« 12–18 nō Tetepa. Isaia 13–14 ; 24–30 ; 35 : ‘Ei ravera’a ūmerehia ’e te maerehia’ », Mai, pe’e mai—nō te ta’ata hō’ē ’e te ’utuāfare : Faufa’a Tahito 2022 (2021)

« 12–18 nō Tetepa. Isaia 13–14 ; 24–30 ; 35 », Mai, pe’e mai—nō te ta’ata hō’ē ’e te ’utuāfare : 2022

Hōho’a

Tē ’ite nei Iosepha Semita i te Metua i te ao ra ’e ia Iesu Mesia i roto i te uru rā’au mo’a

Sacred Grove [Uru rā’au mo’a], nā Brent Borup

12–18 nō Tetepa

Isaia 13–14 ; 24–30 ; 35

« E ravera’a ūmerehia ’e te māerehia »

’Ua ha’api’i mai te peresideni Bonnie H. Cordon ē : « E ha’amāramarama te mau pāpa’ira’a mo’a i tō tātou ferurira’a, e fa’a’amu i tō tātou vārua, e pāhono i tā tātou mau uira’a, e fa’arahi i tō tātou ti’aturi i te Fatu, ’e e tauturu ia tātou ’ia fa’atumu i tō tātou orara’a i ni’a iāna » (« E tiʼaruri ia Iehova ʼe ʼeiaha e turuʼi atu i tō ʼoe iho ra haʼapaʼo », Ensign ’aore rā Liahona, Mē 2017, 7).

Pāpa’i i te mau mana’o e tae mai

Hō’ē o te mau mea tā te Fatu e ani i te mau peropheta ’ia rave ’oia ho’i, e fa’aara i te mau hope’ara’a o te hara. Nō te mau peropheta o te Faufa’a Tahito, te aura’a pinepine o te reira ’oia ho’i, te paraura’a ïa i te mau fa’atere mana rahi o te mau bāsileia pūai ē, e mea ti’a ia rātou ’ia tātarahapa, ’aore rā, e ha’amouhia rātou. ’Ua riro te reira ’ei ’ohipa ataata, terā rā, ’aita ’o Isaia i mata’u, ’e tāna mau fa’aarara’a i te mau bāsileia o tōna ra ’anotau—mai ia ’Īserā’ela, ia Iuda, ’e te mau nūna’a tāpiri mai—e mau fa’aarara’a itoito ïa (’a hi’o Isaia 13–23).

Terā rā, e poro’i fa’atupu ti’aturira’a ato’a tā Isaia. Noa atu ē, ’ua tupu mau te mau ha’amoura’a i tohuhia i ni’a i te reira mau bāsileia, ’ua ’ite ātea ’o Isaia i te taime nō te fa’aho’i-fa’ahou-ra’a mai ’e te fa’a’āpīra’a. E ani te Fatu i tōna mau ta’ata ’ia ho’i iāna ra. E fa’ariro ’oia i « te one ve’ave’a ra ’ei pape hopuna, ’e te repo mārō ra ’ei pape piha’a ana’e » (Isaia 35:7). E rave ’oia i te hō’ē « ravera’a ūmerehia ’e te māerehia » (Isaia 29:14), te fa’aho’ira’a mai ia ’Īserā’ela ra i te mau ha’amaita’ira’a tāna i parau fafau mai ia rātou. ’Aita ’o Isaia, ’aita hō’ē noa ato’a ta’ata tei ora na i tāua tau ra, i ora nō te ’ite i teie ’ohipa ’ūmerehia. Tē ’ite nei rā tātou, i te hope’ara’a, i te tupura’a te reira i teie mahana. E ti’a ’ia parau ē, e tuha’a tātou nō te reira !

Hōho’a

ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Isaia 13:1–11, 19–22 ; 14:1–20

E topa te mau bāsileia ’ino o te ao nei ’e tō rātou mau tāvana.

’Ua pi’ihia te Isaia 13–14 « te hōpoi’a nō te » (e parau poro’i tohu nō ni’a) ia Babulonia (Isaia 13:1). I mūta’a ra, e bāsileia pūai Babulonia, ma te fa’atere pūai, i teienei rā, mai te huru ē e ’ā’ai tahito. Nō reira, nō te aha pa’i te poro’i i tō Babulonia i te mea faufa’a nō tātou i teie mahana ? I roto i te mau pāpa’ira’a mo’a, ’ua riro ’o Babulonia ’ei tapa’o nō te te’ote’o, nō te mau peu o te ao nei, ’e nō te hara, ’e i teie mahana ’ua hā’atihia tātou i teie mau mea ato’a. ’A feruri i teie tāpa’o ’a tai’o ai i te Isaia 13:1–11, 19–22 ; 14:1–20. E nehenehe ato’a ’oe e feruri i te mau uira’a mai teie :

Nāhea te mau fa’aarara’a a Isaia i tō Babulonia i te tū’ati i te mau parau tohu nō ni’a i te ao hou te tae-piti-ra’a mai o te Fa’aora ? (’a hi’o Isaia 13:1–11 ; Te Parau Ha’api’ira’a ’e te mau Parau Fafau 45:26–42).
E aha te mau tū’atira’a tā ’oe e ’ite ra i rotopū i te te’ote’o o te ari’i nō babulonia ’e te te’ote’o o Sātane ? (’a hi’o i te Isaia 14:4–20 ; Mose 4:1–4). E aha te mau fa’aarara’a tā ’oe e ’ite ra nō ’oe iho i roto i teie mau ’īrava ?
E mea nāhea te Fa’aora i te ha’amāha « i tō ’oe ra rohirohi ’e tō ’oe ra mata’u » ? (Isaia 14:3).

He Comes Again to Rule and Reign [E ho’i fa’ahou mai ’oia nō te fa’atere ari’i], nā Mary R. Sauer

Isaia 24:21–23 ; 25:6–8 ; 26:19 ; 28:16

Tē fa’atoro nei te mau pāpa’ira’a a Isaia iā’u i ni’a ia Iesu Mesia ra.

Pinepine te mau ha’api’ira’a a Isaia i te fa’ahiti i te misioni a te Fa’aora, tae noa atu i tāna tusia tāra’ehara, te ti’afa’ahoura’a ’e te tae-piti-ra’a mai. E aha te mau tuha’a o tāna misioni e puta mai i roto i te ferurira’a ’ia tai’o ana’e ’oe i teie mau ’īrava i muri nei : Isaia 24:21–23 ; 25:6–8 ; 26:19 ; 28:16 ? E aha te tahi atu mau ’īrava tā ’oe e ’ite nei ’o tē fa’aha’amana’o ia ’oe i te Fa’aora ?

’A hi’o ato’a Isaia 22:22–25.

Isaia 24:1–12 ; 28:7–8 ; 29:7–10 ; 30:8–14

Te aura’a o te parau tāivara’a, ’o te huri-tua-ra’a ïa i te Fatu ’e i tāna mau peropheta.

Nō te fa’aara i te mau hope’ara’a o te huri-tua-ra’a i te Fatu ’e te pāto’ira’a i tāna mau peropheta, ’ua fa’a’ohipa ’o Isaia e rave rahi fa’ahōho’ara’a. Tei roto i te reira te parau nō te fenua e hūrē-pa’apa’a-roa-hia (Isaia 24:1–12), te peu ta’ero ’ava (Isaia 28:7–8), te po’ia ’e te po’ihā (Isaia 29:7–10), ’e te hō’ē patu ’aore ra te hō’ē ’āu’a pararī (Isaia 30:8–14). ’Ia au i te mea tā ’oe i tai’o i roto i teie mau ’īrava, nō te aha e mea faufa’a ’ia ha’apa’o i tā tātou mau fafaura’a ? ’A feruri i te mau mea tā ’oe e rave nō te ha’apa’o maita’i noa i te Fatu ’e i tāna mau tāvini.

Hi’o ato’a M. Russell Ballard, « ’A fa’aea i roto i te pahī ’e ’a tāpe’a maita’i ! » Ensign ’e ’aore rā Liahona, Novema 2014, 89–92.

Isaiah 29 ; 30:18–26 ; 35

E nehenehe te Fatu e fa’aho’i mai i te mau mea tei mo’e ’e ’aore rā, tei pararī.

’Ia fa’aru’e ana’e te ta’ata ’aore rā, te mau sōtaiete i te Fatu, e hina’aro ’o Sātane ’ia feruri tātou ē, e’ita te reira mau hope’ara’a e taui fa’ahou. Terā rā, ’ua fa’a’ite mai ’o Isaia i te tahi o te mau mea māere tā te Fatu e rave ’ia tātarahapa ’e ’ia fāriu ana’e te ta’ata i ni’a iāna. E aha tā ’oe e ha’api’i mai nei i roto i te Isaia 29:13–24 ; 30:18–26 ; 35 nō ni’a i te Fatu, tōna here, ’e tōna mana ?

Hō’ē rāve’a tō te Fatu fa’a’itera’a mai i tōna mana i tō tātou nei ’anotau ’oia ho’i, nā roto i te fa’aho’i-fa’ahou-ra’a mai i tāna ’evanelia. Tē vai ra i roto ia Isaia 29 e rave rahi mau ’īrava e tuea i te mau ’ohipa o taua fa’aho’i-fa’ahou-ra’a mai. ’Ei hi’ora’a :

’A fa’aau i te Isaia 29:11–12 i te 2 Nephi 27:6–26 ’e te Iosepha Semita—’Ā’amu 1:63–65.
’A fa’aau i te Isaia 29:13–14 i Te Parau Ha’api’ira’a ’e te mau Parau Fafau 4 ’e te Iosepha Semita—’Ā’amu 1:17–19.
’A fa’aau i te Isaia 29:18–24 i te ’api upo’o parau o te Buka a Moromona.

E aha tō ’oe mau mana’o ’aore rā, mau ferurira’a nō ni’a i te fa’aho’i-fa’ahou-ra’a mai o te ’evanelia ’a tai’o ai ’oe i teie mau ’īrava ?

’A hi’o ato’a « Te fa’aho’i-fa’ahou-ra’a mai o te ’īra’a o te ’evanelia a Iesu Mesia : E poro’i i tō te ao nei nō te piti-hānere-ra’a o te matahiti » (ChurchofJesusChrist.org).

Hōho’a

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Isaia 25:4–9.’Ua fāri’i ānei tō ’outou ’utuāfare i te ha’amaita’ira’a nō te vāhi ha’apūra’a pāruruhia i roto i te taime vero ’aore rā, i te marumaru i te hō’ē mahana ve’ave’a nō te pu’e tau māhanahana ? (’a hi’o i te ’īrava 4). ’A paraparau nō ni’a i te reira ’a tai’o ai ’outou i te mau ’īrava ’e i te tahi atu mau tātarara’a a te Fatu e vai ra i roto i te Isaia 25:4–9. Nāhea te Fatu e hōho’a ai i teie mau mea ?

Isaia 25:8–9 ; 26:19.Te fa’a’itera’a i te mau hōho’a o te Fa’aora i roto ia Getesemane, i ni’a i te satauro, ’e i muri a’e i tōna ti’afa’ahoura’a, e nehenehe te reira e tauturu i tō ’outou ’utuāfare ’ia ’ite i te mau tū’atira’a i roto i teie mau ’īrava ’e ’o Iesu Mesia (’a hi’o i te Buka hōho’a nō te ’evanelia, mau nūmera 56, 57, 58, 59). ’A ani i tō ’outou ’utuāfare ’ia fa’a’ite mai nō te aha rātou « e ’oa’oa [ai] i te ora nāna » (Isaia 25:9).

Isaia 29:11–18.E nehenehe teie mau ’īrava e tauturu i tō ’outou ’utuāfare ’ia ’āparau i « te ravera’a ’ūmerehia ’e te māerehia » (’īrava 14) o te fa’aho’i-fa’ahou-ra’a mai o te ’evanelia ’e te taera’a mai o te Buka a Moromona. Nō te aha teie mau mea e riro ai ’ei mea māere e te fa’ahiahia nō tātou ? ’A ani i te mau melo o te ’utuāfare ’ia ’imi i te mau tao’a i roto i tō ’outou fare e fa’ahōho’a i te mau ha’amaita’ira’a ’ūmerehia o te fa’aho’i-fa’ahou-ra’a mai.

Isaia 35.E au paha tō ’outou ’utuāfare ’ia pāpa’i i te mau hōho’a i roto i teie pene ’o tē tauturu ia tātou ’ia māramarama ē, e mea nāhea Iesu Mesia i te patu ia Ziona i tō tātou nei ’anotau. E aha tā teie mau hōho’a e ha’api’i mai nei ? E aha tā tātou e nehenehe e rave nō te tauturu i te patura’a ia Ziona ?

Nō te mau mana’o hau atu nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto Mai, pe’e mai—nō te Paraimere

Hīmene tei mana’ohia : « Par un beau printemps doré », Chants pour les enfants, 57.

Ha’amaita’i i tā tātou ha’api’ira’a

Vaiiho i te mau tamari’i ’ia fa’a’ite’ite mai i tō rātou ’aravihi ’ia hāmani. ’Ia hāmani ana’e te mau tamari’i i te hō’ē mea e tū’ati i te hō’ē parau tumu o te ’evanelia, e tauturu te reira ia rātou ’ia māramarama maita’i a’e i te parau tumu. E vaiiho ia rātou ’ia patu, ’ia pāpa’i hōho’a, ’ia pēni, ’ia pāpa’i ’e ’ia hāmani. (Hi’o Te Ha’api’ira’a mai tā te Fa’aora, 25.)