“Eberi 25–Meei 1. Te Otinako 24; 31–34: ‘E na Airi Matau ma Ngkoe,’” Nakomai, Iriirai—Ibukin te Reirei n Tabati: Te O Tetemanti 2022 (2021)
“Eberi 25–Meei 1. Otinako 24; 31–34,” Nakomai, Iriirai—Ibukin te Reirei n Tabati:: 2022
Tamnei ni kabwarabwara Iehova ni kaoti nakon Mote ao Itingaun unimwaanen Iteraera, iroun Jerry Harston
Eberi 25–Meei 1
Otinako 24; 31–34
“E na Airi Matau ma Ngkoe”
Kariaia taeka mairoun Unimwane Jeffrey R. Holland bwa e na kaira am katauraoi n angareirei: “Angiia aomata aki roko n taromauri bwa a na tii kakaeai koaua n te euangkerio tabeua aika boou. … A roko ni kakaea te namakin ae a na karekea ni maiun tamneia. … A tangiria bwa aia onimaki e na karakaaki ao aia kantaninga bwa e na kabouaki.” (“A Teacher Come from God,” Ensign, Meei 1998, 26).
Korei Am Namakin
Kaunga te Tibwatibwa
Kain te kiraati a na kona n iangoia bwa raoraoia a kangai, “I aki wareka te O Tetemanti, bwa e aki taraa n irekereke nakon maiu.” Tuangiia bwa a na kaeka man tibwauan te bwai are a kunea bwa e boongana inanona aia kamatebwai ae ngkai n te O Tetemanti.
Reirei te Reirei
Ti karinea te bong ae te Tabati bwa te kanikina n ara motinnano nakon te Uea.
-
Ko kona ni waaki man te titiraki nakoia kain te kiraati ngkana a tia ni kabwarabwara nakoia kain aia utu ke raraoia bukin tera e kaokoro aron aia waaki n te Tabati ma boong ake tabeua. Kaoia bwa a na tibwa te bwai are a taekinna ke are a na taekinna n taai aika a na roko. Warekan Te Otinako 31:12–17 ke te rongorongo inanon “Bwaai ni Ibuobuoki riki Tabeua” e kona n anganiia karakaan aia iango. E kanga ara rinerinie are iaon te Tabati ni kabwarabwara ara motinnano nakon Iesu Kristo?
-
E ngae ngke katuaa ake a kabwarabwaraaki inanon Te Otinako 31:14–15 e aki riki ni boong aikai, a bon kaota aron korakoran ana namakin te Uea ibukin te bong ae te Tabati. Bukin tera e rang kakawaki te tua aei? Maroroakinan kiibu aikai e kona n ibuobuoki: Te Otinako 31:12–17; Itaia 58:13–14; Reirei ao Berita aika a Tabu 59:9-13.
Man karineakin te bong ae te Tabati, ti kaota ara tangira ibukin te Uea.
Te bure bon te rairakinako mairoun te Atua, ma E anga te kawai n oki.
-
Ni buokakiia kain te kiraati n iangoa ao ni katamneia i bon irouna te rongorongo inanon Te Otinako 32, te moanibwai tuangiia bwa a na rinanon te mwakoro i bon irouiia ke inanon te kurubu. Ngkanne tuangiia tabeman kain te kiraati bwa a na karaoa are a karaoia kain Iteraera ake a rikirake n aki taotaonakinnano n tataninga okin Mote ao a baireia bwa a na karaoa te boua ae koora. Tera te namakin are e kona ni kairiia bwa a na taromauriia bouannanti? Kain te kiraati ake tabeman a kona ni kataia n tuangiia bwa a na tiku ni kokoaua nakon te Uea ao Ana burabeti. Kain te kiraati a kona ni marooro iaon te bwai are e kaungaaki bwa a na kawakin aia berita ae tabu. Tera ae ti kona ni karaoia ni buokiia naake a ikakorakora ni kawakinan aia berita ae tabu?
-
Ngkana aomata a warekea te O Tetemanti, a kubanako n tabetai n ana katuua te Uea e karaoi ibukin te bure. Te Otinako 34:1–9 e kona ni buokiia n nooria bwa ngkai te Atua e aki kanakoa te bure, E bon nanoanga naba, n anga kabwaraan aia bure naake a rairi nanoia. Tao a kona kain te kiraati ni wareka te rongorongo aei ao n iangoi titiraki aikai: Tera ae ti reiakinna ibukin te Uea man kiibu aikai? Tera ae ti riai n atai man bwaai aikai ibukina? Ko kona ni kabwarabwara bwa a na Rairairi Iotebwa Timiti, Otinako 34:7 (n Te Otinako 34:7, footnote e) e kamataata bwa te Atua e na bon aki “kanakoia akana a bure.” Tera ae kona n nanonaki n aei? Tao kain te kiraati a kona n tibwa aron are a tia ni kakaoua n ana nanoanga te Atua. E kanga te Atua ni kona n uaia ni nanoanga n ae kororaoi ao n etieti? (taraa Aramwa 42:13–15).
-
Te Otinako 34:6–17 e kona n taraaki bwa te kaetieti ni buokakiia kain Iteraera n rairannano man aia bure n taromaurian boua (kabwarabwaraaki n Te Otinako 32). Tera ae ti kunei inanon kibu aikai ake a kona ni buokiia kain Iteraera bwa a na rairi nanoia? Tera ae ti reiakinna ibukin te Uea ao te rairannano man te kaetieti aei?
Ti kainnanoa te Atua inanon maiura.
-
Kona kanga ni buokiia kain te kiraati ni karaoa are e taekina te Uea nakon Mote inanon Te Otinako 33:11–17? Ko kona ni waaki man rinanoan te mwakuri are e teimatoa te Atua ni kainnanoa iai Mote bwa e na kakoroa bukina (taraa Te Otinako 33:1–3). Tera ae ti karekea inanon kibu 11–17 are e na kakorakora ao ni karaua nanon Mote? Kain te kiraati a kona n iangoa te bwai are e tangiria te Atua bwa a na karaoia—n aron kakoroan bukin te nakoa n te Ekaretia, tibwanga n te utu, ke te tai ni karaoa te mwakuri n ibuobuoki. A kona ngkanne ni manga wareki riki kiibu. Tera iango aika ti karekei iaon aron te Atua are e na kona iai ni boutokaira?
Bwaai n Ibuobuoki Riki Tabeua
Te Tabati bon te kanikina.
Beretitenti Russell M. Nelson e kabwarabwara: “Inanon uarerekeu, I kamatebwaia aia mwakuri tabeman ake a tia ni karaoi rinanin bwaai aika a na karaoi ao bwaai aika ana aki karaoi n te Tabati. E aki maan imwiina ngke I a reiakinna man koroboki aika a tabu are anuau ao aroarou n te bong ae te Tabati e kateitei iaon te kanikina imarenau ao Tamara are i Karawa [taraa Te Otinako 31:13; Etekiera 20:12, 20]. Ma te mataata anne, I aki manga kainnanoa rinanin bwaai ake a na karoaki ao bwaai ake a na aki karaoaki. Ngkana N na karaoa te babaire bwa te mwakuri ni kakukurei e raoiroi ke e aki ibukin te Tabati; I titirakinai, ‘Tera te kanikina ae i tangiria bwa N na angan te Atua?’ Te titiraki anne ae e karika au rinerine iaon te Taabati ae e nang oota raoi” (“Te Taabati bon te Kakukurei,” Riaona, Meei 2015, 130).
Kanakoraoan Ara Anga reirei
Reirei ma te Tamnei. “Te moan bwai n te kantaninga ni kabane n are e karaoia te tia reirei n te euangkerio—titiraki ni kabane, koroboki aika tabu ni kabane, taian waaki ni kakukurei—bon kaoan te Tamnei bwa e na karikirakea te onimaki ao ni kaoiia aomata nako bwa a na nakon Kristo” (Teaching in the Savior’s Way, 10).