Ata tusi o Elia ua faaali atu i lana auauna kariota afi, © Review & Herald Publishing/licensed mai goodsalt.com

4–10 Iulai

2 Tupu 2–7

“O Loo ia Isaraelu le Perofeta”

Ao e sauni e aoao atu, faitau le 2 Tupu 2–7 ma saili musumusuga mo lou lava olaga. Ona faalogo lea mo uunaiga e uiga i savali o le a faamanuiaina tagata o lau vasega.

Tusi Faamaumau Ou Lagona Uunai

Valaaulia le Fefaasoaai

O nisi taimi e manaomia e tagata o le vasega se taimi e iloilo puupuu ai mataupu latou te faitauina ae latou te lei faasoaina ni manatu mai a latou suesuega patino o tusitusiga paia. Taumafai e tuuina atu ni nai minute mo lenei vaega i le amataga o le vasega; ona valaaulia lea o tagata o le vasega e faasoa mai se mea na latou aoaoina.

Aoao Atu le Aoaoga Faavae

2 Tupu 2–6

E mafai e le Atua ona faia vavega i o tatou olaga.

• Ao outou talanoaina vavega i le 2 Tupu 2–6, atonu e aoga le fai atu i tagata o le vasega e faamatala le upu vavega. E mafai ona e faasoa atu lenei manatu mai ia Peresitene Howard W. Hunter: “[O vavega] o le faaalia o le mana o le [Atua] lea e le mafai ona tatou faamatalaina pe malamalama atoatoa ai foi. … O nei faailoga ma mea ofoofogia na sili ona vaaia i le olaga ma le galuega a Iesu Keriso, le Alo moni lava o le Atua. Ae maoae ma tumu i le ofoofogia e pei ona latou i ai, o le tele o vavega a Keriso sa na oni ataata o na vavega e sili atu le maoae na faia e lona Tama ae lei i ai o ia ma faaauau pea ona faia faataamilo ia i tatou uma lava. … O le a i ai pea le tele o vavega pe afai e i ai ni o tatou mata e vaai ai ma taliga e faalogo ai” (“O le Atua e Faia Vavega,” Ensign, May 1989, 15–16). E faapefea e nei manatu ona fesoasoani ia i tatou e vaai i le mana o le Atua i o tatou olaga?

• Mafaufau e fai i tagata o le vasega e lisi nisi o vavega o taua i le 2 Tupu 2–6. O le a se mea ua tatou aoaoina e uiga i le Alii mai nei vavega? Atonu foi e naunau tagata o le vasega e talanoa i vavega—tetele pe laiti—na aafia ai i latou po o latou aiga. E faapefea ona mafai ona sili atu lo tatou iloa o vavega a le Atua i o tatou olaga—e aofia ai na e ese mai vavega na tatou faamoemoeina?

• Atonu e iloa e tagata o le vasega e musuia le faatusatusa o nisi o vavega na faia e Elia ma nisi na faia e Iesu Keriso (tagai 2 Tupu 4:8–37 ma le Luka 7:11–16; 2 Tupu 4:42–44 ma le Ioane 6:1–13; 2 Tupu 5:1–15 ma le Luka 17:11–19). O a mea ua aoao mai e nei vavega e uiga i le Faaola ma Ana perofeta?

2 Tupu 5:1–19

Afai tatou te lotomaualalo ma usiusitai, e mafai ona faamaloloina i tatou e Iesu Keriso.

• O se tasi lesona e mafai ona tatou aoao mai le faamalologa o le lepela o Naamanu o le taua o le lotomaualalo. Ina ia amata se talanoaga, e mafai ona e tusia i le laupapa faamaualuga o Naamanu ma le lotomaualalo o Naamanu. E mafai e tagata o le vasega ona suesue le 2 Tupu 5:1–19 ma tusia i le laupapa fuaitau na e faamatalaina le faamaualuga o Naamanu po o le lotomaualalo. E faapefea ona tatou pei o Naamanu i nisi taimi? E faapefea ona tatou pei o ana auauna i nisi taimi? Na faapefea ona oo ina tatou iloa le mea na oo ina iloa e Naamanu?

• O se isi lesona e mafai ona tatou aoao mai lenei tala o le taua o le usiusitai i le Atua i mea laiti. E mafai ona e amata i le faitauina o le 2 Tupu 5:9–12 ma fesili i tagata o le vasega i o latou lagona pe aisea na “ita lava lea o Naamanu ma alu ese” (fuaiupu 12). Aisea tatou te filifili ai i nisi taimi e faia “se mea tele” e tau mai e le Atua ia i tatou, nai lo mea faigofie? (fuaiupu 13). O le a le taua o le faia o mea faigofie?

2 Tupu 6:8–23

“E toatele ua ia te i tatou i e ua ia te i latou.”

• Tatou te oo uma lava i taimi e lagona ai le tuua toatasi po o le fefe. Mafaufau pe faapefea e le talanoaina o le tala i le 2 Tupu 6:8–23 ona fesoasoani i tagata o le vasega o lagona faapea. E mafai ona e amata i le na o le fesili atu lava i tagata o le vasega po o a mea ua uunaia ai i laotu e nei fuaiupu. E mafai foi ona latou faasoa mai ni aafiaga i se taimi na “faapupulaina ai e Ieova o [latou] mata” (fuaiupu 17”) ma fesoasoani ia i latou e vaai e lei tuua na o i latou (tagai foi “Punaoa Faaopoopo”). E faapefea ona tatou fesoasoani i isi ia “aua le fefe”? (fuaiupu 16).

Punaoa Faaopoopo

“Faapupula o tatou mata faaleagaga.”

E tusa ai ma le tala i le 2 Tupu 6:8–23, na saunoa ai Elder Ronald A. Rasband:

“Atonu e i ai pe leai foi ni a tatou kariota afi na auina mai e faate’a ai lo tatou fefe ma faatoilalo o tatou temoni, ae ua manino le lesona. E faatasi le Alii ma i tatou, silafia i tatou ma faamanuiaina i tatou i auala e na o Ia e mafaia. O le tatalo e mafai ona valaau mai ai i lalo le malosi ma faaaliga ia tatou te manaomia e faatotonugalemu ai o tatou mafaufauga ia Iesu Keriso ma Lana taulaga togiola. Na silafia e le Alii e i ai taimi o le a tatou lagona ai le fefe. Sa ou i ai iina ma e faapea foi oe. … I lenei Ekalesia atonu tatou te toalaiti i fuainumera i ala e faitaulia ai e le lalolagi faatosinaga, ae a tatalaina o tatou mata faaleagaga, “e toatele ua ia te i tatou i e ua ia te i latou.”[2 Tupu 6:16]” (“Aua le Atuatuvale,” Liahona, Nov. 2018, 18–19).

Faaleleia o Lo Tatou Aoao Atu

Faasino atu le au a’oa’o i tusitusiga paia. I avanoa uma, uunaia tagata o le vasega e liliu atu i tusitusiga paia ma upu a perofeta soifua mo se taitaiga, tali i fesili, ma le lagolagoina. O le afioga a le Atua o le punaoa sili o le upumoni. (Tagai Aoao Atu i le Ala a le Faaola, 21.)