29 ʻAokosi–4 Sepitema

Lea Fakatātā 1–4; 15–16; 22; 31; Tangata Malanga 1–3; 11–12

“Ko e Manavahē ki [he ʻEikí] ko e Kamataʻanga Ia ʻo e Potó”

ʻE faitāpuekina fēfē nai ʻe he ngaahi pōpoaki ʻi he Lea Fakatātaá mo e Tangata Malangá, ʻa e moʻui ʻa kinautolu ʻokú ke akoʻí? Muimui ʻi he ngaahi ueʻi fakalaumālie mo e ongo ʻokú ke maʻu ʻi hoʻo ako mo teuteu ke faiakó.

Lekooti e Ngaahi Ongo ʻOkú ke Maʻú

Fakaafeʻi e Feʻinasiʻakí

ʻOku lahi ha ngaahi pōpoaki fakaʻofoʻofa mo mālohi ʻi he tohi Lea Fakatātaá mo e Tangata Malangá. Kimuʻa pea aleaʻi ha ngaahi potufolofola pau, hangē ko ia ʻoku fokotuʻu atu ʻi laló, fakaafeʻi e kau mēmipa ʻo e kalasí ke nau vahevahe ha konga ʻo e ngaahi potufolofola ʻoku nau saiʻia taha aí mei heʻenau ako fakataautaha pe ako fakafāmili ʻo e folofolá he uike ní.

Akoʻi e Tokāteliné

Lea Fakatātā 1–4; 15–16; Tangata Malanga 1–3; 11–12

“Fakatokangaʻi ho telingá ki he potó.”

• ʻI he kotoa ʻo e tohi Lea Fakatātaá, ʻoku toutou fakamatala ai ki he fakaafe ke fekumi ki he potó mo e mahinó. Te ke tokoniʻi fēfē ʻa e kau mēmipa ʻo e kalasí ke nau vahevahe ʻa e meʻa ne nau ako fekauʻaki mo e potó lolotonga ʻenau akó? Ko ha founga ʻe taha ko hoʻo tohiʻi ʻa e foʻi lea poto ʻi he palakipoé pea fakaafeʻi e kau mēmipa ʻo e kalasí ke nau tānaki atu e ngaahi fika ʻo e vēsí pe kupuʻi lea mei he Lea Fakatātaá pe Tangata Malangá ʻa ia ʻoku nau ongoʻi ʻokú ne ʻomi ha ngaahi fakakaukau fekauʻaki mo e potó. (Kapau ʻe ʻaonga, te ke lava ʻo fokotuʻu ange ke fekumi ʻa e kau mēmipa ʻo e kalasí ʻi he Lea Fakatātā 1–4; 15–16; Tangata Malanga 1–3; 11–12.) Ko e hā e meʻa ʻoku tau ako fekauʻaki mo e potó mei he ngaahi potufolofola ko ʻení? ʻOku tāpuekina fēfē kitautolu ʻi heʻetau fekumi ki he potó mei he ʻOtuá?

Lea Fakatātā 1:7; 2:5; 3:7; 8:13; 15:33; 16:6; 31:30; Tangata Malanga 12:13

“ʻOua naʻá ke pehē ʻi ho mata ʻoʻoú, ʻokú ke poto; ka ke manavahē ki [he ʻEikí].”

• Ko ha kaveinga ʻe taha ʻoku hā ʻi he Lea Fakatātaá mo e Tangata Malangá ko e “manavahē ki he ʻEikí” (Lea Fakatātā 1:7; vakai foki, Lea Fakatātā 2:5; 3:7; 8:13; 15:33; 16:6; 31:30; Tangata Malanga 12:13). Mahalo ʻe lava ke lau ʻe he kalasí ha niʻihi ʻo e ngaahi veesi ko ʻení pea vahevahe ʻenau ongo ki he ʻuhinga ke manavahē ki he ʻEikí. ʻOku kehe fēfē nai ʻa e manavahē ki he ʻEikí mei he ngaahi faʻahinga kehe ʻo e manavaheé? Te ke lava ʻo vahevahe ha ngaahi fakakaukau mei he fakamatala ʻa ʻEletā Tēvita A. Petinā ʻoku hā ʻi he “Ngaahi Maʻuʻanga Tokoni Lahi Ange.”

Learning to Trust the Lord, [Ko e Ako ke Falala ki he ʻEikí] tā ʻe Kathleen Peterson

Lea Fakatātā 3:5–7

“Falala ki [he ʻEikí] ʻaki ho lotó kotoa.”

• Mahalo ʻe fiefia e kau mēmipa ʻo e kalasí ʻi ha lēsoni fakatātā ʻe tokoni ke mahino kiate kinautolu ʻa e ʻuhinga ke “falala ki [he ʻEikí]” pea “ʻoua naʻa [nau] faʻaki ki [honau] poto [ʻonautolú]” (Lea Fakatātā 3:5). Hangē ko ʻení, te ke lava ʻo fakaafeʻi ha mēmipa ʻo e kalasí ke falala ki ha meʻa ʻoku fefeka mo mālohi, hangē ko e holisí. Hili iá ʻe lava leva ke feinga ʻa e tokotahá ke falala ki ha meʻa ʻoku ʻikai fefeká, hangē ko ha taufale. ʻOku tokoni fēfē ʻa e fakatātā ko ʻení ke mahino kiate kitautolu ʻa e Lea Fakatātā 3:5? Ko e hā e meʻa ʻoku akoʻi ʻe he Lea Fakatātā 3:5–7 fekauʻaki mo e ʻuhinga ke falala ki he ʻEikí? Ko e hā e ʻuhinga ʻoku ʻikai fakapotopoto ai ke tau falala ki hotau poto pē ʻotautolú? Kuo tau ongoʻi fēfē ʻa e tataki ʻe he ʻEikí ʻa hotau halá ʻi heʻetau falala kiate Iá?

Lea Fakatātā 15:1–2, 4, 18,28; 16:24–32

“ʻOku tekeʻi atu ʻa e houhaú ʻe he tali fakavaivaí.”

• Ke tokoni ki he kau mēmipa ʻo e kalasí ke nau aleaʻi e founga ʻe lava ke nau maʻu ai ha melino lahi ange kae fakasiʻisiʻi ʻa e fekeʻikeʻí ʻi heʻenau moʻuí, te ke lava ʻo fakaafeʻi ke nau lau ʻa e Lea Fakatātā 15:1–2,18; 16:32. Hili iá ʻe lava leva ke nau vahevahe ʻa e ngaahi aʻusia kuo nau maʻu ʻokú ne fakatātaaʻi ʻa e ngaahi moʻoni ʻi he ngaahi veesi ko ʻení. Hangē ko ʻení, kuo tokoni fēfē nai ʻa hono fakaʻaongaʻi ha “tali fakavaivaí” ke “tekeʻi atu ʻa e houhaú”? (Lea Fakatātā 15:1). Pe ʻe lava ke nau fakakaukau ki ha ngaahi taimi ne fakafōtunga ai ʻe he Fakamoʻuí ʻa e meʻa ne akoʻi ʻi he ngaahi veesi ko ʻení (vakai, Sione 8:1–11; 18:1–11). Te tau lava fēfē ʻo muimui ki Heʻene tā sīpingá ʻi heʻetau feohi mo e niʻihi kehé?

• Neongo ne ʻikai ʻilo mai ʻe he kau faʻu tohi ʻo e tohi Lea Fakatātaá ʻa e ngaahi founga kehekehe ʻo e fetuʻutakí ʻi hotau kuongá, ka ʻe lava ke fakaʻaongaʻi ʻa e akonaki ʻi he Lea Fakatātā 15 mo e16 ki he ngaahi founga kotoa pē ʻo e fetuʻutakí. Ke tokoni ke mahino ʻeni ki he kau mēmipa ʻo e kalasí, te ke lava ʻo fakaafeʻi ʻa e tokotaha takitaha ke nau fili ha taha ʻo e ngaahi potufolofola ko ʻení ʻo lau: Lea Fakatātā 15:1–2, 4, 18,28; 16:24, 27–30. ʻE lava leva ʻe he kau mēmipa ʻo e kalasí ʻo toe fakalea ʻenau lea fakatātaá ʻi ha founga ʻo e akonaki fekauʻaki mo e feohi mo e niʻihi kehé ʻi he mītia fakasōsialé, pōpoaki telefoní, pe ʻi he ʻinitanetí. ʻE lava ke nau maʻu ha akonaki ʻaonga lahi ange ʻi he “Leá” ʻi he Ki Hono Fakamālohia ʻo e Toʻu Tupú (2011), 20–21.

Ngaahi Maʻuʻanga Tokoni Lahi Ange

“Ko e manavahē faka-ʻOtuá ʻa e ʻofa mo falala kiate Iá.”

Ne fakamatalaʻi ʻe ʻEletā Tēvita A. Petinā ʻo pehē:

“ʻOku tupu ʻa e manavahē ʻoku faka-ʻOtuá mei hano ʻiloʻi totonu ʻo e natula fakalangi mo e misiona ʻa e ʻEiki ko Sīsū Kalaisí, ʻa ia ko e loto fiemālie ke fakavaivaiʻi hotau lotó ki Hono finangaló, mo ʻiloʻi kuo pau ke fai ʻe he tangata mo e fefine kotoa pē ha fakamatala ki heʻene ngaahi angahala ʻaʻaná ʻi he ʻAho ʻo e Fakamāú. …

“Ko e manavahē faka-ʻOtuá ʻa e ʻofa mo falala kiate Iá. ʻI heʻetau manavahē kakato ki he ʻOtuá, ʻoku haohaoa ange ai ʻetau ʻofa ʻiate Iá. Pea ʻoku ‘hanga ʻe he ʻofa haohaoá ʻo tekeʻi ki tuʻa ʻa e ilifia kotoa pē’ (Molonai 8:16). ʻOku ou palōmesi atu ʻe hanga ʻe he ola ʻo e manavahē faka-ʻOtuá ʻo kapusi ʻa e fakapoʻulí (vakai, Tokāteline mo e Ngaahi Fuakava 50:25) ʻi heʻetau sio ki he Fakamoʻuí, pea langa ʻiate Ia ʻo hoko ko hotau makatuʻungá pea tau vilitaki atu ki muʻa ʻi Hono hala ʻo e fuakavá ʻi ha tukupā kuo fakatapui” (“Ko Ia Naʻa Nau Taʻofi ʻEnau Ilifiá,” Liahona, Mē 2015, 48–49).

Ko Hono Fakatupulaki ʻEtau Founga Akoʻí

Fakatefito ʻia Sīsū Kalaisi. ʻOku ʻikai ha toe founga lelei ange ke fakatupulaki ʻaki ʻa e tui ʻa kinautolu ʻokú ke akoʻí, ka ko hono fakatefito hoʻo lēsoní ʻi he Fakamoʻuí. ʻI hoʻo faiakó, fakaafeʻi ʻa e kau mēmipa ʻo e kalasí ke nau langa ʻi he “maka ʻo hotau Huhuʻí, ʻa ia ko Kalaisi, ko e ʻAlo ʻo e ʻOtuá” (Hilamani 5:12).