Buakonikai ae Tabu, iroun Brent Borup

Tebetembwa 12–18

Itaia 13–14; 24– 30;35

“Te Mwakuri ae Kamiimi ae Moan te Kamimi”

Imwain ae ko kona ni buokiia tabeman ni kunei koaua ake inanon ana boki Itaia, ko riai ni kunei koaua i bon ibukim. Ngkai ko wareware n te wiiki aei, iangoia bwa angaa koaua ake ko namakin bwa ko na katuruturua n tain te kiraati.

Korei Am Namakin

Kaunga te Tibwatibwa

Ni kaungaia kaain te kiraati bwa a na tibwauai bwaai ake a reiakin man Itaia, ko kona n titirakiniia bwa a na kangaa ni kaeka temanna are e kangai, “E bon rangi ni kangaanga te mataata n ana boki Itaia.” Tera ae e a tia ni buokiira ni kunei bwaai aika bonganga n ana reirei Itaia? Tera kiibu man koroboki aika tabu ae atia ni anganiira te kairaki mai iroun te tamnei?

Reirei te Reirei

Itaia 24: 21–23; 25:6–8; 26:19; 28:16

A na koroboki Itaia a kairiira nakon Iesu Kristo.

• N aron Nibwaai, kaain am kiraati a na tia n rangi ni kukurei n ana kakoaua Itaia iaon Iesu Kristo (taraa 2 Nibwaai 11:2). Ko na bae n titirakiniia bwa ana tibwai kiibu ake a kunei n tain aia wareware n te wiiki aei are e reireiniia aron te Tia Kamaiu. Ke ko kona ni kaoiia kaain te kiraati bwa a na tibwaa te bwai are a reiakinna iaon Iesu Kristo man Itaia 24:21–23; 25:6–8; 26:19; 28:16 ke kiibu tabeua are ko kunei n am kamatebwai. Bukin tera koaua aikai a kakaawaki ibukira?

  

  He Comes Again to Rule and Reign, [E a Manga Roko ni Kairiiri ao n Tautaeka], iroun Mary R. Saucer

Itaia 24: 1–5; 28:1–8; 29: 7– 10; 30: 8– 14

Kitanan te koaua nanona te tanako mai iroun te Uea ao Ana burabeti.

• Te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu e taekinna bwa ti na iangoi raoi taeka ni kabootau are e kabonganai Itaia ni kabwarabwaraa te bwai ae e na riki ngkana ko tanako mai iroun te Uea ao n aki butimwaiia Ana burabeti. Kaoiia kaain te kiraati bwa a na tibwaua te bwai are a reiakinna. Ke ko kona ni kaoiia bwa a na rinanon taian kibu aikai n tatabemaniia: Itaia 24:1–5; 28:7–8; 29:7–10; 30:8–14. Ni kaineti ma are a warekia, a kona ni kabwanina korean te tiententi aei: Ngkana ti tanako mai iroun te Uea, ti teboo ngaira ma…” Teraa ae ti kona ni karaoia n tiku n nanomatoa nakon te Uea ao n totokoa kitanan te koaua? (Tara “Bwaai n Ibuobuoki Riki Tabeua” ibukin iango riki tabeua.) E kanga te Uea ni kakabwaiaia naake a tiku n nanomatoa Irouna?

• Ni moana te marooro iaon te anua ao te aroaro are e kona ni kairiira nakon kitanan te koaua, ko kona ni kaoiia kaain te kiraati bwa a na ukeuke n Itaia 24:1–5; 28:1–8; 29:7–10; 30:8–14. Tuangiia bwa a na taratarai bwaai irouia aomata ake n ana tai Itaia aika a iango ao a karaoi. Karaoa te kauring ae koreaki iaon te burakibooti ae e kangai Kauring: Taian anua ao aroaro aikai a kona ni kairi nakon kitanan te koaua. A kona kain te kiraati ni korei ni karinani iaon te burakibooti bwaai ake a kunei ni kiibu aikai. Anganiia te tai bwa a na tibwaia bwa a kangaa ni kamanoia bon ngaiia ke aia utu man kitanan te koaua.

Itaia 29:13–24; 30:18–26;35

Te Uea e kona ni kaokii bwaai ake a bua ke n uruaki.

• Aio te titiraki are ko kona ni koreia iaon te burakibooti ae e kona ni buokiia kaain te kiraati ni iangoa Itaia 29: E kanga ana koroboki Itaia ni irekereke nakon Kaokan te euangkerio n ara bong? Kaungaia bwa a na iangoa te titiraki aei ngkai a karaurau ni wareka Itaia 29:13–24. Ngkana a kainnanoa te ibuobuoki, a kona naba n rinanon kiibu n aron aikai 2 Nibwaai 27:6–26; Iotebwa Timiti—Rongorongo 1:17–19, 63–65. Imwiin maroroakinan te titiraki are iaon te burakibooti, a kona ni marooro bwa bukin teraa e “kamimi” ao “n rangi ni kamimi” (Itaia 29:14) bon taeka aika tamaroa ni kabwarabwaraa Kaokan te euangkerio. Tera ae ti reiakinna iaon Kaokan Bwaai man “Kaokan Bwaninin Ana Euangkerio Iesu Kristo:Te Katanoata n te Kauabubua n Ririki nakon te Aonaaba?(ChurchofJesusChrist.org).

• Mwakoro 30 ao35 n Itaia iai inanona kibu n taeka are e kona n anga te kairaki iroun te tamnei n te onimaki ae korakora ni mwaakan te Uea ni kakabwaiaia naake a oki Nakoina. Ni buokiia kain te kiraati bwa a na kunei kibu n taeka aikai, ko kona ni kaoiia bwa a na kamatebwaia tao Itaia 30:18–26 ke Itaia35. Tuangiia bwa a na tibwa te taeka ke te kibu n taeka are a kunea are e na kona ni buoka temanna n rairaki nakon te Uea ibukin kaboan maiura.

Bwaai n Ibuobuoki Riki Tabeua

Tiku n onimaki iroun te Uea ao Ana Ekaretia.

Beretitenti M. Russell Ballard e anga taeka n reirei aikai ni buokiira bwa ti na tiku n onimaki iroun te Uea ao Ana Ekaretia:

“Ti kainanoa ae ti na rinanon te rairaki n tainako man karikirakean ara onimaki iroun Iesu Kristo ao ara nanomwaaka nakon Ana euangkerio rinanon nako maiura—tiaki ti te taina ma ni katoatai [taraa Aramwa 5:26].…

“.…Ana taeka te Uea a kuneaki inanon koroboki aika tabu ao n aia reirei abotoro ao burabeti. A katauraoi ibukira taeka n reirei ao kairiiri ake, ngkana ti irii, a na riki bwa kanga kunikai ni bwai ni kamaiu ao ni kona ni buokiira bwa ti na kangaa n tawii ni baira aika uoua.…

“Irarikin karikirakean arora ae ti taneiai iai n warekan koroboki aika tabu, ti riai n riki n ai aroia natin Motiaea mwaane ao n anga ngaira ‘ni kakorakoraira n tataro, ma n aki mamatam’ [Aramwa 17:3]” (“Stay in the Boat and Hold On!” Riaona, Nobembwa. 2014, 90–91).

Kanakoraoan Ara Anga reirei

Kaota te aki nanououa n aia konabwai taan kamatebwai. Tabeman aomata n am kiraati a bae n aki koaua n aia konabwai n reirei taekan te euangkerio. Anga raun nanoia bwa ngkana a keiaki n reiakina, te Tamnei ae Raoiroi e na reireiniia. (Taraa Teaching in the Savior’s Way, 29–30.)