Auā Ua Fanau Mai Mo i Tatou le Tama, saunia e Simon Dewey

19–25 Tesema

Kerisimasi

“Sa Tatou Faatalitali ia te Ia, ua Ia Faaolaina Foi i Tatou”

I le taimi o lau suesuega patino ma sauniuniga e aoao atu, mafaufau i le ala e mafai ona e fesoasoani ai i tagata o le vasega e lagona le olioli tele i le soifua mai o le Faaola. Valaaulia le Agaga e molimau ia i latou i le alofa laveai o Iesu Keriso.

Tusi Faamaumau Ou Lagona Uunai

Valaaulia le Fefaasoaai

O le vaitau o le kerisimasi e mafai ona avea o se avanoa lelei e valaaulia ai tagata o le vasega e faasoa mai le ala e faamalosia ai lo latou faatuatua ia Iesu Keriso i le suesueina o le Feagaiga Tuai.

Aoao Atu le Aoaoga Faavae

Tatou te olioli i lo tatou Faaola.

• E ui lava o le Kerisimasi ua iloaina o se vaitau o le olioli, e toatele i latou e i ai tulaga e faigatā ai ona maua le olioli, e oo lava i lenei taimi o le tausaga. O se sāvali tāua o le Kerisimasi e faapea, e mafai e le Faaola ona faamāmā a tatou avega ma fesoasoani ia i tatou ia maua le filemu e oo foi i le olioli. Ina ia faasoa atu lenei sāvali, e mafai ona e tusia i le laupapa ia mau fesootai nei: Salamo 35:9; Isaia 25:8–9; 44:21–24; 51:11; Sefanaia 3:14–20; Mose 5:5–11. Ona mafai lea ona e tusia i le laupapa se fesili mo tagata o le vasega e mafaufau loloto i ai a o latou faitauina fuaitau, e pei O a mafuaaga ua tuuina mai e nei fuaitau o mau ia olioli ai? Fai ia i latou e faasoa mai mea ua latou maua. Atonu e mafai foi ona e tuu atu i tagata o le vasega se taimi e tusi ai e uiga i lo latou lava olioli i le Faaola. E mafai ona latou maua ni manatu faaopoopo mai le sāvali a Peresitene Russell M. Nelson i “Punaoa Faaopoopo.”

• E saunia e le Kerisimasi avanoa e tala’i atu ai le olioli ia Keriso i le auauna atu i isi. A o loma le vasega, e mafai ona e valaaulia tagata o le vasega e iloilo le sāvali a Elder Ulisses Soares “A Modern Angelic Host” (First Presidency Christmas devotional, Dec.8, 2019, broadcasts.ChurchofJesusChrist.org) ma ia o mai saunia e faasoa atu le ala na fesoasoani ai se faatinoga o le auauna atu a Elder Soares ma lona āiga e lagona le olioli o le Kerisimasi. E mafai foi ona e faasoa atu ni vaega o lana sāvali i le vasega. E mafai e tagata o le vasega ona fefaasoaai i o latou lava aafiaga o faatinoga o le auauna atu o le tuuina atu ma le mauaina i le taimi o le Kerisimasi. E faapefea ona tatou faatinoina le valaaulia a Elder Soares e mulimuli i le “faataitaiga sili o le alofa ma le agalelei i tagata”?

O faatusa e mafai ona fesoasoani ia i tatou e manatua ai Iesu Keriso.

• O leotootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga e aofia ai se lisi o faatusa i le Feagaiga Tuai lea e aoao ai ia Iesu Keriso. E mafai e tagata o le vasega ona faasoa mai mea na latou aoaoina e uiga i le Faaola mai nei faatusa ma isi na latou maua i a latou suesuega. O a mea ua tatou aoaoina mai tusitusiga paia e uiga i le sailia o le Faaola? O a aafiaga ua aoaoina ai i tatou e faapea “ua foafoaina mea uma ma ua faia e molimau ia te [Ia]”? (Mose 6:63).

Na tuuina mai e le Atua mo i tatou le meaalofa o Lona Alo.

• O le tuuina atu o meaalofa o se tu masani o le Kerisimasi i le tele o aganuu. E mafai ona e taitai atu se talanoaga ma tagata o le vasega i meaalofa na tuuina mai e le Atua mo i tatou, ae maise lava le meaalofa o Lona Alo, o Iesu Keriso. Ina ia faia lenei mea, e mafai ona e faasoa atu le vitio “He Is the Gift” (ChurchofJesusChrist.org) ma valaaulia tagata o le vasega e faasoa mai le uiga o le meaalofa o le Faaola ia i latou. E mafai faapefea ona tatou faaalia i le Tama Faalelagi lo tatou faafetai mo lenei meaalofa?

Isaia 7:14; 9:6

“O igoa foi o ia o le Silisili Ese.”

• Na faaaoga e le perofeta o Isaia le tele o igoa ma faalagiga e faamatala ai le Mesia, o le a fanau i Peteleema (mo se faataitaiga, Isaia 7:14; 9:6). Atonu o le a olioli tagata o le vasega e aoao atili e uiga i le Faaola ma Lana misiona i le aoaoina o nei faalagiga. E mafai ona latou filifili se faalagiga ma sue isi fuaitau o mau e fesoasoani ia i latou e malamalama ai i lona uiga. Mo se faataitaiga, e mafai ona latou aoao atili i le faalagiga “Alii o le Filemu” (Isaia 9:6) i le faitauina o le Salamo 85:8; Isaia 52:7; Luka 2:14; po o le Ioane 16:33. Ina ia fesoasoani i tagata o le vasega e sue isi mau, fautua atu latou te vaai i le Taiala i Tusitusiga Paia (scriptures.ChurchofJesusChrist.org). O a mea ua fautuaina mai e nei faalagiga e uiga i le Faaola ma mea Na te faia mo i tatou?

Punaoa Faaopoopo

Ua ofoina mai e Iesu Keriso le filemu ma le olioli.

Na aoao mai Peresitene Russell M. Nelson:

“Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma. Tatou te lagonaina i le taimi o le Kerisimasi pe a tatou usuina, ‘Le lalolagi ia fiafia, lou tupu ia talia’ [Viiga, nu.113]. Ma e tatou te lagonaina i le tausaga atoa. Mo le Au Paia o Aso e Gata Ai, o Iesu Keriso o le olioli lea!…

“E pei lava foi ona ofo mai e le Faaola le filemu lea e “silisili lava i mea uma e manatu i ai,” [Filipi 4:7], Ua Ia ofoina mai foi le malosi faateleina, loloto, ma le lautele o le olioli lea e tetee ai i tulaga faaletagata po o le malamalama faaletino” (“Olioli ma le Ola ai Faaleagaga,” Ensign po o le Liahona, Nov. 2016,82).

Faaleleia o Lo Tatou Aoao Atu

Saunia ma le mafaufau i tagata. “Ia taialaina au [sauniuniga] e lou malamalama i tagata e te aoaoina. … O faiaoga e faapei o Keriso e le tuutō atu i se faiga faapitoa po o se metotia; latou te tuutō e fesoasoani i tagata e fausia le faatuatua ia Iesu Keriso” (Aoao Atu i le Ala a le Faaola,7).