¶ 1 BEA nae alu hake ai a Naasi koe tagata Amoni, bea ne teu tau ki Jebesi‐kiliati: bea behe e he kau tagata kotoabe o Jebesi‐kiliati, Fai hoo fuakava mo kimautolu, bea te mau tauhi kiate koe.

2 Bea behe e Naasi koe tagata Amoni kiate kinautolu, I he mea ni be teu fai ae fuakava mo kimoutolu, koeuhi keu kabe‘i ho mou mata toomatau kotoabe e tuku ia koe mea manuki ki Isileli kotoabe.

3 Bea nae behe e he kau mātua o Jebesi kiate ia, Ke ke kataki akimautolu i he aho e fitu, koeuhi ke mau fekau e mau talafekau ki he gaahi botu kotoabe o Isileli, bea behe, kabau oku ikai ha tagata ke fakamoui akimautolu, te mau alu atu kiate koe.

¶ 4 Bea nae hoko ae kau talafekau ki Kibea o Saula, bea fakaha ae ogoogo ki he teliga oe kakai: bea nae hiki ho nau le‘o e he kakai kotoabe o tagi.

5 Bea vakai, nae muimui mai a Saula ki he faga manu, mei be goue; bea nae behe e Saula, Koeha oku tagi ai ae kakai? Bea naa nau fakaha kiate ia ae ogoogo oe kau tagata o Jebesi.

6 Bea nae hoko ae Laumalie oe Otua kia Saula i he ene ogo‘i ae gaahi ogoogo ni, bea tubu ai ene ita o lahi.

7 Bea naa ne omi ae faga bulu e ua, bea tuutuu ke iki, bea fekau ke ave o tufaki ki he gaahi botu kakai kotoabe o Isileli i he nima oe kau tagata fekau, o behe, Koia kotoabe oku ikai ha‘u o muimui ia Saula mo Samuela, e fai behe be ki he ene faga bulu. Bea nae to ki he kakai ae manavahe kia Jihova, bea naa nau hiki loto taha be kituaa.

8 Bea i he ene lau akinautolu i Biseki, nae toko tolu kilu ae fānau a Isileli, bea toko tolu mano ae fānau a Juta.

9 Bea naa nau behe ki he kau talafekau nae ha‘u, Ke mou lea behe ki he kau tagata o Jebesi‐kiliati, Koe abogibogi, o feouga moe mafana oe laa, te mou ma‘u ae tokoni. Bea nae ha‘u ae kau tagata fekau o fakaha ia ki he kau tagata o Jebesi: bea naa nau fiefia ai.

10 Koia nae tala ai e he kau tagata o Jebesi, Te mau alu atu kiate kimoutolu abogibogi, bea te mou fai kiate kimautolu aia kotoabe oku matalelei kiate kimoutolu.

11 Bea hoko ki he abogibogi, bea behe, nae fokotuu vahe tolu e Saula ae kakai; bea naa nau hoko ki he lotolotoga oe tau i he lakaga leo bogibogi, o ta‘i ae kakai Amoni o a‘u ki he bubuha oe aho: bea nae hoko o behe, nae fakamovetevete akinautolu nae toe, nae ikai tuu fakataha ha toko ua.

¶ 12 Bea nae behe e he kakai kia Samuela, Kohai ia nae behe, E bule koa a Saula kiate kimautolu? omi ae kau tagata, koeuhi ke mau tamate‘i akinautolu.

13 Bea nae behe e Saula, E ikai ha tagata e toko taha e tamate‘i he aho ni: he kuo fai ae fakamoui e Jihova i Isileli he aho ni.

14 Bea nae behe e Samuela ki he kakai, Ha‘u ke tau o ki Kilikali, o fakamau ke mau ae buleaga i ai.

15 Bea nae alu ae kakai kotoabe ki Kilikali; bea naa nau fakanofo i ai a Saula ke tu‘i i he ao o Jihova i Kilikali; bea naa nau atu i ai ae gaahi feilaulau koe feilaulau fakalelei i he ao o Jihova; bea nae fiefia lahi i ai a Saula moe kau tagata kotoabe o Isileli.