« ថ្ងៃទី ៣១ ខែ តុលា–ថ្ងៃទី ៦ ខែ វិច្ឆិកា ។ ដានីយ៉ែល ១–៦ ៖ ‹ គ្មានព្រះឯណាទៀត ដែលអាចនឹងជួយឲ្យរួចយ៉ាងដូច្នេះបានឡើយ › » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ៣១ ខែ តុលា–ថ្ងៃទី ៦ ខែ វិច្ឆិកា ។ ដានីយ៉ែល ១–៦ » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ឆ្នាំ ២០២២

ដានីយ៉ែលបកស្រាយសុបិនរបស់នេប៊ូក្នេសា ដោយ ហ្រ្គេន រ៉មនី ខ្លសិន

ថ្ងៃទី ៣១ ខែ តុលា–ថ្ងៃទី ៦ ខែ វិច្ឆិកា

ដានីយ៉ែល ១–៦

« គ្មានព្រះឯណាទៀត ដែលអាចនឹងជួយឲ្យរួចយ៉ាងដូច្នេះបានឡើយ »

សមាជិកក្នុងថ្នាក់ជាច្រើននឹងស្គាល់ដំណើររឿងមួយចំនួននៅក្នុងគម្ពីរដានីយ៉ែល ។ កាលបងប្អូនសិក្សា និងរៀបចំខ្លួនបង្រៀន សូមស្វែងរកការដឹកនាំមកពីព្រះវិញ្ញាណ ស្ដីពីរបៀបដែលបងប្អូនអាចជួយសមាជិកក្នុងថ្នាក់ ឲ្យរកឃើញអត្ថន័យផ្ទាល់ខ្លួនចេញពីជំពូកទាំងនេះ ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

វាអាចមានអត្ថប្រយោជន៍ដើម្បីអញ្ជើញសមាជិកក្នុងថ្នាក់ ឲ្យចែកចាយពីដំណើរការនៃការសិក្សាព្រះគម្ពីរផ្ទាល់ខ្លួន ឬជាគ្រួសាររបស់ពួកគេ ។ នៅពេលសមាជិកក្នុងថ្នាក់ចែកចាយការយល់ដឹងអំពីអ្វីមួយ ដែលព្រះវិញ្ញាណបានបង្រៀនពួកគេនៅសប្ដាហ៍នេះ នោះបងប្អូនអាចសួរពួកគេពីអ្វីដែលពួកគេបានធ្វើ ដែលនាំឲ្យមានការយល់ដឹងទាំងនោះ ។

បង្រៀនគោលលទ្ធិ

ដានីយ៉ែល ១; ៣; ៦

យើងអាចទុកចិត្តលើព្រះអម្ចាស់បាន នៅពេលសេចក្តីជំនឿរបស់យើងជួបនឹងការសាកល្បង ។

ដើម្បីចាប់ផ្ដើមការពិភាក្សាអំពីរបៀបដែល ដានីយ៉ែល សាដ្រាក់ មែសាក់ និង អ័បេឌ-នេកោ បានបង្ហាញសេចក្ដីជំនឿលើព្រះអម្ចាស់ នោះបងប្អូនអាចសូមឲ្យសមាជិកក្នុងថ្នាក់ពីរបីនាក់សង្ខេបឧបសគ្គនានា ដែលបុរសទាំងបួនរូបនេះបានប្រឈមមុខ ដូចដែលបានពិពណ៌នានៅក្នុង ដានីយ៉ែល ១, ៣ និង ៦ ។ ហេតុអ្វីវាអាចជារឿងពិបាកដើម្បីមានភាពស្មោះត្រង់នៅក្នុងស្ថានភាពទាំងនេះ ? តើយើងប្រឈមមុខនឹងស្ថានភាពអ្វីខ្លះ ដែលផ្ចាញ់ផ្ចាលសេចក្ដីជំនឿរបស់យើង ? សមាជិកក្នុងថ្នាក់អាចស្រាវជ្រាវក្នុង ដានីយ៉ែល ១:១០–១៣; ៣:១៥–១៨; ៦:១០ ហើយរកមើលរបៀបដែលបុរសទាំងបួនរូបនេះបានឆ្លើយតបនឹងឧបសគ្គរបស់ពួកគេ ។ តើគំរូរបស់ពួកគេអាចជួយយើងក្នុងកិច្ចខិតខំរបស់យើង ដើម្បីធ្វើជាសិស្សដ៏ស្មោះត្រង់របស់ព្រះយេស៊ូវគ្រីស្ទដោយរបៀបណា ?
ដូចជាដានីយ៉ែល និងមិត្តភក្ដិរបស់លោកដែរ ពួកយើងភាគច្រើនមានអារម្មណ៍ថារងសម្ពាធ ក្នុងការធ្វើអ្វីមួយដែលខុសពីបទដ្ឋានរបស់យើង ។ តើមានប្រភពណាខ្លះដែលនាំឲ្យមានសម្ពាធនេះនៅក្នុងជីវិតរបស់យើង ? ដើម្បីជួយសមាជិកក្នុងថ្នាក់ឲ្យរៀនមកពីគំរូរបស់ដានីយ៉ែល និងមិត្តភក្ដិរបស់លោក បងប្អូនអាចបំបែកពួកគេជាបីក្រុម ហើយសូមចាត់ឲ្យក្រុមនីមួយៗពិនិត្យមើលជំពូកមួយដូចតទៅនេះ ៖ ដានីយ៉ែល ១, ៣ ឬ ៦ ។ តើព្រះអម្ចាស់បានប្រទានពរដល់ដានីយ៉ែល សាដ្រាក់ មែសាក់ និង អ័បេឌ-នេកោ យ៉ាងដូចម្ដេច នៅពេលពួកគេបានជ្រើសរើសដើម្បីមានភាពស្មោះត្រង់ មិនថាពួកគេប្រឈមមុខនឹងសម្ពាធខ្លាំងប៉ុណ្ណាក្ដី ? ក្រុមនីមួយៗអាចចែកចាយជាមួយនឹងសមាជិកក្នុងថ្នាក់ នូវអ្វីដែលពួកគេបានរកឃើញ ។ បន្ទាប់មក សមាជិកក្នុងថ្នាក់អាចប្រឹក្សារួមគ្នាអំពីរបៀបដើម្បីបន្ដនៅស្មោះត្រង់ មិនថាមានសម្ពាធសង្គម ឬសម្ពាធផ្សេងទៀតយ៉ាងណានោះទេ ។ ពួកគេក៏អាចពិភាក្សាពីសារៈសំខាន់នៃការស្វែងរកមិត្តល្អ ដែលនឹងជួយគាំទ្រយើងឲ្យធ្វើតាមបទដ្ឋានរបស់យើងផងដែរ ។

ដានីយ៉ែល ២

សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជានគរព្រះនៅលើផែនដីនេះ ។

ការពិភាក្សា ដានីយ៉ែល ២ អាចជួយសមាជិកក្នុងថ្នាក់របស់បងប្អូន ឲ្យយល់ពីរបៀបដែលសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ កំពុងតែបំពេញជោគវាសនារបស់ខ្លួនជាថ្មដែលបានព្យាករនោះដែល « ដាប់ផ្តាច់ចេញពីភ្នំ » ( ខទី ៤៥ ) ។ ដើម្បីចាប់ផ្ដើម បងប្អូនអាចរំឭករួមគ្នានូវការពិពណ៌នា និងការបកស្រាយសុបិនរបស់នេប៊ូក្នេសាដោយដានីយ៉ែល ដែលមាននៅក្នុង ដានីយ៉ែល ២:៣១–៤៥ ។ រួចហើយ បងប្អូនអាចបង្ហាញរូបភាពថ្មមួយ ( ឬគូររូបថ្មនៅលើក្ដារខៀន ) ។ សូមអញ្ជើញសមាជិកក្នុងថ្នាក់ឲ្យចែកចាយអ្វី ដែលពួកគេបានរៀនអំពីនគររបស់ព្រះ ដោយធ្វើការប្រៀបធៀបវាទៅនឹងការពិពណ៌នាអំពីថ្មនេះនៅក្នុង ដានីយ៉ែល ២:៣៤–៣៥, ៤៤–៤៥ ។ ប្រហែលជាសមាជិកក្នុងថ្នាក់អាចដឹងប្រវត្តិសាសនាចក្រខ្លះៗ នៅក្នុងតំបន់របស់បងប្អូនដែលពួកគេអាចចែកចាយបាន ។ តើយើងឃើញថា ការព្យាកររបស់ដានីយ៉ែលបានបំពេញនៅក្នុងជីវិតរបស់យើងម្នាក់ៗតាមរបៀបណា ?

ដានីយ៉ែល ២:១–៣០

ការទទួលវិវរណៈតម្រូវឲ្យមានការរៀបចំខ្លួនខាងវិញ្ញាណ ។

ប្រហែលជាសមាជិកក្នុងថ្នាក់នឹងទទួលប្រយោជន៍ពីការរៀនអំពីរបៀប ដែលដានីយ៉ែលបានរៀបចំខ្លួនលោក ដើម្បីទទួលវិវរណៈដែលចាំបាច់ដើម្បីពិពណ៌នា និងបកស្រាយសុបិនរបស់នេប៊ូក្នេសា ។ បងប្អូនអាចចាប់ផ្ដើមដោយការសូមឲ្យសមាជិកក្នុងថ្នាក់រំឭក ដានីយ៉ែល ២:១–១៥ រួចហើយចែកចាយពីអារម្មណ៍របស់ពួកគេ ប្រសិនបើពួកគេឃើញថា ខ្លួនឯងស្ថិតក្នុងស្ថានភាពរបស់ដានីយ៉ែលនោះ ។ សូមអញ្ជើញពួកគេឲ្យស្រាវជ្រាវក្នុង ដានីយ៉ែល ២:១៦–១៨ ដើម្បីរៀនអំពីអ្វីដែលដានីយ៉ែលបានធ្វើ ។ តើយើងអាចរៀនអ្វីខ្លះមកពី ដានីយ៉ែល ១:១៧ អំពីរបៀបដែលព្រះបានរៀបចំដានីយ៉ែល ? តើយើងអាចរៀនអ្វីខ្លះមកពីដានីយ៉ែល ដែលអាចជួយយើងបាន នៅពេលយើងស្វែងរកវិវរណៈផ្ទាល់ខ្លួននោះ ? តើយើងអាចរៀនអ្វីខ្លះមកពីពាក្យសម្ដី និងសកម្មភាពរបស់ដានីយ៉ែល ក្រោយពីលោកបានទទួលជំនួយរបស់ព្រះអម្ចាស់ហើយ ? ( សូមមើល ដានីយ៉ែល ២:២០–៣០ ) ។

ក្មេងប្រុសបួននាក់អង្គុយនៅតុបដិសេធសាច់ដែលបុរសម្នាក់ផ្តល់ឲ្យ — រចនារូបភាពអំពី ដានីយ៉ែល និងមិត្តភក្តិរបស់លោកកំពុងបដិសេធមិនបរិភោគព្រះស្ងោយរបស់ស្តេច ដោយ ប្រាយអិន ខល

ដានីយ៉ែល ៣

នៅពេលលទ្ធផលមិនប្រាកដប្រជា នោះយើងនៅតែអាចជ្រើសរើសយកសេចក្ដីជំនឿបានដដែល ។

បទពិសោធន៍របស់ សាដ្រាក់ មែសាក់ និង អ័បេឌ-នេកោ ដូចមាននៅក្នុង ដានីយ៉ែល ៣ អាចជួយសមាជិកក្នុងថ្នាក់របស់បងប្អូនឲ្យយល់កាន់តែច្បាស់លាស់ថែមទៀត អំពីអត្ថន័យនៃការមានសេចក្ដីជំនឿលើព្រះយេស៊ូវគ្រីស្ទ ។ បងប្អូនអាចអញ្ជើញសមាជិកក្នុងថ្នាក់ឲ្យសង្ខេបឧបសគ្គដែល សាដ្រាក់ មែសាក់ និង អ័បេឌ-នេកោ បានប្រឈមមុខ ( សូមមើល ដានីយ៉ែល ៣:១–១២ ) បន្ទាប់មក សូមពិភាក្សាពីរបៀបដែលពួកគេបានឆ្លើយតប ( សូមមើល ដានីយ៉ែល ៣:១៣–១៨ ) ។ តើយើងរៀនអ្វីខ្លះអំពីសេចក្ដីជំនឿចេញពីចម្លើយរបស់បុរសទាំងនេះ ? បងប្អូនអាចសរសេរឃ្លានេះនៅលើក្ដារខៀន ព្រះនៃយើងអាច… និង តែបើមិនអាចទេ នោះ… មកពី ខទី ១៧–១៨ ។ សមាជិកក្នុងថ្នាក់អាចផ្ដល់យោបល់ពីរបៀបដែលពួកគេនឹងបំពេញចន្លោះនេះ ដោយស្ថានភាពនានាដែលពួកគេអាចនឹងប្រឈមមុខ ។ ឧទាហរណ៍ ពួកគេអាចស្នើថា « ព្រះនៃយើងអាចឆ្លើយតបនឹងសំណួររបស់ខ្ញុំទាំងអស់ » និង « តែបើមិនអាចទេ នោះខ្ញុំនឹងទុកចិត្តលើទ្រង់ដោយចិត្តអំណត់ » ។ កាលសមាជិកក្នុងថ្នាក់ចែកចាយឧទាហរណ៍នានា សូមលើកទឹកចិត្តពួកគេឲ្យនិយាយអំពីរបៀបដែលព្រះអង្គសង្គ្រោះគាំទ្រ និងពង្រឹងដល់ពួកយើង ទោះជាពេលដែលយើងមិនដឹងថាអ្វីៗនឹងទៅជាយ៉ាងណាក្ដី ។

ការកែលម្អការបង្រៀនរបស់យើង

ប្រើជំនួយចក្ខុ ។ « សិល្បៈដូចជារូបភាព វីដេអូ និងការសម្ដែងអាចជួយផ្សារភ្ជាប់អ្នករៀន—ជាពិសេសអ្នករៀនដោយការមើល—ហើយធ្វើឲ្យដំណើររឿងបទគម្ពីរកាន់តែចងចាំបានច្រើន » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២២ ) ។