Uru rā’au mo’a, nā Brent Borup

12–18 nō Tetepa

Isaia 13–14 ; 24–30 ;35

« Te hō’ē ’ohipa ’ūmerehia ’e te māerehia »

Hou ’outou ’a tauturu ai i te tahi atu mau taʼata ʼia ʼite mai i te mau parau mau i roto i te buka a Isaia, e tiʼa ia ʼoutou ʼia ʼite mai i te mau parau mau nō ʼoutou iho. ’A tai’o ai ’outou i teie hepetoma, ’a feruri i te mau parau mau e fa’auruhia ia ’outou ’ia ha’apāpū atu i roto i te piha ha’api’ira’a.

Pāpa’i i te mau mana’o e tae mai

Tītau i te mana’o

Nō te fa’aitoito i te mau pīahi ’ia fa’a’ite mai i te mea tā rātou i ha’api’i mai i roto i te Isaia, e nehenehe ’outou e ui atu ia rātou e nāhea rātou ’ia pāhono atu i te hō’ē ta’ata o te parau mai ē, « e mea pa’ari roa ’ia māramarama i te buka a Isaia ». E aha te mea i tauturu ia tātou ’ia ’ite i te aura’a i roto i te mau ha’api’ira’a a Isaia ? E aha te mau ’īrava o te pāpa’ira’a mo’a tei fa’auru ia tātou ?

Ha’api’i i te ha’api’ira’a tumu

Isaia 24:21–23 ; 25:6–8 ; 26:19 ; 28:16

Tē fa’a’ite nei te mau pāpa’ira’a a Isaia ia tātou ia Iesu Mesia.

• Mai ia Nephi, ’ua ’oa’oa paha tā ’outou mau pīahi i te ’itera’a pāpū o Isaia nō ni’a ia Iesu Mesia (hi’o 2 Nephi 11:2). E nehenehe ’outou e ani ia rātou ’ia fa’a’ite mai i te tahi mau ’īrava tā rātou i ’ite i roto i tā rātou tai’ora’a i teie hepetoma tei ha’api’i ia rātou nō ni’a i te Fa’aora. ’Aore rā e nehenehe ’outou e ani i te mau pīahi ’ia fa’a’ite mai i te mea tā rātou i ha’api’i mai nō ni’a ia Iesu Mesia i roto i te Isaia 24:21–23 ; 25:6–8 ; 26:19 ; 28:16 ’aore rā, te tahi atu mau ’īrava tā ’outou i ’ite i roto i tā ’outou tuatāpapara’a. Nō te aha e mea faufa’a teie mau parau mau nō tātou ?

  

  E ho’i fa’ahou mai ’oia ’ei ha’ava ’e ’ei ari’i, nā MaryR. Sauer

Isaia 24:1–5 ; 28:1–8 ; 29:7–10 ; 30:8–14

Te tāivara’a ’o tē mata-’ē-ra’a ïa i te Fatu ’e i tāna mau peropheta.

• Tē fa’a’ite nei Te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’ia feruri hōhonu i te tahi o te mau fa’ahōho’ara’a tā Isaia i fa’a’ohipa nō te fa’a’ite i te mau hope’ara’a nō te mata-’ē-ra’a i te Fatu ’e te pāto’ira’a i tāna mau peropheta. E ani i te mau pīahi ’ia fa’a’ite mai i tā rātou i ’apo mai. ’Aore rā e nehenehe ’outou e ani ia rātou tāta’itahi ’ia tai’o fa’ahou i te hō’ē o te mau ’īrava i muri nei : Isaia 24:1–5 ; 28:7–8 ; 29:7–10 ; 30:8–14. ’Ia au i te mea tā rātou i tai’o, e nehenehe rātou e fa’aoti i teie ’īrava : « Mai te mea e mata ’ē atu tātou i te Fatu, e riro mai tātou mai … ». E aha tā tātou e nehenehe e rave nō te vai ha’apa’o tāmau noa i te Fatu ’e ’ia ’ape i te tāivara’a ? (Hi’o « Te tahi atu ā māteria tauturu » nō te tahi mau mana’o tauturu.) Nāhea te Fatu i te ha’amaita’i i te feiā e vai ha’apa’o noa iāna ?

• Nō te ha’amata i te hō’ē ’āparaura’a nō ni’a i te huru ’e te mau ravera’a ’o te nehenehe e arata’i ia tātou i te tāivara’a, e nehenehe ’outou e ani i te mau pīahi ’ia ’imi i te Isaia 24:1–5 ; 28:1–8 ; 29:7–10 ; 30:8–14. E ani ia rātou ’ia ’imi i te mau mea tā te mau ta’ata i te ’anotau ’o Isaia i feruri ’e i rave na. ’A pāpa’i te hō’ē parau fa’aara i ni’a i te tāpura ’ere’ere Fa’aarara’a : E nehenehe te mau huru ’e te mau peu i muri nei e arata’i i te tāivara’a. E nehenehe te mau pīahi e tāpura i te mea tā rātou i ʼite i roto i te mau ’īrava. ’A hōro’a ia rātou i te hō’ē rāve’a nō te fa’a’ite mai e nāhea rātou i te pāruru ia rātou iho ’aore rā i tō rātou ’utuāfare i te tāivara’a.

Isaia 29:13–24 ; 30:18–26 ; 35

E nehenehe te Fatu e fa’aho’i mai i te mau mea i mo’e ’aore rā i fati.

• Teie te hō’ē uira’a tā ’outou e nehenehe e pāpa’i i ni’a i te tāpura ’ere’ere ’o te nehenehe e tauturu i te mau pīahi ’ia feruri i te Isaia 29 : Nāhea te mau pāpa’ira’a a Isaia e tū’ati ai i te fa’aho’i-fa’ahou-ra’a mai o te ’evanelia i tō tātou nei ’anotau ? ’A fa’aitoito ia rātou ’ia feruri i teie uira’a ’a tai’o ai rātou ma te māmū i te Isaia 29:13–24. Mai te mea e hina’aro rātou i te tauturu, e nehenehe ato’a rātou e hi’o fa’ahou i te mau tuha’a mai teie : 2 Nephi 27:6–26 ; Iosepha Semita—’Ā’amu 1:17–19, 63–65. I muri a’e i tō rātou paraparaura’a nō ni’a i te uira’a i ni’a i te tāpura, e nehenehe rātou e ’āparau nō te aha « ’ūmerehia » ’e « māerehia » (Isaia 29:14) e riro ai e mau parau maita’i nō te fa’a’ite i te fa’aho’i-fa’ahou-ra’a mai o te ’evanelia. E aha tā tātou e ha’api’i mai nō ni’a i te fa’aho’i-fa’ahou-ra’a mai « Te fa’aho’ira’ahia mai te ’īra’a o te ’evanelia a Iesu Mesia : Poro’i i tō te ao nei nō te pitira’a o te tenetere » ? (ChurchofJesusChrist.org).

• Tē vai nei e rave rahi mau ’īrava i roto i te mau pene 30 ’e 35 a Isaia ’o te nehenehe e fa’auru rahi atu ā i te fa’aro’o i roto i te mana o te Fatu nō te ha’amaita’i i te feiā e fāriu atu i ni’a iāna. Nō te tauturu i te mau pīahi ’ia ’ite i teie mau ’īrava, e nehenehe ’outou e ani ia rātou ’ia tuatāpapa i te Isaia 30:18–26 ’aore rā te Isaia 35. E ani ia rātou ’ia fa’a’ite mai i te mau ta’o ’aore rā te mau pereota tā rātou i ’ite ’o te nehenehe e tauturu i te hō’ē ta’ata ’ia fāriu atu i ni’a i te Fatu nō te fa’aorara’a.

Te tahi atu ā mātēria tauturu

Tāmau noa i te ha’apa’o maita’i i te Fatu ’e i tāna ’Ēkālesia.

’Ua hōro’a mai te peresideni M. Russell Ballard i te a’o i muri nei nō te tauturu ia tātou ’ia vai ha’apao noa i te Fatu ’e i tāna ’Ēkālesia :

« Tītauhia tātou ’ia ora i te hō’ē fa’afāriura’a tāmau nā roto i te fa’arahira’a i tō tātou fa’aro’o ia Iesu Mesia ’e i tō tātou ha’apa’o maita’i i tāna ’evanelia i te roara’a o tō tātou orara’a―’eiaha i te hō’ē noa taime i te mau mahana ato’a rā [hi’o Alama 5:26]…

« … E ’itehia te mau parau a te Fatu i roto i te mau pāpa’ira’a mo’a ’e te mau ha’api’ira’a a te mau ’āpōsetolo ’e te mau peropheta. Tei roto i te reira te parau a’o ’e te arata’ira’a nō tātou, ’ia pe’e-ana’e-hia te reira, e riro mai ïa ’ei ’ahu pōito pae vārua ’e e tauturu mai ïa te reira ’ia tāpe’a maita’i i nā rima e piti…

« Hau atu i te fa’atupura’a i te ha’amātaura’a ’ia tai’o i te pāpa’ira’a mo’a nō tātou iho, tītauhia ia tātou ’ia riro mai te mau tamari’i tamāroa a Mosia ’e ’ia pinepine tātou i te pure ’e i te ha’apae i te mā’a’ [Alama 17:3] » (« ’A fa’aea i roto i te pahī ’e ’a tāpe’a maita’i ! » Liahona, Novema 2014, 90–91).

Ha’amaita’ira’a i tā tātou ha’api’ira’a

’A fa’a’ite i te ti’aturira’a i roto i te mau ’aravihi o te mau pīahi. Tē vai nei paha te tahi ’o rātou te ’ore e ti’aturi nei i tō rātou iho ’aravihi nō te ha’api’i mai i te ’evanelia. ’A ha’apāpū ia rātou ē ’a tūtava ai rātou i te raupā i te ’ite, e ha’api’i te Vārua Maita’i ia rātou. (Hi’o Ha’api’ira’a mai tā te Fa’aora, 29-30.)