Iesu inanon te Tinakoke i Natareta, iroun GregK. Olsen

October 3–9

Itaia 58–66

“E na Nakomai te Tia Kamaiu ae te Tia Kabobo nako Tion”

Ngkai ko kamatebwai reirei aika a tamaroa ni mwakoro aikai, kaoa te Tamnei bwa e na kairiko nakon taian rongorongo ake a na rangi ni bongana nakoia kaain am kiraati.

Korei Am Namakin

Kaunga te Tibwatibwa

Ko kona ni kaoiia kaain te kiraati bwa a na korei iaon te burakibooti taian kibu ake anganiia kairi mai iroun te tamnei n tain aika kamatebwai n te wiiki aei. N am kiraati, ko kona ngkanne n tarai kiibu akanne ao ni marooro iaon koaua ake a kuneaki iai. Te atatai n noori koauan bwaai aika raba e kona ni kairi nakon marooro aika a nano n reirei man teuana ke ae mwaiti n aron ae karinanaki inano.

Reirei te Reirei

Itaia 58:3–12

Te aki mamatam e uota te kakabwaia.

• Ni buokiia kaain te kiraati ni maroroakinna bwa bukin tera te Uea e tuangiira bwa ti na aki mamatam, ko kona ni katei uoua karinan iaon te burakibooti ae atunaki n “Kam na Aki Mamatam n Aron ae kam Kaaoia n te Bong Aei” ao “Te Aki Mamatam ae I Rineia.” Ngkanne kaain te kiraati a kona ni wareka Itaia 58:3–7, ni kanoaa te moan karinan ma te kabwarabwara bwa a kangaa kaain Iteraera n aki mamatam ao te kauoua ni karinan ma kabwarabwaraan te aki mamatam are e tangiria te Uea. A kanga kabwarabwara aikai n roota arora n taraakin te aki mamatam? A kona naba kaain te kiraati n tibwauaia bwa e kanga, n aron aia taneiai, te aki mamatam e kairi nakon kakabwaia are e berita iai te Uea inanon kiibu 8–12.

• Tabeman kaain te kiraati a na iai aia taneiai are a rinanona ae a na kona iai ni kabwarabwaraa nakoia tabeman bwa e aera ti aki mamatam. Kaoiia bwa a na tibwaia bwa tera ae a taekinna. Ko kon naba ni kaoiia kaain te bitiobiriki bwa ana taetae iaon ae e kangaa aron karaoan te aki mamatam. Ke ko kona n tibwaa teuana te katooto mai iroun Beretitenti Henry B. Eyring n ana marooro “Tiaki Aio te Aki Mamatam Are I Rineia?” (Riaona, Meei 2015, 22–25). E kanga te aki mamatam ao te angabwai n aki mamatam ni buoka “kabaraan kabaean te amo ae rawawata” mai iaora ao iaoia tabeman? (Itaia 58:6).

Itaia 61:1–3; 63: 7– 9

Iesu Kristo ara Tia Kamaiu ao te Tia Kabooira.

• Ngke e taekinna Iesu Kristo nakoia aomata i Natareta ae Ngaia te Meetia, E taekina kanoan te koroboki man Itaia 61:1–3 (taraa Ruka 4:16–21, noora naba te witeo “Jesus Declares He Is the Messiah” ChurchofJesusChrist.org). Tao a kona kain te kiraati ni wareka Itaia 61:1–3 ao ni maroroakinna bwa a kanga kiibu aikai n rangi n tamaroa ni kabwarabwaraan ana mition te Tia Kamaiu. Tao ko na karinanii iaon te burakibooti bwaai nako ake te Tia Kamaiu e kabiriko iai bwa e na karaoi ao ni maroroakina bwa tera nanoia n tatabeua nako. E kanga te Tia Kamaiu ni kakoroi nanon ni kabane Ana mition n Ana tai ni maiu n te maiu ae mamate aei? E kanga n kakoroi nanoia inanon maiura?

• A kona naba kaain te kiraati ni wareka Itaia 63:7–9 ao n tibwaia bwa e kanga Iesu Kristo n tia ni kakabwaiaia ni kawai aikai.

• Itaia 61:1–3 e kabonganai taeka aika a tamaroa ao ni kabinano ni kabwarabwara mwaakan Iesu Kristo ni kamiua te bwai ae e taraa n uruaki. Ni buoka kamatataan kiibu aikai, iangoia ni tibwaa te karaki iaon te bwai ae e taraaki bwa e a bua ke n uruaki ma e karaoaki nakon te bwai ae e a rangi n tamaroa. Te katooto, noora te witeo “Provo City Center Temple” (ChurchofJesusChrist.org, taraa naba “Bwaai ni Ibuobuoki riki Tabeua”) ke te karaki ni moan ana rongorongo Beretitenti Dieter F. Uchtdorf “He Will Place You on His Shoulders and Carry You Home” (Riaona, Meei 2016, 101–4). A kona kaain te kiraati ni maroroakinna bwa a kanga n tia n nora te Uea n anganiia aomata te bwai ae tamaroa ngke atia ni iangoaia bwa e a uruaki maiuia.

Itaia 65:17–25

N tain Kauaokina, te Uea e na “karika karawa nabangkai ma aonaaba nabangkai.”

• Itaia 65:17–25 e kabwarabwaraa tein aron te aonaaba imwiin Kauaokin te Tia Kamaiu. Ko kona ni kaoiia kaain te kiraati bwa a na rinanoi taian kibu aikai ni kakaei kaekaan titiraki n aron aikai: E na kangaa aron te maiu n te “aonaaba ae boou” ni kaokoro ma aron te maiu ae ngkai n te aonaaba aei? Tera ae ko kunea inanon kiibu aikai are e karikiko bwa ko na kimwareirei?

Bwaai n Ibuobuoki Riki Tabeua

Te Uea e “aki katikuira inanon te manang.”

Imwiin manga karakinan bwa e kangaa te urarake ni kuri ni kamaunaa te Provo Tabaenako, ni kariaia manga kateana bwa ai te Provo City Center Tembora, Titita Linda S. Reeves e taku: “E kariaia te Uea bwa ti na tuoaki man kataaki, n tabetai nakon korakoran ara konabwai. Ti a tia n noori maiua ake ti tangiriia—ao tao bon maiura—ae kanga ai aron ae e kabuokaki nako aontano ao ni miimi bwa bukin tera ngkai Tamara are i Karawa ae tatangira e kariaia bwa a na riki aekakain bwaai aikai. Ma e aki katikuira inanon te manang; E tei ma baina aika tangaina nako, n ingainga ni kan kaoiira bwa ti na Nakoina. E katei maiura bwa a na riki bwa tembora aika tamaroa are e kona Tamneina ni maeka iai n aki toki” (“Claim the Blessings of Your Covenant s,” Riaona, Nobembwa 2013, 119).

Kanakoraoan Ara Anga reirei

Kinaia naake ko reireiniia. Aomata n tatabemaniiia ake ko reireiniia iai rongorongoia ae onoti, aia nonoori, ao konabwaia ibon irouia. Iangoi kakaokoroia aikai ngkai ko ukora aron buokaia n reiakinaki n te kawai ae manena ao n ururingaki. (Taraa Teaching in the Savior’s Way, 7.)