E Kaureaki Matan te Mwaane ae Mataki, iroun Carl Heinrich Bloch

Tebetembwa 19–25

Itaia 40–49

“Kabebetei Nanoia Au Aomata”

N taainako Itaia e kabongana te taetae n te kanikina ni kaota nanon te bwai teuana. Kakauongo nakon iango ao namakin ike kanikina aikai a uoti nakon am iango ao nanom. Aei e na buokiko ni kamatataako raoi n te bwai are e reiakiniko iai.

Korei Am Namakin

“Kabebetean te nano” bon ana moan taeka Itaia mwakoro40. E kanikinaea moanakin te namakin ae kaokoro, katuruturuan kaokoron ana rongorongo te burabeti. N are n ana moan koroboki Itaia e kauringiia Iteraera ao Iuta ibukin te urubwai ao te tautoronaki are e na roko ibukin aia bure, taetae ni burabeti aika imwiina a bon nanonaki ibukin kabebeteakin nanoia Iutaia 150 te ririki n taai aika a na roko—imwiin uruakan Ierutarem, akea karinean te tembora, ao aomata a tautoronaki irouia i Bwaburon. Ma taetae ni burabeti aikai iai naba ana anainano iaoia naake a waaki nako n taai aika a na roko nakoia Iteraera ake a konaaki man bwarananoia. A taetae nakoira, are n tabetai a namakina te konaaki, bwarannano, ao te bua.

Ana rongorongo Itaia nakoia ao nakoia e bon bebete: “Tai maku” (Itaia 43:1). Ma aki bua ni kabane. E aki mwaninga taekam te Uea, ao iai mwaakana iaon kangaanga nako are e a riaon am konaa. Tiaki te Uea “ae karaoan taian karawa, ao… ae takin aonaaba ma baika a riki mai iai, ao … e anga te ikeike nakoia aomata aika i aonaaba”? (Itaia 42:5). E aki mwaaka riki nakon Bwaburon, nakon te bure, nakon bwaai ake a tauko iai nakon te tautoronaki? “Ko na okirai,” E bubuti, “ba I kamaiuko ni kaboko” (Itaia 44:22). E kona ni kamaiu, ni kaoka, ni kakorakora, ni kabwara te bure, ao ni kabebetea te nano—bwaai nako ake ko kainnanoi, ni kaineti ma arom, ni kaboan maium.

N reiakinna bwa e kanga Nibwaai ao Iakobwa ni kabotaua Itaia 48–49 nakoia aia aomata, taraa 1Nibwaai22 ao 2Nibwaai6.

Iango ibukin te Kamatebwai i bon Iroum ni Koroboki aika Tabu

Itaia 40–49

E kona Iesu Kristo ni kabebetea nanou ao n anganai te kantaninga.

E na taraa ni kabwaranano, ao ni kauruaki nano, irouia Iteraera ni kuneia bwa a tautoronaki i Bwaburon. Angiia a bae ni mimi ngkana a tia ni kabua aia tabo ngkai bon ana aomata ni berita te Atua, aika e a tia n rineiia. Ngkai ko wareka Itaia 40–49, tarai ikota ni kibuntaeka are a na kona ni katauraoa te kabebeteaki n nano ao te kantaninga. Ibukin ikota ni kibuntaeka n tatabeua nako ake ko kunei, iangoia raoi ao koroi mwiin bwaai ake e na taekin te Uea nakoim inanon kiibu aikai. Aikai kiibu tabeua aika ko na waaki ma ngaai:

• 40:11, 29–31:

• 41:10–13, 17–18:

• 42:6–7:

• 43:1–7,25:

• 44:1–4, 21–24:

• 46:3–4:

• 49:7–16:

Ko na kanga ni tibwauai rongorongo aikai ma temanna are e kainnanoa te kaunganano ke te kantaninga? (taraa Itaia 40:1–2).

Taraa naba JeffreyR. Holland, “Te Kantaninga ae Tamaroa man Kororaoi,” Ensign ke Riaona, Meei 2020, 81–84.

Man te ongeaaba iroun te Uea, ti kona ni karekea te “rau … ai aron te karanga” (Itaia 48:18).

Itaia 40:3–8, 15–23; 42:15–16; 47:7–11

Mwaakan te Atua e korakora rikin nakon mwaakan te aonaaba.

Itaia e kaokiokia ni kauringiia ana aomata ibukin mwaakan te Atua ae akea kabotauana, ni kabotauaki nakon mwaakan te aonaaba ae kananokawaki are a katobibiaki iai. Kakaea taekan te rongorongo aei ngkai ko wareka Itaia 40:3–8, 15–23; 42:15–16; ao 47:7–11 (taraia bwa mwakoro47 e koreaki nakon te tia tauia taenikai ibukin Iteraera, Bwaburon). Tera ae reireiniko ikota ni kibuntaeka aikai ibukin bwain te aonaaba? Tera ae a rereiniko ibukin te Atua? Iangoia raoi bukin tera ngkai e bae n rangi ni kakawaki nakoia Iutaia ake a mena inanon te tautoronaki. Bukin tera e kakawaki iroum?

Taraa naba “Tiku Irou!” Boki n Anene nambwa.166.

Itaia 41:8–13; 42:1–7; 43:9–12; 44:21–28; 45:1–4; 48:10; 49:1–9

“Bon au toro ngkoe.”

Rinanon Iatai 40–49 ni kabane e taetae te Uea ibukiia Ana “toro” ao Ana “tia kakoaua.” Inanon tabeua ikota ni kibuntaeka taeka aikai a taraa ni kaineti nakon Iesu Kristo (taraa Itaia 42:1–7), tabeua a kananonaaki nakon te bata are Iteraera (taraa Itaia 45:4), ao iraikina tabeman a kananonaaki nakon te Uea Tairati, are e kariaia taian Iutai bwa a na oki nako Ierutarem ao ni manga katea te tembora (taraa 44:26–45:4). Ni keiti tabeua, e ngae n anne, ko na bae n iangoia bwa a kanga ikota ni kibuntaeka ni kaineti nakoim ae ana toro ao ana tia kaotioti te Uea. N aron te katooto, iangoi raoi titiraki aikai:

Itaia 41:8–13; 42:6; 44:21. Tera ae e weteiko te Uea bwa ko na karaoia? Iangoi ana wewete te Ekaretia n ai aron naba mwioko n te berita ae tabu ni beku ibukina. E kanga ni boutokaiko ao “n taua [baim]” (Itaia 42:6) ngkai ko beku? E kanga ni “karaoiko” bwa ko na riki bwa Ana toro? (taraa naba Itaia 48:10).

Itaia 43:9–12. N te kawai raa are ko a riki bwa ana tia kaotioti Iesu Kristo? Tera taneiai inanon maium ae a kaotia bwa boni Ngaia te Tia Kamaiu?

Itaia 49:1–9. Tera taian rongorongo ake ko kunei inanon kiibu aikai are a kona ni buokiko ngke am konabwai ao am mwakuri ni ibuobuoki a taraa n “akea uana, ao akea naba mwina”? (te kibu4).

Taraa naba Motiaea 18:9; HenryB. Eyring, “A Child and a Disciple,” Ensign ke Riaona, Meei 2003, 29–32.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Itaia 40:3–4.N neneria bwa tera ae nanonaki ni “katauraoa … kawain te Uea,” a kona am utu ni kaeta te bwai ae bwaoua, kaitiaka te burooa ae bareka, ke kaitiaka te kawai iaontano ae kiriatiibu. Ko kona naba ni kaota tamnein Ioane te Tia Bwabetio ao Iotebwa Timiti (taraa Bokin Tamnein te Euangkerio, nambwa. 35,87). A kanga ni katauraoa te kawai ibukin Okin te Uea (taraa Ruka 3:2–18; Reirei ao Berita aika Tabu 135:3). Ti na kanga ni ibuobuoki ni katauraoa te kawai ibukina? (n aron te katooto, taraa Reirei ao Berita aika Tabu 33:10).

Itaia 40:28; 43:14–15; 44:6.Tera aran ke nakoan Iesu Kristo aika ti kunei inanon kiibu aikai? Tera ae e reireinira aara aikai n tatabeua ibukina?

Itaia 41:10; 43:2–5; 46:4.A kaotaki kiibu aika inanon te anene n taromauri “Ai Matoara” (Boki n Anene nambwa.85). A na bae ni kukurei am utu ni uaia n anenea te anene n taromauri ao ni kunei kibun taeka ake inanona ake ti te arona ma kibun taeka inanon kiibu aikai. Teraa ae a reireiniira kibun taeka aikai ibukin taekan Iesu Kristo?

Itaia 44:3–4; 45:8.Imwiin warekan kiibu aikai, a kona am utu n teboka te aroka ngkai ko maroroakin kakabwaia ake e urakin te Uea nako aoia. Tera ae na riki nakon te aroka ngkana ti tebotebokia? Tera ae kantaningaia te Uea mairoura ngkai E kakabwaiaira?

Itaia 48:17–18.Iangoia kaota te witeo ke tamnein te karaanga ao naon marawa. E kanga te rau n titebo ma aekakin te karaanga? E kanga te rau n titebo ma aekakin taian nao?

Ibukin iango aika a mwaiti riki ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae tamaroa: “Ai Matoara,” Boki n Anene nambwa 85.

Kanakoraoan Am Kamatebwai I Bon Iroum

Kabwarabwarai nanon taian taeka. Kataia taraai nanon taeka ni koroboki aika tabu aika ko aki oota iai—ao taeka naba ake ko taku bwa ko atai. N tabetai nanon taeka a kona ni buokiko ni wareka te kibu n ae kaokoro ao ni karekei atatai n tamnei aika a boou.

“Te uea e a tia ni kabeebeteia ana botanaomata, ao e na nanoangaia ake a karawawataki” (Isaiah 49:13).Balm of Gilead, iroun Ann Adele Henrie