“Tuun 13–19. 1 Tamuera 8–10; 13; 15–18: ‘Ana Bwai te Uea te Buaka,’” Nakomai, Iriirai—Ibukin te Reirei n Tabati: O Tetemanti 2022 (2021)
“Tuun 13–19. 1 Tamuera 8–10; 13; 15–18,” Nakomai, Iriirai—Ibukin te Reirei n Tabati: 2022
Tawita ao Koria, iroun Steve Nethercott
Tuun 13–19
1 Tamuera 8–10; 13; 15–18
“Ana Bwai te Uea te Buaka”
Ngkai ko katauraoi n anga reirei, uringnga bwa taraan ae iai aia taneiai ae uaana kain te kiraati ni kamatebwaia booki aika tabu n te mweenga. Tera ae ko kona ni karaoia ni karikirakei taneiai akanne?
Korei Am Namakin
Kaunga te Tibwatibwa
Ni kaungaiia kain te kiraati n tibwaua te bwai ae a na reiakinna n te wiiki aei, anganiia aia tai bwa a na iangoi namakin aika a karekei man 1 Tamuera 8–10; 13; 15–18. Imwiina tuangiia bwa a na tibwaua te kibu ae e karekea te namakin.
Reirei te Reirei
1 Tamuera 9:15–17; 10:1–12; 16:1–13
Te Atua e weteia aomata n te taetae ni burabeti bwa a na beku n Abanueana.
-
Rongorongon te Atua ngke e rinea Tauro ao Tawita n te taetae ni burabeti ao n te kaotioti e kona ni buokiia kain te kiraati n ataa aron weteaia aomata bwa a na beku n te Ekaretia n te bong aei. Ko kona ni kaoiia kain te kiraati bwa a na wareka 1 Tamuera 9:15–17; 10:1–12; ao 16:1–13, ao ni kakaei kibu n taeka aika a na kona ni buokiia n ataia bwa tera ae nanonaki ni “wetean te aomata iroun te Atua” (Taekan te Onimaki 1:5). Tera te kaokoro ae e karaoki, ibukiia aomata ake a weteaki ao ibukiia naake a boutokaia, n ataia bwa e rineia ana aomata te Atua bwa a na beku n Ana Ekaretia?
Te kamataata n te tamnei ngke Tamuera e katabua Tauro, © Lifeway Collection/licensed from goodsalt.com
“E raoiroi riki te ongotaeka nakon te anga nano.”
-
Ni maroroakinna bwa bukin tera e kakawaki bwa ko na ongotaeka nakon te Uea, ko kona ni kaoiia kain te kiraati bwa a na rinanon 1 Tamuera 13:5–14 ao ni kakaai katei ao anua are e kaira Tauro nakon te bwaka. Tera ae ti kona n reiakinna man ana kairua Tauro?
-
Ngkai tiaki ataia bwa bukin tera Tauro e tuangaki bwa e na tiringiia ni kabane tenaan Amareka ma aia man, iai reirei aika kona reiakin man ana kaeka nakon te kaetieti anne. Ni buokiia kain te kiraati bwa a na atai reirei aikai, koroia iaon te burakibooti Te ongotaeka e raoiroi riki nakon … ao kaoiia kain te kiraati bwa a na iangoa raoi te kibu n taeka aei ngkana kamikotaki n rinanoi kanoan 1 Tamuera 15. Tera bwaai tabeua aika raraoi aika ti karaoi ni maiura are n tabetai ti rinei irarikin are te ongotaeka iroun te Atua? Bukin tera e tamaraoa riki te ongotaeka nakon te Atua nakon bwaai riki tabeua aika raraoi?
“E taratara te nano Iehova.”
-
Imwiin warekan 1 Tamuera 16:6–7, a kona kain te kiraati n tibwauai aia iango n te bwai ae nanonaki n taratara “te nano” (kibu 7). Ti na kanga n reiakinna n noora te kawai n aron ae nooria te Uea? A kona kain te kiraati n tibwauai aia taneiai are e reireiniia kakawakin tarataraan te nano nakon tarataraan tinikun te aomata.
E kona te Uea ni buokiira iaon ara kangaanga n aekaia nako.
-
N te kamataata n te wiiki aei n Nakomai, Iriirai—Ibukiia n Tatabemaniia ao Utu, a na tia kain te kiraati ni iangoi raoi aia taeka aomata aika kakaokoro inanon 1 Tamuera 17. Iangoia n titirakiniia kain te kiraati bwa a na tibwaua te bwai ae a reiakinna man te taneiai aei. Ni bon arona, tera te bwai ae a reiakinna iaon taekan Tawita?
-
Tabeman kain am kiraati iai aia kangaanga ae kakamaaku n aron ae karaoia Koria nakon Tauro ao kain ana tanga ni buaka. Ko na kanga ni kabongana karakinan Tawita ao Koria ni buokiia kain te kiraati ni kaitarai aia kangaanga ma te onimaki iroun te Uea? Kaota tamnein Tawita ao Koria (n aron are inanon te kamataata n te wiiki aei n Nakomai, Iriirai—Ibukiia n Tatabemaniia ao Utu). A kona ngkanne kain te kiraati ni koroi iaon te burakibooti tabeua bwaai aika ti te arona ma “Koria” n ara bong. A kona ni kakaai kiibu inanon 1 Tamuera 17 are e kaota ana onimaki Tawita, are e a konaa iai Koria (taraa naba te rongorongo inanon “Bwaai n Ibuobuoki Riki Tabeua”). Tao a kona kain te kiraati n tibwaua aia taneiai are a kitana iai te Uea n nako n ibuobuoki ni buaka.
Bwaai n Ibuobuoki Riki Tabeua
Kakorakorakin ara Koria.
E reirei Beretitenti Gordon B. Hinckley:
“Iai taian Koria aika a katobibiko, aintoa aika moan te korakora ma nanoia aika buakaka aika a na kamaunanakoko. Aikai mwaane aika tiaki 3 te miita abwakiia, ma bon mwaane ao taabo n reirei are e kamwakuri mwiin bwaai aika tamaroa ma bwaai aika buakaka ake a kona ni kaewenakoko ao ni kamamarako ao ni kamaunanakoko. …
“… Ma ko aki riai ni maaku ngkana iai kanoan te kainikatebe ae koauan koroboki aika tabu ni baim. … Iai iroum atiibu aika tamaroa ao ni karineaki ao ni kokoaua iroum ni kabonganai ni kaaitarai am kairiribai aika a tangiria ni kamaunanakoko. N te tai aei n tabeaiangam, ko kona ni buakaniia ara kairiribai n te tamnei n te tabo are a kai mate iai, n aron ana kawai Tawita n tiringa Koria. Ko kona n tokanikai iaoia man tararuakim bwa ko na aki reke irouia. Ko kona n taekin nakoia ni kabane aron are e taekinna Tawita nakon Koria, ‘Ko nako iu ma te kabaang, ma te raanti, ma te koro, ma I nako im n aran Iehova Tabaota, ae Atuaia aia taanga nako Iteraera, aika ko a tia ni kaewenakoia’ [1 Tamuera 17:45]” (“Overpowering the Goliaths in Our Lives,” Ensign, Meei 1983, 46, 51).
Kanakoraoan Ara Anga Reire
Weteam e kairaki iroun te Tamnei. Ngkai te tia reirei ngkoe, ko a tia ni weteaki iroun te Atua bwa ko na kakabwaiaia Natina. N tabem bwa te tia reirei ko tau ni karekea Ana ibuobuoki, E na anganiko te kaotioti ae ko tangiria. (Taraa Teaching in the Savior’s Way, 5.)