Jisas insaed long haos blong prea long Nasaret, i kam long GregK. Olsen

3–9 Oktoba

Aesea 58–66

“!Ol Man blong Mi! Bambae Mi Mi Kam long Taon Ya Jerusalem”

Taem yu stadi long gudgudfala doktrin long ol japta ia invaetem Spirit blong i lidim yu i go long ol mesej we i gat moa long ol memba blong klas.

Raetemdaon Ol Filing mo Tingting blong Yu

Invaetem Ol Memba blong Serem Wanem Oli Gat

Yu save invaetem ol memba blong klas blong oli raetem long bod refrens blong ol ves we i givim insperesen long olgeta long stadi blong olgeta long wik ia. Olsem ol memba blong klas, yufala i save lukaotem ol ves ia mo tokbaot ol trutok we oli stap insaed. Ol save ia oli save lid i go long toktok raon we i moa dip long wan o moa prinsipol we oli stap long lis daon ia.

Stap Tijim Doktrin

Aesea 58:3–12

Livim kakae i karem ol blesing i kam.

• Blong helpem ol memba blong klas blong tokbaot from wanem Lod i komandem yumi blong livim kakae, yu save krietem tu (2) kolom long bod wetem tufala taetel ia “[Bae Yufala I No Livim Kakae olsem we Yufala I Mekem Tedei]” mo “[Fasin blong Livim Kakae We Mi Bin Jusum.]” Afta ol memba blong klas oli save rid long Aesea 58:3–7, fulumap fas kolom wetem olsem wanem Ol Man Isrel oli bin stap livim kakae mo seken kolom wetem livim kakae we Lod i wantem yumi blong mekem. ?Olsem wanem ol toktok ia jenisim wei yumi lukluk long livim kakae? Ol memba blong klas oli save serem eksperiens blong olgeta tu olsem wanem livim kakae i lidim olgeta i go long ol blesing we Lod i promes long hem long ol ves 8–12.

• Sam memba blong klas oli maet gat eksperiens blong eksplenem long narawan from wanem yumi livim kakae. Invaetem olgeta blong serem wanem oli bin talem. Yu save invaetem wan memba blong bisoprik blong tokbaot olsem wanem oli yusum fas ofring. O yu save serem wan long ol eksampol we i kam long Presiden HenryB. Mesej blong Eyring “?I No Hemia Nao Fasin blong Livim Kakae we Mi Bin Jusum?” ( churchofjesuschrist.org/?lang=bis). Olsem wanem livim kakae mo pem fas ofring i help blong “mekem i laet ol hevi we yumi stap karem” blong yumi mo ol narawan? (Aesea 58:6).

Aesea 61:1–3; 63:7–9

Jisas Kraes i Sevya mo Ridima blong yumi.

• Taem Jisas Kraes i anaonsem long ol pipol blong Nasaret se hem i Mesaea, Hem i kwotem toktok we i stap long Aesea 61:1–3 (luk long Luk 4:16–21; luk tu long vidio “Jesus Declares He Is the Messiah,” ChurchofJesusChrist.org). Maet ol memba blong klas oli save rid long Aesea 61:1–3 mo tokbaot from wanem ol ves ia oli talemaot gud misin blong Sevya. Yu maet wantem raetem long bod lis blong wanwan samting we oli anoentem Sevya blong mekem mo tokbaot mining blong olgeta wanwan. ?Olsem wanem nao Sevya i fulfilim evri wok blong misin blong Hem long taem blong laef blong Hem long wol ia? ?Olsem wanem nao i fufilim olgeta long laef blong yumi?

• Ol memba blong klas oli save rid long Aesea 63:7–9 mo serem olsem wanem Jisas Kraes i bin blesem olgeta long ol wei ia.

• Aesea 61:1–3 i yusum ol naesfala toktok blong poem blong tokbaot paoa blong Jisas Kraes blong pemaot wanem we i brokbrok mo i nogud. Blong soemaot ol ves ia long wan klia pikja, tingting blong serem wan stori we i abaot samting we i had blong lusum o i kam nogud be oli tanem samting ia i kam moa naes. Eksampol, luk vidio ia “Provo City Center Temple” (ChurchofJesusChrist.org; luk tu “Sam Moa Risos”) o storian long stat blong Presiden DieterF. Mesej blong Uchtdorf “He Will Place You on His Shoulders and Carry You Home” (Liahona, May 2016, 101–4). Ol memba blong klas oli save tokbaot olsem wanem oli bin luk Lod i givim gudfala samting long pipol taem oli ting se laef blong olgeta ia i nogud.

Aesea 65:17–25

Long Seken Kaming blong Hem, Lod bae i “krietem wan niu heven mo wan niu wol.”

• Aesea 65:17–25 i tokbaot wol ia bae i olsem wanem afta long Seken Kaming blong Sevya. Yu save invaetem ol memba blong luklukbak long ol ves ia mo lukaotem ol ansa blong ol kwestin olsem ia: Laef long “niufala wol” bae i defren olsem wanem long laef we yumi stap long hem naoia long wol ia? ?Wanem nao yu faenem long ol ves ia we i mekem yu yu glad?

Sam Moa Risos

Lod “i no stap livim yumi stap long asis.”

Afta long storian blong olsem wanem faea kolosap i bonem daon Provo Tabenakol, mo we oli bin bildim bakegen afta i kam Provo Siti Senta Tempol, Sista LindaS. Reeves i talem: “Lod i letem blong oli traem yumi mo testem yumi samtaem long ful paoa we yumi gat. Yumi bin luk laef blong ol lav wan—mo ating blong yuwan—olsem we i bon daon i go long graon mo yumi stap tingting se from wan Papa long Heven we i gat ol sore, kea mo lav i save letem kaen samting olsem i hapen. Be Hem i no stap livim yumi i stap long asis; Hem i stanap wetem ol han blong Hem oli open bigwan, i stap invaetem yumi wetem ful hat blong Hem blong yumi go long Hem. Hem i bildim laef blong yumi i kam ol naesfala tempol we Spirit blong Hem i save stap long hem blong wan taem we i no save finis” (“Claim the Blessings of Your Covenants,” Liahona, Nov. 2013,119).

Stap Kam Antap long Fasin blong Yumi blong Stap Tij

Kam blong save gud olgeta we yu stap tijim. Wanwan man o woman we yu stap tijim, hem i gat ples blong hem we i kamaot long hem, i gat lukluk blong hemwan, mo i gat ol samting we hem i save mekem. Tingting long ol defren kwaliti ia lukaotem blong helpem evriwan blong lanem samting long wan wei we i gat mining mo i save stap oltaem long tingting. (Luk long Teaching in the Savior’s Way, 7.)