“Tebetembwa 19–25, Itaia 40–49: ‘Kabebetei Nanoia au Aomata,’” Nakomai, Iriirai—Ibukin te Reirei n Tabati: O Tetemanti 2022 (2021)
“Tebetembwa 19–25, Itaia 40–49,” Nakomai, Iriirai—Ibukin te Reirei n Tabati: 2022
Healing the Blind Man, [Kamaiuan te Mwaane ae Matakii], iroun Carl Heinrich Bloch
Tebetembwa 19–25
Itaia 40–49
“Kabebetei Nanoia au Aomata”
Tabeman aomata a bae n aki tauraoi n tibwaa aia iango n te kiraati ibukina bwa a namakinna ae e aki bati n tau aia atatai iaon koroboki aika tabu. Ko na kanga ni buokiia kaain te kiraati n namakinna bwa aia atatai ni bwain te tamnei e kinaaki?
Korei Am Namakin
Kaunga te Tibwatibwa
Iangoia ni koreia iaon te burakibooti titiraki aikai: Tera ae e reiakiniko te Tamnei ngkai ko kamatebwaia Itaia 40–49? A kona kaain te kiraati n iangoa te titiraki aei ngkai a korei rekeia, ao tabeman a kona n tibwaa aia iango.
Reirei te Reirei
E kona Iesu Kristo ni karau nanora ao n anganira te kantaninga.
-
Te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu e kaotia bwa a na noraki rongorongo ibukin te karau nano ao te kantaninga inanon Itaia 40–49 ao korei ni karinanii tabeua taeka ni moanna mai iai. Ko kona n tuangiia kaain te kiraati bwa a na tibwauai rongorongo ake a kunei. Kaungaia bwa a na marooro bwa a kanga rongorongo aika ni buokiia Iutaia ake a taenikai ao a na kanga ni buokiira ni boong aikai. Ko kona naba ni kairiia nakon kiibu ake ko kunei inanon am tai ni kamatebwai i bon iroum. Tera ae e tangiriira te Uea bwa ti na ataia Ibukina? E kanga ni karau nanora? Ko kona ni kauringiia kaain te kiraati bwa “te Uea” n te O Tetemanti e kaeinetaki nakon Iehova, ke Iesu Kristo.
-
Te anene n taromauri “Ngkami Ana Tabu Te Uea” (Te Boki n Anene n Taromauri, nambwa 6) e anaaki man ana taeka Itaia n Itaia 41:10; 43:2–5; 46:4. Imwiin warekan koroboki aika tabu aikai ao n anenei kiibu man te boki n anene aika a tau taekaia, kaain te kiraati a kona ni marooro n aroia ngke a namakinna bwa e mena te Uea irouia ao a kanga taneiai akanne ni buokiia bwa a na “aki maaku.”
“E na kakamwarakea ana nanai n ai aron te tia kawakin tiibu” (Itaia 40:11).
Itaia 40:1–3, 9–11; 43:8–13; 48:20–21; 49:1–9
“Bon tani kakoauaa au taeka ngkami.”
-
Tera ae nanonaki bwa taani “kakoaua” ibukin te Uea? A kona kaain te kiraati ni iangoa te titiraki aei ngkai a wareka teuana ke ae mwaiti riki iaon kiibu aikai: Itaia 40:1–3, 9–11; 48:20–21; 49:1–9. Taeka ake inanon “Bwaai n Ibuobuoki Riki Tabeua” a kona naba n anga tabeua kaekaan titiraki. Tera taian “rongorongo aika raoiroi” ake ti tibwai ngkai taan kakoaua iroun te Uea? Tera inanon taian kibu aikai ae buokiira n “aki maaku” n tibwaa ara kakoaua? (Itaia 40:9). Kaain te kiraati a konaa ni marooro iaon taai ngke a riki bwa taan kakoaua iroun te Uea ao e kangaa aia koaua ni kona ni kakabwaiaia tabeman.
-
Ni buokiia kaain te kiraati ni kamwakura te reirei n Itaia 43:8–13, ko kona ni kaoia bwa a na katamneia bwa aongkoa a tia ni kaoaki bwa a na tei n te tabo n anga koaua n tain te bowii ni kaburebure. N te bowi aei, Iesu Kristo e bukinaki bwa e taekina te bwai are e koreaki n Itaia 43:11. Ngkana ti weteaki bwa taan kakoaua ni boutoka Iesu n te bwai are e taekina (taraa kibu 10), teraa ara kakoaua ae ti na aanga? Teraa bwaai ni kakoaua mani maiura ae ti na kaotia?
E kona te Uea ni kanakoraoira rinanon karawawataara.
-
Tao a kona kaain te kiraati ni marooroakinna bwa a kanga taeka aika mai iroun Unimwaane Quentin L. Cook e buokiira ni mataata iaon Itaia 48:10: “Nakoraoin te anua ao te etieti ake a mwakuriaki n te kabuebue inanon te nenikanaiai ae te karawawataaki a kanakoraoira ao ni kaitiakiira” (“The Songs They Could Not Sing,” Riaona, Nobembwa 2011, 106). A kona naba ni maroroakinna bwa e kanga aia “nenikanaiai ae te karawawataaki” n tia ni buokiia ni kaitiakiia ni mauia n tamnei. E kanga Itaia 49:13–16 ni buokiira ngkana ti karawawataaki? Noora naba te witeo “The Refiner’s Fire” (ChurchofJesusChrist.org).
Bwaai n Ibuobuoki Riki Tabeua
Tei bwa te tia kakoaua.
Beretitenti Margaret D. Nadauld e kabwarabwaraa bwa tera nanon ae te “tei bwa taan kakoaua ibukin te Atua n taainako ao ni bwaai nako, ao n taabo nako” (Motiaea 18:9):
“N tei bwa te tia kakoaua n taainako, ti berita bwa ti na tangira te Uea, ni Karinea n taainako—n te ngaina ao te bong, n tain te kabuebue ke te maitoro, n taai aika a nakoraoi ao n taai aika bubuaka—tangira te Uea ao kaota te tangira anne man anuan maiura.…
“N tei bwa te tia kakoaua.ni bwaai nako e nanonaki bwa ni kabane bwaai—aika bubura, aika uarereke, n ara kakarabakau, n ara manikangare, n takakaro ake ti karaoi ao booki ake ti wareki ao katangitang ae ti ongoraa iai, ni baike a boutokaaki, ni beku ake a karaoaki, ni kunikai ake ti kabonganai, n raoraora ake ti karekei.…
“Ni kabaneana, ti taekinna bwa ti tei bwa taan kakoaua n taabo nako. E nanonaki anne bwa tiaki ti n ana tabo te botanaomata ma n taabo aika onoti, n ae raba, n te roo ke n taabo aika oota; inanon umwantabu, taabo n reirei, mweenga, ke kaa; iaon maunga ke iaon biike, iaon te kawai ke n te tabo ni kamangang.…
“Ngkana ti iangoa tamaroan ana bwai n tangira te [tia Kamaiu] nakoira, tera te bwai ae uarereke ae ti kona ni karaoia Ibukina ao ibukin Tama ae i Karawa are Ngaia ae e Kanakoa? Ti kona n tei bwa taan kakoaua ibukin Aia tangira ao aia reirei n taainako, ni bwaai nako, ao n taabo nako” (“Stand as a Witness, ” Ensign Meei 2000, 93,95).
Kanakoraoan Ara Anga reirei
Kaungaa te nanomatoa ni kamatebwai. “Taan reiakinaki bon tabeia n tokin te tai bwa a na bon reiakiniia. Iangoia bwa ko na kangaa ni buokiia taan reiakinaki ni butimwaea ao ni kakoroa nanon tibwangaia aei” (Teaching in the Savior’s Way, 29).