e toru ta’ata e paraparau ra i te hō’ē ta’ata i ni’a i te repo

Te mau ha’avāra’a ’o Ioba, nā Joseph Brickey

1–7 nō ’Ātete

Ioba 1–3 ; 12–14 ; 19 ; 21–24 ; 38–40 ; 42

« E ti’aturi ā rā vau iāna »

E aha te mau parau mau tā te Vārua Maita’i i tauturu ia ’outou ’ia ha’api’i mai, ’a tuatāpapa ai ’outou i te buka a Ioba ? E aha tā ’outou e hina’aro e fa’a’ite i tā ’outou piha ha’api’ira’a ?

Pāpa’i i te mau mana’o e tae mai

ītona fa’a’itera’a

Tītau i te mana’o

Te mau pīahi tei tuatāpapa ia Ioba i teie hepetoma, ’ua ’itehia paha ia rātou te mau parau mau faufa’a nō rātou. Nō te fa’auru ia rātou ’ia fa’a’ite mai, e nehenehe ’outou e pāpa’i i ni’a i te tāpura ’ere’ere ’ua ha’api’i mai au nā roto mai ia Ioba… ’e e ani i te mau pīahi nāhea rātou ’ia fa’ahope i teie pereota.

ītona ha’api’ira’a

Ha’api’i i te ha’api’ira’a tumu

Ioba 1–2 ; 12–13 ; 19:23–27

E nehenehe tō tātou ti’aturi i te Metua i te ao ra ’e ia Iesu Mesia e tauturu ia tātou ’ia vai ha’apa’o maita’i noa i roto i te mau huru tupura’a ato’a.

• E nehenehe nā pene mātāmua e piti ’o Ioba, ’o tē fa’ata’a nei i te uiuira’a a Sātane nō ni’a i te mau tumu o te ha’apa’o maita’i o Ioba, e tauturu i te mau pīahi ’ia hi’opo’a i tā rātou iho mau tumu nō te ha’apa’o-maita’i-ra’a i te Metua i te ao ra ’e ia Iesu Mesia. E nehenehe te mau pīahi e ha’amata nā roto i te tāpurara’a i te tahi mau tumu e mā’iti ai te hō’ē ta’ata ’ia ha’apa’o i te mau fa’auera’a a te Atua. I muri iho, e nehenehe rātou e ’imi i te Ioba 1:6–12 ; 2:1–6 nō te ’ite i te mea tā Sātane i parau nō ni’a i te ha’apa’o maita’i o Ioba. Nō te aha e mea ataata ’ia ha’apa’o i te parau a te Fatu nō te tumu tei hōro’ahia mai e Sātane ? E aha tā te pāhonora’a a Ioba i roto i te Ioba 1:20–22 ; 2:9–10 e fa’a’ite nei nō ni’a ia Ioba ? E nehenehe te mau melo o te piha e paraparau nō te aha rātou e mā’iti ai ’ia vai ha’apa’o noa i te Atua.

  ta’ata e hi’o ra i ni’a

  Ioba, nā Gary L. Kapp

• Noa atu i te tahi mau taime, ’ua ’aro ’o Ioba i te mana’o fē’a’a ’e te ’oto, i te pae hope’a, ’ua pāturu tōna ti’aturi i te Fatu iāna i roto i tōna māuiui. Nō te ha’api’i mai i roto i te hi’ora’a o Ioba, e nehenehe te mau pīahi e ’imi i te tahi o teie mau ’īrava i muri nei nō te ’ite i te tahi mau pāhonora’a maita’i a Ioba i tōna mau tāmatara’a : Ioba 1:21 ; 2:10 ; 12:9–10, 16 ; 13:15–16 ; 19:23–27. E aha tā tātou e nehenehe e ha’api’i mai i roto i teie mau pāhonora’a ’o tē nehenehe e tauturu ia tātou ’ia pūai i te pae vārua ’ia fārerei ana’e tātou i te mau tāmatara’a ? Nō te aha e mea ataata ’ia feruri ē, e fa’autu’ara’a te mau tāmatara’a nō te hara ?

• E nehenehe te fa’ahitira’a parau a Ioba i roto i te Ioba 19:23–27 e fa’auru i te mau pīahi ’ia feruri ’e ’ia fa’a’ite i tō rātou iho ’itera’a ē, tē ora nei te Fa’aora ’o Iesu Mesia. E nehenehe ’outou e ha’amata nā roto i te anira’a i te mau pīahi ’ia feruri ma te muhu ’ore, i te mau parau a Ioba i roto i teie mau ’īrava. I muri iho, e nehenehe rātou e tāu’aparau i te mau uira’a mai teie : Nō te aha e mea faufa’a te ’itera’a pāpū nō tō tātou Fa’aora i roto i te mau taime tāmatara’a mai tā Ioba i māuiui ? E mea nāhea tō tātou ’itera’a pāpū i te pāturura’a ia tātou i roto i tō tātou mau tāmatara’a ? E nehenehe te hīmenera’a ’aore rā, te tai’ora’a i te mau paraparau o te hō’ē hīmene nō ni’a ia Iesu Mesia, mai te « ’Ua ’ite au te ora nei tō’u Fatu » (Te mau Hīmene, no. 69), e tu’u mai i te mana’o ’e te mana pae vārua i tā ’outou ’āparaura’a.

Ioba 38

E rahi atu te hi’ora’a ātea a te Atua i tā tātou.

• Tē fa’a’ite ra te hō’ē tuha’a rahi o te buka a Ioba (pene 3–37) ia Ioba ’e tōna mau hoa i te tauto’ora’a i ni’a i te uira’a ē « Nō te aha te mau mea ’ī’ino e tupu ai i ni’a i te feiā parauti’a ? » Noa atu ’aita te Fatu e pāhono hope roa nei i teie uira’a i roto i te buka a Ioba, tē hōro’a nei rā ’oia i te hō’ē parau poro’i faufa’a. E nehenehe ’outou e tauturu i te mau pīahi ’ia ’ite i teie parau poro’i nā roto i te anira’a ia rātou ’ia tai’o i te mau uira’a tā te Fatu i ui ia Ioba i roto i te Ioba 38:1–7, 18–24. E aha tā tātou i ha’api’i mai i roto i teie mau uira’a ?

• Tē hōro’a mai nei te ’evanelia a Iesu Mesia i fa’aho’i-fa’ahou-hia mai i te tahi atu mau māramarama ’o tē nehenehe e tauturu ia tātou ’ia hāro’aro’a i te tahi o te mau tumu nō te māuiui i roto i te ao nei. E nehenehe te mau pīahi e fa’a’ite mai i te mau parau mau tā rātou i ’ite maoti te fa’aho’i-fa’ahou-ra’a mai o te ’evanelia, tei hōro’a ia rātou i te hi’ora’a ’e te hāro’aro’ara’a rahi a’e nō ni’a i te māuiui. E nehenehe e ’itehia ia rātou te tahi o teie mau parau mau i roto i te mau pāpa’ira’a mo’a ’e te fa’ahitira’a parau e ’itehia i roto i « Te tahi atu mau rāve’a tauturu ».

ītona nō te tahi atu mau rāve’a tauturu

Te tahi atu mau rāve’a tauturu

Te ’itera’a o te mau mahana hope’a nei nō ni’a i te fā o te māuiui.

Nā te mau pāpa’ira’a mo’a i muri nei e hōro’a mai i te mau ’itera’a nō ni’a i te mau fā o te māuiui :

• 2 Nephi 2:11–14

• Etera 12:27

• Te Parau Ha’api’ira’a ’e te mau Parau Fafau 58:3–5

• Te Parau Ha’api’ira’a ’e te mau Parau Fafau 122

• Mose 5:10–12

’Ua ha’api’i mai Spencer W. Kimball:

« Mai te mea e hi‘o tātou i te orara’a tāhuti nei mai te tā’āto’ara’a o te orara’a, e riro ïa te māuiui, te ’oto, te manuïa ’ore ’e te orara’a poto ’ei ’ati rahi. Mai te mea rā e hi’o tātou i te orara’a mai te hō’ē mea mure ’ore e toro atu i te ātea roa i roto i te orara’a hou tē tāhuti nei, ’e i roto i te tau mure ’ore i muri a’e i te pohe, i reira ïa e nehenehe ai e tu’u i te mau mea ato’a i roto i tō rātou vaira’a mau.

« ’Aita ānei e pa’ari tō roto i te Atua i te hōro’ara’a mai ia tātou i te mau tāmatara’a ’ia upo’oti’a tātou i ni’a i te reira, te mau hōpoi’a e ti’a ia tātou ’ia fa’aoti, te ’ohipa nō te ha’apa’ari i tō tātou mau uaua, te mau ’oto nō te tāmata i tō tātou vārua ? ’Aita ānei tātou i tu’uhia i mua i te mau fa’ahemara’a nō te tāmata i tō tātou pūai, te ma’i ’ia ti’a ia tātou ’ia ha’api’i mai i te fa’a’oroma’i, te pohe ’ia riro mai tātou ’ei mea tāhuti ’ore ’e ’ia faahanahanahia ?

« Mai te mea e hōro’a-’oi’oi-noa-hia te ’oa’oa ’e te hau ’e te mau ha’amāuruurura’a i te ta’ata rave i te ’ohipa maita’i, ’aita ïa e ’ino—e rave ïa te mau ta’ata ato’a i te maita’i, ’eiaha nō te ti’a-mau-ra’a o te ravera’a i te maita’i. ’Aita ïa e tāmatara’a nō te pūai, ’aita ïa e fa’ahotura’a i te huru o te ta’ata, ’aita e tupura’a i te rahi o te mau mana, ’aita e ti’amāra’a » (Te mau Ha’api’ira’a a te mau peresideni o te ’Ēkālesia : Spencer W. Kimball [2006],15).

Ha’amaita’ira’a i tā tātou ha’api’ira’a

Pe’e i te Vārua. E’ita ’outou e nehenehe e tohu mai te aha te huru o te terera’a o te ha’api’ira’a tāta’itahi, terā rā, nā te mau fa’aurura’a a te Vārua e arata’i ia ’outou. Mai te mea ’ua ineine ’outou i te pae vārua, e hōro’a mai te Fatu ia ’outou « i te taime mau iho ā, i te mea tā [’outou] e parau » (Te Parau Ha’api’ira’a ’e te mau Parau Fafau 100:6), ’e penei a’e ’o te mea mau ïa tā te mau melo o te piha ha’api’ira’a e ti’a ’ia fa’aro’o. (Hi’o Ha’api’ira’a mai tā te Fa’aora,10.)