Feituʻu Te ke ʻAlu Ki Aí, fai ʻe Sandy Freckleton Gagon

6–12 Sune

Lute; 1 Samuela 1–3

“‘Oku Fiefia Hoku Lotó [ʻi he ʻEikí]”

‘Oku mahuʻinga ke mateuteu ke faiako, ka ke fakapapauʻi ‘oku kau ʻi ho‘o palaní hano ʻoange ki he kau mēmipa ʻo e kalasí ha faingamālie ke nau vahevahe ai ʻa e meʻa kuo nau akó.

Lekooti e Ngaahi Ongo ʻOkú ke Maʻú

Fakaafeʻi e Feʻinasiʻakí

Te ke lava ʻo fakaafeʻi kinautolu ke nau hiki ʻi he palakipoé ha foʻi lea pe kupuʻi lea mei he Lute 1–4 pe 1 Samuela 1–3 naʻá ne ueʻi kinautolu he lolotonga ʻo ʻenau ako fakafoʻituituí pe fakafāmili ʻi he uike ní. Lau le‘olahi ha ni‘ihi, mo kole ki he kau mēmipa ʻo e kalasí ke nau fakamatalaʻi e founga ʻoku ueʻi fakalaumālie ai kinautolu ʻe he ngaahi foʻi lea mo e kupuʻi lea ko ʻení.

Akoʻi e Tokāteliné

Lute; 1 Samuela 1–2

‘E lava ke liliu ʻe Kalaisi ‘a e meʻa fakamamahí ko ha ikuna.

• Neongo ʻe ala maʻu ʻe he kau mēmipa hoʻo kalasí ha ngaahi faingataʻa fakafoʻituitui ʻoku kehe meia Lute mo ʻAna, ka te nau lava ʻo ako mei he ngaahi founga ne tali ʻaki ʻe he ongo fafine faivelengá ni ʻa e molé mo e loto mamahí. Ke tokoni ke nau fakahoko ʻeni, te ke lava ʻo vahevahe ʻa e kalasí ki ha fanga kiʻi kulupu pea fakaafeʻi ʻa e fanga kiʻi kulupú takitaha ke nau lau ha vahe mei he Lute 1–4 pe 1 Samuela 1. Te ke lava ʻo hiki ha ngaahi fehuʻi ʻi he palakipoé hangē ko ʻení: Ko e hā e ngaahi faingataʻa naʻe fehangahangai mo Lute pea mo ʻAná? Na‘á na fakahaaʻi fēfē ʻena falala ki he ‘Eikí ʻi he lolotonga hona ngaahi faingataʻá? ʻE lava ke kumi ʻe he ngaahi kulupú ha ngaahi tali ki ha fehuʻi ʻe taha pe toe lahi ange pea vahevahe ʻa e meʻa ne nau maʻú. Ko e hā ʻoku tau ako mei he ngaahi fakamatalá ni fekauʻaki mo e founga ʻe tokoniʻi ai kitautolu ʻe he ʻEikí ʻi hotau ngaahi faingataʻá?

  

  Naʻá ku Lotua ʻa e Tama ko ʻEní, tā ‘e Elspeth Young

• ʻOku ʻikai maʻu ʻe he taha kotoa ʻokú ne lotua ha tamá ha taha, pea ʻoku ʻikai toe mali ʻa e taha kotoa pē kuo pekia hano malí. Ka ko hotau ngaahi pole fakafoʻituituí, tatau ai pē pe ko e hā, ʻe lava ke hoko ia ko ha ngaahi faingamālie ke tau tafoki ai ki he Fakamoʻuí pea mo fakamālohia ʻetau tui kiate Iá. Te ke ala kole ki he kau mēmipa ʻo e kalasí ke nau lau ʻa e Lute 2:11–12 mo e 1 Samuela 1:9–11 pea talanoa fekauʻaki mo e founga hono faitokonia ʻe he ngaahi faingataʻa ʻa Lute mo ʻAná ʻa hona vā mo e ʻEikí. ʻE toe lava foki ʻa e kau mēmipa ʻo e kalasí ke vahevahe ha founga ne fakamālohia ai ʻenau tuí koeʻuhí ko haʻanau tafoki kia Sīsū Kalaisi ʻi he taimi ʻo e faingataʻá.

  Te ke lava ʻo fakaafeʻi ha toko taha pe toe tokolahi ange ʻo e kau mēmipa e kalasí ke haʻu mateuteu ke vahevahe ha ngaahi ʻilo mei ha taha ʻo e ngaahi meʻa ko ʻení: Pōpoaki ʻa Sisitā Leina E. ʻAputo “[Lolotonga e Ngaahi Faingataʻá, ʻEiki Ta Feʻao Pē]!” (Liahona, Nōvema 2019, 57–60); konga ʻoku ui ko e “Ko e Fiefia ʻi he Ikuna ʻia Kalaisí” mei he pōpoaki ʻa ʻEletā D. Toti Kulisitofasoni “Ko e Fiefia ‘a e Kau Māʻoniʻoní” (Liahona, Nōvema 2019, 16–17); pe ko e ngaahi lea ʻa Palesiteni ʻIleini S. Tolotoní ʻi he “Ngaahi Maʻu‘anga Tokoni Kehé.” Kole ki he kau mēmipa ‘o e kalasí ke nau vahevahe ʻa e meʻa kuo nau ako fekauʻaki mo e founga ʻe lava ai hotau ngaahi faingataʻá ʻo hoko ko ha ngaahi faingamālie ki ha tui lahi ange kia Sīsū Kalaisi.

1 Samuela 2:18–36; 3

‘Oku totonu ke tau fakafanongo mo talangofua ki he leʻo ‘o e ʻEikí.

• Mahalo ʻe ʻi ai ha kakai ʻi hoʻo kalasí, ʻoku hangē ko Samuelá, kuo nau ʻosi ongona e leʻo ʻo e ʻEikí ka naʻe ʻikai ke nau fakatokangaʻi ko Hono leʻó ia. Te ke ala fakaafe‘i ʻa e kau mēmipa ‘o e kalasí ke nau vakaiʻi ‘a e 1 Samuela 3, ʻo kumi ʻa e meʻa naʻe fakahoko ʻe Samuela ʻe lava ke tokoni mai kiate kitautolu ʻi heʻetau feinga ke fanongo mo talangofua ki he leʻo ʻo e ʻEikí. Te ke toe lava foki ʻo kole ki ha mēmipa ʻe toko ua ʻo e kalasí ke na fakatātaaʻi ʻa e talanoa ʻa Samuela mo ʻĪlaí.

• Ko e taimi ʻe niʻihi ʻoku tau fakatokangaʻi ai ʻoku tau ʻi ha tuʻunga tatau mo ʻĪlaí—ʻoku tau maʻu ha faingamālie ke tokoni ki ha taha ke ne fakatokangaʻi e leʻo ʻo e ʻEikí. Mahalo naʻa lava ke vahevahe ʻe he kau mēmipa ʻo e kalasí ha founga kuo nau fakahoko ai ʻeni ki ha ngaahi kaungāmeʻa, kau mēmipa ʻo e fāmilí, pe ha niʻihi kehe. Ko e hā ha ngaahi potufolofola pe ngaahi a‘usia kuo tau vahevahe ke tokoni ke mahino ki he niʻihi kehé ʻa e founga ʻo e fetuʻutaki ʻa e ʻEikí mo kitautolú? (hangē ko ʻení, vakai, Tokāteline mo e Ngaahi Fuakava 6:22–23; 8:2–3; 9:7–9).

Ngaahi Maʻuʻanga Tokoni Kehe

ʻOku ʻikai ke tau teitei tuēnoa.

Na‘e akoʻi ‘e Palesiteni ʻIleini S. Tolotoni:

“ʻOku faʻa ʻave kitautolu, he taimi ʻe niʻihi, ʻe he fononga ʻo e moʻuí ʻi ha ngaahi hala ta‘eʻamanekina. ʻOku ʻi ai ha ngaahi vilo mo ha ngaahi afe ʻi he halá he ʻikai lava ʻo fakakaukau ki ai ha taha. Ka ʻi he ngaahi vilo mo e ngaahi afe takitaha ko ʻení, ʻoku ʻi ai mo ha faingamālie—ha faingamālie ke fili ʻa e anga ‘o ʻetau talí mo ‘etau palani ngāué. ‘E lava ke hoko ʻa e ngaahi faingataʻa ʻi he moʻuí ko ha ngaahi faingamālie ke tokoni ʻo tohoakiʻi atu kitautolu ke ofi ange ki he Fakamoʻuí pea mo falala kakato ange kiate Ia. Ko e nofo ofi kiate Ia ʻi he ʻaho kotoa peé, ʻoku tau fakatupulaki ai ha ngaahi ʻulungaanga faka-Kalisi pea mo ha ngaahi ‘ulungaanga lelei. …

“Te tau foua kotoa ʻa e faingataʻá, ʻo tatau mo Lute pea mo ʻAná. He ʻikai mahino maʻu pē kiate kitautolu e palani ʻa e ʻEikí ki heʻetau moʻuí, ka ʻoku ou fakamoʻoni atu ʻoku ʻikai ke tau teitei tuēnoa. ‘Oku ne ʻiate kitautolu ma‘u ai pē, pea ʻoku Ne tala‘ofa mai, ʻʻOku ʻikai te mou lava ʻo mamata ʻaki homou mata fakanatulá, ʻi he taimí ni, ki he finangalo ʻo homou ʻOtuá ʻo kau ki he ngaahi meʻa ko ia ʻe hoko mai ʻamuí, pea mo e nāunau ʻe hoko mai hili ʻa e faingataʻa lahí’ [Tokāteline mo e Ngaahi Fuakava 58:3]” (“Lessons from Ruth and Hannah,” Ensign, Apr. 2006, 35, 37).

Vakai foki, Sione 14:18; ʻAlamā 38:5.

Fakatupulaki ʻo ʻEtau Founga Akoʻí

ʻOku sai pē ke te pehē “ʻOku ʻikai ke u ʻilo.” Neongo ‘oku totonu ke ke fai hoʻo lelei tahá ke tali ha ngaahi fehuʻi ʻa e kau mēmipa hoʻo kalasí, ka ʻoku ʻikai fie maʻu ʻe he ʻEikí ia ke ke ʻilo ʻa e meʻa kotoa pē. Ko ha taimi pē ʻoku ʻikai ke ke ʻilo ai ha founga ke tali ʻaki ha meʻa, talaange pē pea fai haʻo fakamoʻoni fakamātoato ki he meʻa ʻokú ke ʻiloʻí. (Vakai, 1 Nīfai 11:16–17; Ko e Faiako ‘i he Founga ʻa e Fakamoʻuí, 24.)