¶ 1 BEA nae bekia a Samuela; bea nae katoa fakataha ai ae kakai Isileli kotoabe, o nau tegihia ia, bea nae tanu ia i hono fale i Lama. Bea nae hiki a Tevita o alu hifo ki he toafa o Balani.

2 Bea nae ai ae tagata i Maoni, ka nae i Kameli a hono tofia; bea koe tagata lahi ia, bea nae tolu afe ene faga sibi, bea moe koji e taha afe: bea nae koji eia a ene faga sibi i Kameli.

3 Bea ko hono higoa oe tagata ko Nabale; bea koe higoa o hono unoho ko Abikale: bea koe fefine loto fakabotoboto, mo mata hoihoifua ia: ka nae agakovi ae tagata, bea kovi i he ene faiaga; bea nae oe fale o Kelebi ia.

¶ 4 Bea nae fanogo a Tevita i he toafa oku fai ene koji sibi e Nabale.

5 Bea nae fekau e Tevita ae kau talavou e toko hogofulu, o ne behe ki he kau talavou, Mou alu hake ki Kameli, bea alu kia Nabale, o lea ofa kiate ia i hoku higoa:

6 Bea mou lea behe kiate ia oku moui monuia, Ke iate koe ae fiemalie, ke i ho fale ae fiemalie, bea ke i he mea kotoabe oku ke ma‘u ae fiemalie,

7 Bea koeni, kuou fanogo, oku ke ma‘u ae kau koji sibi: bea koeni nae iate kimautolu a hoo kau tauhi sibi, nae ikai te mau fai ha mea kovi kiate kinautolu, bea nae ikai ha mea nae mole iate kinautolu, i he gaahi aho kotoabe oe mau nofo i Kameli.

8 Ke ke fehui ki hoo kau talavou, bea te nau fakaha kiate koe. Koia, tuku ke ma‘u e he kau talavou ae ofa i ho ao: he oku mau hoko i he aho lelei: Oku ou kole kiate koe, foaki mai aia kotoabe oku faa omi e ho nima ki hoo kau tamaioeiki, bea ki ho foha ko Tevita.

9 Bea i he hoko atu ae kau talavou a Tevita, naa nau lea kia Nabale i he higoa o Tevita o fakatatau ki he gaahi lea ni kotoabe, bea gata.

¶ 10 Bea nae lea a Nabale ki he kau tamaioeiki a Tevita, o ne behe, Kohai a Tevita? bea kohai ae foha o Jese? Oku ai ae kau tamaioeiki toko lahi i he gaahi aho ni oku motuhi mo hola taki taha mei he ene eiki.

11 Bea e behe koa a eku too eku ma mo eku vai, mo eku faga manu kuo tamate‘i ma a eku kau koji sibi, bea foaki ia ki he kau tagata aia oku ikai teu ilo be oku meife akinautolu?

12 Koia nae tafoki ai ae kau talavou a Tevita o toe alu i ho nau hala, o hoko o fakaha kiate ia ae gaahi tala ni kotoabe.

13 Bea nae behe e Tevita ki hono kau tagata, Mou nonoo taki taha ae tagata ene heleta. Bea naa nau nonoo taki taha ae tagata ene heleta: bea nae nonoo foki mo Tevita ene heleta: bea naa nau alu hake o muimui ia Tevita, koe kau tagata e toko fageau; bea nae nofo ae toko uageau moe nau gaotoota.

¶ 14 Ka nae tala kia Abikale koe unoho o Nabale e he talavou e taha, o behe, Vakai, nae fekau e Tevita ae kau talavou mei he toafa moe lea ofa ki ho mau eiki; ka naa ne taukae akinautolu.

15 Ka nae fai agalelei lahi ae kau tagata kiate kimautolu, bea nae ikai ha mau lavea iate kinautolu, bea nae ikai haa mau mea e mole i he e mau nonofo mo kinautolu, i he e mau i he gaahi vao:

16 Koe a akinautolu kiate kimautolu i he bo moe aho, i he kuoga kotoabe naa mau iate kinautolu i he tauhi ae faga sibi.

17 Bea koeni, ke ke ilo, bea fifili be koeha ia te ke fai; he kuo tuutuuni ae kovi ki ho tau eiki, bea ki hono fale kotoabe: he oku behe fau a ene agakovi, oku ikai faa lea ha tagata kiate ia.

18 Koia nae fai fakatootoo ai e Abikale, o ne too ae ma kotoa e uageau, moe hina uaine e ua, moe sibi e nima kuo gaohi, moe fua uite tunu e nima, moe fuhi kalebi e teau, moe ma fiki e uageau, bea naa ne fakaheka ia ki he faga asi.

19 Bea behe eia ki he ene kau tamaioeiki, Mou alu o muomua iate au: vakai teu muimui atu. Ka nae ikai te ne tala ki hono unoho ko Nabale.

20 Bea nae behe, i he ene heka i he asi, bea hoko atu ia ki he malumalu oe mouga, vakai, ko Tevita mo hono kau tagata oku alu hifo fakahagatonu mai kiate ia; bea nae fakafetaulaki atu ia kiate kinautolu.

21 Ka kuo oji ene lau e Tevita, o behe, Koe mooni kuo taeaoga eku leohi ae koloa kotoabe ae jiana ni i he toafa, koia nae ikai ha mea e taha e mole i he ene gaahi mea kotoabe, bea kuo ne totogi kovi eia kiate au i he lelei.

22 Ke fai behe mo lahi hake foki e he Otua ki he gaahi fili o Tevita, o kabau teu tuku o feouga moe maa hake ae aho abogibogi ha tamaji i tagata e toko taha.

23 Bea i he mamata a Abikale kia Tevita, nae fakatootoo ia, bea hifo mei he asi, bea fakatomabee ia kia Tevita i hono mata, o ne bunou hifo ki he kelekele,

24 Bea nae fakatomabee ia ki hono va‘e, o ne behe, E hoku eiki, tuku kiate au, tuku kiate au ae hia ni: bea oku ou kole kiate koe, tuku ke lea a hoo kaunaga i ho ao, bea ke fanogo ki he lea a hoo kaunaga.

25 Oku ou kole kiate koe, ke oua naa tokaga e hoku eiki ki he tagata agakovi ni ko Nabale; he oku hage ko hono higoa, oku behe be ia; ko Nabale hono higoa, bea oku iate ia ae vale: ka ko au ko hoo kaunaga nae ikai teu mamata ki he kau talavou a hoku eiki, aia naa ke fekau.

26 Bea koeni, E hoku eiki, oku moui a Jihova, bea moui mo ho laumalie, koe mea i he taofi koe e Jihova, mei he ha‘u ke ligi ae toto, bea mei he fai totogi ekoe aki ho nima oou, koia, ke hoko ho gaahi fili mo kinautolu kotoabe oku kumi ke fai kovi ki hoku eiki, ke hage ko Nabale.

27 Bea koeni, koe mea ofa ni aia kuo omi e hoo kaunaga ki hoku eiki, ke atu ia ki he kau talavou oku muimui ki hoku eiki.

28 Oku ou kole kiate koe, ke ke fakamolemole ae hala a hoo kaunaga: he koe mooni e gaohi e Jihova ki hoku eiki ae fale tuumau; koeuhi oku fai e hoku eiki ae gaahi tau a Jihova, bea nae ikai ilo ha kovi iate koe i ho gaahi aho kotoabe.

29 Ka kuo tuu hake ae tagata ke tuli koe, bea ke kumi ho laumalie: ka koe laumalie o hoku eiki e fakataha ia i he u moui a Jihova ko ho Otua; ka koe laumalie o ho gaahi fili, e lijigi eia akinautolu kituaa, o hage koe lijigi mei he loto makata.

30 Bea e hoko o behe, oka hili hono fai e Jihova ki hoku eiki o tatau moe lelei kotoabe aia kuo ne folofola ki ai kiate koe, mo ne fokotuu koe koe bule ki Isileli;

31 E ikai hoko ai ae mea ni koe mea te ke koviia ai, be fakamamahi ki he loto o hoku eiki, koeuhi i hoo ligi tae totonu ae toto, be koe lagomaki‘i ia, e hoku eiki: ka oka hili ene fai lelei a Jihova ki hoku eiki, bea ke toki manatu‘i ai hoo kaunaga.

32 Bea nae behe e Tevita kia Abikale, Fakafetai kia Jihova koe Otua o Isileli, aia naa ne fekau koe he aho ni ke fakafetaulaki kiate au:

33 Bea fakafetai koeuhi ko hoo tokoni, bea ke monuia be akoe, akoe kuo ke taofi au he aho ni ke oua naaku alu atu o ligi ae toto, bea mei he lagomaki‘i au aki hoku nima.

34 He koe mooni aubito, hage oku moui a Jihova koe Otua o Isileli, aia kuo ne taofi au ke oua naaku fai ha kovi kiate koe, ka ne taeoua hoo fakatootoo bea ke ha‘u ke fakafetaulaki kiate au, koe mooni e ikai toe kia Nabale o feouga moe maa hake ae aho abogibogi ha tagata e toko taha.

35 Koia nae ma‘u e Tevita mei hono nima aia naa ne omi kiate ia, bea behe eia kiate ia, Alu fiemalie ki ho fale, vakai kuou tokaga ki ho le‘o, bea kuou leleiia iate koe.

¶ 36 Bea nae ha‘u a Abikale kia Nabale; bea, vakai, nae fai eia ae katoaga i hono fale, o hage koe katoaga ae tu‘i; bea nae fiefia lahi ae loto o Nabale, he nae kona lahi ia: koia nae ikai te ne tala ai ha mea jii be ha mea lahi, kae oua ke aho hake.

37 Bea bogibogi ai i he alu ae uaine mei a Nabale, bea i he oji hono tala e hono unoho ae gaahi mea ni, nae bogia hono loto iate ia, bea nae hoko ia o hage koe maka.

38 Bea hili ia koe aho e hogofulu nai, nae ta‘i e Jihova a Nabale, bea nae mate ai ia.

¶ 39 Bea kuo fanogo a Tevita kuo mate a Nabale, bea behe eia, Fakafetai kia Jihova aia kuo lagomekina eia a hoku manuki‘i mei he nima o Nabale, bea kuo ne taofi ene tamaioeiki mei he kovi: he kuo fakahoko e Jihova ae agakovi a Nabale ki hono ulu oona. Bea nae ave ae lea a Tevita kia Abikale koeuhi ke ne ma‘u ia ko hono unoho.

40 Bea i he hoko atu ae kau tamaioeiki kia Abikale ki Kameli naa nau lea kiate ia o behe, Kuo fekau mai akimautolu e Tevita kiate koe, ke mau ave koe kiate ia ko hono unoho.

41 Bea nae tuu hake ia, o ne fakabunou hifo hono mata ki he kelekele, o ne behe, Vakai, ke hoko a hoo mou kaunaga koe kaunaga ke kaukau ae va‘e oe kau tamaioeiki a hoku eiki.

42 Bea nae fakatootoo e Abikale, bea nae tuu hake bea heka ia i he asi, mo ene kau taahine e toko nima nae mui mui iate ia; bea naa ne alu o muimui atu i he kau tagata fekau a Tevita, bea nae hoko ia ko hono unoho.

43 Bea nae omi e Tevita a Ahinoami mei Jesilili, bea naa na hoko fakatouoji be ko hono ogo unoho.

¶ 44 Ka kuo foaki e Saula hono ofefine ko Mikale, koe unoho o Tevita, kia Faliteli koe foha o Leisi, aia nae o Kalimi.