Eseta o loo tatalo

Eseta, na tusia e James Johnson

Iulai 25–31

Eseta

“Ua Faia Oe ma … Ona o se Aso Faapenei”

O le a le lelei o lou iloaina o tagata o lau vasega? Taumafai ia iloa lelei se tagata se toatasi o lau vasega i vaiaso taitasi. O le a fesoasoani lenei mea ia te oe e mafaufau ai i o latou manaoga ao e saunia e aoao atu (tagai Aoao Atu i le Ala a le Faaola, 7).

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E mafai e tagata o le vasega ona faasoa i se tasi o nofo lata ane se mea na aoaoina ai i latou e le Agaga, se mea na oo ina latou malamalama atili ai, po o se mea na latou faatatau i o latou lava olaga ao latou faitauina le tusi o Eseta. Ona mafai lea e nisi o i latou ona faasoa mai i le vasega atoa.

aikona o le aoao atu

Aoao Atu le Aoaoga Faavae

Eseta

E tuuina i tatou e le Alii i tulaga e mafai ai ona tatou faamanuiaina isi.

• Atonu na vaavaai tagata o lau vasega mo ni auala na faia e le Alii mo Eseta e faasao ai Iutaia, e pei ona ta’ua i le otootoga o lenei vaiaso i le Sau, Mulimuli Mai ia te Au—Mo Tagata Taitoatsi ma Aiga. Valaaulia i latou e faasoa mai mea na latou maua. Pe mafai ona outou vaavaai mo ni nai faataitaiga faatasi (tagai Eseta 2:21–23; 3:10–14; 4:14–16). O le a se mea e mafai ona tatou faia ina ia iloa ai le aao o le Atua i o tatou olaga? O le saunoaga a Elder Neil. L. Andersen i le “Punaoa Faaopoopo” o loo i ai se tali i lenei fesili.

• Ina ia fesoasoani i tagata o lau vasega e mafaufau i le ala na saunia ai i latou e le Alii “ona o se aso faapenei” (Eseta 4:14), valaaulia i latou e faitau le Eseta 4:10–17. Na ono fesoasoani faapefea upu a Moretekai ia Eseta e faia le filifiliga e puipuia lona nuu? E pei lava ona tuuina e le Atua Eseta i se tulaga e mafai ai ona ia faasaoina Iutaia, oa ni tulaga ua Ia tuuina i ai i tatou ina ia mafai ona tatou faamanuiaina isi? E faapefea ona avea i tatou ma ni meafaigaluega sili atu i Ona aao? O le faitauina o le saunoaga a Sister Virginia U. Jensen i le “Punaoa Faaopoopo” e mafai ona musuia tagata o le vasega e mafaufau i taimi na latou lagona ai o i latou o ni meafaigaluega mo le Alii. Fai ia i latou e faasoa mai o latou aafiaga, ao taialaina e le Agaga.

Eseta 4

O le anapogi e faaalia ai lo tatou faalagolago i le Alii.

• E mafai ona e faaaoga le Eseta 4 e talanoaina ai faamanuiaga e oo mai le anapogi. E mafai ona e tuu atu i se tagata o le vasega e iloilo mea na tutupu na taitai atu ai Eseta ma isi tagata Iutaia e anapopogi. Aisea na latou filifili ai e anapopogi? Aisea tatou te filifili ai e anapopogi? Atonu e te manao e iloilo faatasi nisi o mau faaopoopo e uiga i le anapogi, e pei o le Isaia 58:6–12 ma le Mataio 4:1–4; 17:14–21 (tagai foi i le Taiala i Tusitusiga Paia, “Anapogi, Anapopogi,” scriptures.ChurchofJesusChrist.org). Atonu o oe po o ni nai tagata o le vasega e mafai ona faasoa mai ni aafiaga e faaalia ai pe faapefea ona aumaia e le anapogi le mana o le Alii i o tatou olaga.

Eseta 3:1–11; 4:10–17; 5:1–4

O le faia o le mea sa’o e masani ona manaomia ai le lototele sili.

• O tala ia Moretekai ma Eseta ua tutu atu ma le lototetele mo le amiotonu e mafai ona uunaia ai tagata o le vasega ia maua le lototele e fai le mea sao. E mafai ona e valaaulia le afa o le vasega e faitau e uiga ia Moretekai (tagai Eseta 3:1–11) ma le isi afa e faitau ia Eseta (tagai Eseta 4:10–17; 5:1–4). Pe ana i ai i laua iinei i le asō, o le a se mea e ono tau mai e Moretekai ma Eseta e uunaia ai i tatou pe a faigata ona fai se mea e sa’o? E mafai e tagata o le vasega ona faasoa mai ni tulaga na latou faatino ai le lototele. E mafai ona e faaali le vitio “Courage” (ChurchofJesusChrist.org) pe fai i le vasega e usu pe faitau upu o se viiga e uiga i le tu atu mo le upumoni, e pei o le “Fai Mea Tonu” (Viiga, nu. 148). Ona talanoaina lea o mea ua aoaoina mai e le vitio po o le pese e uiga i le lototele.

  Eseta ma le tupu

  Eseta i luma o le Tupu, saunia e Minerva K. Teichert.

aikona o punaoa faaopoopo

Punaoa Faaopoopo

O le aao o le Atua.

Na aoao mai Elder Neil L. Andersen:

‘O nisi taimi e mafai ona tatou vaai i le aao o le Alii i olaga o isi ae tatou te taumanatunatu, “Pe mafai faapefea ona manino atili la’u vaai i Lona aao i lo’u lava olaga?” …

“A o outou tausia poloaiga ma tatalo i le faatuatua ina ia iloa le aao o le Alii i lou olaga, o le a Ia faapupula tele ou mata faaleagaga, ma o le a atili manino ai lau vaai e le o tuua na o oe” (“Ia Oo Mai Lou Malo,” Liahona, Me 2015, 121–22).

“Ona o se aso faapenei.”

Na aoao mai Sister Virginia U. Jensen: “Ou te le talitonu ua e i ai iinei faafuasei ma au i lenei taimi faapitoa. Ou te talitonu, e pei o Eseta anamua, ua tatou “oo mai i le malo ona o se aso faapenei’ [Eseta 4:14], pe a mafai ona tutu atu a tatou faatosinaga, a tatou faataitaiga, lo tatou malosi, ma lo tatou faatuatua o se papuipui e faasaga i le tai fa’aga’e a le tiapolo lena e faamatau mai e siomio o tatou fale, o tatou aiga, ma e pele ia i tatou” (“Fatuina o ni Nofoaga o le Saogalemu,” Liahona, Ian. 1998, 89

Faaleleia o Lo Tatou Aoao Atu

Alu muamua i tusitusiga paia. E tatau ona avea tusitusiga paia ma punaoa autu mo au suesuega ma tapenapenaga. Aua nei galo e mafai e tuleiga a perofeta i ona po nei ona faaopoopo atu i tusitusiga faavae ma tusitusiga paia foi. (Tagai Aoao Atu i le Ala a le Faaola, 17–18.)