“O Ona Ala ia Mai le Vavau” (Sapakuka 3:6). Sa i ai le Upu i le Amataga, saunia e Eva Timothy

28 Novema–4 Tesema

Nauma; Sapakuka; Sefanaia

“O Ona Ala ia Mai le Vavau”

O lau faataitaiga o se tagata aoao o le talalelei e mafai ona faamanuiaina ai tagata o lau vasega. Faasoa atu ia i latou le ala e fesoasoani ai le Agaga Paia ia te oe e malamalama ai i mau, ma faailoa atu lou mautinoa o le a Ia fesoasoani foi ia i latou.

Tusi Faamaumau Ou Lagona Uunaia

Valaaulia le Fefaasoaai

Ina ia tuu atu i tagata o le vasega se avanoa e faasoa mai ai manatu mai a latou suesuega o tusitusiga paia, e mafai ona e tusia Nauma, Sapakuka, ma le Sefanaia o ni autū i le laupapa. Ona mafai lea e tagata o le vasega ona tusi i lalo o autū se upu po o se fuaitau e faapitoa ia i latou ma le mataupu ma le fuaiupu na latou maua ai. Tuu atu ia i latou se taimi e faamatala ai pe aiseā na tāua ai nei upu po o fuaitau ma mea na aoaoina ai i latou e le Agaga Paia.

Aoao Atu le Aoaoga Faavae

Nauma1

O le Alii e mamana ma alofa mutimutivale.

• O leotootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga ua fautuaina le suesue i le Nauma1 mo fuaiupu o loo faamatala ai uiga o le Alii. E mafai ona e fesili i tagata o le vasega po o a mea na latou aoaoina e uiga i le Alii mai a latou suesuega patino. Mo se faataitaiga, o le a se mea ua tatou aoaoina e uiga ia te Ia mai fuaiupu 1–9? E mafai ona e ta’u atu faapea na valoia e Nauma faamasinoga a le Alii e faasaga ia Nineva, le laumua o Asuria lea na sauā ia Isaraelu mo le tele o tausaga. Aiseā na tāua ai mo Isaraelu ona faalogo i le sāvali a Nauma e uiga i le Atua? Aiseā e tāua ai lena mea mo i tatou i aso nei?

  

  “O loo agalelei Ieova, o le ‘olo ia i le aso o le puapuagā” (Nauma 1:7).

Sapakuka 1:1–4; 2:1–4;3

E mafai ona tatou faalagolago i le finagalo o le Alii ma Lana taimi.

• Atonu e fesoasoani mo tagata o le vasega le iloa faapea, e pei o le tele o i tatou, na popole Sapakuka i mea na ia vaaia i le lalolagi na siomia o ia. Atonu e mafai e tagata o le vasega ona faitau le Sapakuka 1:1–4 ma otooto mai popolega o Sapakuka. E mafai foi ona latou faatusatusa ana fesili ma isi i tusitusiga paia, e pei o fesili o loo i le Mareko 4:37–38 ma le Mataupu Faavae ma Feagaiga 121:1–6. O a ni fesili faapena o fai e tagata e uiga i le Atua i aso nei? O le a le fautuaga ua tuuina mai e le Alii i le Sapakuka 2:1–4 e fesoasoani ia te oe e faalagolago ai i Lona finagalo ma le taimi? (tagai foi Mareko 4:39–40; Mataupu Faavae ma Feagaiga 121:7–8). E mafai e tagata o le vasega ona maua isi manatu aogā i “Punaoa Faaopoopo.” E mafai foi ona latou faasoa mai le ala na fesoasoani ai le Faaola ia i latou e “ola i [lo latou] faatuatua” e tusa lava pe i ai ni a latou fesili e le o taliina.

• Ina ia amata se talanoaga o le Sapakuka3, e mafai ona e valaaulia tagata o le vasega e iloilo le mataupu ma faasoa mai ni lagona o le faafetai ma le faatuatua ua latou maua. Ina ia fesoasoani ia i latou e faaaoga nei upu ia i latou lava, e mafai ona e valaaulia tagata taitoatasi o le vasega e tusi se lisi o faamanuiaga ua tuuina mai e le Atua ia te ia. Valaaulia i latou e mafaufau loloto i le mea o le a tupu pe afai latou te le maua nisi o a latou faamanuiaga faaletino. Faitau faatasi le Sapakuka 3:17–19, ma talanoaina pe aisea e ono faigatā ai ona “’oli’oli i le Alii” (fuaiupu18) i taimi faigatā e pei ona faamatalaina i le fuaiupu17. E mafai faapefea ona tatou atiae se faatuatua e pei o Sapakuka?

Sefanaia 3:14–20

O le a olioli le Alii faatasi ma Lona nuu i Siona.

• Ina ia fesoasoani i tagata o le vasega ia maua le faamoemoe mo le lumanai i le Sefanaia 3:14–20, e mafai ona e tusia i le laupapa “Ia fiafia ma olioli ma lou loto atoa” aua… Ona sue lea e tagata o le vasega nei fuaiupu mo faamanuiaga na folafolaina mo le lumanai e mafai ona fesoasoani ia i latou e olioli ai i le asō. E mafai faapefea e lenei folafolaga ona fesoasoani ia i tatou i taimi o faigatā?

Punaoa Faaopoopo

O le faatuatua o lona uiga o le faalagolago i le atamai, agaalofa, ma le taimi a le Atua.

Na saunoa Elder Jeffrey R. Holland:

“O le a ea le umi tatou te faatali ai mo se toomaga mai faigatā ua oo mai i o tatou luga? Ae ā le onosaia o tofotofoga patino a o tatou faatali ma faatali pea, ma foliga mai ua fai si telegese o le oo mai o se fesoasoani? Aiseā ua faatuai ai a o avega ua foliga mai ua mamafa atu nai lo mea e mafai ona tatou lavātia?…

“…O le a i ai taimi i o tatou olaga ia e oo lava i a tatou taumafaiga sili faaleagaga ma naunautai, ua le maua ai mai tatalo faatauanau ni manumalō mo mea na tatou naunau i ai, pe faatatau i ni faafitauli tetele faalelalolagi po o ni faafitauli iti faaletagata lava ia. O lea la, a o tatou galulue ma faatalitali faatasi ai mo ni tali i nisi o a tatou tatalo, ou te ofo atu ia te outou la’u folafolaga faaaposetolo o loo faafofogaina ma taliina, e ui atonu e le o taimi tonu po o le ala tonu na tatou mananao i ai. Ae e tali mai lava tatalo e le aunoa i le taimi ma i le ala e tatau ai i se mătua ua silafia aoao mea uma ma le agaalofa e faavavau ona tali mai ai na tatalo.…

“…O le faatuatua o le faalagolago lea i le Atua i taimi lelei ma taimi leaga, e tusa lava pe aofia i lena mea sina puapuagā se’ia oo ina tatou vaaia Lona aao [laveai] o faaalia mo tatou” (“Faatalitali i le Alii,” Liahona, Nov. 2020, 115–16).

Faaleleia o Lo Tatou Aoao Atu

Fai ni fesili e le na o le tasi se tali. A fesiligia tagata o le vasega i o latou aafiaga ma tusitusiga paia, “Ia faailoa atu ia i latou e te le o sueina se tali patino, ae o loo e fia iloa moni mea ua latou aoaoina” (Aoao Atu i le Ala a le Faaola, 29). Mo ni faataitaiga o fesili e le tasi se tali, tagai Aoao ATU i le Ala a le Faaola, 31–32.