Iesu e haere ra ’e te mau māmoe

’O Iehova tō’u tīa’i, nā Yongsung Kim, havenlight.com

8–14 nō ’Ātete

Salamo 1–2 ; 8 ; 19–33 ; 40 ; 46

« ’O Iehova tō’u tīa’i »

’A fa’anaho i te mau rāve’a nō te vaiiho i te mau pīahi ’ia fa’a’ite mai i te mau ’itera’a pae vārua tā rātou i fāri’i ’a tai’o ai rātou i te Salamo.

Pāpa’i i te mau mana’o e tae mai

ītona fa’a’itera’a

Tītau i te mana’o

E nehenehe te anira’a i te mau pīahi ’ia fa’a’ite mai i te mau mea tei ’itehia ia rātou i roto i te Salamo, e riro ’ei ’ohipa ’ōhie, mai te uira’a i te mau uira’a mai teie : E aha tā te Vārua i ha’api’i ia ’outou ’a tai’o ai ’outou i te Salamo i teie hepetoma ? E aha te Salamo tei tauturu ia ’outou ’ia piri ta’a ’ē atu i te Fatu ?

ītona ha’api’ira’a

Ha’api’i i te ha’api’ira’a tumu

Salamo 1 ; 23 ; 26–28 ; 46

Tē ha’api’i nei te Salamo ia tātou ’ia ti’aturi i te Fatu.

• Tē parau nei te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’ia tai’o i te Salamo 1 ; 23 ; 26–28 ; 46 ’e ’ia ’imi i teie mau mea i muri nei:

  • Te mau anira’a ’ia ti’aturi i te Fatu

  • Te mau ta’o e fa’a’ite ra i te Fatu

  • Te mau ta’o e fa’a’ite ra i te hau, te pūai, ’e te tahi atu mau ha’amaita’ira’a tāna e hōro’a mai

  • Te mau ta’o e fa’a’ite ra i te feiā e ti’aturi iāna

  E nehenehe ’outou e pāpa’i i teie mau pereota i ni’a i te tāpura ’ere’ere ’e e ani i te mau pīahi ’ia pāpa’i i pīha’i iho i te pereota tāta’itahi, i te hō’ē mea tei ’itehia ia rātou i roto i te Salamo 1 ; 23 ; 26–28 ; ’aore rā 46. Mai te mea e hina’aro rātou i te tauturu, e nehenehe ’outou e fa’ahi’o ia rātou i teie mau ’īrava : Salamo 1:1–4 ; 23:1–6 ; 26:1, 6–8, 12 ; 27:1, 3, 8, 14 ; 28:1, 7 ; 46:1–3, 10. E nehenehe te mau pīahi e fa’a’ite mai i te mau mana’o tei fāri’ihia e rātou nō ni’a i te Fa’aora ’a tai’o ai rātou i teie Salamo.

• I te mea ho’i ē, e au te Salamo i te mau hīmene nō te ’āti -Īserā’ela, e nehenehe ’outou e ani i te mau pīahi ’ia fa’a’ite mai i te mau hīmene ’o tē fa’aha’amana’o ia rātou i te mau Salamo tā rātou i tai’o i teie hepetoma. E nehenehe rātou e hi’o i te fa’ahorora’a « Pāpa’ira’a mo’a » i te pae hope’a o te buka hīmene nō te mau mana’o (hi’o ato’a i te tāpura i roto i « Te tahi atu mau rāve’a tauturu »). E nehenehe te mau pīahi e hīmene i te tahi o teie mau hīmene ’e ’ia ’imi i te mau tumu parau e ’aifāito i roto i te mau hīmene ’e te mau salamo. E aha te mau parau poro’i nō te hau ’e te fa’aro’o ia Iesu Mesia tā tātou e ’ite nei ?

Salamo 2 ; 22 ; 31:5

Tē fa’atoro nei te Salamo i tō tātou ferurira’a i ni’a i te orara’a ’e i te ’ohipa tāvinira’a a Iesu Mesia.

• Te tai’ora’a i te Salamo—te mau salamo iho ā rā e fa’a’ite nei i te orara’a o te Fa’aora— e nehenehe te reira e riro ’ei rāve’a rahi nō te ha’apūai i te fa’aro’o ia Iesu Mesia. E nehenehe ’outou e vāhi i te piha ha’api’ira’a i roto e rave rahi pupu e piti ta’ata ’aore rā, hau atu, ’e e hōro’a i te pupu tāta’itahi i te hō’ē o teie mau fa’ahorora’a ’āpitipiti : Salamo 2:1–3 ’e Te mau ’Ohipa 4:24–28 ; Salamo 2:7 ’e Te mau ’Ohipa 13:30–33 ; Salamo 22:1 ’e Mataio 27:45–46 ; Salamo 22:7–8 ’e Mataio 27:39–43 ; Salamo 22:16 ’e Luka 23:32–33 ; Salamo 22:18 ’e Mataio 27:35 ; Salamo 31:5 ’e Luka 23:46. ’A ani i te pupu tāta’itahi ’ia ’imi e mea nāhea te hō’ē parau tohu i roto i te Salamo i te fa’atupura’ahia i roto i te orara’a o te Fa’aora, ’e ’a tāu’aparau e nāhea teie mau pāpa’ira’a mo’a i te ha’apūai i tō rātou ’itera’a pāpū nō te Fa’aora.

  ’Aore rā e nehenehe ’outou e pāpa’i i te mau fa’ahorora’a o te pāpa’ira’a mo’a i ni’a i te tāpura ’ere’ere, ’e e ani i te mau pīahi ’ia fa’atū’ati i te hō’ē pāpa’ira’a i roto i te Salamo i ni’a i te ’ohipa i tupu i roto i te Faufa’a ’Āpī.

  E nehenehe ato’a ’outou e ani i te mau pīahi ’ia fa’a’ite mai i te tahi atu mau fa’ahorora’a nō ni’a i te Fa’aora tei ’itehia ia rātou i roto i tā rātou tuatāpapara’a i te Salamo (mai te Salamo 34:20 ; 41:9 ; hi’o ato’a Luka 24:44).

  I muri a’e i te ’āparaura’a a mau melo o te piha ha’api’ira’a i teie mau pāpa’ira’a mo’a, e nehenehe rātou e paraparau nō te aha teie mau salamo i riro ai ’ei mea faufa’a nō te mau ’āti Iuda tei ’ite i te Fa’aora. Nō te aha te reira e riro ai ’ei mea faufa’a nō tātou?

Salamo 23

« ’O te Fatu to’u tīa’i ».

• Nō te tauturu i te mau pīahi ’ia ’āparau i te fa’ahōho’ara’a ’e i te tāpa’o i roto i te Salamo 23, e nehenehe e fa’a’ite i te mau hōho’a e tū’ati i ni’a i te mau mana’o i roto i te salamo, mai terā i roto i te Mai, pe’e mai—nō te ta’ata hō’ē ’e te ’utuāfare. I muri iho e nehenehe ’outou e ani i te mau pīahi ’ia ’imi i te mau ta’o ’aore rā, te mau pereota faufa’a i roto i te salamo ’e e tāu’aparau e aha tā te reira e fa’ahōho’a ra. ’Ei hi’ora’a, e aha tā te mau pereota mai teie « tē fa’ata’oto nei ’oia iā’u i te mau ’āua he’euri ra » ’aore rā, « te pape atati’a ra » e fa’atupu i roto i te ferurira’a ? E aha tā te « rā’au » ’e te « to’oto » tāmāhanahana e fa’ahōho’a nei ? E aha te aura’a « tē ’ī nei tā tātou ’āu’a » ? E aha tā teie mau tāpa’o e ha’api’i nei ia tātou nō ni’a ia Iesu Mesia ? E nehenehe ’outou e parau i te mau pīahi ’ia fa’ahiti fa’ahou i te salamo, ma te mono i te tahi mau tāpa’o i tō rātou mau aura’a tei paraparauhia e te piha ha’api’ira’a.

ītona nō te tahi atu mau rāve’a tauturu

Te tahi atu mau rāve’a tauturu

Te mau hīmene e tū’ati i te mau Salamo.

• Salamo 8:3–9 ; 9:1–2. « Tō’u Fa’aora tō’u Atua » (Te mau Hīmene, no. 42)

• Salamo 23. « Iehova tō’u tīa’i », « The Lord my pasture will prepare » (Te mau Hīmene, Hymns nos. 54, 109)

• Salamo 23:6 ; 150. « ’Ārue iāna te Ari’i Mana Hope ra » (Te mau Hīmene, no. 33)

• Salamo 26:8. « ’Ua here mātou i tō ’oe nā fare » (Te mau Hīmene, no. 150)

• Salamo 27:1. « ’O te Fatu tō’u māramarama » (Te mau Hīmene, no. 43)

• Salamo 33:1–6 ; 95:1–6. « Nehenehe te ao nei » (Te mau Hīmene, no. 35)

• Salamo 37:3–9. « Tō’u vārua: tei te Fatu ’oe » (Te mau Hīmene, no. 61)

• Salamo 148. « E tā te Atua rahi » (Te mau Hīmene, no. 28)

Ha’amaita’ira’a i tā tātou ha’api’ira’a

Fa’a’ohipa i te pehe. « E tītau te mau hīmene i te Vārua o te Fatu, e fa’atupu i te hō’ē mana’o fa’atura, e tāhō’ē ia tātou ’ei mau melo, ’e e hōro’a i te hō’ē rāve’a ia tātou nō te ’ārue i te Fatu. E tūra’i te hīmene ia tātou i roto i te tātarahapa ’e i te ’ohipa maita’i, e patu i te ’itera’a pāpū ’e te fa’aro’o, e tāmāhanahana i tei teimaha, e tāmarū i tei ’oto, ’e e fa’auru ia tātou ’ia itoito noa e tae noa atu i te hope’a »(Te mau Hīmene, ix)