malumalu o Serupapelu

Ata tusi o le malumalu o Serupapelu, saunia e Sam Lawlor

18–24 Iulai

Esera 1; 3–7; Neemia 2; 4–6; 8

“O Loo Faia e Au le Galuega Tele”

Ao e valaaulia tagata o lau vasega e fasoa mai mea na tulaga ese ia i latou i tusi o Esera ma Neemia, ia faasoa atu foi ni uunaiga na e maua ao e suesue.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O nisi taimi o le tusia o upu autu po o fuaitau i le laupapa e mafai ona faamanatu ai i tagata o le vasega mea na latou aoaoina mai tusitusiga paia ma faigofie atili ai mo i latou ona faasoa mai. Mo se faataitaiga, e mafai ona e tusia Toefausia, Toefaafou, ma le Toefaatulaga i le laupapa ma valaaulia tagata o le vasega e faasoa mai fuaiupu mai a latou faitauga e fesootai i le tasi po o le sili atu o nei upu.

aikona o le aoao atu

Aoao Atu le Aoaoga Faavae

Esera 3:8–13; 6:16–22

E mafai ona aumai e malumalu ia i tatou le olioli.

• O le faitau i le olioli na lagona e tagata Iutaia ao toe fausia lo latou malumalu e mafai ona fesoasoani i tagata o le vasega e lagona le faafetai sili atu mo malumalu i o tatou aso. Atonu e mafai ona e valaaulia tagata o le vasega e iloilo le Esera 3:8–13 ma le 6:16–22 ona talanoaina lea o nisi o auala na faamanatuina ai e Iutaia le toefausia ma le faapaiaina o le malumalu. Aisea e mafua ai ona faamanatu le fausia o se malumalu? E mafai ona e valaaulia tagata o le vasega e faasoa mai pe faapefea e malumalu, ma le galuega tatou te faia iina, ona aumaia ia i tatou le olioli. O le fuaitau i le “Punaoa Faaopoopo” e mafai ona uunaia ai tagata o le vasega ia maua le olioli i galuega o le malumalu.

  aiga o loo savalivali i laufanua o le malumalu

  E mafai ona avea le malumalu o se punavai o le olioli i o tatou olaga.

Esera 4–5; Neemia 2; 4; 6

E mafai ona tatou fesoasoani i le galuega a le Atua e alualu i luma e ui lava i faigata.

• Ua faamatalaina e tusi a Esera ma Neemia tagata na ausia se galuega taua e ui lava i faalavelave mai o latou fili. Ina ia amata se talanoaga, e mafai ona e fesili i tagata o le vasega po o le a le “galuega tele” (Neemia 6:3)a Neemia e mafai ona faatusatusa i o tatou olaga. O le a le galuega taua ua tuuina mai e le Atua ia i tatou e fai? Ona mafai lea ona latou faitau le Esera 4:4 ma talanoaina le ala o taumafai Satani e faavaivaia o tatou lima ma faalavelave ia i tatou i le faia o le galuega a le Atua. O a mea ua tatou aoao mai ia Neemia ma ona soo i le Neemia 2:18–20; 4:6–9; ma le 6:1–3? O le a le uiga o le i ai o “se loto i le galuega” i le galuega a le Faaola ? (Neemia 4:6). Mafaufau e faasoa atu se vaega o le savali a Peresitene Dieter F. Uchtdorf, “O Loo Tatou Faia le Galuega Tele ma Ua Le Mafai ona Tatou O Ifo i Lalo” (Liahona, Me 2009, 59–62), ae maise lava vaega mulimuli e lua.

• Atonu e uunaia oe e taitaia se talanoaga e faatusatusa ai taumafaiga a Serupapelu i le toefausia o le malumalu ia tatou taumafaiga e auai i le malumalu ma faia galuega faaola iina. Mo se faataitaiga, e mafai ona e tusi i le laupapa: Serupapelu ma Tatou. I lalo o Serupapelu, e mafai e tagata o le vasega ona tusi ai po o a taumafaiga a “fili o Iuta ma Peniamina” (Esera 4:1) na fai e taofia ai Serupapelu ma tagata Iutaia mai le toefausia o le malumalu (tagai Esera 4). I lalo o le Tatou, e mafai e tagata o le vasega ona lisi ai auala o loo taumafai le fili e taofia ai i tatou mai le auai i le malumalu. Ona mafai lea ona latou faasoa ni fautuaga i le tasi ma le isi pe faapefea ona tatou sailia le fesoasoani a le Alii e faatoilalo ai lena faigata.

Neemia 8:1–12

E faamanuiaina i tatou pe a tatou suesueina tusitusiga paia.

• Atonu e mafai e tagata o le vasega ona faitau le Neemia 8:1–12 faatasi ma talanoaina lagona o Esera ma lona nuu e uiga i le Atua ma Lana afioga. Uunaia tagata o le vasega e vaai i fuaiupu faapitoa o faaalia ai o latou lagona. Valaaulia tagata o le vasega e faaleo mai o latou lagona i le afioga a le Atua. E mafai faapefea ona tatou faaleleia a tatou taumafaiga e suesue le afioga a le Atua?

aikona o punaoa faaopoopo

Punaoa Faaopoopo

Aafia i le olioli o le malumalu.

Na aoao mai Peresitene Russell M. Nelson:

“E mafai ona musuia i tatou i le aso atoa e uiga i aafiaga o le malumalu ma talafaasolopito o aiga na maua e isi. Ae e tatau ona tatou faia se mea ina ia tatou maua moni ai e i tatou lava le olioli. Ou te fia faalautele atu se lui ia i tatou uma taitoatasi, ina ia faaauau pea ma faateleina pea le lagona matagofie o lenei galuega. Ou te valaaulia outou ina ia mafaufau ma le agaga tatalo po o le a le ituaiga ositaulaga—ma e talosia o se ositaulaga o le taimi—e mafai ona e faia ai galuega se tele o malumalu ma talafaasolopito o aiga i lenei tausaga.

“O loo tatou i ai i le galuega a le Atua Silisili Ese. O loo soifua o Ia. O Iesu o le Keriso. O Lana Ekalesia lenei. O i tatou o Ana fanau o le feagaiga. E mafai ona Ia faalagolago ia i tatou” (Russell M. Nelson ma Wendy W. Nelson, “Tatala le Lagi e Ala i Galuega o Malumalu ma Talafaasolopito o Aiga,” Liahona, Oke. 2017, 39).

Faaleleia o Lo Tatou Aoao Atu

Faaaofia ai matua o talavou. Afai e te aoaoina le autalavou, faasoa atu mea o loo e aoaoina i o latou matua. E mafai ona latou fesoasoani ia te oe e malamalama i manaoga o le autalavou ma le ala e fesoasoani ai ia i latou. E mafai foi ona avea lenei mea o se ala lelei e uunaia ai talanoaga faaleaiga i mea o loo aoaoina e talavou i vasega. (Tagai Aoao Atu i le Ala a le Faaola, 27.)