« ថ្ងៃទី ១២–១៨ ខែ កញ្ញា ។ អេសាយ ១៣–១៤; ២៤–៣០; ៣៥ ៖ ‹ ការណ៍អស្ចារ្យ ហើយចម្លែក › » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ព្រះគម្ពីរសញ្ញាចាស់ ឆ្នាំ ២០២២ ( ២០២១ )

« ថ្ងៃទី ១២–១៨ ខែ កញ្ញា ។ អេសាយ ១៣–១៤; ២៤–៣០; ៣៥ » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ឆ្នាំ ២០២២

ព្រៃពិសិដ្ឋ ដោយ ប្រេនថ៍ បូរ៉ាប់

ថ្ងៃទី ១២–១៨ ខែ កញ្ញា

អេសាយ ១៣–១៤; ២៤–៣០; ៣៥

« ការណ៍អស្ចារ្យ ហើយចម្លែក »

ពីមុនបងប្អូនអាចជួយមនុស្សដទៃឲ្យរកឃើញសេចក្ដីពិតទាំងឡាយនៅក្នុងគម្ពីរអេសាយបាន នោះបងប្អូនត្រូវរកឃើញសេចក្ដីពិតនោះសម្រាប់ខ្លួនឯងសិន ។ នៅពេលបងប្អូនអាននៅសប្ដាហ៍នេះ សូមពិចារណាថា តើសេចក្តីពិតមួយណាដែលបងប្អូនមានអារម្មណ៍ថាត្រូវតែគូសបញ្ជាក់នៅក្នុងថ្នាក់រៀន ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

ដើម្បីលើកទឹកចិត្តសមាជិកក្នុងថ្នាក់ឲ្យចែកចាយអ្វីដែលពួកគេកំពុងរៀនមកពីអេសាយ បងប្អូនអាចសួរពួកគេថា តើពួកគេនឹងឆ្លើយតបយ៉ាងដូចម្ដេចទៅកាន់នរណាម្នាក់ដែលនិយាយថា « គម្ពីរអេសាយពិបាកយល់ខ្លាំងណាស់ » ។ តើមានអ្វីខ្លះដែលបានជួយយើងឲ្យរកឃើញនូវអត្ថន័យនៅក្នុងការបង្រៀនរបស់អេសាយ ? តើវគ្គបទគម្ពីរអ្វីខ្លះដែលបានបំផុសគំនិតយើង ?

បង្រៀនគោលលទ្ធិ

អេសាយ ២៤:២១–២៣; ២៥:៦–៨; ២៦:១៩; ២៨:១៦

ការសរសេរទាំងឡាយរបស់អេសាយចង្អុលបង្ហាញយើងទៅរកព្រះយេស៊ូវគ្រីស្ទ ។

ដូចជានីហ្វៃដែរ សមាជិកក្នុងថ្នាក់របស់បងប្អូនអាចមានចិត្តរីករាយនឹងសាក្សីរបស់អេសាយអំពីព្រះយេស៊ូវគ្រីស្ទ ( សូមមើល នីហ្វៃទី២ ១១:២ ) ។ បងប្អូនអាចសូមឲ្យពួកគេចែកចាយខគម្ពីរណាមួយ ដែលពួកគេរកឃើញនៅក្នុងការអានរបស់ពួកគេនៅសប្ដាហ៍នេះ ដែលបានបង្រៀនពួកគេអំពីព្រះអង្គសង្គ្រោះ ។ ឬបងប្អូនអាចអញ្ជើញសមាជិកក្នុងថ្នាក់ ឲ្យចែកចាយអ្វីដែលពួកគេបានរៀនអំពីព្រះយេស៊ូវគ្រីស្ទមកពី អេសាយ ២៤:២១–២៣; ២៥:៦–៨; ២៦:១៩; ២៨:១៦ ឬខគម្ពីរផ្សេងទៀតដែលបងប្អូនបានរកឃើញនៅក្នុងការសិក្សារបស់បងប្អូន ។ ហេតុអ្វីសេចក្ដីពិតទាំងនេះមានតម្លៃចំពោះយើង ?

ទ្រង់យាងមកម្ដងទៀតដើម្បីគ្រប់គ្រង និងសោយរាជ្យ ដោយ ម៉ារី អ័រ សោអើរ

អេសាយ ២៤:១–៥; ២៨:១–៨; ២៩:៧–១០; ៣០:៨–១៤

ការក្បត់សាសនាមានន័យថា ការងាកចេញពីព្រះអម្ចាស់ និងពួកព្យាការីរបស់ទ្រង់ ។

គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ផ្ដល់យោបល់ឲ្យសញ្ជឹងគិតអំពីការប្រៀបធៀបមួយចំនួន ដែលអេសាយបានប្រើដើម្បីរៀបរាប់ពីលទ្ធផលនៃការងាកចេញពីព្រះអម្ចាស់ និងការបដិសេធពួកព្យាការីរបស់ទ្រង់ ។ សូមអញ្ជើញសមាជិកក្នុងថ្នាក់ឲ្យចែកចាយអ្វីដែលពួកគេបានរៀន ។ ឬបងប្អូនអាចអញ្ជើញពួកគេម្នាក់ៗឲ្យរំឭកវគ្គបទគម្ពីរដូចតទៅនេះមួយ ៖ អេសាយ ២៤:១–៥; ២៨:៧–៨; ២៩:៧–១០; ៣០:៨–១៤ ។ ដោយផ្អែកលើអ្វីដែលពួកគេបានអាន ពួកគេអាចបំពេញប្រយោគនេះបាន ៖ « ប្រសិនបើយើងងាកចេញពីព្រះអម្ចាស់ នោះយើងដូចជា… » ។ តើយើងអាចធ្វើអ្វីខ្លះ ដើម្បីបន្ដនៅស្មោះត្រង់ចំពោះព្រះអម្ចាស់ ហើយចៀសវាងពីការក្បត់សាសនា ? ( សូមមើល « ធនធានបន្ថែមទាំងឡាយ » ដើម្បីទទួលបានយោបល់មួយចំនួន ) ។ តើព្រះអម្ចាស់ប្រទានពរជ័យដល់អស់អ្នកដែលបន្ដនៅស្មោះត្រង់នឹងទ្រង់យ៉ាងដូចម្ដេច ?
ដើម្បីចាប់ផ្ដើមការពិភាក្សាមួយអំពីអាកប្បកិរិយា និងឥរិយាបថដែលអាចនាំយើងទៅរកការក្បត់សាសនា បងប្អូនអាចអញ្ជើញសមាជិកក្នុងថ្នាក់ឲ្យស្រាវជ្រាវក្នុង អេសាយ ២៤:១–៥; ២៨:១–៨; ២៩:៧–១០; ៣០:៨–១៤ ។ សូមឲ្យពួកគេរកមើលអ្វីដែលប្រជាជនក្នុងជំនាន់របស់អេសាយបានគិត និងធ្វើ ។ សូមធ្វើស្លាកព្រមានមួយដាក់នៅលើក្ដារខៀន ដែលសរសេរថា បម្រាម ៖ អាកប្បកិរិយា និងឥរិយាបថដូចតទៅនេះអាចនាំទៅរកការក្បត់សាសនា ។ សមាជិកក្នុងថ្នាក់អាចសរសេរនៅលើក្ដារខៀន នូវអ្វីដែលពួកគេរកឃើញនៅក្នុងខគម្ពីរទាំងនេះ ។ សូមផ្ដល់ឱកាសមួយឲ្យពួកគេចែកចាយពីរបៀបដែលពួកគេការពារខ្លួនគេ ឬក្រុមគ្រួសាររបស់ពួកគេពីការក្បត់សាសនា ។

អេសាយ ២៩:១៣–២៤; ៣០:១៨–២៦; ៣៥

ព្រះអម្ចាស់អាចស្ដារអ្វីដែលបាត់បង់ ឬបែកបាក់មកវិញបាន ។

នេះជាសំណួរមួយ ដែលបងប្អូនអាចសរសេរដាក់លើក្ដារខៀន ដែលអាចជួយសមាជិកក្នុងថ្នាក់ឲ្យសញ្ជឹងគិតពី អេសាយ ២៩ ៖ តើការសរសេររបស់អេសាយទាក់ទងទៅនឹងការស្តារឡើងវិញនៃដំណឹងល្អនៅជំនាន់របស់យើងយ៉ាងដូចម្ដេច ? សូមលើកទឹកចិត្តឲ្យពួកគេគិតអំពីសំណួរនេះ កាលពួកគេអានក្នុង អេសាយ ២៩:១៣–២៤ ដោយស្ងាត់ស្ងៀម ។ ប្រសិនបើពួកគេត្រូវការជំនួយ នោះពួកគេក៏អាចរំឭកវគ្គបទគម្ពីរដូចតទៅនេះបានផងដែរ ៖ នីហ្វៃទី២ ២៧:៦–២៦; យ៉ូសែប ស្មីធ—ប្រវត្តិ ១:១៧–១៩, ៦៣–៦៥ ។ បន្ទាប់ពីពួកគេជជែកគ្នាអំពីសំណួរនៅលើក្ដារខៀនហើយ នោះពួកគេអាចពិភាក្សាពីមូលហេតុដែលពាក្យ « អស្ចារ្យ » និង « ចម្លែក » ( អេសាយ ២៩:១៤ ) គឺជាពាក្យដ៏ល្អដើម្បីពិពណ៌នាពីការស្តារឡើងវិញនៃដំណឹងល្អ ។ តើយើងរៀនបានអ្វីខ្លះអំពីការស្ដារឡើងវិញមកពី « ការស្ដារឡើងវិញនៃភាពពេញលេញនៃដំណឹងល្អរបស់ព្រះយេស៊ូវគ្រីស្ទ ៖ ការប្រកាសដល់ពិភពលោកនៃខួបលើកទីពីររយឆ្នាំ » ? ( នៅលើគេហទំព័រChurchofJesusChrist.org ) ។
ជំពូក ៣០ និង ៣៥ នៃគម្ពីរអេសាយមាននូវវគ្គបទគម្ពីរបីបួន ដែលអាចបំផុសឲ្យមានសេចក្ដីជំនឿកាន់តែខ្លាំងឡើងលើព្រះចេស្ដារបស់ព្រះអម្ចាស់ ក្នុងការប្រទានពរជ័យដល់អស់អ្នកដែលបែរចិត្តគំនិតទៅរកទ្រង់ ។ ដើម្បីជួយសមាជិកក្នុងថ្នាក់ឲ្យរកវគ្គបទគម្ពីរទាំងនេះឃើញ បងប្អូនអាចអញ្ជើញពួកគេឲ្យសិក្សាក្នុង អេសាយ ៣០:១៨–២៦ ក៏បាន ឬក្នុង អេសាយ ៣៥ ក៏បាន ។ សូមឲ្យពួកគេចែកចាយពាក្យ ឬឃ្លានានាដែលពួកគេរកឃើញ ដែលអាចជួយនរណាម្នាក់ឲ្យបែរចិត្តគំនិតទៅរកព្រះអម្ចាស់ ដើម្បីទទួលបានសេចក្ដីប្រោសលោះ ។

ធនធានបន្ថែមទាំងឡាយ

ការបន្ដនៅស្មោះត្រង់ចំពោះព្រះអម្ចាស់ និងសាសនាចក្ររបស់ទ្រង់ ។

ប្រធាន អិម រ័សុល បាឡឺដ បានផ្ដល់ការប្រឹក្សាដូចខាងក្រោមនេះ ដើម្បីជួយយើងឲ្យបន្ដនៅស្មោះត្រង់ចំពោះព្រះអម្ចាស់ និងសាសនាចក្ររបស់ទ្រង់ ៖

« យើងត្រូវប្រែចិត្តជឿជាបន្តបន្ទាប់ ដោយបង្កើនសេចក្ដីជំនឿយើងលើព្រះយេស៊ូវគ្រីស្ទ និងភាពស្មោះត្រង់របស់យើងចំពោះដំណឹងល្អរបស់ទ្រង់ពេញមួយជីវិតយើង—ពុំមែនតែម្ដងទេ ប៉ុន្តែជាដរាបទៅ [ សូមមើល អាលម៉ា ៥:២៦ ] ។…

« …បន្ទូលរបស់ព្រះអម្ចាស់មាននៅក្នុងព្រះគម្ពីរ និងការបង្រៀនរបស់ពួកសាវក និងពួកព្យាការី ។ បន្ទូលទាំងនេះផ្ដល់ការទូន្មាន និងការណែនាំដល់យើង ដែលប្រៀបដូចជាអាវពោងខាងវិញ្ញាណ ហើយនឹងជួយយើងឲ្យដឹងពីរបៀបយកដៃទាំងពីរតោងទូកឲ្យជាប់ ។…

« បន្ថែមពីលើការអភិវឌ្ឍទម្លាប់នៃការអានព្រះគម្ពីរផ្ទាល់ខ្លួន យើងត្រូវធ្វើដូចជាពួកបុត្រារបស់ម៉ូសាយ ហើយប្រគល់ខ្លួនក្នុង ‹ ការអធិស្ឋាន និងការតមអាហារជាច្រើន › [ អាលម៉ា ១៧:៣ ] » ( « Stay in the Boat and Hold On! » Liahona ខែ វិច្ឆិកា ឆ្នាំ ២០១៤ ទំព័រ ៩០–៩១ ) ។

ការកែលម្អការបង្រៀនរបស់យើង

បង្ហាញការជឿជាក់លើសមត្ថភាពរបស់អ្នករៀន ។ មនុស្សមួយចំនួនក្នុងថ្នាក់របស់បងប្អូន ប្រហែលជាខ្វះភាពជឿជាក់លើសមត្ថភាពរៀនដំណឹងល្អរបស់ខ្លួន ។ សូមអះអាងដល់ពួកគេថា នៅពេលពួកគេខិតខំរៀន នោះព្រះវិញ្ញាណបរិសុទ្ធនឹងបង្រៀនពួកគេ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៩–៣០ ) ។