¶ 1 BEA nae i he fonua oe kau Filisitia ae buha tabu o Jihova i he mahina e fitu.

2 Bea nae fekau e he kau Filisitia ke ha‘u ae kau taulaeiki moe kau kikite, o behe, Koeha te mau fai ki he buha tabu o Jihova? fakaha kiate kimautolu be te mau atu ia aki ae ha ki hono botu?

3 Bea naa nau behe, Kabau oku mou fekau ke ave ae buha tabu oe Otua o Isileli, oua naa ave mola be ia; ka mou atu mu‘a kiate ia ae feilaulau i he agahala: koia e fakamoui ai akimoutolu, bea e toki ilo ai ekimoutolu be koeha kuo ikai hiki ai hono nima iate kimoutolu.

4 Bea naa nau behe, Koeha ae feilaulau i he agahala aia te mau atu kiate ia? Bea naa nau tala, Koe mea‘i koula e nima, moe kuma koula e nima, o fakatatau ki he houeiki Filisitia e toko nima; he koe hagatamaki be taha nae iate kimoutolu kotoabe, bea i ho mou houeiki.

5 Koia ke mou gaohi ae gaahi fakatātā ki ho mou mata‘i hagatamaki, bea moe gaahi fakatātā ki he kuma aia oku maumau‘i ae fonua; bea ke mou tuku ae ogoogolelei ki he Otua o Isileli: hei ilo be te ne fakamaamaa hono nima iate kimoutolu, bea mei ho mou gaahi otua, bea mei ho mou fonua.

6 Koeha oku mou fakafefeka ai ho mou loto, o hage koe fakafefeka e he kakai Ijibite mo Felo ho nau loto? i he hili ene fai ae gaahi mea mana iate kinautolu, ikai naa nau tukuage ae kakai ke alu, bea nau alu ai?

7 Bea koia, mou gaohi ae saliote foou, bea too ae ogo bulu fefine oku huhua, aia kuo teeki hoko ki ai ha haamoga, bea nonoo ae ogo manu ki he saliote, bea omi ho na uhiki ki abi meiate kinaua:

8 Bea hiki ae buha tabu o Jihova, o fakaheka ia ki he saliote; bea ai ae gaahi teuga koula aia oku mou atu koe feilaulau i he agahala, ai ia ki he buha e taha i hono kaokao; bea fekau ke ave ia, koeuhi ke alu ia.

9 Bea vakai, kabau oku alu ia i he hala ki hono fonua ki Bete‐semesi, koe mooni kuo ne fai ae mamahi lahi ni kiate kitautolu: bea kabau oku ikai, bea tau toki ilo ta oku ikai ko hono nima kuo ta‘i akitautolu, ka koe kovi kuo hoko tuugaa be kiate kitautolu.

¶ 10 Bea nae fai ia e he kau tagata; nae omi ae ogo jinamanu, o nonoo akinaua ki he saliote, kae tabuni ho na uhiki i abi:

11 Bea naa nau hilifaki ae buha tabu ki he saliote, bea moe aiga oe kuma koula moe gaahi fakatātā ki ho nau hagatamaki.

12 Bea nae alu ae ogo jinamanu i he hala totonu, i he hala ki Bete‐semesi, o alu ai be i he hala motua, o tagi be mo alu, bea nae ikai te na tafoki ki he nima toomatau be ki he toohema; bea nae muimui ki ai ae houeiki oe kakai Filisitia o a‘u ki he vee fonua o Bete‐semesi.

13 Bea nae lolotoga ae tuuji ae toukai uite e he kakai o Bete‐semesi i he telea: bea naa nau hiki hake ho nau mata, o mamata ki he buha tabu, bea naa nau fiefia i he jio ki ai.

14 Bea nae ha‘u ae saliote ki he goue a Josiua koe tagata Bete‐semesi bea tuu i ai, i he botu nae i ai ae fuu maka lahi: bea naa nau tafahi ae akau oe saliote, o feilaulau aki ae ogo jinamanu, koe feilaulau tutu kia Jihova.

15 Bea nae fakahifo e he kau Livai ae buha tabu o Jihova, bea moe buha aia nae i ai ae gaahi teuga koula, o ai ia ki he fuga oe maka lahi: nae atu e he kau tagata o Bete‐semesi ae gaahi feilaulau tutu, o feilaulau aki ae gaahi feilaulau kia Jihova i he aho koia.

16 Bea i he mamata ki ai ae houeiki e toko nima oe kakai Filisitia, naa nau liu mai ki Ekiloni i he aho koia.

17 Bea koe gaahi mea‘i koula e nima ko eni aia nae atu e he kau Filisitia koe feilaulau i he agahala kia Jihova; koe taha ki Asitoti, koe taha ki Kesa, koe taha ki Asikeloni, koe taha ki Kati, bea taha ki Ekiloni;

18 Bea nae nima ae kuma koula o fakatatau ki he gaahi kolo kotoabe ae houeiki e toko nima oe kakai Filisitia, ae gaahi kolo tau moe gaahi botu kakai i uta, o a‘u atu ki he maka lahi ko Ebeli, aia naa nau hifo ki ai ae buha tabu o Jihova: ae maka koia oku kei tuu, i he goue a Josiua koe Bete‐semesi o a‘u ki he aho ni.

¶ 19 Bea naa ne teia ae kau tagata o Bete‐semesi, koe mea i he e nau fakajiojio ki he loto buha tabu o Jihova, io naa ne ta‘i ae tagata e toko nima mano ma toko fitugofulu: bea nae tagilaulau ae kakai, he kuo ta‘i e Jihova ae kakai i he ta lahi aubito.

20 Bea nae behe e he kau tagata o Bete‐semesi, Kohai oku mafai ke tuu i he ao o Jihova, koe Otua maonioni ni? bea e alu hake ia ki ahai meiate kitautolu?

¶ 21 Bea naa nau fekau ae kau talafekau ki he kakai o Keja‐jialimi, ke behe, Kuo toe omi e he kakai Filisitia ae buha tabu o Jihova; mou omi o haamo hake ia kiate kimoutolu.