“26 Septemba–2Oktoba. Aesea 50–57: ‘Olgeta Samting We I Stap Mekem Yumi Harem Nogud, Hem I Karem Olgeta Evriwan. Ol Sobodi we Hem I Karem, Hemia Ol sobodi blong Yumi,’” Kam Folem Mi—Blong Sandei Skul: OlTesteman 2022 (2021)
“26 Septemba–2Oktoba. Aesea 50–57,” Kam Folem Mi—Blong Sandei Skul: 2022
Oli Stap Jikim Kraes, i kam long Carl Heinrich Bloch
26 Septemba–2Oktoba
Aesea 50–57
“Olgeta Samting We I Stap Mekem Yumi Harem Nogud, Hem I Karem Olgeta Evriwan. Ol Sobodi we Hem I Karem, Hemia Ol sobodi blong Yumi”
Moa impoten wei blong rere mo tij i blong ridim mo tingting hevi long ol skripja. ?Yu filim mo lanem wanem taem yu rid long Aesea 50–57?
Raetemdaon Ol Filing mo Tingting blong Yu
Invaetem Ol Memba blong Serem Wanem Oli Gat
Blong Helpem ol memba blong klas blong serem ol eksperiens oli gat taem oli rid long Aesea 50–57, yu save raet long bod wan sentens we i olsem Fet blong mi long Jisas Kraes i kam strong taem mi rid long… Invaetem ol memba blong klas blong serem olsem wanem bae oli finisim sentens ia.
Stap Tijim Doktrin
Fiuja blong ol pipol blong Lod i gud tumas.
-
Yumi evriwan i gat taem we yumi filim se yumi no strong. Blong helpem ol memba blong klas oli dipen long paoa blong Lod, yu save givim wok long olgeta wanwan blong ridim ol ves long Aesea 51–52 mo serem samting oli faenem we bae i givim paoa long sam man we i filim se i no gat paoa o i no gat strong tingting. Yu maet wantem blong poenemaot se Sevya afta long laef bakegen long ded Hem i bin ripitim sam long ol toktok blong Aesea long ol pipol long Amerika (luk long 3Nifae 20:32–45). ?Wanem ol toktok blong Sevya long 3Nifae 20:30–34 i ademap long save blong yumi abaot long wanem taem ol profesi ia bae oli fulfil?
-
Aotlaen blong wik ia long Kam Folem Mi—blong Wanwan Man, Woman mo Famli i givim tingting blong listim evri samting long Aesea 50–52 we Lod i invaetem ol pipol blong Hem blong Mekem. Maet ol memba blong klas oli save serem wanem oli faenem mo tokbaot wanem ol invitesen ia minim long olgeta. Yu wantem blong lukluk nomo long invitesen long Aesea 51:1–2, 6–8; 52:1–3, 9–11. ?Olsem wanem yumi save folem ol invitesen ia? Yu maet wantem blong poenemaot se Doktrin mo Ol Kavenan 113:7–10 i givim wan eksplenesen we i moa inspae blong Aesea 52:1–2. ?Wanem nao ol toktok ia oli ademap long save blong yumi?
From Lav, i kam long man blong kaving Angela Johnson
Jisas Kraes i karem long Hem ol sin blong yumi mo ol sore.
-
Blong helpem ol memba blog klas luk long wan klia pikja ol toktok blong Aesea long Aesea 53, yu save soemaot sam pikja we oli raonem Atonmen blong Jisas Kraes (luk long Gospel Art Buk, ol pej. 56–60). Yu save askem ol memba blong klas blong faenem ol sentens long Aesea53 we i talemaot wanem i hapen long ol pikja ia. ?Wanem ol toktok blong Aesea i tijim yumi abaot Safaring blong Sevya from yumi? ?Wanem nao oli talem, from wanem Hem i safa blong yumi? ?Wanem nao ol tijing ia oli givim insperesen long yumi blong mekem?
-
Blong invaetem Tabu Spirit blong testifae abaot trutok we oli bin tijim long Aesea 52:13–15; 53, yu maet askem ol memba blong klas oli ridim ol ves ia blong olgeta nomo, taem yu plei long wan hym abaot Atonmen blong Jisas Kraes. Invaetem ol memba blong klas blong lukaotem ol toktok o ol sentens insaed long skripja we oli filim se oli impoten. Afta letem olgeta oli serem wanem oli faenem mo olsem wanem oli filim abaot Sevya. Tingting tu blong invaetem ol memba blong klas blong rid long Mosaea 15:10–12, ples ia Abinadae i eksplenem wanem i minim sentens ia “ol pikinini blong hem.” Olsem wanem hemia i helpem yumi andastanem Aesea 53:10?
Jisas Kraes i wantem yumi blong go bak long Hem.
-
Stadi blong Aesea54 i save givim insperesen long ol memba blong klas we oli filim se oli lusum hop from sin blong olgeta o olgeta we oli filim se oli no strong. Yu save invaetem ol memba blong klas blong lukaot insaed long japta54 ol sentens o ol ves we i soem olsem wanem Sevya i filim abaot yumi. ?Olsem wanem nao Hem i wantem yumi filim abaot ol sin mo wiknes blong yumi we i pas finis? ?Olsem wanem Hem i wantem yumi blong filim abaot Hem? Leftemap tingting blong ol memba blong klas blong serem eni samting we oli lanem abaot Jisas Kraes long Japta ia. Stetmen we i kam long Presiden DieterF. Uchtdorf long “Sam Moa Risos” bae i save givim moa blong save toktok raon long hem.
Sam Moa Risos
Tru long Jisas Kraes yumi save gat Hop.
Presiden DieterF. Uchtdorf i bin tijim:
I nomata se laef blong yumi i go rong olsem wanem. I no impoten tumas se sin blong yumi i doti olsem wanem, se konkon i bigwan hamas, se yumi stap yumiwan, o hat i brok. Iven olgeta we oli no gat hop, we oli laef wetem trabol tingting, we oli salem yumi, we oli salem tru fasin blong olgeta, o tanem olgeta agensem God, oli save bildimap olgeta bakegen.
“Glad nius blong gospel i olsem: from plan we i no save finis blong stap glad, we Papa long Heven we i gat lav i givim, mo tru long Atonmen blong Jisas we i Kraes, Hem i save pemaot yumi long ples we yumi foldaon long hem mo mekem yumi kam klin gud bakegen, be tu, yumi save progres i go bitim wanem man i save tingting long hem mo kasem laef we i no save finis wetem Hem mo kam pat long bigfala glori blong God” (“He Will Place You on His Shoulders and Carry You Home,” Liahona, May 2016,102).
Stap Kam Antap long Fasin blong Yumi blong Stap Tij
Laef long wan laef we i klin inaf blong Spirit i save lidim yumi. Taem yu laef klin folem gospel, yu yu inaf blong gat Spirit i stap olsem kompanion blong yu, we Hem nao i ril tija. Taem yu stap lukaotem blong Hem blong i lidim yu, Tabu Spirit bae i givim yu ol tingting, ol filing mo ol gudgudfala aedia abaot olsem wanem blong lukluk long ol nid blong olgeta we yu stap tijim. (Luk long Teaching in the Savior’s Way, 5.)