Aokati 29– Tebetembwa4

Taeka n Rabakau 1–4; 15–16; 22; 31; Te Minita 1–3; 11–12

“Makan Iehova bon Moan Rikin te Ataibwai”

E na kanga te rongorongo n Taeka n Rabakau ao Te Minita ni kakabwaiai mauiia naake ko reireiniia? Ira ana kairi te tamnei ao am namakin ake ko karekei ngkai ko kamatebwai ao ni katauraoi n anga reirei.

Korei Am Namakin

Kaunga te Tibwatibwa

A mwaiti rongorongo aika tamaroa ao n anai nano inanon Taeka n Rabakau ao Te Minita. Imwaain maroroakinan mwakoro aika a kaonotaki, n aron akana a koreaki inano, kaoiia kaain te kiraati bwa a na tibwai tabeua kiibu ake mamaten nanoia man aia kamatebwai i bon irouia ke n te utu n te wiiki aei.

Reirei te Reirei

Taeka n Rabakau 1–4; 15–16; Te Minita 1–3; 11–12

“Katanimaia taningam nakon te rabakau.”

• Te kakao bwa ko na ukora te rabakau ao ataibwai e kaokiokaki rinanon nako Taeka n Rabakau. Ko na kanga n buokiia kaain te kiraati bwa a na tibwaa te bwai are a reiakinna n tain aia kamatebwai? Teuana te kawai tao ko na korea rabakau iaon te burakibooti ao kaoiia kaain te kiraati bwa a na aanga riki nambwan kiibu man Taian Rabakau ke Te Minita ake a namakinna bwa e katauraoi nonori mai iroun te tamnei iaon te rabakau. (Ngkana e na ibuobuoki, ko kona n tuangiia kaain te kiraati n kakaea n Taeka n Rabakau 1–4; 15–16; Te Minita 1–3; 11–12.) Tera ae ti reiakinna iaon te rabakau man kiibu aikai? Ti kanga ni kakabwaiaaki ngkana ti ukoukora te rabakau mai iroun te Uea?

Taeka n Rabakau 1:7; 2:5; 3:7; 8:13; 15:33; 16:6; 31:30; Te Minita 12:13

“Tai bakanrabakau i matam: ko na maka Iehova.”

• Teuana riki te boto ni iango ae kuneaki rinanon nako Taeka n Rabakau ao Te Minita bon “maakan Iehova” (Taeka n Rabakau 1:7; taraa naba Taeka n Rabakau 2:5; 3:7; 8:13; 15:33; 16:6; 31:30; Te Minita 12:13). Tao a kona kaain te kiraati ni warekii kiibu aikai ao n tibwaua bwa tera ae a namakinna ae nanonaki ni maaka Iehova. E kangaa maakan Iehova ni kaokoro ma aekakin maaku riki ake tabeua? Ko kona n tibwaa te nonori mai iroun Unimwaane David A. Bednar n ana kabwarabwara are e kuneaki n “Bwaai n Ibuobuoki Riki Tabeua.”

Reiakinna n Onimakina te Uea, iroun Kathleen Peterson

Taeka n Rabakau 3:5–7

“Ko na onimakina Iehova n nanom ni kabane.”

• Kaain te kiraati a na kukurei n te reirei n te bwai ae kotaki are e buokiia ni mataata bwa tera nanon ae “ko na onimakina Iehova” ao “tai mwiokoa oin [aia] ataibwai” (Taeka n Rabakau 3:5). Te katooto, ko kona ni kaoa temanna kaain te kiraati bwa e na rara nakon te bwai ae matoatoa ao n aki mwaingiing, n aron te oo. Ngkanne te aomata anne e kona ni kataia n rara nakon te bwai ae aki matoatoa, n aron te buruum. E kanga te bwai ae e karaoaki aei ni buokiira bwa ti na mataata iaon Taeka n Rabakau 3:5? Tera ae e reirei iaona Taeka n Rabakau 3: 5–7 bwa tera ae e nanonaki n onimakina Iehova? Bukin tera bwa te iango ae aki tamaroa ni bon onimakina oin ara ataibwai? Ti kanga n tia n namakinna ae te Uea e kaira kawaira ngkai ti a tia n onimaki Irouna?

Taeka n Rabakau 15:1–2, 4, 18,28; 16:24–32

“E raira nako te un te kaeka ae nimamanei.”

• Ni buokiia kaain te kiraati ni maooro bwa a na kanga ni karekea riki te rau ao ni kauarerekea te kakauntaeka inanon mauia, ko kona ni kaoiia bwa a na wareka Taeka n Rabakau 15:1–2, 18; 16:32. Ngkanne a kona n tibwauai taneiai ae a tia ni karekei are e kaotii koauan bwaai ake a taekinaki man kiibu aikai. Te katooto, n ningai ae e a tia ni kabonganaaki te “kaeka ae nimamanei” ni “[kanakoa] te un”? (Taeka n Rabakau 15:1). Ke a kona ni iangoa te tai ngke te Tia Kamaiu e karaoa nanon te bwai are e reiakinaki inanon kiibu aikai (taraa Ioane 8:1–11; 18:1–11). Ti na kanga n ira ana katooto ngkana ti karaoa te reitaki ma tabeman?

• Ngkai taan korea Taeka n Rabakau aki ataia bwa mwaitira bwaai n reitaki ae ti kabonganai ngkai n ara bong, taeka n reirei ake inanon Taeka n Rabakau 15 ao16 a kaineti nakon nikabane bwaai n reitaki. Ni buokiia kain te kiraati bwa a na mataata n aei, ko kona ni kaoiia n tatabemaniia nako bwa a na anaa teuana te kibu man koroboki aika tabu ni warekia: Taeka n Rabakau 15:1–2, 4, 18,28; 16:24, 27–30. A kona kaain te kiraati ni manga taekina aia taeka n rabakau n aron ae anga taeka n reirei iaon te reitaki iaon bwaai ni kaongoraa, rinanon te tekiting, ke iaonrain. A kona ni kunei taeka n reirei are e na buokiia riki iaon “Taetae” inanon Ibukin Kakorakoraaia te Roronrikirake (2011), 21–21.

Bwaai n Ibuobuoki Riki Tabeua

“Makakin te Atua bon tangirana ao te onimaki Irouna.”

Unimwaane David A. Bednar e kabwarabwaraa:

“Makakin te Atua e rikirake man te atatai ae eti n aron ana mition Iesu Kristo n arona n Atua, te tatauraoi n anga nanora nakon Nanona, ao te atatai bwa ni kabane mwaane ao aine a bane ni bukintaeka nakon are bon oin aia bure ni Bongin te Motikitaeka…

“Makakin te Atua bon tangirana ao te onimaki Irouna. Ngkai ti maaka te Atua n ae bwanin, ti tangiria n ae e kororaoi riki. Ao ‘te tangira are e kororaoi e kakioa nako te maaku ni kabane’ (Moronaai 8:16). I berita bwa te oota ae otanako ni makan te atua e na kakionakoa roon te roo n te maaku n te maiu ae mamate (taraa Reirei ao Berita aika Tabu 50:25) ngkai ti taraa te Tia Kamaiu, ni kateitei Iaona bwa aara, ao n ni waaki rake iaon Ana kawai ni berita ma te nanomatoa ae katabuaki” (“Therefore They Hushed Their Fears,” Riaona, Meei 2015, 48–49).

Kanakoraoan Ara Anga reirei

Kabanea Nanom iaon Iesu Kristo. Bon akea riki te kawai ae tamaroa ni karikirakea aia onimaki naake ko reireiniia man ti man kabotoana am reirei iaon te Tia Kamaiu. Rinanon nako am anga reirei, kaoiia kaain te kiraati bwa a na kateitei “i aon te bwa are ara Tia Kabomwi, are Kristo, natin te Atua” (Ereman 5:12).