“Meei 9–15. Warekaia Iteraera 11–14; 20–24: ‘Kam na Tai Rawa Nakon Iehova, ao Tai Makuia,’” Nakomai, Iriirai—Ibukin te Reirei n Tabati: O Tetemanti 2022 (2021)
“Meei 9–15. Warekaia Iteraera 11–14; 20–24,” Nakomai, Iriirai—Ibukin te Reirei n Tabati: 2022
Meei 9–15
Warekaia Iteraera 11–14; 20–24
“Kam na Tai Rawa Nakon Iehova, ao Tai Makuia ”
Teuana te kabanea n tamaroa ni kawai n ataa te bwai ae ko na kabanea am tai iaona n tain te kiraati bon titirakinaia kain te kiraati te bwai ae a kunea ae uaana ngkai a kamatebwaia booki aika tabu. E na kaota aei te bwai ae kakawaki nakoia ao te bwai ae a tauraoi n reiakinna.
Korei Am Namakin
Kaunga te Tibwatibwa
N tabetai bwaai ake a kainnanoaki ni kaungaiia kain te kiraati bwa a na tibwauai aia namakin man aia kamatebwai bon man titirakinaia titiraki aika bebete n aron “Tera ae reireiniko te Tamnei ae Raoiroi ngkai ko wareki booki aika tabu n te wiiki aei?” Ngkanne anganiia aia tai bwa a na iangoia raoi ao ni kaeka.
Reirei te Reirei
Te taetae ni kabuakakaia ana burabeti te Ueae na kauna te Uea.
-
Warekan Warekaia Iteraera 12 e kona ni buokiia kain te kiraati bwa a na ata kangaangan te taetae ni kaitaraa ana burabeti te Uea. Ko kona ni kaoiia kain te kiraati bwa a na wareka te kibu aei ao n taetae iaon aron ana namakin te Uea iaoia Ana toro. Ni boboto iaon kiibu 1–2, tera n am iango ae nanonaki n te taetae ni kaitaraa ana burabeti te Uea? Tera kabuanibwai man karaoana? Tera ae ti kona n reiakinna man ana mwakuri Mote ao kain Iteraera inanon kiibu 13 ao 15?
“Mote e rangi n nimamannei.”
-
Tabeman aomata ana bae ni miimi ni warekia bwa te tia kairiiri ae rangi n nimamannei n aron Mote, are e tei imatan Bwarao ao ni kaoti kakai aika rangi n raraoi ma mwakan te Uea, e bon rang naba “n ni mamanei.” Ko kona ni kabongana Warekaia Iteraera 12:3 ni moana te marooro iaon taekan te nimamannei ni koaua. Ko kona n nakon te kabwarabwara inanon “Meek, Meekness” inanon te Kairi nakon Koroboki aika Tabu (scriptures.ChurchofJesusChrist.org). Ma kain te kiraati, kam kona naba n tarai kanikinaa n nimamannein Mote inanon Warekaia Iteraera 12.
-
Tera riki kakoauan ana nimamannei Mote ae ti kona n reirei mai iai? (taraa, ibukin te katooto, Te Otinako 18:13–25; Warekaia Iteraera 11:26–29; Ebera 11:24–27; Mote 1:10–11). Kam kona naba ni wareka ao ni maroroakina aron te Tia Kamaiu ni kaota aron te nimamannei (taraa Mataio 11:29; 27:11–14; Ruka 22:41–42; Ioane 13:4–5). E kanga ana banna ni katooto Mote ao te Tia Kamaiu—ke aomata aika ti kinaia—n reireiniira taekan te nimamannei? Bukin tera e tangiria te Atua bwa ti na bwaina te nimamannei?
Ma te onimaki iroun te Uea, ti kona ni karekea te kantaninga ibukin te tai ae na roko.
-
Ngkana ko maroroakina karakinaia kain Iteraera aika 12 mwaitiia ni ukoukora te tabo ae a na karekei iai rongorongo man te aba ni berita ao n anga aia ribooti, iangoia n titirakiniia kain te kiraati aron aia namakin n te karaki aei ae kona ni kaineti nakon taian kangaanga aika a rinanona. N ibuobuoki, ko kona ni kaoia kain te kiraati bwa a na koroi bwaai man Warekaia Iteraera 13:23–33 are e kona ni kabotauaki ma te bwai inanon maiura. Te katooto, te aba ni berita e kona n tei ibukin te bwai teuana ae e tangiria te Uea bwa ti na kakoroa bukina, boota ni kurebe a kona n tei ibukin kakabwaia, te aintoa e kona n tei ibukin kakaewenako aika ti rinanoi, ao a mwaiti riki. Kaungaiia kain te kiraati bwa a na tibwaua te bwai ae a namakinna ae na tangiria te Uea bwa a na reiakinna man te karaki.
Tengaun ana tibwaai Iteraera a maaku, Iotua ao Karebwa iai aia onimaki. © Lifeway Collection/licensed from goodsalt.com
Ngkana ti taraa Iesu Kristo n te onimaki, E kona ni kamaiura n te tamnei.
-
Ni buokia kain te kiraati ni maroroakina te rongorongo inanon Warekaia Iteraera 21:4–9 ao ni karikirakea aia onimaki iroun te Tia Kamaiu, ko kona ni koroi titiraki n aron aikai iaon te burakibooti: Tera ae tei ibukina te naeta ae te buraati? Tera ae tei ibukin ana tena te naeta? Bukin tera tabeman aomata aki tangiria n tarai bwaatua buraati? Ti na kanga ni kona n “taraia” n te bong aei? A kona kain te kiraati n tibwauai kaeka aika kunei n aia tai ni wareka Warekaia Iteraera 21:4–9; 1 Nibwaai 17:40–41; Aramwa 33:18–22; ao Ereman 8:13–15. Tera bwaai tabeua aika a bebete are kaoiira te Tia Kamaiu bwa ti na karaoi bwa ti aonga ni karekea Ana kamaiu? Bukin tera n tabetai e kangaanga karaoan bwaai aikana a bebete aikanne? (taraa “Bwaai n Ibuobuoki Riki Tabeua” ibukin iango tabeua n te bwai aei). Tao a na konaa kain te kiraati n tibwauaia bwa e kanga karaoan bwaai aikai n tia ni karekea mwaakan te Tia Kamaiu nakon maiuia.
Bwaai n Ibuobuoki Riki Tabeua
“Bwaai aika uarereke man aki kaangaanga.”
Unimwaane L. Whitney Clayton e tuanga te bitiobi are e buokiia kain te uoote aika a kaitara ma kakaewenako aika kakaokoro ni maiuia:
“Ana reirei nakoia kain te uoote e raonaki n taainako ma te okirikaaki nakon kamwakuran te onimaki, n aron kamatebwaiaan Ana Boki Moomon[,] … kabwakaan te kabwianibwai, ao te beku n te Ekaretia ma te nano ni koaua. N aron tein aia kaeka nakoina e bon kananououa: ‘… Tera rekereken aei ma baike ma te kangaanga ae I kaitara ma ngaia?’
“… Naake a korakora nanoia ni kan karaoi bwaai aika a ‘uarereke man bebete’ [Aramwa 37:6]—karinean karaoan mwakuri aika uarereke—a kakabwaiakaki ma te onimaki ao te korakora are e riaon aron raoi mwakurin te ongotaeka ao, ni koauana, a taraa n ae akea rekerekeia nakoia” (“Whatsoever He Saith unto You, Do It,” Riaona, Meei 2017, 98).
Kanakoraoan Ara Anga reirei
Kabanea am iango iaon te bwai ae rang kakawaki. E aki kangaanga karaoan nanon karaki ke reirei ni kabane. Ira te Tamnei, ao iangoi kainnanoia kain te kiraati ngkai ko baireia bwa ko na kanga ni kabongana n tain te kiraati. Uringnga bwa te mweenga, tiaki te kiratiruum, bon te tienta ibukin reiakinan te euangkerio.