Profet Aesea I Tokbaot Finis Taem Kraes Bae I Bon, i kam long Hari Andeson.

5–11 Septemba.

Aesea 1–12

“Hae God I God blong Mi, mo Hem I Stap Sevem Mi”

Tingting long ol wei blong leftemap tingting blong ol memba blong klas blong serem ol filing mo tingting mo andastaning we oli kasem long taem blong stadi blong olgetawan o wetem famli blong olgeta.

Raetemdaon Ol Filing mo Tingting blong Yu

Invaetem Ol Memba blong Serem Wanem Oli Gat

Aotlaen blong wik ia, insaed long Kam Folem Mi—Blong Wanwan Man, Woman mo Famli i givim ol aedia blong andastanem ol raeting blong Aesea. Yu save invaetem ol memba blong klas blong serem olsem wanem wan long ol aedia ia, o wan nara samting, i bin helpem olgeta blong lanem samting aot long Aesea 1–12.

Stap Tijim Doktrin

Aesea 1–12

Ol toktok blong Aesea bambae oli kamtru.

• Taem Hem i stap tokbaot Aesea, Sevya i bin tijim se “evri samting we hem i talemaot oli bin hapen mo bae oli hapen folem ol toktok we hem i bin talemaot” (3Nifae 23:3). Yu maet wantem statem blong toktokraon abaot Aesea taem yu serem skripja ia mo toktok ia insaed long “Sam Moa Risos.” Afta yu save raetem long bod Dei blong Aesea, Ministri blong Sevya long laef ia, mo Ol las dei. Ol memba blong klas oli save lukaotem ol ves insaed long Aesea 1–12 we bae i save go wetem wan o moa long ol sentens we i stap long bod (eksampol, Aesea 2:1–5; 7:1–7; 7:10–14; 9:2–7; 10:20; 11:10; 12:1). ?From wanem hemia i wan blesing blong save gat ol profesi ia oli stap wetem yumi tedei?

Aesea1; 3;5

“Stop blong mekem rabis fasin.”

• Yu maet wantem blong askem ol memba blong klas blong oli serem wanem oli bin lanem long stadi blong olgetawan mo wetem famli blong olgeta long Aesea1, 3,5 abaot spirituol kondisen blong kingdom blong Juda long ol dei blong Aesea. Maet bae oli save luklukbak long ol japta ia mo mekem wan lis blong ol ves mo ol kondisen we ol ves ia oli stap tokbaot. ?Wanem ol mesej blong hop we yumi faenem long japta ia? (Sapos i nid, yu save talem long ol memba blong klas blong rid long Aesea 1:16–20, 25–27; 3:10.) Sapos Juda blong bifo i gat wan mesej blong yumi, ?wanem nao bae i mesej ia?

• Ol memba blong klas oli save mekem olsem se oli bin stap laef long Jerusalem taem Aesea i bin profesae. Yu save intaviu sam long olgeta, askem olgeta wanem Aesea i bin talem mo olsem wanem nao oli bin filim abaot wanem Aesea i talem. Eksampol, yu maet askem ol memba blong klas blong tokbaot ol toktok blong Aesea we i stap long Aesea 1:16–20; 3:16–26; 5:20–23. ?Wanem nao Aesea i bin talem we i givim insperesen long yumi blong sakem sin?

Aesea2; 4; 11–12

God bae i mekem wan bigfala wok long ol las dei.

• Blong helpem ol memba blong klas blong oli tingting hevi long olsem wanem ol profesi blong Aesea abaot ol las dei i stap kam tru, yu save jusum sam ves we i stap long Aesea2; 4; 11–12 (olsem hemia long Aesea 2:2–3; 4:5–6). Afta askem ol memba blong klas blong faenem ol toktok we oli tokbaot ol aksen toktok we bae i hapen long fiuja, long ol ves ia (olsem “bae i kam” o “bae i hapen”). Invaetem olgeta blong putum sam long ol aksen toktok ia wetem ol aksen toktok we bae i hapen naoia (olsem “i stap” o “i stap gogohed”). ?Olsem wanem ol profesi ia oli stap kam tru long laef blong yumi? ?From wanem i impoten blong save abaot ol profesi ia?

• Yu maet wantem blong poenemaot se taem Moronae i visitim Josef Smit long 1823, hem i kwotem Aesea11 mo i talem se bae i hapen i no longtaem (luk long Josef Smit—Histri 1:40; luk tu long Doktrin mo Ol Kavenan 113:1–6). Ol memba blong klas oli save ridim sam ves long Aesea11 (olsem ves 6–12) mo talem long sot toktok blong olgetawan, wanem Aesea i luk we bae i hapen. ?Wanem wok blong yumi blong mekem ol profesi ia i kam tru?

“Wan pikinini boe bae i bon long mifala, Bambae yu yu givim long mifala” (Aesea 9:6).

Aesea 7–9

Aesea i bin profesae abaot Jisas Kraes.

• Yu maet askem ol memba blong klas abaot wanem oli lanem abaot Jisas Kraes aot long ol ves olsem Aesea 7:14; 8:13–14; 9:2, 6–7. Eksampol, ?from wanem Emanuel i wan gudfala taetel blong Sevya? (luk long Matiu 1:23). ?Olsem wanem nao Jisas Kraes i bin stap olsem wan “Kaonsela” o “Prins blong Pis” long yumi? Ol memba blong klas oli save serem tu ol nara ves we oli faenem long Aesea 1–12 we i mekem olgeta i tingbaot Jisas Kraes. ?Wanem nao ol ves ia oli tijim yumi abaot Hem?

• Bifo klas, yu save invaetem ol memba blong klas blong karem wan pikja blong Kraes i kam long klas, we oli filim se i soemaot wan long ol wei we oli tokbaot Sevya we i stap long Aesea 7–9. Long taem blong klas, givim taem long olgeta blong soem pikja we oli karem i kam mo eksplenem olsem wanem i go wetem ol toktok blong Aesea.

Sam Moa Risos

Ol profesi blong Aesea oli save hapen fulap taem.

Presiden DallinH. Oaks i bin tijim: “Buk blong Aesea i holem plante profesi we i luk olsem oli save hapen plante taem. I luk olsem wan i tekem o hapen long taem blong ol pipol blong Aesea o ol situesen blong nekis jeneresen blong hem. Wan narafala mining, we fulap taem i kamaot olsem wan saen, i poen i go long ol samting we oli stap hapen long medel blong taem, taem Jerusalem i bin brokdaon mo ol pipol blong hem oli seraot i go olbaot afta long krusifiksen blong pikinini blong God. Wan moa mining o wanem i hapen long sem profesi i joen wetem ol ol taem we stap hapen g kasem Seken Kaming blong Sevya. I tru se plante long ol profesi ia i save gat plante mining, i mekem se hem i impoten blong yumi lukaotem revelesen we i kam long Tabu Spirit blong helpem yumi blong andastanem stret mining blong olgeta” (“Scripture Reading and Revelation,” Ensign, Jan. 1995,8).

Kam Antap long Fasin blong Yumi blong Stap Tij

Stap Invaetem Spirit. Tabu miusik, ol skripja, ol toktok blong ol profet blong lata-dei, ol fasin blong soemaot lav mo testemoni, mo ol kwaet taem blong tingting long samting, oli save invaetem Spirit blong kam stap” (Teaching in the Savior’s Way,10).