“Tebetembwa 5–11. Itaia 1–12: ‘Bon Au Tia Kamaiu te Atua,’” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022 (2021)
“Tebetembwa 5–11. Itaia 1–12,” Nakomai, Iriirai–Ibukiia Aomata n Tatabemaniia ao Utu: Te O Tetemanti: 2022
Te Burabeti ae Itaia e a Kaman Taekina Bungiakin te Kristo, iroun Harry Anderson
Tebetembwa 5–11
Itaia1–12
“Bon Au Tia Kamaiu te Atua”
Ukoukora ana kairi te tamnei ngkai ko kamatebwai. Ana taeka Itaia a kona ni matata riki ngkana ti “kaonaki n tamnein te taetae ni burabeti,” n aron are e reirei iai Nibwaai (2Nibwaai 25:4).
Korei Am Namakin
Riki ngkana aio am moan tai ni wareka ana boki Itaia, ko kona ni kunei rongorongo aika ko taneiai n ongo mai imwaina. Anne ibukina bwa, mai irouia burabeti ni kabane n te O Tetemanti, Itaia bon teauana mai ibuakoia aika rang tataekinaki ni booki tabeua man koroboki aika a tabu, n ikotaki naba ma bon te Tia Kamaiu. Ana taeka Itaia a kaoti naba n angiin te tai ni kuuna n taromauri ao katangitang riki tabeua aika a tabu. Bukin tera e rang tataekinaki ana taeka Itaia n tainako?
Ni koauana bwa teuana mwakoron bukina bwa Itaia iai ana tarena ibukin tataekinan ana taeka te Atua n ae matata, n te taetae ae ururingaki. Ma e raka riki nakon anne. Itaia e a tia ni kaungaia burabeti n roro nako ibukin te koaua are e tataekinna ni kaineti nakoia aika bon ana roro—kain Iteraera ake a maiu imarenan 740 ao 701IK. Tibwangana bwa e na kaurei matara n noori ana mwakuri te Atua aika korakora n te mwakuri ni kamaiu, are e rang korakora riki nakon te botanaomata ae ti teuana ke n te tai ae ti teuana. Mairoun Itaia, Nibwaai e reiakinna bwa ngaia ma ana aomata, e ngae ngke a maenako mai irouia kain Iteraera, ma bon mwakoron naba ana aomata ni berita te Atua. N Itaia, taan korea te Nu Tetemanti a kunei taetae ni burabeti ibukin te Meetia ake a tia ni koro bukiia are a noori. Ao n Itaia, Iotebwa Timiti e kunea te nonori ibukin te mwakuri ni boong aika kaitira ni bobotakiia kain Iteraera ao katean Tion. Ngke ko wareka Itaia, tera ae kona kunea?
Ibukin riki rongorongon Itaia ao ana koroboki, taraa “Itaia” in te Rikitionari n te Baibara. Ibukin rongorongon te tai are e maiu iai Itaia, taraa 2Uea 15–20 ao 2Rongorongo 26–32.
Iango ibukin te Kamatebwai i bon Iroum ni Koroboki aika Tabu
N na kanga n oota riki n ana reirei Itaia?
Ngkai ti taekina ana koroboki Itaia, e taku te Tia Kamaiu, “Botumwaaka n ukoukori bwaai aikai; bwa a korakora bonganan ana taeka Itaia.” (taraa 3Nibwaai 23:1–3). E ngae n anne irouia aika a mwaiti, Itaia e kona ni kangaanga bwa kona ota iai. Aikai tabeua iango ake a na buokiko ni karekei nanon ana taeka Itaia n ae korakora riki:
-
Iangoi kanikina ao kabootau ake e kabonganai Itaia. Te katooto, iangoia tera te bwai ae tangiria Itaia n taekinna ngke e koroboki iaon taekan te tawana ni kureebe (taraa Itaia 5:1–7), ranin Tiroa (taraa Itaia 8:5–10), te man (taraa Itaia 5:26), ao te buraeki (taraa Itaia 11:10,12).
-
Ibukin mwakoro nako ake ko wareki, titirakiniko, “Tera ae I reiakinna n rongorongon Iesu Kristo?” (taraa 1Nibwaai 19:23).
-
Taratarai atuun rongorongo ake ko namakinna bwa a irekereke nakon ara bong, n aron maiun ao ana mwakuri Iesu Kristo, maenakon ao bobotakia kain Iteraera, te kabanea ni bong, ao te Mereniam. Ko kona naba ni kawakin rinanin ke kibu man Itaia ake a reirei iaon atuun reirei aikai.
-
Kabonganai bwaai n ibuobuoki ibukin te kamatebwai are tauraoi, n aron te rikitionari, te koroboki mai nano n Baibara, atuun rongorongo, ao te Kairi nakon Koroboki aika a Tabu.
Taraa naba 2Nibwaai 25:1–8.
“Toki ni karaoa ae buakaka.”
Itaia e reitinako ni kauringa kaain Iuta ibukin aroia n te maiu n tamnei. Imwiin warekan Itaia1, 3, ao5, kona kanga ni kabwarabwara aroia aomata n te maiu n tamnei? Tera kauring aika ko kunei ake ko namakinna bwa e kaineti nakon ara bong?
N ikotaki ma kauring, kona bae naba ni korei rongorongo aika e na reke iai te kantaninga ibukin buakakaia kain Iteraera (taraa, ibukin te katooto, Itaia 1:16–20, 25–27; 3:10). Tera ae ti reiakinna mairoun te Uea man taian rongorongo aikai?
Te Atua e na karaoa te mwakuri ae korakora ni boong aika kaitira.
Angiin ana koroboki Itaia bon taetae ni burabeti ake a kaineti raoi nanoia nakon ara bong. Tera ana kabwarabwara Itaia ni boong aika kaitira inanon mwakoro2; 4; 11–12 aika a rang riinga nanom? (Reirei ao Berita aika Tabu 113:1–6 e anga iango aika ibuobuoki ibukin Itaia11.) Tera ae ko reiakinna ibukin ikotakiia kain Iteraera ao kamaiuan Tion? Tera ae ko namakinna bwa ko kaungaaki ni karaoi imwiin warekan mwakoro aikai?
Taraa naba Itaia 5:26; 10:20.
Burabeti a weteaki iroun te Atua.
N mwakoro6, Itaia e taekina weteana n riki bwa te burabeti. Ngkai ko wareka te mwakoro aei, tera ae e kaunga nanom n te bwai are e rinanona Itaia? E kanga te mwakoro aei ni bita am iango ibukin te Uea, Ana burabeti, ao te mwakuri are ko weteaki bwa kona karaoia?
“Bwa e na bungiaki te teei nakoira, ao ti na anganaki te nati te mwaane” (Itaia 9:6).
E taetae ni burabeti Itaia ibukin Iesu Kristo.
Ni moan n ana kabwarabwara Itaia, te tautaeka n Iteraera (e aranaki naba bwa Eberaim) e karekea ana boraraoi ma Turia bwa e na katea otangana ni kaitara Assyria. Iteraera ao Turia a tangiria ni kairoroa Aati, uean Iuta, bwa e na raoniia n aia reitaki. Ma Itaia e taetae ni burabeti bwa te reitaki aei e na bwaka ao e tuanga Aati bwa e na onimakina te Uea (taraa Itaia 7–9, riki Itaia 7:7–9; 8:12–13).
Ngkai Itaia e reireina Aati, e karaoi tabeua taetae ni burabeti aika a rang n ataaki, n aron ake a kuneaki n Itaia 7:14; 8:13–14; 9:2, 6–7. Ngkai e tuai rang ni matata raoi bwa tera ae nanonaki n taetae ni burabeti aikai n ana tai Aati, a bane ni matata bwa e kaineti nakon Iesu Kristo (taraa naba Mataio 1:21–23; 4:16; 21:44; Ruka 1:31–33). Tera ae ko reiakinna n rongorongon te Tia Kamaiu man kiibu aikai?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Itaia 1:16–18.Ni buokakiia kain te utu bwa a na matata riki ni kibu aikai, ko kona ni wareka te mwakoro “Some of Us Feel We Can Never Be Good Enough” man ana rongorongo Titita Sharon Eubank “Kristo: Te Ota Are E Ota n te Roo” (Ensign ke Riaona, Meei 2019,75). Ke ko kona ni kabwarabwara bwa e kanga ni kanakoaki te memea man te kunnikai. E kanga ana rongorongo te Uea ni kiibu aikai ni kaokoro man te bwai are e tangiriira Tatan bwa tina kakoaua?
-
Itaia 2:1–5.Kain te utu a kona n ana teuana man kiibu aikai ao ni korea tamnein te bwai are e kabwarabwara. Tera ae e reireiniira te tembora ibukin ana kawai te Uea? Ti kanga ni kakabwaiaki ngkai ti “nakonako inanon otan te Uea”? (Itaia 2:5).
-
Itaia 4:5–6.Tera ae e berita iai te Uea nakoira inanon kiibu aikai? Tera ae e kona n nanonaki ni berita aikai? E kanga ni Kakoroi bukiia? (Taraa naba Te Otinako 13:21–22.)
-
Itaia 7:14; 9:1–7.Kabonganai korotamnei ke tamnei man ana maekatiin te Ekaretia, ko kona ni karaoi boutita ni kabwarabwarai tabeua bwaai ake ti reiakin ibukin Iesu Kristo man kibu aikai.
Ibukin iango aika a mwaiti riki ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te kuna ae rineaki: “Nora te Manuia,” Boki n Anene, nambwa.26.
Kanakoraoan Am Kamatebwai
Bubutia te Uea ibukin te ibuobuoki. Arora bwa tina ota ni koroboki aika a tabu, ti kainnanoa te kaotioti ae onoti nakoira. E a tia ni berita te Uea, “Bubuti, ao ane kam na anganaki; kam na ukeuke, ao ane e na reke I roumi; kam na karebwerebwe, ao ane e na kaukaki nako imi” (Mataio 7:7).
Itaia e reirei bwa e na riki Ngaia bwa te “umwa ae te nuu ni ngaina man te riringa” ao “ni katantan man te buaka ma te karau” (Itaia 4:6).Idaho Falls Idaho Tembora