“10–16 Oktoba. Jeremaea 1–3; 7; 16–18; 20: ‘Taem Mi No Wokem Yu Yet long Bel blong Mama blong Yu, Be Mi Mi Save Yu Finis,’” Kam Folem Mi—Blong Sandei Skul: OlTesteman 2022 (2021)
“10–16 Oktoba. Jeremaea 1–3; 7; 16–18; 20,” Kam Folem Mi—Blong Sandei Skul: 2022
Jeremaea, i kam long Walter Rane
10–16 Oktoba
Jeremaea 1–3; 7; 16–18; 20
“Taem Mi No Wokem Yu Yet long Bel blong Mama blong Yu, Be Mi Mi Save Yu Finis”
Taem yu stap stadi, tingbaot ol memba blong klas blong yu, mo lukaotem blong Spirit i lidim yu blong save wanem mesej i impoten long olgeta.
Raetemdaon Ol Filing mo Tingting blong Yu
Invaetem Ol Memba blong Serem Wanem Oli Gat
Wan wei blong leftemap tingting blong ol memba blong klas blong save serem wanem oli gat, invaetem olgeta blong raetem long wan pepa wan trutok blong gospel we oli lanem aot long stadi blong olgeta long Jeremaea truaot long wik ia. Yu save kolektem ol pepa ia mo jusum sam long olgeta blong save tokbaot olsem wan klas. ?Olsem wanem nao ol raeting blong Jeremaea i helpem yumi andastanem ol trutok ia?
Stap Tijim Doktrin
Oli singaotem ol profet blong talemaot toktok blong Lod.
-
Blong statem wan toktok raon long koling blong Jeremaea olsem wan profet, soem wan pikja blong wan profet we i stap laef mo askem ol memba blong klas blong serem olsem wanem oli kam blong save se God i singaotem hem. Yu save askem olgeta blong serem olsem wanem oli bin helpem ol narawan blong kam blong save impoten trutok ia. ?Olsem wanem nao save ia i blesem laef blong yumi? Ol memba blong klas oli save listim long bod ol samting we oli lanem abaot ol profet long Jeremaea 1:4–19. ?Wanem ol profet long dei blong yumi oli “pulumaot rus” o “brekemdaon”? ?Wanem oli “bildim” mo “stanemap”? (ves10).
-
Invaetem ol memba blong klas blong serem wanem Jeremaea i lanem abaot hemwan long Jeremaea 1:5. Olsem wanem save ia i afektem ministri blong hem? Ol memba blong klas oli save ridim stetmen ia long “Sam Moa Risos” mo ol skripja ia we i sapotem trutok ia: Alma 13:1–4; Doktrin mo Ol Kavenan 138:53–56; Ebraham 3:22–23. ?Olsem wanem ol trutok ia abaot laef blong yumi bifo long laef ia i helpem yumi jusum wanem rod yumi tekem long laef ia?
Ol pipol long Isrel bifo oli yusum ol wel blong storem gudfala klin wota.
“Oli sakemaot mi mi olsem wan springwota we i save givim laef.”
-
Blong statem wan toktok raon abaot Jeremaea 2:13, yu save droem long bod wan wel (wan bigfala hol olsem wel i go andanit long graon) mo wan springwota (we i stap ron hemwan). Nao, ol memba blong klas oli save rid long Jeremaea 2:13 mo tokbaot from wanem i moa gud blong tekem wota long springwota bitim we oli tikim wan wel. ?Wanem i maet semmak long saed blong spirit blong mekem ol wel we oli brok? Yu save invaetem ol memba blong klas blong save ridim ol ves we i stap long Jeremaea2 mo7 mo serem sam long wei Ol Man Isrel oli lego “springwota we i save givim laef” (luk, long eksampol ia, Jeremaea 2:26–28; 7:2–11). ?From wanem “wota we i givim laef” wan gud simbol blong wanem we Sevya i givim long yumi?
Lod bae karem ol pipol blong Hem oli kam tugeta.
-
From Jeremaea i komperem kam tugeta blong Isrel long taem Moses i karemaot Isrel long Ijip mo mekem olgeta i kam fri, yu maet wantem blong soem pikja blong taem ia we oli aot long Ijip (luk long aotlaen blong 4–10 Epril long Kam Folem Mi—blong Wanwan Man, Woman mo Famli). Invaetem ol memba blong klas blong tokbaot olsem wanem kamaot blong olgeta long Ijip i gat bigfala mining long wan jeneresen afta narawan. Nao, ol memba blong klas oli save ridim Jeremaea 16:14–15 mo tokbaot olsem wanem kam tugeta blong Isrel long ol las dei ia i moa impoten long ol pipol blong God (luk tu long Jeremaea 3:14–18). Ol memba blong klas we oli luklukbak long “Hope of Israel” olsem pat blong stadi blong olgetawan oli serem wanem oli lanem abaot impoten blong kam tugeta blong Isrel (luk long RussellM. Nelson mo WendyW. Nelson, “Hope of Israel” [worldwide youth devotional, June3, 2018], nara pat long New Era mo Ensign, Aug. 2018, 2–17, ChurchofJesusChrist.org). O, yu save luklukbak long sam pat blong mesej ia olsem wan klas. ?Olsem wanem nao Isrel i stap kam tugeta long eria blong yumi?
Sam Moa Risos
Papa long Heven i save yu.
Presiden RussellM. Nelson i bin tijim:
“Spirit blong yu i samting we i blong yuwan blong wan taem we i no save finis. Lod i bin talem long profet blong Hem Ebraham: ‘Mi bin jusum yu bifo yu bon’ [Ebraham 3:23]. Lod i bin talem samting semmak abaot Jeremaea [luk long Jeremaea 1:5] mo plante moa [luk long Alma 13:2–3]. Hem i talem abaot yu tu [luk long Doktrin mo Ol Kavenan 138:55–56].
“Papa blong yu long Heven i bin save yu blong wan longfala taem. Yu, olsem boe mo gel blong Hem, Hem i bin jusum yu blong kam long wol ia long taem ia, blong stap olsem lida long bigfala wok blong Hem. Oli bin jusum yu i no from bodi blong yu be from spirit blong yu, ol samting olsem gat strong tingting, gat wan tru hat, tosta from trutok, hanggri from waes mo wan hat we i wantem blong givim seves long narawan.
“Yu bin developem sam long ol kwaliti ia long laef bifo laef ia. Ol Narafala wan yu save developem olgeta long wol ia sapos yu traehad blong lukaotem olgeta” (“Decisions for Eternity,” Liahona, Nov. 2013,107).
Stap Kam Antap long Fasin blong Yumi blong Stap Tij
Laef folem gospel wetem ful hat blong yu. Bae yu kam wan tija olsem Kraes taem yu lavem gospel ia mo laef folem evri dei long laef blong yu. Blong stap tij olsem Kraes i no nidim blong yu kam stret evriwan—traem blong mekem mo gohed blong traem blong mekem. Taem yu gohed blong mekem gud mo lukaotem blong fogivim taem yu foldaon, yu save kam disaepol blong Kraes olsem we hem i nidim yu. (Luk long Teaching in the Savior’s Way, 13–14.)