“24–30 ʻOkatopa. ʻIsikeli 1–3; 33–34; 36–37; 47: ‘Te U ʻAi Kiate Kimoutolu ha Laumālie Foʻou,’” Haʻu, ʻo Muimui ʻIate Au—Maʻá e Lautohi Faka-Sāpaté: Fuakava Motuʻá 2022 (2021)
“24–30 ʻOkatopa. ʻIsikeli 1–3; 33–34; 36–37; 47,” Haʻu, ʻo Muimui ʻIate Au—Maʻá e Lautohi Faka-Sāpaté: 2022
Come, Follow Me [Haʻu, ʻo Muimui ʻIate Au, tā ʻe Scott Sumner
24–30 ʻOkatopa
ʻIsikeli 1–3; 33–34; 36–37; 47
“Te U ʻAi Kiate Kimoutolu ha Laumālie Foʻou”
Kuo fakatolonga ʻe he ʻEikí ʻa e ngaahi lea ʻa ʻIsikelí ki ha taumuʻa fakapotopoto pea ʻe lava ke ne faitāpuekina e kau mēmipa ʻo hoʻo kalasí. Fakalaulauloto ki heni ʻi hoʻo ako e ngaahi tohi ʻa ʻIsikelí he uike ní.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
Naʻe fakakaukau e kakai ne nau fanongo kia ʻIsikelí ne “mālie” ʻene ngaahi leá, “ka [naʻe] ʻikai te nau fai ki ai” (vakai, ʻIsikeli 33:30–33). ʻE lava ke vahevahe ʻe he kau mēmipa ʻo e kalasí ha potufolofola ne nau maʻu ʻi he ngaahi tohi ʻa ʻIsikelí ne ueʻi kinautolu ke nau fai ha meʻa.
Akoʻi e Tokāteliné
ʻOku fakaafeʻi kitautolu ʻe he ʻEikí ke fafanga ʻEne fanga sipí.
Ke tokoni ki he kau mēmipa ʻo e kalasí ke nau maʻu ha ngaahi ʻuhinga fakafoʻituitui ʻi he ʻIsikeli 34, te ke lava ʻo hiki ʻi he palakipoé ha ngaahi tūkunga ʻe lava ke nau fehangahangai mo ia, hangē ko e teuteu ke ngāue fakafaifekaú, tauhi ha fānaú, pe maʻu ha fatongia ngāue fakaetauhí. ʻE lava ke fili ʻe he kau mēmipa ʻo e kalasí ha meʻa ʻe taha ke fakalaulauloto ki ai ʻi heʻenau lau fakalongolongo ʻa e ʻIsikeli 34:1–10. Fakaafeʻi ke nau vahevahe pe ko e hā ha faleʻi te nau fai ki ha taha ʻi he tūkunga ne nau filí, ʻo makatuʻunga ʻi he ngaahi veesi ko ʻení. ʻOku ʻuhinga ki he hā ke tau fafangaʻi pē ʻa kitautolu kae ʻikai ko e tākanga ʻa e ʻEikí? Te tau lava fēfē ʻo hoko ko ha kau tauhisipi ʻo hangē ko e Fakamoʻuí? (vakai, veesi 11–16).
ʻE lava ke ueʻi koe ke ke ʻeke ha ngaahi fehuʻi ʻoku tokoni ki he kau mēmipa ʻo e kalasí ke nau fakalaulauloto ki he fakatātā ʻi he ʻIsikeli 34:11–31. Hangē ko ʻení, ko e hā nai e meʻa ʻoku fakafofongaʻi ʻe he “potu lau māʻuiʻuí” mo e “loto ʻā leleí” ʻi he veesi 14? Ko e hā nai e faikehekehe ʻo e sipi ʻoku “molé” mo e sipi ʻoku “fakaheeʻi atú”? (veesi 16). ʻOku fakahaofi fēfē ʻe he Fakamoʻuí ʻa e ongo faʻahinga sipi ko ʻení? ʻE lava ke vahevahe ʻe he kau mēmipa ʻo e kalasí ha toe ngaahi fakatātā kehe ʻoku nau maʻu ʻi he ngaahi veesi ko ʻení pea talanoa ki he meʻa ʻoku akoʻi ange kiate kinautolu ʻe he ngaahi fakatātā ko ʻení fekauʻaki mo Sīsū Kalaisí.
ʻOku tānaki ʻe he ʻEikí ʻa Hono kakaí pea foaki ange kiate kinautolu ha moʻui foʻou.
-
ʻE lava ke hoko ʻa hono lau ʻa e ʻIsikeli 37 mo e fakakaukau ki he talaʻofa ʻa e ʻEikí ke tānaki ʻa ʻIsilelí ke tau maʻu ai ha ngaahi fakakaukau ki he ʻuhinga ʻo e tānakí pea mo e founga ke tau kau ai ki aí. Ke tokoni ki he kau mēmipa ʻo e kalasí ke nau maʻu ʻa e ngaahi fakakaukau ko ʻení, te ke lava ʻo tohi ʻi he palakipoé ʻa e ngaahi fehuʻi hangē ko e Ko e hā ʻa e meʻa ʻoku feinga ʻa e ʻEikí ke ikunaʻí ʻi hono tānaki ʻo ʻIsilelí? Ko e hā ʻa e founga ʻokú Ne ikunaʻi ai iá? Te ke lava leva ʻo kole ki ha vaheua ʻe taha ʻo e kalasí ke nau lau ʻa e ʻIsikeli 37:1–14 pea lau ʻe he vaheua ʻe tahá ʻa e ʻIsikeli 37:15–28 ʻi heʻenau fekumi ki ha ngaahi fakakaukau ʻe lava ke ʻomi ʻe he ngaahi potufolofola ko ʻení ki he ongo fehuʻi he palakipoé. Mahalo ʻe tokoni ke fakamatalaʻi ko e ongo vaʻakau ʻo Siosefa mo Siuta ʻoku lave ki ai ʻi he veesi 16–19 ʻokú na fakafofongaʻi ʻa e Tohi ʻa Molomoná mo e Tohi Tapú. ʻI he vahevahe ʻe he kau mēmipa ʻo e kalasí ʻa ʻenau ngaahi talí, poupouʻi kinautolu ke nau talanoa fekauʻaki mo honau fatongia ʻi hono tānaki ʻo ʻIsilelí ʻi he ngaahi ʻaho kimui ní.
Naʻe mamata ʻa ʻIsikeli ki ha meʻa-hā-mai ʻo ha vaitafe ʻoku tafe mei he temipalé ʻo fakamoʻui ʻa e Tahi Maté.
ʻOku ʻomi ʻe he temipalé ʻa e fakamoʻui fakalaumālie.
-
ʻE ala tokoni ʻa e ʻū fakatātaá ke mahino ki he kau mēmipa ʻo e kalasí ʻa e meʻa-hā-mai ʻoku fakamatalaʻi ʻi he ʻIsikeli 47:1–12. Hangē ko ʻení, te ke lava ʻo fakaʻaliʻali ha fakatātā ʻo ha temipale, vaitafe, toafa mo e Tahi Maté (vakai ki he ʻū fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e Ngaahi Mape mo e Ngaahi Tā ʻo e Tohi Tapú, fika 3, “Toafa Siuteá pea mo e Tahi Maté”). ʻE ala tokoni ke fakamatalaʻi ange ko e Tahi Maté ʻoku fuʻu lahi e māsima ʻi aí ʻoku ʻikai ai ke lava ʻa e iká mo e ʻakaú ʻo moʻui ʻi ai. ʻE lava ke lau ʻe he kau mēmipa ʻo e kalasí ʻa e veesi 1–12 pea vahevahe ʻa e meʻa ʻoku nau mālieʻia ai fekauʻaki mo e ngaahi vai ʻoku fakamatalaʻi ʻi he mata meʻa-hā-maí (vakai foki ki he Fakahā 22:1 mo e fakamatala ʻi he “Ngaahi Maʻuʻanga Tokoni Lahi Angé”). ʻE lava foki ke nau tā ha ʻū fakatātā ʻo e mata meʻa-hā-mai ʻa ʻIsikelí. Ko e hā nai e meʻa ʻoku fakafofongaʻi ʻe he vaí? Ko e hā nai e meʻa ʻoku fakafofongaʻi ʻe he ʻakau ʻoku fakamatalaʻi ʻi he veesi 12 ? Mahalo ʻe lava ke vahevahe ʻe he kau mēmipa ʻo e kalasí ʻa e founga kuo ʻomi ai ʻe he temipalé mo hono ngaahi tāpuakí ʻa e moʻui mo fakamoʻui fakalaumālie kiate kinautolú.
Ngaahi Maʻuʻanga Tokoni Lahi Ange
ʻE lava ke fakamoʻui kitautolu ʻe he ngaahi tāpuaki ʻo e temipalé.
ʻI he fakamatala ʻa ʻEletā Teili G. Lenilani ki he vai ʻoku tafe mei he temipalé ʻi he mata meʻa-hā-mai ʻa ʻIsikelí (vakai, ʻIsikeli 47:1–12), naʻá ne pehē ai:
“ʻOku ʻi ai ha natula ʻe ua ʻo e vaí ʻoku mahuʻinga ke fakatokangaʻi. ʻUluakí, neongo ko e kiʻi tafenga vaí naʻe ʻikai toe tō ki ha ngaahi vaitafe lalahi, ka naʻe tupu ia ʻo hoko ko ha vaitafe mālohi, ʻo fālahi mo loloto ange ʻi he mamaʻo ange ʻene tafé. ʻOku hoko ha meʻa meimei tatau mo e ngaahi tāpuaki ʻoku tafe mei he temipalé, he taimi ʻoku silaʻi ai ʻa e fakafoʻituituí ko e ngaahi fāmilí. ʻOku hoko ha tupulaki mahuʻinga, ʻo aʻu ki he ngaahi toʻu tangata ʻi mui mo e toʻu tangata ʻi muʻa, ʻi he taimi ʻoku silaʻi fakataha ai ʻa e ngaahi fāmilí.
“Uá, naʻe fakafoʻou ʻe he vaitafé ʻa e meʻa kotoa pē naʻe aʻu ki aí. ʻOku pehē pē ʻa e maʻu ʻe he ngaahi tāpuaki ʻo e temipalé ʻa e ivi fakaofo ke fai-fakamoʻuí. ʻE lava ʻe he ngaahi tāpuaki fakatemipalé ke fakamoʻui ʻa e ngaahi lotó mo e moʻuí pea mo e ngaahi fāmilí” (“Hisitōlia Fakafāmilí mo e Ngāue Fakatemipalé: Silá mo e Fakamoʻuí,” Ensign pe Liahona, Mē 2018, 47–48).
Ko Hono Fakatupulaki ʻEtau Founga Akoʻí
Tokoni ki he niʻihi kehé ke nau maʻu ʻa e Laumālié. “ʻE fakakaukau ha kau faiako he taimi ʻe niʻihi ko ʻenau ʻiló pe ngaahi foungá pe tōʻongá ʻokú ne fakalotoa e niʻihi ʻoku nau akoʻí. … ʻOku ʻikai ko hoʻo taumuʻa ko ha faiakó ke fai ha lēsoni mālie, ka ke tokoni ke maʻu ʻe he niʻihi kehé e takiekina ʻo e Laumālie Māʻoniʻoní” (Ko e Faiako ʻi he Founga ʻa e Fakamoʻuí, 10).