Ieremia, iroum Walter Rane

Okitobwa 10–16

Ieremia 1–3; 7; 16–18; 20

“Imwain ae Ko Mena n te Biroto ao I kinako”

N am tai ni kamatebwai, iangoia kaain am kiraati, ao ukora ana kairi te Tamnei ibukin ataan rongorongo ake tao a rianako kakaawakia irouia.

Korei Am Namakin

Kaunga te Tibwatibwa

Teuana te kawai ni kaunga te tibwatibwa bon kaoaia kaain te kiraati bwa a korea iaon te beba koaua ake a reiakin n aia kamatebwai n Ieremia n te wiki aei. Ko kona n booti eba aikai ao n rinei tabeua bwa a maroroakinaki n te kiraati. A kanga ana koroboki Ieremia ni karababa ootara ni koaua aikai?

Reirei te Reirei

Ieremia 1:4–19

A weteaki burabeti bwa a na tataekina ana taeka te Uea.

• Ko kona ni moana te maroro iaon wetean Ieremia bwa te burabeti man kaotan tamnein te burabeti ae ngkai ao tuangakiia kaain te kiraati bwa a na tibwaia bwa a kanga n ataia ae E weteaki iroun te Atua. Ko kona naba n tuangiia bwa a tibwaa aroia ni buokiia temwangina n ataa te koaua ae kakaawaki aei. E kanga ataakin aei ni kakabwaiai maiura? A kona kaain te kiraati ni korei iaon te burakibooti bwaai ake a reiakin ibukiia burabeti man Ieremia 1:4–19. Tera ae a karaoia burabeti ni bong aikai ni “kouwakaai” ke ni “kabwakai”? Tera ae a “katei” man “uniki”? (kibu10).

• Kaoia kaain te kiraati bwa ana tibwaa te bwai ae e reiakinna Ieremia n Ieremia 1:5. E kanga ataakin aei n roota ana mwakuri? A kona kaain te kiraati ni wareka te rongorongo n “Additional Resources” ao kibu aikai ake a boutoka te koaua aei: Aramwa 13:1–4; Reirei ao Berita aika Tabu 138:53–56; Aberaam 3:22–23. A kanga koaua iaon maiura imwain te maiu aei n roota ara waaki n te maiu aei?

Aomata i aban Iteraera rimoa a kabonganai tititen ni kawakina iai te ran.

Ieremia 2; 7

“A tia n mwanuokinai ngai ae koburake mai iai te ran ni kamaiu.”

• Waakinan te maroro iaon Ieremia 2:13, ko kona ni korea iaon te burakibooti tamnein te mwanibwa (nnen te ran i nano) ao te koburake n ran (n aron te bwaro n ran). A kona kaain te kiraati ni wareka Ieremia 2:13 ao ni maraoroakinna bwa bukin tera e raoiroi riki karekean te ran man te koburake n ran nakon kenan te mwanibwa. Tao tera botaun karaon te onobwai nakon nnen te ran ae uruaki? Ko kona ni kaoiia kaain te kiraati bwa a wareka Ieremia2 ao7 ao tibwai tabeua kawai ake a tia iai tibun Iteraera ni mwaninga “koburaken te ran ni kamaiu” (tara, te katoto, n Ieremiaj 2:26–28; 7:2–11). Bukin tera te “ran ni kamaiu” bon te kabotau ae tamaroa ni baike e anganira te Tia Kamaiu?

Ieremia 3:14–18; 16:14–15

E na bootiia Ana aomata te Uea.

• Ibukina bwa Ieremia e kabotaua ikotakiia tibun Iteraera ni boong aika kaitira ma otinakoia mai Aikubita rinanon Mote, ko kona n kaota tamnein Te Otinako (tara te kamatata ibukin Eberi 4–10 n Nakomai, Iriirai—Ibukiia Aomata n Tatabemaniia ao Utu). Kaoia kaain te kiraati bwa a na maroroakina kakaawakin Te Otinako irouia tibun Iteraera n roro nako. A kona ngkanne kaain te kiraati ni wareka Ieremia 16:14–15 ao ni maroro bwa e na kanga ikotakiia tibun Iteraera ni boong aika kaitira n raka kakawakina ana aomata te Atua (tara naba Ieremia 3:14–18). Kaain te kiraati ake a taraa “Hope of Israel” bwa kanoan aia kamatebwai ibon irouia a kona n tibwaua kakaawakin ikotakiia tibun Iteraera (see RussellM. Nelson and WendyW. Nelson, “Hope of Israel” [worldwide youth devotional, Tuun3, 2018], bwa raon te New Era ao Ensign, Aokati. 2018, 2–17, ChurchofJesusChrist.org). Ke ko kona ni wareka mwakoron te rongorongo anne n te kiraati. E kanga ni ikotaki tibun Iteraera n am aono?

Bwaai n Ibuobuoki Riki Tabeua

Tamara are i Karawa e kinako.

Beretitenti RussellM. Nelson e reirei:

“Tamneim bon te kinaaki ae akea tokina. E taku te Uea nakon Ana burabeti ae Aberaam: ‘Ko rineaaki imwain ae ko bungiaki’ [Aberaam 3:23]. E titebo ana taeka te Uea ibukin Ieremia [tara Ieremia 1:5] ao e mwaiti riki [tara Aramwa 13:2–3]. E taekina naba aei ibukim [tara Reirei ao Berita aika Tabu 138:55–56].

“Tamam are i Karawa e kinako i nanon te tai ae rangi ni maan. Ngkoe, bwa Natina te mwaane ke te aine, ko rineaki i Rouna bwa ko na roko nako aonteaba n te tai aei, n riki bwa tia kairiiri n Ana mwakuri ae korakora i aon te aba. Ko rineaki tiaki ibukin taraan rabwatam ma ibukin arom n te maiu n tamnei n aron te ninikoria, te unganano, te itiaki n nano, te taka ibukin te koaua, tangira te rabakau, ao te nano ni kan buokiia tabeman.

“Ko karekei tabeua anua aikai n te maiu are imwain te maiu aei. Ko kona ni karekei ake tabeua ikai iaon te aba ngkana ko ukoukori ma te nanomwaaka” (“Decisions for Eternity,” Riaona, Nobembwa. 2013,107).

Kanakoraoan Ara Anga reirei

Maiuakina te euangkerio ma nanom ni kabanea. Ko na riki bwa te tia reirei ae ai aron Kristo ngkana ko mwanea te euangkerio ao ko maiuakina i nanon maium. Te anga reirei n ai aron Kristo e aki kairoroko bwa ko na kororaoi—ma ko na kataia ao n teimatoa ni kataia. N te tai are ko nanomwaaka ni karaoa ama kabanea n tamaroa ao ko ukora kabwaraan am bure ni kabwakam, ko kona n riki bwa ana reirei Kristo ae E iangoia ibukim. (Taraa Anga Reirei n ana Kawai te Tia Kamaiu, 13–14.)