“17–23 Oktoba. Jeremaea 30–33; 36; Ol Krae 1; 3: ‘Olgeta we Naoia Oli Stap Harem Nogud, Oli Stap Krae, Mi Mekem Olgeta Oli Harem Gud Bakegen,’” Kam Folem Mi—Blong Sandei Skul: OlTesteman 2022 (2021)
“17–23 Oktoba. Jeremaea 30–33; 36; Ol Krae 1; 3,” Kam Folem Mi—Blong Sandei Skul: 2022
Krae blong Profet Jeremaea, kaving ia i kam long Nazarene School
17–23 Oktoba
Jeremaea 30–33; 36; Ol Krae1; 3
“Olgeta we Naoia Oli Sta Harem Nogud, Oli stap Krae, Mi Mekem Olgeta oli Harem Gud Bakegen”
Tingting hevi long filing mo tingting we yu kasem long taem blong stadi blong yuwan long Jeremaea mo Ol Krae. ?Wanem ol toktok we i kam ol japta ia we yu filim se bae i gat moa mining long olgeta we yu stap tijim olgeta?
Raetemdaon Ol Filing mo Tingting blong Yu
Invaetem Ol Memba blong Serem Wanem Oli Gat
Blong helpem ol memba blong klas blong serem wanem oli lanem long skripja stadi blong olgeta, yu save raetem long bod ol sentens olsem Mi lanem se…, mi gat wan testemoni blong…, o mi bin eksperiensem… Ol memba blong klas oli save serem samting long Jeremaea mo Ol Krae blong finisim ol sentens we i stap.
Stap Tijim Doktrin
Jeremaea 30–31; 33; Ol Krae 1:1–7; 3:1–5
Lod bae i karemaot Isrel long slef mo karem olgeta i kam wan ples.
-
Ol mesej we i stap long ol profesi blong Jeremaea i save givim hop long ol memba blong klas long wanwan situesen blong olgeta. Maet klas blong yu i save toktok raon long ol situesen we i maet mekem ol pipol long dei blong yumi naoia oli lusum hop olsem we ol pipol long taem blong Jeremaea oli bin filim (luk long Jeremaea 30:5; 31:15; Ol Kraes 1:1–7; 3:1–5; mo kwot we i stap long “Sam Moa Risos”). Yu save seraotem ol memba blong klas long tri grup blong lukluk bak long Jeremaea30; 31; mo 33 blong faenem ol mesej we i save karem hop i kam long ol pipol tedei. ?Olsem wanem hop long Lod i helpem yumi stanap strong long ol hadtaem?
“Mi bambae mi God blong yufala, mo yufala bambae i kam man blong mi bakegen.”
-
Lukluk bak long Jeremaea 31:31–34; 32:37–42 i save helpem klas blong yu oli tingting hevi long ol kavenan we oli bin mekem. Wan wei blong leftemap tingting blong gat wan toktok raon long ol ves we i stap, givim sam minit long memba blong klas blong ridim ol ves ia mo raetem long wan pis blong pepa wan kwestin we oli wantem askem long klas abaot wanem oli bin ridim. Maet bae oli wantem blong toktok raon long wanem i minim blong raetem loa blong God long ol hat blong yumi (luk long Jeremaea 31:33) o olsem wanem kavenan i helpem yumi blong kam blong save Lod (luk long Jeremaea 31:34). Yu save pikimap ol kwestin mo jusum sam long olgeta nomo blong toktok raon long hem. ? Wanem yumi lanem long ol ves ia we i givim insperesen long yumi blong yumi stanap strong blong kipim ol kavenan blong yumi?
Ol skripja oli save givim insperesen long yumi blong yumi sakem sin mo tanem yumi i go long Lod.
Ol skripja oli gat paoa blong karemaot yumi long paoa blong Setan.
-
Ol memba long klas oli save kasem ol save abaot ol skripja taem oli stadi long Jeremaea36 long hom. Invaetem olgeta blong serem wanem we oli lanem. Yu save givim wok tu long ol memba blong klas nem blong wan man o woman insaed long japta ia mo invaetem olgeta blong ridim abaot wanem nao man o woman ia i bin mekem wetem tok blong God. Ol memba blong klas oli save stadi ol toktok mo aksen blong Lod (luk long ol ves 1–3, 27–31); Jeremaea (luk long ol ves 4–7,32); Baruk (luk long ol ves 4, 8–10, 14–18); Jehudi mo King Jehoeakim (luk long ol ves 20–26); mo Elnatan, Delaea, mo Gemaria (luk long ves25). ?Olsem wanem ol toktok mo aksen blong yumi oli soem olsem wanem yumi filim abaot ol skripja?
Sam Moa Risos
Oltaem yu save gat hop.
Presiden M.Russell Ballard i talemaot ol situesen we i save mekem se sam bae oli lusum hop, mo hem i givim kaonsel abaot wea ples blong faenem hop:
“Sam long yumi oli faenem laef blong olgeta i hevi wetem wari, harem nogud, mo sore. Plante oli filim se oli no save dil wetem ol problem we oli stap oltaem long wol ia. Ol narawan oli stap harem nogud from ol memba blong famli we oli lusum rod blong laef oli folem rod we i lidim olgeta i go daon long ples we gudfala standet mo valiu blong laef i no strong. … Plante oli lego olgetawan i go blong akseptem wiknes mo fasin nogud blong wol ia olsem ol samting we yumi save mekem i kam gud bakegen. Oli nomo gat hop.…
“…Sam long yumi maet bae oli lusum evri hop from ol sin mo fasin nogud. Wan man o woman i save go dip insaed long ol wei blong wol ia we hem i no lukim wan nara rod blong kamaot mo lusum evri hop. Singaot blong mi i go long olgeta we oli foldaon long trap ia blong Setan, hem i neva givap! Nomata lukluk i stap se i no moa gat hop o moa yumi go hop i stap blong lus plis biliv long mi, bae yu save gat hop oltaem. Oltaem” (“The Joy of Hope Fulfilled,” Ensign, Nov. 1992, 31–32).
“I simpol nomo, wan hop blong yumi blong sevem yumi long saed blong spirit long taem blong trabol i blong tanem maen mo hat blong yumi i go long Jisas Kraes. … Fet long God mo long Pikinini blong Hem, Jisas Kraes, i impoten long yumi blong mentenem wan balens long laef long taem blong hadtaem” (“The Joy of Hope Fulfilled,”32).
Kam Antap long Fasin blong Yumi blong Stap Tij
Stap folem Spirit. Yu no save talemaot bifo taem se evri lesen bae oli go olsem wanem, be taem yu lisin long smol voes blong Tabu Spirit bae hem i save lidim lesen blong yu. Taem we yu rere long saed blong spirit, bambae Lod i givim yu “long stret aoa, yes long stret taem, wanem we bae [yu] talem” (Doktrin mo Ol Kavenan 100:6); luk tu long Teaching in the Savior’s Way, 10).