Healing the Blind Man [Iesu e fa’aora ra i te ta’ata matapō], nā Carl Heinrich Bloch

19–25 nō Tetepa

Isaia 40–49

« E ha’amāhanahana i tō’u ra mau ta’ata »

E mea pinepine ’o Isaia i te fa’a’ohipa i te reo taipe. ’A ha’apa’o maita’i i te mau mana’o ’e te mau ferurira’a tā teie mau tāpa’o e fa’atupu mai i roto i tō ’outou ferurira’a ’e tō ’outou ’ā’au. E nehenehe te reira e tauturu ia ’outou ’ia māramarama maita’i a’e i te mea tāna i ha’api’i mai.

Pāpa’i i te mau mana’o e tae mai

« Ha’amāhanahana » ’o te parau mātāmua ïa a Isaia pene 40. E tāpa’o te reira nō te ha’amatara’a te hō’ē ta’ira’a reo ’ē, e parau ta’a ’ē e tūra’ihia i roto i te parau poro’i a te peropheta. ’Ua riro te mau pāpa’ira’a mātāmua a Isaia ’ei fa’aarara’a ia ’Īserā’ela ’e ia Iuda i te ha’amoura’a ’e te fa’atītīra’a e tae mai i ni’a ia rātou nō tā rātou mau hara, ’āre’a rā te mau parau tohu hope’a nei, nō te tāmāhanahana ïa i te mau ’āti Iuda i roto i te 150 matahiti i muri mai—i muri a’e i te ha’amoura’ahia Ierusalema, ’ua ha’avi’ivi’ihia te hiero ’e ’ua hōpoi-tītī-hia te ta’ata nā Babulonia. Terā rā, tē tae nei teie mau parau tohu i te mau tau a muri atu, i muri atu i te mau ’āti ’Īserā’ela tei pau ’e tei paruparu. Tē parau nei te reira ia tātou, ’o tē tae ato’a mai nei te mana’o ’aravī ’e te tarapape ’e te mo’e roa ato’a.

E mea ’ōhie roa te parau poro’i a Isaia ia rātou ’e ia tātou nei : « ’Eiaha e mata’u » (Isaia 43:1). Tē vai ra te rāve’a. ’Aita te Fatu i ha’amo’e ia ’outou, ’e e mana tōna i ni’a i te mau vaira’a e mea huru noa’a ’ore ’ia rave. E ’ere ānei ’o te Fatu « ’о tei hāmani i te mau ra’i, ’e […] ’o tei hōhora ho’i i te fenua, ’e […] ’о tei hōro’a mai i te aho nō te mau ta’ata i ni’a ihora » ? (Isaia 42:5). E ere ānei e mana rahi a’e tōna i tō Babulonia, i te hara, i te mau mea ato’a e fa’atītī nei ia ’outou ? « E fāriu mai iā’u nei », tāna ïa tāparura’a, « ’ua fa’aorahia ’oe e au » (Isaia 44:22). E nehenehe tāna e fa’aora, e fa’aho’i fa’ahou, e ha’apūai, e fa’a’ore i te hapa, ’e e tāmāhanahana—noa atu te mea e hina’arohia nō ’outou, e hina’aroha i tō ’outou vaira’a, ’ia fa’aorahia te reira.

Nō te ha’api’i e mea nāhea tō Nephi ’e ’o Iakoba fa’aaura’a ia Isaia 48–49 i tō rāua mau ta’ata, ’a hi’o i te 1 Nephi 22 ’e te 2 Nephi 6.

Mau mana’o nō te tuatāpapara’a pāpa’ira’a mo’a a te ta’ata hō’ē

Isaia 40–49

E nehenehe Iesu Mesia e tāmāhanahana iā’u ’e e hōro’a mai i te tīa’ira’a iā’u.

E mea pāpū ē, e mea ha’aparuparu mana’o ’e te ’ino ho’i nō te ’āti ’Īserā’ela ’ia ’ite ia rātou iho i fa’atītīhia i Babulonia. E rave rahi paha tei uiui ē, ’ua ’ere roa ānei rātou ē a muri noa atu i tō rātou ti’ara’a ta’ata mā’itihia ’e te fafauhia nā te Atua. ’A tai’o ai ’oe i te Isaia 40–49, ’a ’imi i te mau ’īrava e mahere ē, ’ua hōro’a i te tāmāhanahana ’e te tīa’ira’a. Nō te ’īrava tāta’itahi e ’itehia ia ’oe, ’a feruri ’e ’a pāpa’i e aha tā te Fatu e parau nei ia ’oe i roto i teie mau ’īrava. Teie te tahi mau ’īrava e nehenehe ’oe e ha’amata :

• 40:11, 29–31 :

• 41:10–13, 17–18 :

• 42:6–7 :

• 43:1–7, 25 :

• 44:1–4, 21–24 :

• 46:3–4 :

• 49:7–16 :

Nāhea ’oe e nehenehe ai e fa’a’ite i teie mau parau poro’i i te hō’ē ta’ata e hina’aro i te fa’aitoitora’a ’aore rā, te tīa’ira’a ? (’a hi’o Isaia 40:1–2).

’A hi’o ato’a Jeffrey R. Holland, « Ma te tīa’i pāpū roa », Ensign ’e ’aore rā Liahona, Mē 2020, 81–84.

Nā roto i te ha’apa’ora’a i te Fatu, e nehenehe tātou e fāri’i i te « maita’i […] mai te pape pu’e ra » (Isaia 48:18).

Isaia 40:3–8, 15–23 ; 42:15–16 ; 47:7–11

E mana rahi a’e tō te Atua i tō te ao nei.

’Ua tāmau noa ’o Isaia i te fa’aha’amana’o i tōna mau ta’ata i te mana fāito ’ore o te Atua, rahi a’e i te teimaha o te mana o te ao nei tei hā’ati ia rātou. ’A ’imi i teie parau poro’i ’a tai’o ai ’oe i te Isaia 40:3–8, 15–23 ; 42:15–16 ; ’e 47:7–11 (’a hi’o ē, te pene 47 nō te nūna’a ïa tei haru ia ’Īserā’ela, ’o Babulonia). E aha tā teie mau ’īrava e ha’api’i nei ia ’oe nō ni’a i te mau mea o te ao nei ? E aha tā te reira e ha’api’i nei ia ’oe nō ni’a i te Atua ? ’A feruri nō te aha teie parau poro’i e nehenehe ai e riro ’ei mea faufa’a roa nō te mau ’āti Iuda i roto i te fa’atītīra’a. Nō te aha e mea faufa’a te reira nō ’oe ?

’A hi’o ato’a « ’Ei iā’u nei tō’u Atua ē ! » Te mau hīmene, N°90.

Isaia 41:8–13 ; 42:1–7 ; 43:9–12 ; 44:21–28 ; 45:1–4 ; 48:10 ; 49:1–9

« ’O tā’u tāvini ho’i ’oe ».

I roto i te Isaia 40–49 tē paraparau nei te Fatu nō ni’a i tōna « tāvini » ’e tōna mau « ’ite ». I roto i te tahi mau ’īrava e au ra ē, tē parau nei teie mau ta’o nō ni’a ia Iesu Mesia (’a hi’o Isaia 42:1–7), i roto i te tahi atu tē parau ra ïa nō ni’a i te ’utuāfare o ’Īserā’ela (’a hi’o Isaia 45:4), ’e i roto i te tahi atu tē parau ra ïa nō ni’a i te ari’i Kuro, tei fa’ati’a i te ’āti Iuda ’ia ho’i i Ierusalema ’e ’ia patu fa’ahou i te hiero (’a hi’o 44:26–45:4). Terā rā, i te mau taime ato’a, e nehenehe ato’a ’oe e feruri ē, nāhea te mau ’īrava e tano ai nō ’oe ’ei tāvini ’e ’ei ’ite nō te Fatu. ’Ei hi’ora’a, ’a feruri i te mau uira’a mai teie te huru :

Isaia 41:8–13 ; 42:6 ; 44:21. E aha tā te Fatu i pi’i ia ’oe ’ia rave? ’A feruri i te mau pi’ira’a o te ’Ēkalesia e tae noa atu i te tahi atu mau hōpoi’a nō te fafaura’a nō te tāvini iāna. Nāhea ’oia i te pāturu ia ’oe ’e ’ia « tāpe’a i tō [’oe] rima » (Isaia 42:6) ’a tāvini ai ’oe ? E mea nāhea ’oia i te « hāmanira’a » ia ’oe ’ia riro mai ’ei tāvini nōna ? (’a hi’o ato’a Isaia 48:10).

Isaia 43:9–12. E aha te aura’a ’o te parau ē, e ’ite ’oe nōna ? E aha te mau ’ohipa i tupu i roto i tō ’oe orara’a tei fa’a’ite mai ia ’oe ē, ’o ’oia te Fa’aora ?

Isaia 49:1–9. E aha te mau parau poro’i tā ’oe e ’ite nei i roto i teie mau ’īrava ’o tē nehenehe e tauturu mai i te taime e riro tā ’oe mau tauto’ora’a ’e te tāvinira’a, mai te huru ra ē e « mea faufa’a ’ore ? » (’īrava 4).

’A hi’o ato’a Mosia 18:9 ; Henry B. Eyring, « Hō’ē tamari’i ’e hō’ē pipi », Ensign ’e ’aore rā Liahona, Mē 2003, 29–32.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Isaia 40:3–4.Nō te tuatāpapa e aha te aura’a o te parau ra, « ’a fa’anehenehe […] i te ’ē’a o Iehova », e nehenehe tō ’oe ’utuāfare e fa’a’āfaro i te hō’ē tao’a tei fefe, fa’aāteatea i te hō’ē tahua tei ’ī te pehu, ’aore rā, e fa’atoro i te hō’ē purūmu nā ni’a i te hō’ē fenua ’ōfa’ifa’i. E nehenehe ato’a ’outou e fa’a’ite i te mau hōho’a nō Ioane Bāpetizo ’e nō Iosepha Semita (’a hi’o i te Buka hōho’a nō te ’evanelia, N°35, 87). E mea nāhea rātou i te fa’aineinera’a i te ’ē’a nō te taera’a mai o te Fatu ? (’a hi’o Luka 3:2–18 ; Te Parau Ha’api’ira’a ’e te mau Parau Fafau 135:3). Nāhea tātou ’ia tauturu i te fa’aineinera’a i te ’ē’a nōna ? (’ei hi’ora’a, ’a hi’o Te Parau Ha’api’ira’a ’e te mau Parau Fafau 33:10).

Isaia 40:28 ; 43:14–15 ; 44:6.E aha te mau i’oa ’aore rā te mau ti’ara’a o Iesu Mesia tā tātou e ’ite nei i roto i teie mau ’īrava ? E aha tā te i’oa tāta’itahi e ha’api’i mai nei ia tātou nō ni’a iāna ?

Isaia 41:10 ; 43:2–5 ; 46:4.E ’itehia teie mau ’īrava i roto i te hīmene « ’Auē te pa’ari » (Te mau hīmene, N°41). E au paha tō ’oe ’utuāfare ’ia hīmene ’āmui ’e ’ia ’imi i te mau pereota i roto i te hīmene tei tū’ati i te mau pereota i roto i teie mau ’īrava. E aha tā teie mau pereota e ha’api’i nei ia tātou nō ni’a ia Iesu Mesia ?

Isaia 44:3–4 ; 45:8.I muri a’e i te tai’ora’a i teie mau ’īrava, e nehenehe tō ’oe ’utuāfare e pīpī i te hō’ē rā’au tanu ’a paraparau ai ’outou nō ni’a i te mau ha’amaita’ira’a tā te Fatu i nīni’i mai i ni’a ia rātou. E aha tē tupu i ni’a i te hō’ē rā’au tanu ’ia pīpī ana’e tātou i te reira ? E aha tā te Fatu e tīa’i nei ia tātou ’ia ha’amaita’i ana’e ’oia ia tātou ?

Isaia 48:17–18.E nehenehe e fa’a’ite i te mau hōho’a ’aore rā, te mau video nō te mau ’ānāvai pape ’e te mau ’are miti. Nāhea te hau e nehenehe ai ’ia riro mai te ’ānāvai pape ? Nāhea te parauti’a e nehenehe ai ’ia riro mai te ’are miti ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ’Auē te pa’ari » Te mau hīmene, N°41.

Ha’amaita’i i tā ’oe iho tuatāpapara’a pāpa’ira’a mo’a

’A fa’ata’a i te mau ta’o. ’A tāmata i te hi’o i te tātarara’a o te mau ta’o i roto i te mau pāpa’ira’a mo’a ’aita ’outou e māramarama ra—’e te mau ta’o ato’a tā ’outou e mana’o ra ē, ’ua ta’a ’outou. I te tahi mau taime, e nehenehe te tātarara’a e tauturu ia ’outou ’ia ’ite i te tahi ta’a-’ē-ra’a i roto i te tai’ora’a i te hō’ē ’īrava, ma te fāri’i i te ’itera’a pae vārua ’āpī.

« ’Ua ha’amāhanahana mai Iehova i tōna ra ta’ata, ’e tōna ta’ata i ro’ohia e te ’ati ra, e aroha mai ’oia ia rātou » (Isaia 49:13).Balm of Gilead [Rā’au i Gileada], nā Ann Adele Henrie