“20–26 Sune. 2 Samuela 5–7; 11–12; 1 Ngaahi Tu‘i 3; 8; 11: ʻ[Ko] Ho Puleʻangá ʻe Fokotuʻu ia … ʻo Taʻengata,’” Ha‘u, ʻo Muimui ‘Iate Au—Maʻá e Lautohi Faka-Sāpaté: Fuakava Motu‘a 2022 (2021)
“20–26 Sune. 2 Samuela 5–7; 11–12; 1 Ngaahi Tu‘i 3; 8; 11,” Haʻu, ‘o Muimui ʻIate Au—Ma‘á e Lautohi Faka-Sāpaté: 2022
Hilifaki Kalauni ʻo e Tuʻi ko Tēvitá, tā ʻe Jerry Miles Harston
20–26 Sune
2 Samuela 5–7; 11–12; 1 Ngaahi Tu‘i 3; 8; 11
“[Ko] Ho Puleʻangá ʻe Fokotuʻu ia … ʻo Taʻengata”
ʻI hoʻo ako ko ia ʻa e folofolá, fekumi ʻi he faʻa lotu ke ke ʻilo pe ko e fē ʻa e tefitoʻi moʻoni ʻe mahuʻinga taha ki he kau mēmipa hoʻo kalasí, ka ke lava ʻo nofotaha ki heʻenau ngaahi fiemaʻú.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
Koeʻuhí ke ʻilo e meʻa naʻe maʻu ʻe he kau mēmipa ʻo e kalasí ʻoku mahuʻinga ʻi heʻenau ako folofolá, te ke lava ʻo kole ke nau hiki ʻa e ngaahi fakamoʻoni fakafolofola ki ha fakamatala naʻá ne ueʻi kinautolu, ʻi ha fanga kiʻi laʻipepa pea faʻo ia ʻi ha faʻoʻanga meʻa. Hili ia, pea ʻe lava leva ʻe he kau mēmipa ʻo e kalasí ʻo fili ha fanga kiʻi laʻipepa mei he faʻoʻanga meʻá, pea lau leva ʻe he kalasí mo aleaʻi ʻa e ngaahi potufolofolá.
Akoʻi e Tokāteliné
Kuo pau ke tau fakahoko e ngāue ʻa e ‘Otuá ʻi Heʻene foungá.
-
Te ke ala kole ki he kau mēmipa ʻo e kalasí ke nau lau ʻa e 2 Samuela 6:1–8 pea fakakaukauʻi pe ko e hā e ngaahi fakatokanga ʻi he talanoá ni maʻatautolu he ʻahó ni. ʻE lava ʻo tokoni e fakamatala ne fai ʻe Pilikihami ʻIongi ʻi he “Ngaahi Ma‘uʻanga Tokoni Kehé.” Ko e hā ha ngaahi founga te tau ala ʻahiʻahiʻi ke fakahoko e ngāue ʻa e ʻOtuá ʻoku kehe mei he meʻa naʻá Ne tuʻutuʻuní? Ko e hā ʻoku fakatuʻutāmaki ai ʻení? Mahalo naʻa lava ke vahevahe ʻe he kau mēmipa ʻo e kalasí ha ngaahi aʻusia ne nau ako ai ke falala ki he fakahinohino ʻoku fai ʻe he ʻEikí ki hono fakahoko ʻEne ngāué.
‘Oku totonu ke tau tokanga maʻu pē telia ʻa e faiangahalá.
-
ʻE lava ʻo tokoni mai hano ako e ngaahi fili fakamamahi ʻa Tēvita ʻoku lekooti ʻi he 2 Samuela 11 ke tau fakaʻehiʻehi ai mei ha ngaahi fehalaaki tatau mo ia. Mahalo ʻe lava ke lau fakataha ʻe he kalasí ʻa e 2 Samuela 11:1–17 pea ʻiloʻi e ngaahi fili naʻe fai ʻe Tēvita naʻe iku ai ke ne faiangahalá. Ko e hā naʻe mei kehe hano fakahoko ʻe Tēvitá? Te ke lava foki ʻo kole ki he kau mēmipa ʻo e kalasí ke nau hiki ha sētesi ʻe tokoni ke ueʻi fakalaumālie ha taha ke fakaʻehiʻehi mei he angahalá, ʻo fakatatau mo e meʻa ne nau ʻilo mei he 2 Samuela 11. Fakaafeʻi ha kau mēmipa ʻe niʻihi ʻo e kalasí ke nau vahevahe ʻa ʻenau ngaahi fakakaukaú.
-
Te ke ala faka‘aongaʻi ‘a e 2 Samuela 11 ke fakamatalaʻi ʻa e fakatuʻutāmaki ‘o e ponokalafí mo e ngaahi angahala fakasekisuale kehé. Ke fai ‘eni, ʻe lava ke vakaiʻi fakataha ʻe he kalasí ʻa e ngaahi konga ʻo e pōpoaki ʻa ʻEletā L. Uitenī Keleitoní ʻi he “Blessed Are All the Pure in Heart” (Liahona, Nov. 2007, 51–53). Ko e hā ha faleʻi ʻoku fai ʻe ʻEletā Keleitoni fekauʻaki mo e ngaahi fakatuʻutāmaki ʻo e ponokalafí? Te mou toe lava foki ʻo mamata ʻi he foʻi vitiō “Ke Sio Ki Ai” (ChurchofJesusChrist.org). ‘E tokoniʻi fēfē kitautolu ʻe he Fakamoʻuí ke tau ikunaʻi ʻa e ngaahi fakatauele pe ngaahi tōʻonga ko ʻení?
Mahalo naʻa lava ke vahevahe ʻe he kau mēmipa ʻo e kalasí ha ngaahi fakakaukau kuo nau pehē ʻoku ʻaonga ʻi heʻenau feinga ke maluʻi honau ngaahi fāmilí mei he ponokalafí pe ikunaʻi ʻa e ngaahi nunuʻa ʻo e ponokalafí. ʻE lava ke tokoni e pōpoaki ʻa Sisitā Linitā S. Līví “Maluʻi mei he Ponokalafí—ko ha ʻApi ʻOku Fakatefito ʻia Kalaisi” (Liahona, Mē 2014, 15–17; vakai foki, “Ngaahi Maʻu‘anga Tokoni Kehé”).
Ko e temipalé ko e fale ia ʻo e ʻEikí.
‘Oku ʻomi ‘e he ngaahi temipalé ʻa e ngaahi tāpuakí.
-
‘Oku fakamatalaʻi ‘e he 1 Ngaahi Tuʻi 8 ʻa e ngaahi tāpuaki naʻe kumi ʻe Solomone maʻa hono kakaí ʻi he ʻosi ʻa e temipalé. Te ke ala vahevahe ʻa e veesi 22–61 ki he kau mēmipa ʻo e kalasí pea kole ange ke nau vahevahe ha meʻa ʻoku nau maʻu ʻi he ngaahi vēsí ni ʻokú ne ueʻi fakalaumālie kinautolu ʻi heʻenau moihū ʻi he temipalé. ʻE lava ke vahevahe ʻe he kau mēmipa ʻo e kalasí ʻa e founga ʻoku tāpuakiʻi ai ʻenau moʻuí ʻi he moihū he fale ʻo e ʻEikí.
“Na‘e ʻikai haohaoa hono lotó ʻi he ʻao ʻo [e ʻEikí].”
-
ʻOku ʻuhinga ki he hā ke “haohaoa [hotau] lotó ʻi he ʻao ʻo [e ‘Eikí]”? (1 Ngaahi Tuʻi 8:61). ‘Oku kehe nai ia mei he haohaoa ʻo ʻetau ngaahi tōʻongá? ʻO fēfē? Lolotonga e fakalaulauloto ʻa e kau mēmipa ʻo e kalasí ki he ngaahi fehuʻi ko ʻení, ʻe lava ke nau lau e 1 Ngaahi Tu‘i 11:1–11 mo fakatokangaʻi e meʻa naʻe folofola ʻaki ʻe he ʻEikí kau ki he loto ʻo Solomoné. Te tau lava fēfē ʻo hao mei he ngaahi fehalaaki naʻá ne fakahokó?
Ngaahi Maʻuʻanga Tokoni Kehe
Ko hono taʻofi ʻa e ngaueue ʻa e puha tapú.
Na‘e akoʻi ‘e Palesiteni Pilikihami ʻIongi: “Tuku noaʻi pē ʻa e Puleʻangá, ko e ʻEikí ʻokú ne pukepuke ʻa e puha tapú; pea kapau ʻe sēlue, mo ngali ʻoku fie maʻu ke fokotuʻu maʻu, kapau ʻoku kiʻi tokakovi ʻa e halá he taimi ʻe niʻihi, tokanga ʻi he founga ʻokú ke fakamafao atu ai ho nimá ke pukepuké; ʻoua te tau fuʻu kaunoa ʻi he ngaahi meʻa ʻoku ʻikai ke fekauʻaki mo kitautolú; tuku noaʻi, ko e ngāue ia ʻa e ʻEikí” (Discourses of Brigham Young, sel. John A. Widtsoe [1954], 66).
Ko hono maluʻi ʻo e fāmilí mei he ponokalafí.
Na‘e akoʻi ‘e Sisitā Linitā S. Liivi: “Te tau maluʻi fēfē ʻetau fānaú mo e toʻu tupú? Ko ha meʻangāue ʻaonga ʻa e meʻa sivi ʻo e ʻinitanetí, ka ko e meʻa sivi lelei taha he māmaní, pea ko e meʻa pē ia ʻe taha ʻe ngāué, ko e meʻa sivi fakatāutaha ʻoku maʻu mei ha fakamoʻoni loloto mo tuʻuloa ki he ʻofa ʻa ʻetau Tamai Hēvaní mo e feilaulau huhuʻi ʻa hotau Fakamoʻuí maʻatautolú” (“Malu‘i mei he Ponokalafí—ko ha ʻApi ʻOku Fakatefito ʻia Kalaisi,” Liahona, Mē 2014, 16; vakai foki, Joy D. Jones, “Fefaʻuhi mo e Ponokalafí: Maluʻi, Tali, & Fakamoʻui,” Liahona, ʻOkatopa 2019, 22–27).
Fakatupulaki ʻEtau Founga Akoʻí
Fakapapauʻi ʻokú ke akoʻi ʻa e tokāteline moʻoní. “Toutou fehuʻi loto pē, ‘ʻE tokoni fēfē ʻa e meʻa ʻoku ou akoʻí ki he kau mēmipa ʻo ʻeku kalasí ke nau langaki ha tui kia Kalaisi, fakatomala, fakahoko mo tauhi e ngaahi fuakava mo e ʻOtuá, mo maʻu ʻa e Laumālie Māʻoniʻoní?’” (Ko e Faiako ʻi he Founga ʻa e Fakamoʻuí, 20).