ʻOku Kikiteʻi ʻe he Palōfita ko ʻĪsaiá ʻa e ʻAloʻi ʻo Kalaisí, tā ʻe Harry Anderson

5–11 Sepitema

ʻĪsaia 1–12

“Ko e ʻOtuá ko Hoku Fakamoʻui”

Fakakaukau ki ha ngaahi founga ke poupouʻi ai ʻa e kau mēmipa ʻo e kalasí ke nau vahevahe ha ngaahi ongo mo e mahino ne nau maʻu lolotonga ʻenau ako fakatāutahá mo fakafāmilí.

Lekooti e Ngaahi Ongo ʻOkú ke Maʻú

Fakaafeʻi e Feʻinasiʻakí

ʻOku ʻomi ʻe hefokotuʻutuʻu ki he uiké ni ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ha ngaahi fakakaukau ke mahino ai ʻa e ngaahi tohi ʻa ʻĪsaiá. Te ke lava ʻo fakaafeʻi e kau mēmipa ʻo e kalasí ke nau vahevahe ʻa e founga ne tokoniʻi ai kinautolu ʻe ha taha ʻo e ngaahi fakakaukau ko ʻení, pe ko ha meʻa kehe, ke nau ako mei he ʻĪsaia 1–12.

Akoʻi e Tokāteliné

ʻĪsaia 1–12

ʻE fakahoko kotoa ʻa e ngaahi lea ʻa ʻĪsaiá.

• ʻI he lea kau kia ʻĪsaiá, naʻe akoʻi ʻe he Fakamoʻuí “ko e ngaahi meʻa kotoa pē naʻá ne leaʻakí kuo hoko pe ʻe hoko, ʻo hangē ko e ngaahi lea naʻá ne leaʻakí” (3 Nīfai 23:3). Te ke lava ʻo kamata ha fealeaʻaki fekauʻaki mo ʻĪsaia ʻaki haʻo vahevahe ʻa e potufolofola ko ʻení mo e fakamatala ʻi he “Ngaahi Maʻuʻanga Tokoni Lahi Angé.” Hili iá, te ke lava leva ʻo hiki ʻi he palakipoé Kuonga ʻo ʻĪsaiá, Ko e ngāue ʻa e Fakamoʻuí ʻi he matelié, mo e Ko e ngaahi ʻaho kimui ní. ʻE lava ke kumi ʻe he kau mēmipa ʻo e kalasí ha ngaahi potufolofola mei he ʻĪsaia 1–12 ʻa ia ʻe ala fakaʻaongaʻi ki ha kupuʻi lea ʻe taha pe lahi ange ʻi he palakipoé (hangē ko ʻení, ʻĪsaia 2:1–5; 7:1–7; 7:10–14; 9:2–7; 10:20; 11:10; 12:1). Ko e hā e ʻuhinga ʻoku hoko ai ko ha tāpuaki ke tau maʻu ʻa e ngaahi kikite ko ʻení he ʻaho ní?

ʻĪsaia 1; 3;5

“Tuku ʻa e fai koví.”

• Te ke lava ʻo kole ki he kau mēmipa ʻo e kalasí ke nau vahevahe ʻa e meʻa ne nau ako mei heʻenau ako fakataautaha mo fakafāmili ʻa e ʻĪsaia 1, 3,5 fekauʻaki mo e tūkunga fakalaumālie ʻo e Puleʻanga ʻo Siutá ʻi he kuonga ʻo ʻĪsaiá. Mahalo ʻe lava ke nau toe vakaiʻi ʻa e ngaahi vahé ni pea faʻu ha lisi ʻo e ngaahi veesi mo e ngaahi tūkunga ʻoku nau fakamatalaʻí. Ko e hā ha ngaahi pōpoaki ʻo e ʻamanaki leleí ne tau maʻu ʻi he ngaahi vahé ni? (ʻO ka fie maʻu, te ke lava ʻo ʻai ʻa e kalasí ke nau vakai ki he ʻĪsaia 1:16–20, 25–27; 3:10.) Kapau ne maʻu ʻe Siuta ʻo e kuonga muʻá ha pōpoaki moʻotautolu, ko e hā nai ia?

• ʻE lava ke fakangalingali ʻa e kau mēmipa ʻo e kalasí ʻoku nau moʻui ʻi Selusalema ʻi he taimi ne kikite ai ʻa ʻĪsaiá. Te ke lava ʻo ʻinitaviu hanau niʻihi, pea fehuʻi kiate kinautolu ʻa e meʻa naʻe lea ʻaki ʻe ʻĪsaiá pea ko e hā ʻenau ongo ki aí. Hangē ko ʻení, te ke lava ʻo kole ki he kau mēmipa ʻo e kalasí ke nau talanoa kau ki he ngaahi lea ʻa ʻĪsaia ʻoku hā ʻi he ʻĪsaia 1:16–20; 3:16–26; 5:20–23. Ko e hā e meʻa ne lea ʻaki ʻe ʻĪsaia ʻokú ne ueʻi kitautolu ke fakatomalá?

ʻĪsaia 2; 4; 11–12

ʻE fakahoko ʻe he ʻOtuá ha ngāue lahi ʻi he ngaahi ʻaho kimui ní.

• Ke tokoni ki he kau mēmipa ʻo e kalasí ke nau fakalaulauloto ki he founga ʻoku lolotonga fakahoko ai e ngaahi kikite ʻa ʻĪsaiá fekauʻaki mo e ngaahi ʻaho fakaʻosí, te ke lava ʻo fili ha ngaahi veesi mei he ʻĪsaia 2; 4; 11–12 (hangē ko e ʻĪsaia 2:2–3; 4:5–6). Hili iá pea kole leva ki he kau mēmipa ʻo e kalasí ke nau fekumi ki ha ngaahi veape ʻi he taimi-kahaʻú ʻi he ngaahi veesi ko ʻení (hangē ko e “ʻe fokotuʻu” pe “ʻe ʻalu”). Fakaafeʻi ke nau fetongi ha niʻihi ʻo e ngaahi veape ko ʻení ʻaki ʻa e ngaahi veape ʻi he taimi-lolotongá (hangē ko e “ʻoku fokotuʻu” pe “ʻoku ʻalu”). ʻOku fakahoko fēfē ʻa e ngaahi kikite ko ʻení ʻi heʻetau moʻuí? Ko e hā ʻoku mahuʻinga ai ke ʻilo fekauʻaki mo e ngaahi kikite ko ʻení?

• Te ke lava ʻo fakamahinoʻi ange ko e taimi naʻe ʻaʻahi ai ʻa Molonai kia Siosefa Sāmita ʻi he 1823, naʻá ne lea ʻaki ʻa e ʻĪsaia 11 peá ne pehē ʻoku ʻamanaki ke fakahoko ia (vakai, Siosefa Sāmita—Hisitōlia 1:40; vakai foki, Tokāteline mo e Ngaahi Fuakava 113:1–6). ʻE lava ke lau ʻe he kau mēmipa ʻo e kalasí ha ngaahi veesi mei he ʻĪsaia 11 (hangē ko e veesi 6–12) pea fakanounouʻi ʻi heʻenau lea pē ʻanautolu ʻa e meʻa naʻe tomuʻa mamata ki ai ʻa ʻĪsaiá. Ko e hā hotau fatongia ʻi hono fakakakato e ngaahi kikite ko ʻení?

“He kuo fanauʻi kiate kitautolu ʻa e tamasiʻi, kuo foaki kiate kitautolu ʻa e foha” (ʻĪsaia 9:6).

ʻĪsaia 7–9

Naʻe kikite ʻa ʻĪsaia ʻo kau kia Sīsū Kalaisi.

• Te ke lava ʻo fehuʻi ki he kau mēmipa ʻo e kalasí ʻa e meʻa ʻoku nau ako fekauʻaki mo Sīsū Kalaisi mei he ngaahi potufolofola hangē ko e ʻĪsaia 7:14; 8:13–14; 9:2, 6–7. Hangē ko ʻení, ko e hā e ʻuhinga ʻoku hoko ai ʻa e ʻImanuelá ko ha huafa lelei ki he Fakamoʻuí? (vakai, Mātiu 1:23). Ko e hā ha founga kuo hoko ai ʻa Sīsū Kalaisi ko ha “Akonaki” pe “ʻEiki ʻo e Melinó” kiate kitautolu? ʻE lava foki ke vahevahe ʻe he kau mēmipa ʻo e kalasí ha ngaahi potufolofola kehe ne nau maʻu ʻi he ʻĪsaia 1–12 ʻa ia ʻoku fakamanatu ange ai kiate kinautolu ʻa Sīsū Kalaisi. Ko e hā ʻoku akoʻi mai ʻe he ngaahi potufolofola ko ʻení fekauʻaki mo Iá?

• Kimuʻa he kalasí, te ke lava ʻo fakaafeʻi e kau mēmipa ʻo e kalasí ke nau ʻomi ha fakatātā ʻo Kalaisi ʻoku nau ongoʻi ʻokú ne fakafofongaʻi ha taha ʻo e ngaahi fakamatala ʻo e Fakamoʻuí ʻoku hā ʻi he ʻĪsaia 7–9. Lolotonga e kalasí, tuku ange ha taimi ke nau fakaʻaliʻali ai ʻa e fakatātā ne nau ʻomí pea fakamatalaʻi ʻa ʻene kaunga ki he ngaahi lea ʻa ʻĪsaiá.

Ngaahi Maʻuʻanga Tokoni Lahi Ange

ʻE lava ke fakahoko e ngaahi kikite ʻa ʻĪsaiá ʻi ha ngaahi founga kehekehe.

Ne akonaki ʻa Palesiteni Tāleni H. ʻOakesi ʻo pehē: “ʻOku ʻi he tohi ʻa ʻĪsaiá ha ngaahi kikite lahi ʻoku lahi hono fakahokó. Ko e kikite ʻe taha hangē ʻoku kau ki he kakai ʻi he kuonga ʻo ʻĪsaiá pe ko e ngaahi tuʻunga ʻe hoko ʻi he toʻu tangata ka hokó. Ko e ʻuhinga ʻe taha pe ko e fakatātā ki ha meʻa ʻe hoko ʻi he vaeuaʻangamālie ʻo taimí, ʻi he taimi naʻe fakaʻauha ai ʻa Selusalema pea fakamoveteveteʻi hono kakaí hili e tutuki ʻo e ʻAlo ʻo e ʻOtuá. ʻI he taimi tatau ko ha ʻuhinga pe ko hano fakakakato ʻe taha ʻo e kikite tatau pē ʻoku fekauʻaki ia mo e ngaahi meʻa ʻe hoko ʻi he Hāʻele ʻAnga Ua Mai ʻa e Fakamoʻuí. Ko hono moʻoní ko e konga lahi ʻo e ngaahi kikite ko ʻení ʻoku lahi honau ngaahi ʻuhingá pea ʻokú ne fakamamafaʻi ʻa hono mahuʻinga ko ia ke tau fekumi ki ha fakahā mei he Laumālie Māʻoniʻoní ke tokoni kiate kitautolu ʻi hono fakaʻuhingaʻi kinautolú” (“Scripture Reading and Revelation,” Ensign, Jan. 1995, 8).

Ko Hono Fakatupulaki ʻEtau Founga Akoʻí

Fakaafeʻi ʻa e Laumālié “ʻE lava ke fakaafeʻi mai e Laumālié ʻe he ngaahi hiva toputapú, folofolá, lea ʻa e kau palōfita ʻo e ngaahi ʻaho kimui ní, fakahaaʻi ʻo e ʻofá mo e fakamoʻoní pea mo e ngaahi momeniti fakalaulaulotó” (Ko e Faiako ʻi he Founga ʻa e Fakamoʻuí,10).