“Tuun 20–26. 2 Tamuera 5–7; 11–12; 1 Uea 3; 8; 11: “E na Kateimatoaki am Kaintokanuea n Aki Toki,’” Nakomai, Iriirai—Ibukin te Reirei n Tabati: Te O Tetemanti 2022 (2021)
“Tuun 20–26. 2 Tamuera 5–7; 11–12; 1 Uea 3; 8; 11,” Nakomai, Iriirai—Ibukin te Reirei n Tabati: Te O Tetemanti: 2022
King David Enthroned(Te Uea Tawita n te Kaintoknuea), iroun Jerry Miles Harston
Tuun 20–26
2 Tamuera 5–7; 11–12; 1 Uea 3; 8; 11
“E na Kateimatoaki am Kaintokanuea n Aki Toki”
Ngkai ko kamatebwaia koroboki aika a tabu, tataromwaaka n ukoukoria n ata te reirei raa ae e na rang n nano riki nakoia kain am kiraati bwa ko aonga ni kabanea am tai iaon kainnanoia.
Korei Am Namakin
Kaunga te Tibwatibwa
Ni kakaea bwa tera ae a kunea kain te kiraati ae rang n nano n aia kamatebwai ni koroboki aika a tabu, ko kona n tuangiia bwa a na korei kiibu man te rongorongo are e katika nanoia iaon te mwakoro ni beeba ao ngkanne katokai beeba inanon te kaonteina. Ngkanne kain te kiraati a kona n rinei beeba man te kaoteina, ao a kona kain te kiraati ni wareki ao ni maroroakin rongorongo.
Reirei te Reirei
Ti riai ni karaoa ana mwakuri te Atua n Ana kawai.
-
Kona bae n tuangiia kain te kiraati bwa a na wareka 2 Tamuera 6:1–8 ao n iangoia tera te kauring man te karaki aei are e kaineti ibukira n te bong aei. Te marooro mairoun Brigham Young n “Bwaai ni Ibuobuoki riki Tabeua” e kona n ibuobuoki. Tera kawai tabeua aika ti na bae ni kataia ni karaoi n ana mwakuri te Atua n te aro riki are e na kona iai ni karaoia? Bukin teraa e kakaamaku aei? Tao a kona n tibwa te bwai are a rinanona kain am kiraati are a reiakinna iai n onimakina ana kairi te Uea are e anga ibukin katiaan Ana mwakuri.
Ti riai n tainako n tatauraoi ni kaitara te bure.
-
Reiakinara man ana kairua Tawita are e koreaki n 2 Tamuera 11 e kona ni buokiira n totokoi aekakin kairua akanne. Tao te kiraati e kona n ikotaki ni wareka 2 Tamuera 11:1–17 ao ni katebenakoi rinerine ake e karaoi Tawita are e kairia nakon te bure. Tera ae e kona Tawita ni karaoa ae kaokoro riki? Ko kona naba n tuangiia kain te kiraati bwa a a korea te tiententi are e kona n ibuobuoki ni kaunga temanna bwa e na totokoa te bure, ni boboto iaon te bwai are a reiakinna man 2 Tamuera 11. Kaoiia tabeman kain te kiraati bwa a na tibwaua aia iango.
-
Kona bae ni kabongana 2 Tamuera 11 ni maroroakina kakamakun tamnei aika tangako ao buure riki tabeua n te wenenibure. Ni karaoan aei, te kiraati e na ikotaki n rinanon mwakoron ana rongorongo Unimwaane L. Whitney Clayton “Blessed Are All the Pure in Heart” (Riaona, Nobembwa 2007, 51–53). Tera te reirei ae e anga Unimwaane Clayton iaon kakamakun tamnei aika buakaka? Kam kona naba ni mataku n te witeo “To Look Upon” (ChurchofJesusChrist.org). E na kanga ni kona ni buokiira te Tia Kamaiu n tokanikai iaon kariiri ke anua aikai?
2:3Tao a kona kain te kiraaki n tibwai iango ake a kunea bwa e ibuobuoki n aia mwakuri ni katana aia utu man tamnei aika buakaka ke n tokanikai iaon rootakia n tamnei aika buakaka. Ana rongorongo Titita Linda S. Reeves “Protection from Pornography—a Christ-Focused Home” e kona n ibuobuoki (Riaona, Meei 2014, 15–17; taraa naba “Bwaai ni Ibuobuoki riki Tabeua”).
Te tembora bon Ana auti te Uea.
Tembora e uoti kakabwaia.
-
1 Uea 8 e kabwarabwarai kakabwaia ake e ukoukori nakoia ana aomata Toromon ngke e a tia te tembora. Kona bae n tibwauai kibu 22–61 imarenaia kain am kiraati ao tuangiia bwa a na tibwa te bwai teuana are a kunea n aia kibu are e kaungaia n aia nebonebo n te tembora. Kain te kiraati a kona n tibwa aron te nebonebo n ana auti te Uea ni kakabwaia maiuia.
“Ao E aki moan eti nanona ma te Uea.”
-
Tera ae e nanonaki n “anga nano[ra]… e na moaniba n raoiroi iroun te Uea”? (1 Uea 8:61). E kaokoro anne man ara mwakuri ni karaoan ae kororaoi? E kanga? Ngkai kain te kiraati a iangoi titiraki aikai, a kona ni wareka 1 Uea 11:1–11 ao n noora te bwai are e taekinna te Uea ibukin nanon Toromon. Ti na kanga n totokoi kaairua ake e karaoi?
Bwaai n Ibuobuoki Riki Tabeua
Kamatoan te aake.
Beretitenti Brigham Young e reirei: “Katuka te Abanuea n arona, te Uea e na kamatoa te aake, ao ngkana e mwaiei, ao n taraa ni kainnanoa kamatoana, ngkana te kawai n tabetai e taraa n tabeitera, ao n tarana ni kabane e a taraa ni kabwakaaki, taratara raoi n aron aroran baim ni kamatoa; ti na riai n aki rang irekereke n rinnako n te bwai ae e aki irekereke ma ngaira; katikua n arona, bon ana mwakuri te Uea” (Discourses of Brigham Young, sel. John A. Widtsoe [1954], 66).
Kamanoaia utu man tamnei aika tangako.
Titita Linda S. Reeves e reirei: “Ti na kanga ni kataniia natira ao te roronrikirake? Raumea bon bwaai ni mwakuri aika a boongana, ma te raumea ae korakora riki n te aonaaba, bon ti teuana are e na bon mwakuri n tokin te tai, bon ara raumea i bon iroura are e roko man te koaua ae nano ae teimatoa n ana tangira Tamara are i Karawa ao ana angakarea ni kamaiu ara Tia Kamaiu ibukira n tatabemaniira” (“Protection from Pornography—a Christ-Focused Home,” Riaona, Meei 2014, 16; taraa naba Joy D. Jones, “Addressing Pornography: Protect, Respond, and Heal,” Ensign, Oct. 2019, 22–27).
Kanakoraoan Ara Anga Reirei
Ataia raoi bwa ko anga te reirei ae koaua. “Teimatoa n titirakiniko, ‘E na kanga bwaai ake I angareirei iaona n ibuobuoki nakoia kain au kiraati ni karikirakea te onimaki iroun Kristo, te rairannano, karaoan ao kawakinan berita aika tabu ma te Atua, ao ni karekea te Tamnei ae Raoiroi?’” (Teaching in the Savior’s Way, 20).