Te Mesia i roto i te ’ahu ’ute’ute hā’atihia e te mau ta’ata e tūturi ra

E tu’u te mau turi ato’a i raro, nā J. Kirk Richards

22–28 nō ’Ātete

Salamo 102–103 ; 110 ; 116–119 ; 127–128 ; 135–139 ; 146–150

« ’O tei huti i te aho ra ’ia ha’amaita’i ana’e ïa ia Iehova »

’Ia mana’o ’outou, e aha te mau ha’api’ira’a i roto i te Salamo ’o tē tauturu maita’i roa i te mau melo o tā ’outou piha ha’api’ira’a ? ’A tuatāpapa ai ’outou i teie hepetoma, ’a feruri nāhea ’outou e nehenehe ai e tauturu i te mau pīahi ’ia ’ite i te aura’a o te mau parau a teie mau Salamo.

Pāpa’i i te mau mana’o e tae mai

ītona fa’a’itera’a

Tītau i te mana’o

’A hōro’a i te mau pīahi i te tahi tau minuti nō te hi’o fa’ahou i te Salamo tā rātou i tai’o i teie hepetoma, ’e ’a ani i te tahi pae ’ia fa’a’ite mai i te hō’ē tuha’a auhia. ’A fa’aitoito ia rātou ’ia fa’a’ite mai i te mea tā te Vārua i ha’api’i ia rātou. E mea nāhea tō te mau Salamo ha’amaita’ira’a i tā tātou iho ha’amorira’a i te Fatu ?

ītona ha’api’ira’a

Ha’api’i i te ha’api’ira’a tumu

Salamo 102–3 ; 116

E ti’a i te Fatu ’ia tāmāhanahana ia tātou i roto i tō tātou mau māuiui.

• ’Ua fāri’i ānei te mau melo ’o tā ’outou piha ha’api’ira’a i te mau mana’o tei fāri’ihia e te ta’ata pāpa’i o te Salamo 102 ? Nāhea e ti’a ai ia tātou ’ia fāriu atu i ni’a i te Fatu ’ia tupu ana’e te mana’o paruparu ’aore rā, te hepohepo i roto ia tātou ? ’A tuatāpapa ai te mau pīahi i te Salamo 102, 103,’e te 116 i te fare i teie hepetoma, e nehenehe e ’itehia mai ia rātou te mau fa’ahitira’a parau ’o tē fa’auru ia rātou ’ia fāriu atu i te Fatu i roto i tō rātou mau tāmatara’a. ’A fa’aitoito ia rātou ’ia fa’a’ite mai i te mau mea tei ’itehia ia rātou, ’aore rā, ’ia ’imi te piha tā’āto’a i te tahi mau fa’ahitira’a parau fa’auru. E nehenehe ato’a te mau pīahi e paraparau nō ni’a i te huru o tō te Fatu pāturura’a ia rātou i roto i te mau taime ’ati.

• E nehenehe te mau melo o tā ’outou piha ha’api’ira’a e ’oa’oa ’ia pāpa’i i tā rātou iho Salamo nō ni’a i te huru ’o tō te Fatu tauturura’a ia rātou i roto i te mau taime tāmatara’a. ’Aita e tītauhia te mau salamo roa ’aore rā, te fifi—te tahi noa mau fa’ahitira’a parau ’ōhie nō te fa’aro’o, te māuruuru, ’e te ’āruera’a. E nehenehe te mau pīahi e ’ohipa hō’ē noa ’aore rā, e ’āpitipiti, ’e e nehenehe rātou e hi’o fa’ahou i te Salamo 102, 103, ’e 116 nō te tahi mau mana’o. ’A ani i te tahi mau ta’ata ’ia fa’a’ite mai i tā rātou mau salamo, mai te mea e hina’aro rātou. E nehenehe ato’a ’outou e hīmene ’āmui i te mau hīmene nō ni’a i te huru ’ia tāmāhanahana mai te Fatu ia tātou, mai te « I hea vau e fāri’i ai i te hau » (Te mau Hīmene, n° 62.)

  Iesu e fa’aora ra

  Fa’aorara’a, nā J. Kirk Richards

Salamo 119

E tāpe’a te parau a te Atua ia tātou i ni’a i tōna ’ē’a.

• Nō te ha’amata i te hō’ē ’āparaura’a nō ni’a i te Salamo 119, e nehenehe ’outou e ani i te mau pīahi ’ia paraparau mai nō ni’a i te hō’ē taime ’a pe’e ai rātou i te hō’ē ’ē’a e tae atu ai i te hō’ē vāhi (e mea tano ’ia fārerei i te hō’ē ta’ata nā mua roa, ’e ’ia ani iāna ’ia fa’aineine nō te paraparau mai i teie parau). E aha te mau ’ohipa i tupu tei ha’afifi roa i te parau nō te vai-noa-ra’a i ni’a i te ’ē’a ? E aha te mea i tauturu ia rātou ’ia vai noa i ni’a i te ’ē’a ? I teie nei, e nehenehe ’outou e pāpa’i i te hō’ē ’ē’a i ni’a i te tāpura ’ere’ere ’e e ani i te mau pīahi ’ia pāpa’i i te mau pereota nō roto mai i te Salamo 119 ’o tē fa’a’ite ra i te mea tā te Fatu i rave nō te tauturu ia tātou ’ia vai noa i ni’a i tōna ’ē’a nō te fafaura’a. E nehenehe ’outou e fa’a’ite i te fa’ahitira’a parau a te peresideni Russell M. Nelson i roto i « Te tahi atu mau rāve’a tauturu » ’ei tuha’a nō tā ’outou ’āparaura’a.

• E nehenehe te mau melo ’o tā ’outou piha ha’api’ira’a e fāna’o i te fa’aaura’a i te mau mea tā te Salamo 119 e ha’api’i nei nō ni’a i te fa’aeara’a i ni’a i te ’ē’a o te Fatu, ’e te tahi atu mau pāpa’ira’a mo’a e ha’api’i ato’a ra i te reira mau parau mau. E nehenehe e vāhi i te piha ha’api’ira’a nā roto e rave rahi pupu ’e e ani i te pupu tāta’itahi ’ia hi’o fa’ahou i te mau ’īrava mai teie : Salamo 119:33–40, 105 ; Maseli 4:11–19 ; 1 Nephi 8:20–28 ; 11:25 ; 2 Nephi 31:17–21 ; Alama 7:9, 19–20. E ani i te pupu tāta’itahi ’ia fa’a’ite mai i te mea tā rātou i ha’api’i mai. ’A hōro’a i te taime i te mau pīahi ’ia feruri i te mau mea i fa’auruhia rātou ’ia rave mai te au i tā rātou i ha’api’i mai.

Salamo 139

’Ua ’ite te Fatu i tō tātou ’ā’au.

• Te ’itera’a ē, ’ua ’ite te Fatu ia tātou—tō tātou mau mana’o ’e te mau ’ohipa, te mau pūai ’e te mau paruparu—’e ’ua here ’oia ia tātou, e nehenehe te reira e fa’atupu i te hō’ē fa’aurura’a pūai i ni’a i te mau mā’itira’a tā tātou e rave. E nehenehe ’outou e ani i te mau pīahi ’ia ’imi i te mau pereota i roto i te Salamo 139 ’o tē ha’api’i nei i teie parau mau faufa’a rahi. E aha tā te ’itera’a i teie parau mau e fa’atupu i ni’a i tō tātou orara’a ? E nehenehe ato’a te mau pīahi e ’āparau i te mau rāve’a e nehenehe ai ia tātou ’ia ani i te Fatu ’ia « hi’opo’a mai ’oe iā’u, e te Atua, ’ia ’ite ho’i ’oe i tā’u ’ā’au » (’īrava 23).

ītona nō te tahi atu mau rāve’a tauturu

Te tahi atu mau rāve’a tauturu

Te ’ē’a ’āfaro ’e te piriha’o.

’Ua parau te peresideni Russell M. Nelson :

« Mai te mea e tītauhia ’ia manuia tō tātou tere i roto i te orara’a nei, e ti’a ïa ia tātou ’ia pe’e i te arata’ira’a a te Atua. ’Ua parau te Fatu ē, ‘’a hi’o mai iā’u nei i tō mau mana’o ato’a na; ’eiaha e fē’a’a, ’eiaha e mata’u’ [Te Parau Ha’api’ira’a ’e te mau Parau Fafau 6:36]. ’E ’ua pāpa’i te Salamo ē, ‘e lamepa tā ’oe parau i tō’u nei ’āvae, e ti’arama nō tō’u nei mau ’ē’a’Salamo 19:105] […]

« I roto i tō ’outou tere i roto i te orara’a nei, e fārerei ’outou e rave rahi fifi ’e e rave ho’i i te tahi mau hape. E tauturu te arata’ira’a pāpa’ira’a mo’a ia ’outou ’ia ’ite i te hape ’e ’ia rave i te fa’atītī’aifarora’a e tītauhia. E fa’aea ’outou i te haere i te vāhi hape. E tuatāpapa māite ’outou i te hōho’a purūmu o te pāpa’ira’a mo’a. I muri iho, e rave ’outou i te tātarahapara’a ’e te fa’aho’ira’a e tītauhia nō te haere nā ni’a i te ’ē’a ’āfaro ’e te piriha’o ’o tē arata’i atu i te ora mure ’ore ra’ [2 Nephi 31:18] » (« Living by Scriptural Guidance [Te orara’a mai te au i te arata’ira’a pāpa’ira’a mo’a] », Ensign, Novema 2000, 17).

Ha’amaita’i i tā tātou ha’api’ira’a

’A fa’a’ohipa ia rātou i roto i te fifi. I te tahi mau taime, te mea tā te mau melo o te piha ha’api’ira’a i roto i te fifi, e hina’aro nei, ’oia ho’i ’ia fāri’ihia ’e ’ia herehia rātou. E nehenehe e ani ia rātou ’ia rave i te hō’ē tuha’a i roto i te hō’ē ha’api’ira’a i muri nei, ’aore rā ’ia ha’apāpū ē, e faura’o tō rātou nō te haere mai i te purera’a. ’Eiaha e fa’aru’e mai te mea e’ita rātou e pāhono i tā ’outou mau tauto’ora’a i te ha’amatara’a. (Hi’o Ha’api’ira’a mai tā te Fa’aora, 8-9.)