Jesus in the Synagogue at Nazareth [Ko Sīsū ʻi he Falelotu ʻi Nāsaletí], tā ʻe Greg K. Olsen

3–9 ʻOkatopa

ʻĪsaia 58–66

“ʻE Haʻu ʻa e Huhuʻí ki Saione”

ʻI hoʻo ako ʻa e tokāteline fakaʻofoʻofa ʻi he ngaahi vahe ko ʻení, fakaafeʻi e Laumālié ke Ne tataki koe ki he ngaahi pōpoaki ʻe ʻuhingamālie taha ki he kau mēmipa ʻo e kalasí.

Lekooti e Ngaahi Ongo ʻOkú ke Maʻú

Fakaafeʻi e Feʻinasiʻakí

Te ke lava ʻo fakaafeʻi e kau mēmipa ʻo e kalasí ke nau hiki ʻi he palakipoé ʻa e ngaahi fakamoʻoni fakafolofola ki he ngaahi veesi naʻá ne ueʻi fakalaumālie kinautolu lolotonga ʻenau ako folofola he uike ní. ʻE lava leva ke mou fekumi fakataha mo e kalasí ʻa e ngaahi veesi ko iá pea talanoa ki he ngaahi moʻoni ne maʻu aí. ʻE lava ke tataki ʻe he ngaahi fakakaukau ko ʻení ki ha fealeaʻaki loloto ange ʻo ha tefitoʻi moʻoni ʻe taha pe lahi ange ʻoku lisi atu ʻi laló.

Akoʻi e Tokāteliné

ʻĪsaia 58:3–12

ʻOku ʻomi ʻe he ʻaukaí ha ngaahi tāpuaki.

• Ke tokoni ki he kau mēmipa ʻo e kalasí ke nau aleaʻi ʻa e ʻuhinga mo e founga kuo fekauʻi ai ʻe he ʻEikí ke tau ʻaukaí, te ke lava ʻo tā ha kōlomu ʻe ua ʻi he palakipoé pea fakahingoa “ʻE ʻIkai Te Mou ʻAukai ʻo Hangē ko e ʻAho Ní” mo e “ʻA e ʻAukai Kuó U Filí.” ʻE lava leva ke lau ʻe he kau mēmipa ʻo e kalasí ʻa e ʻĪsaia 58:3–7, ʻo fakafonu ʻa e kōlomu ʻuluakí ʻaki e ngaahi fakamatala ki he founga ne ʻaukai ai ʻa e kau ʻIsilelí pea kōlomu hono uá ʻaki e ngaahi fakamatala ki he ʻaukai ne fakataumuʻa ki ai e ʻEikí. ʻOku liliu fēfē ʻe he ngaahi fakamatala ko ʻení ʻa e anga ʻo ʻetau vakai ki he ʻaukaí? ʻE lava foki ke vahevahe ʻe he kau mēmipa ʻo e kalasí ʻa ʻenau aʻusia ki he founga ʻoku fakataumuʻa ai ʻa e ʻaukaí ki he ngaahi tāpuaki ne talaʻofa ʻe he ʻEikí ʻi he veesi 8–12.

• ʻE lava ke maʻu ʻe ha kau mēmipa ʻe niʻihi ʻo e kalasí ha ngaahi aʻusia ʻoku nau fakamatalaʻi ai ki he niʻihi kehé ʻa e ʻuhinga ʻoku tau ʻaukai aí. Fakaafeʻi ke nau vahevahe e meʻa ne nau lea ʻakí. Te ke lava foki ʻo fakaafeʻi ha mēmipa ʻo e kau pīsopelikí ke talanoa ki he founga ʻoku fakaʻaongaʻi ai ʻa e foaki ʻaukaí. Pe te ke vahevahe ha taha ʻo e ngaahi sīpinga mei he pōpoaki ʻa Palesiteni Henelī B. ʻAealingi ko e “ʻIkai Ko ʻEni ʻa e ʻAukai Kuó U Filí?” (Liahona, Mē 2015, 22–25). ʻOku tokoni fēfē ʻa e ʻaukaí mo hono totongi ʻo e foaki ʻaukaí ke “vete ʻa e ngaahi kavenga mamafa” ʻo kitautolu mo e niʻihi kehé? (ʻĪsaia 58:6).

ʻĪsaia 61:1–3; 63:7–9

Ko Sīsū Kalaisi hotau Fakamoʻuí mo e Huhuʻí.

• ʻI he taimi ne fakahā ai ʻe Sīsū Kalaisi ki he kakai Nāsaletí ko Ia ʻa e Mīsaiá, naʻá Ne tōfolofola mei he ʻĪsaia 61:1–3 (vakai, Luke 4:16–21; vakai foki ki he vitiō “Fakahā ʻe Sīsū Ko Ia ʻa e Mīsaiá,” ChurchofJesusChrist.org). Mahalo naʻa lava ke lau ʻe he kau mēmipa ʻo e kalasí ʻa e ʻĪsaia 61:1–3 pea talanoa ki he ʻuhinga ʻoku hoko ai e ngaahi vēsí ni ko hano fakamatalaʻi lelei ʻo e misiona ʻa e Fakamoʻuí. Te ke lava ʻo lisi ʻi he palakipoé ʻa e meʻa takitaha ne pani ʻa e Fakamoʻuí ke Ne fakahokó pea aleaʻi ʻa e ʻuhinga ʻo e meʻa takitaha. Naʻe founga fēfē hono fakahoko ʻe he Fakamoʻuí ʻa e ngaahi konga ko ʻeni ʻo Hono misioná lolotonga ʻEne ʻi he moʻui fakamatelié? Kuo founga fēfē Haʻane fakahoko ia ʻi heʻetau moʻuí?

• ʻE lava foki ke lau ʻe he kau mēmipa ʻo e kalasí ʻa e ʻĪsaia 63:7–9 pea vahevahe ʻa e founga ne tāpuekina ai kinautolu ʻe Sīsū Kalaisi ʻi he ngaahi foungá ni.

• ʻOku fakaʻaongaʻi ʻi heʻĪsaia 61:1–3 ha fakalea fakaʻofoʻofa mo laulau taʻanga ke fakamatalaʻi ʻaki e mālohi ʻo Sīsū Kalaisi ke huhuʻi ʻa e meʻa kuo ngali maumaú. Ke tokoni ki hono fakatātaaʻi ʻo e ngaahi veesi ko ʻení, fakakaukau ke vahevahe ha talanoa fekauʻaki mo ha meʻa naʻe pehē kuo mole pe maumau pea naʻe liliu ia ki ha meʻa naʻe fakaʻofoʻofa ange. Hangē ko ʻení, vakai ki he talanoa ʻi he kamataʻanga ʻo e pōpoaki ʻa Palesiteni Tieta F. Uchtdorf’s message “He Will Place You on His Shoulders and Carry You Home” (Liahona, May 2016, 101–4). ʻE lava ke talanoa ʻa e kau mēmipa ʻo e kalasí ki he founga kuo nau mamata ai ki hono foaki ʻe he ʻEikí ki he kakaí ha meʻa fakaʻofoʻofa ʻi he taimi ne nau fakakaukau ai kuo ʻauha ʻenau moʻuí.

ʻĪsaia 65:17–25

ʻI he Hāʻele ʻAnga Ua Mai ʻa e ʻEikí, te Ne “fakatupu ʻa e ngaahi langi foʻou pea mo e fonua foʻou.”

• ʻOku fakamatalaʻi ʻi heʻĪsaia 65:17–25 ʻa e ngaahi tūkunga ʻo e māmaní ʻi he hili ʻa e Hāʻele ʻAnga Ua Mai ʻa e Fakamoʻuí. Te ke lava ʻo fakaafeʻi e kau mēmipa ʻo e kalasí ke nau toe vakaiʻi ʻa e ngaahi veesi ko ʻení ki ha ngaahi tali ki he ngaahi fehuʻi hangē ko ʻení: ʻE faikehekehe fēfē nai ʻa e moʻui ʻi he “fonua foʻoú” mei he anga e moʻui ʻi he māmaní he lolotonga ní? Ko e hā ʻokú ke maʻu ʻi he ngaahi veesi ko ʻení ʻokú ne fakatupunga koe ke ke fiefiá?

Ngaahi Maʻuʻanga Tokoni Lahi Ange

ʻOku ʻikai ke “tuku kitautolu [ʻe he ʻEikí] ʻi he efú.”

Hili haʻane toe fakamanatu ʻa e founga ne mei fakaʻauha ai ʻe ha afi ʻa e Tāpanekale Polovó, ʻo lava ai ke toe langa foʻou ia kimui ke hoko ko e Temipale Polovo Siti Senitaá, naʻe pehē ai ʻe Sisitā Linitā S. Liivi: “ʻOku fakaʻatā ʻe he ʻEikí ke ʻahiʻahiʻi mo siviʻi kitautolu, pea taimi ʻe niʻihi ʻoku fai ia ki he taupotu taha te tau malavá. Kuo tau mātā hano holoki ha moʻui ʻa ha niʻihi ʻoku tau ʻofa ai—mo kitautolu—ʻo holofa ki he kelekelé pea tau fifili pe ko e hā ʻoku tuku ai ʻe ha Tamai Hēvani ʻofa ke hoko e faʻahinga meʻa peheé. Ka ʻoku ʻikai ke Ne tuku kitautolu ʻi he efú; ʻoku mafao mai Hono toʻukupú mo Ne fakaafeʻi loto vekeveke kitautolu kiate Ia. ʻOkú Ne langa hake ʻetau moʻuí ke hoko ko ha ngaahi temipale maʻongoʻonga ʻe lava ke nofo taʻengata ai ʻa Hono Laumālié” (“Maʻu e Ngaahi Tāpuaki Hoʻo Fuakavá,” Liahona, Nōvema 2013, 119).

Ko Hono Fakatupulaki ʻEtau Founga Akoʻí

Feinga ke ke ʻiloʻi ʻa kinautolu ʻokú ke akoʻí. Ko e taha kotoa pē ʻokú ke akoʻí ʻoku kehe hono puipuituʻá, ʻa ʻene fakakaukaú, mo hono ngaahi talēnití. Fakakaukau ki he ngaahi faikehekehe ko ʻení ʻi hoʻo feinga ke tokoniʻi ʻa e taha kotoa pē ke ako ʻi ha ngaahi founga ʻoku ʻuhingamālie mo fakangalongataʻá. (Vakai, Ko e Faiako ʻi he Founga ʻa e Fakamoʻuí, 7.)