“4–10 Siulai. 2 Ngaahi Tu‘i 2–7: ʻʻOku Ai ha Palōfita ʻi ʻIsileli,’” Haʻu, ‘o Muimui ʻIate Au—Ma‘á e Lautohi Faka-Sāpaté: Fuakava Motuʻá 2022 (2021)
4–10 Siulai. 2 Ngaahi Tuʻi 2–7,” Haʻu, ʻo Muimui ʻIate Au—Maʻá e Lautohi Faka-Sāpaté: 2022
Tā fakatātaa‘i ʻo e fakahā ʻe ‘Ilaisa ki heʻene tamaioʻeikí ʻa e ngaahi saliote afí, © Review & Herald Publishing/licensed from goodsalt.com
4–10 Siulai
2 Ngaahi Tuʻi 2–7
“ʻOku Ai ha Palōfita ʻi ʻIsileli”
‘I hoʻo teuteu ke faiakó, lau ʻa e 2 Ngaahi Tuʻi 2–7 mo kumia ha tataki fakalaumālie ki hoʻo moʻui ʻaʻaú. Hili ia peá ke fakafanongo ki he ngaahi ue‘i fekauʻaki mo e ngaahi pōpoaki te ne tāpuekina ‘a e kau mēmipa hoʻo kalasí.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
ʻE fie maʻu ʻe he kau mēmipa ʻo e kalasí he taimi ʻe niʻihi, ha taimi ke nau vakaiʻi nounou ai ʻa e ngaahi vahe ʻoku nau laú, kimuʻa pea nau toki lava ʻo vahevahe ʻa e ngaahi ʻilo mei heʻenau ako folofola fakatāutahá. Feinga ke ‘oange ha ngaahi miniti siʻi ʻi he kamataʻanga ʻo e kalasí; hili ia pea toki fakaafeʻi ʻa e kau mēmipa ʻo e kalasí ke nau vahevahe ha meʻa ne nau ako.
Akoʻi e Tokāteliné
‘E lava ke fakahoko ʻe he ‘Otuá ha ngaahi mana ʻi he‘etau moʻuí.
-
‘I hoʻomou alea‘i ʻa e ngaahi mana ‘i he 2 Ngaahi Tuʻi 2–6, mahalo naʻa ʻaonga ke ke kole ki he kau mēmipa ʻo e kalasí ke nau fakaʻuhingaʻi ʻa e foʻi lea ko e mana. Te ke lava ʻo vahevahe ʻa e ʻilo ko ʻeni meia Palesiteni Hauati W. Hanitaá: “Ko e [ngaahi maná] ko e ngaahi [hāsino] ia ʻo e mālohi ʻo e [‘Otuá], ʻa ia ‘oku ʻikai ke tau lava ʻo fakamatalaʻi pe mahino kakato kiate kitautolu. … Na‘e hā mahino ʻa e ngaahi fakaʻilonga mo e ngaahi meʻa fakaofo ko ʻení ʻi he moʻui mo e ngāue ʻa Sīsū Kalaisí, ʻa e ‘Alo tonu ʻo e ʻOtuá. Ka neongo ʻenau fakaofo mo fakatupu fifilí, ko e ngaahi mana lahi ʻa Kalaisí ko ha hoʻata pē ʻo ha ngaahi meʻa fakaofo lahi ange naʻe ʻosi fakahoko ʻe heʻene Tamaí kimuʻa ʻiate ia pea ʻoku kei fakahoko pē ʻiate kitautolu. … ‘E kei ʻi ai maʻu pē ha ngaahi mana lahi kapau ʻoku ʻi ai hatau mata ke mamata mo ha telinga ke fanongo” (“The God That Doest Wonders,” Ensign, May 1989, 15–16). ‘Oku tokoniʻi fēfē ʻe he ngaahi ʻiló ni ke tau fakatokangaʻi e toʻukupu ʻo e ʻOtuá ʻi heʻetau moʻuí?
-
Fakakaukau ke kole ki he kau mēmipa ʻo e kalasí ke nau hiki ha niʻihi ‘o e ngaahi mana ʻoku fakamatalaʻi ‘i he 2 Ngaahi Tuʻi 2–6. Ko e hā ʻoku tau ʻilo fekauʻaki mo e ʻEikí mei he ngaahi mana ko ʻení? Mahalo naʻa toe loto fiemālie ʻa e kau mēmipa ʻo e kalasí ke nau fakamatala fekauʻaki mo ha ngaahi mana—lalahi pe iiki—kuo nau aʻusia pe ko honau ngaahi fāmilí. Te tau lava fēfē ʻo fakatokangaʻi lelei ange ʻa e ngaahi mana ʻa e ʻOtuá ʻi heʻetau moʻuí—kau ai kinautolu ʻoku kehe mei he meʻa ne tau ʻamanaki ki aí?
-
Mahalo naʻa faingofua ange ki he kau mēmipa ʻo e kalasí ke nau fakafehoanaki ha niʻihi ʻo e ngaahi mana naʻe fakahoko ʻe ʻIlaisá mo ha niʻihi naʻe fakahoko ʻe Sīsū Kalaisí (vakai, 2 Ngaahi Tu‘i 4:8–37 mo e Luke 7:11–16; 2 Ngaahi Tuʻi 4:42–44 mo e Sione 6:1–13; 2 Ngaahi Tu‘i 5:1–15 mo e Luke 17:11–19). Ko e hā ʻoku akoʻi mai ʻe he ngaahi mana ko ʻení fekauʻaki mo e Fakamoʻuí mo ʻEne kau palōfitá?
Kapau ‘oku tau loto-fakatōkilalo mo talangofua, ʻe lava ke fakamo‘ui kitautolu ʻe Sīsū Kalaisi.
-
Ko ha lēsoni ‘e taha te tau lava ʻo ako mei hono fakamoʻui e kilia ʻo Neamaní ko hono mahuʻinga ʻo e loto fakatōkilaló. Te ke lava ʻo hiki ʻi he palakipoé ʻa e hīkisia ʻa Neamaní mo e loto fakatōkilalo ʻa Neamaní, ke kamataʻi ʻaki ha fealēleaʻaki. ʻE lava ke kumi ʻe he kau mēmipa ʻo e kalasí ʻi he 2 Ngaahi Tu‘i 5:1–19 pea hiki ʻi he palakipoé ʻa e ngaahi kupuʻi lea ʻoku nau fakafōtunga e hīkisia pe loto fakatōkilalo ʻa Neamaní. ʻOku tau tatau fēfē he taimi ʻe niʻihi mo Neamaní? ʻOku tau tatau fēfē he taimi ʻe niʻihi mo ʻene kau tamaioʻeikí? Kuo tau ʻilo fēfē ʻa e meʻa naʻe ʻilo ʻe Neamaní?
-
Ko ha lēsoni ʻe taha te tau lava ʻo ako mei he talanoa ko ʻení ko hono mahuʻinga ʻo e talangofua ki he ʻOtuá ʻi he fanga kiʻi meʻa īkí. Te mou lava ke kamata ʻaki hano lau ʻo e 2 Ngaahi Tu‘i 5:9–12 pea ʻeke ki he kau mēmipa ʻo e kalasí ʻenau fakakaukau ki he ʻuhinga naʻe “ʻalu [ai ʻa Nemani] ʻi he ʻita lahi” (veesi 12). Ko e hā ‘oku tau faʻa sai‘ia ange ai he taimi ʻe niʻihi ke fai ha “meʻa lahi” ʻoku kole mai ʻe he ʻOtuá, kae ʻikai ko e fanga kiʻi meʻa faingofuá? (veesi 13). Ko e hā e mahu‘inga hono fai e fanga kiʻi me‘a faingofua ko ʻení?
“Ko kinautolu ʻoku kau mai kiate kitauá ʻoku tokolahi hake ʻiate kinautolu ʻoku kau kiate kinautolú.”
-
‘Oku tau foua kotoa ha ngaahi taimi ʻoku tau ongoʻi tuenoa pe ilifia ai. Fakakaukauʻi ʻa e founga ʻe ala tokoni ai hono aleaʻi e fakamatala ʻi he 2 Ngaahi Tuʻi 6:8–23 ki he kau mēmipa ʻo e kalasí ʻoku nau ongoʻi pehení. Te mou lava ʻo kamata ʻaki hano fehuʻi pē ki he kau mēmipa ʻo e kalasí pe ko e hā ne nau ongoʻi ʻi he ngaahi veesi ko ʻení. Te nau toe lava foki ʻo vahevahe ha ngaahi aʻusia ʻi he taimi naʻe “fakaʻā [ʻe he ʻEikí honau] matá” (veesi 17) mo tokoni ke nau ʻilo naʻe ʻikai ke nau tuenoa (vakai foki, “Ngaahi Ma‘uʻanga Tokoni Kehé”). Te tau lava fēfē ʻo fetokoniʻaki ke “ʻoua naʻa [tau] manavahē”? (veesi 16).
Ngaahi Maʻuʻanga Tokoni Kehe
“Fakaʻā hotau mata fakalaumālié.”
Fekauʻaki mo e 2 Ngaahi Tuʻi 6:8–23, na‘e pehē ʻe ‘Eletā Lainolo A. Lasipeni:
“Mahalo pē ʻe ʻi ai pe ʻikai fekauʻi mai ha saliote afi ia ke matafi atu ai ʻetau ilifiá mo ikunaʻi e ngaahi meʻa fakailifiá, ka ʻoku mahino ʻa e lēsoní. ʻOku tau kau mo e ʻEikí, ʻokú Ne tokaimaʻananga mai mo Ne tāpuakiʻi kitautolu ʻi ha founga ko Ia tokotaha pē te Ne lavá. ʻE lava ʻe he lotú ʻo ʻomi e ivi mo e fakahā ʻoku tau fie maʻu ke fakatefito ai ʻetau fakakaukaú ʻia Sīsū Kalaisi mo ʻEne feilaulau fakaleleí. Naʻe ʻafioʻi ʻe he ʻEikí ʻe ʻi ai ha ngaahi taimi te tau ongoʻi ilifia ai. Kuo tau ʻosi foua kotoa ia. … Mahalo ʻoku tau tokosiʻi ʻi he Siasí ni, ʻo fakatatau mo e lau fika ʻa e māmaní, ka ko e taimi ʻoku fakaava ai hotau mata fakalaumālié, ʻko kinautolu ʻoku kau mai kiate [kitautolú] ʻoku tokolahi hake ia ʻiate kinautolu ʻoku kau kiate kinautolú’ [2 Ngaahi Tu‘i 6:16]” (“ʻOua ʻe Puputuʻu,” Liahona, Nōvema 2018, 18–19).
Ko Hono Fakatupulaki ʻEtau Founga Akoʻí
Taki e kau akó ki he ngaahi folofolá. Ko e taimi pē te ke lava aí, peá ke poupouʻi e kau mēmipa ʻo e kalasí ke nau tafoki ki he folofolá mo e ngaahi lea ʻa e kau palōfita mo‘uí ke maʻu ha fakahinohino, ha tali ki he ngaahi fehuʻí, mo ha tokoni. Ko e folofola ʻa e ʻOtuá ko e maʻuʻanga lelei taha ia ʻo e moʻoní. (Vakai, Ko e Faiako ʻi he Founga ʻa e Fakamoʻuí, 21.)