Mataupu 4

“O Se Lalolagi Lautele ma le Lavelave o Faatinoga”

I le aso 26 o Tesema, 1866, sa fono ai le Au Peresitene Sili ma le Korama a Aposetolo e Toasefululua i lalo o le taitaiga a Peresitene Polika Iaga. Ina ua tau faaiuiu le fono, sa faaalia e Peresitene Iaga, le Peresitene lona lua o le Ekalesia, se manao e toefaatuina ia Aualofa i le Ekalesia atoa.¹

O le tausaga na sosoo ai, na lagona ai e Peresitene Iaga le faateleina o le uunaiga faanatinati e fesoasoani i epikopo i lo latou tiutetauave e sailia ma fesoasoani atu ia i latou e le tagolima. I le taulamua ai i se taumafaiga e toefaatu le Aualofa i uarota taitasi, sa ia faasoa mai ai le fautuaga lenei i epikopo: “Tuu atu [i tuafafine] e faatulaga ia Aualofa i uarota taitasi. E toatele o tatou tamaitai talenia o loo i ai, ma e tatou te manaomia la latou fesoasoani i lenei mataupu. Atonu o le a manatu nisi e le o se mea taua lenei, ae e leai; ma o le a outou iloa ai o le a avea tuafafine ma punavai autu o le polokalama. Avatu i ai lau faautautaga ma le poto masani, avatu i ai lau uunaiga, taiala ma taitai lelei i latou ma le poto, ma o le a matua faateleina le vave ona latou maua o avanoa mo e matitiva ma o le a matua faateleina le vave latou te maua mai ai mea mo le lagolagoina o i latou nai lo se mea e mafaia e le Epikopo.”²

O le a toe faatulagaina nei tamaitai i lalo o le pule o le perisitua, ma pei lava ona saunoa Perofeta Iosefa Samita, “e tuu ai i se tulaga [latou te mafai ai] galulue e tusa ai ma na tigaalofa lea na tuuina i ai e le Atua.”³ O le a latou faamalolosia o latou aiga ma isi e manaomia le fesoasoani, i la le tino ma la le agaga. O lenei auaunaga, o le a faateleina ai lo latou lava faatuatua ma le amiotonu. Sa aoao mai e Sister Eliza R. Snow e faapea, o le Aualofa o le a “matua faaleleia ma sii a’e ai [ia tamaitai], a o le mea sili o le a faamalolosia i latou i le faatuatua i le Talalelei, ma o le faia o lena mea, e mafai ai ona avea ma meafaigaluega e laveai ai le toatele.”⁴

O Se Aualofa i Uarota Taitasi

Na tofia e Peresitene Iaga ia Sister Snow e auauna i le Ekalesia e ala i lona femalagaai i le teritori atoa, e fesoasoani i epikopo e faatulaga ia Aualofa. Fai mai a ia, “Sa faatonuina e Peresitene Iaga ia Epikopo e faatulaga ia Aualofa a Tamaitai i Uarota taitasi, ma … toe avatu ai foi le avea’i, ma avatu i vaega uma ua faato’aina ai, ma valaau atu i tamaitai ina ia ulufale i faalapotopotoga, e le gata mo le faaolatotoga i e matitiva, ae mo le faataunuuina o galuega lelei uma ma le tausaafia.”⁵

I le avea ai ma failautusi o le uluai Aualofa a Tamaitai i Navu, Ilinoi, sa tausia ai e Sister Snow ia minute auiliili o fonotaga, e aofia ai faatonuga mai ia Iosefa Samita (tagai mataupu 2). I le savaliga mai Navu i le Vanu o Sate Leki, sa ia puipui maluina ai ma le faaeteete lana api o minute. Sa malamalama o ia i le taua o mea sa aoaoina i tamaitai i na fonotaga. Sa ia iloa le ala e tatau ona faatulaga ai le sosaiete, ma sa ia manatuaina mataupu faavae na faavae ai. Sa malamalama o ia o le faalapotopotoga o se vaega faavae lea o le Ekalesia a Keriso, i tisipenisione uma pe a i ai i lona atoatoaga.”⁶ I le taimi nei, a o femalagaai o ia mai lea uarota i lea uarota, sa ia aoao atu pea lava pea mai minute.

Faalauteleina o le Vaaiga Mamao ma Uunaiga a Tamaitai

E le gata ina talosagaina Sister Snow e galulue ma taitai perisitua i uarota taitasi, ae sa faalauteleina e Peresitene Iaga lona tofiga. Na ia saunoa, “Ou te manao ia te oe e aoao ia tuafafine.”⁷ E ui o le a le vaetofiaina o ia e avea ma peresitene aoao lona lua o le Aualofa seia aulia le 1880, ae sa tuuina atu ia te ia na lava tiutetauave na tuuina e le Alii ia Ema Samita: “ia faamatala atu tusitusiga paia, ma ia apoapoai atu i le ekalesia, e pei ona tuuina atu ia te oe e lo’u Agaga.”⁸

Sa tuuina atu foi e Peresitene Iaga apoapoaiga i tamaitai o le Ekalesia. O ana apoapoaiga ma aoaoga a Sister Snow, sa tuufaatasi e faalautele ai le vaaiga mamao a tamaitai i lo latou mana mo le lelei o o latou aiga, i le Ekalesia, faapea i le lalolagi. Na saunoa Sister Snow:

Afai e i ai ni afafine ma ni tina o Isaraelu o lagonaina le [faatapulaaina] i o latou lalolagi i le taimi nei, e mafai nei ona latou maua le mau avanoa mo malosiaga uma ma le gafatia mo le faia o mea lelei lea ua sili ona faamanuiaina ai. … Sa tatalaina e Peresitene Iaga se lalolagi lautele ma le lavelave o faatinoga ma le aoga.”⁹

O loo faaalia i se iloiloga o nisi o aoaoga ma taumafaiga na faamatalaina ai le Aualofa i le vaega taufaaiuiu o le 1800 le ala na faateleina ai le vaaiga mamao ma uunaiga amiotonu a tamaitai o le Au Paia o Aso e Gata Ai, ina ua toefaatuina le Aualofa.

Alofa Moni

O le faamaoni i le mamanu na faavaeina e Iosefa ma Ema Samita i Navu, na faaauau ai ona avea le alofa moni ma faavae o mea uma, i la le agaga ma la le tino, sa faatulagaina ai tamaitai o le Aualofa e fai. Na aoao mai Peresitene Iaga:

“O loo aofia ai nei mea uma i la tatou tapuaiga. O upu ma galuega lelei uma, o mea faaletino uma, ma mea faaleagaga uma, o mea i le lagi, ma mea o i le lalolagi, ma mea o i lalo ifo o le lalolagi ua faatapulaaina e la tatou tapuaiga. … Afai tatou te faia nei mea, ma olioli i le faia o le mea tonu, o le a tutu [mausali] o tatou vae ma le lē maluelue e faapei o faavae o nei mauga e faavavau. E le tatau ona tatou mananao i se isi lava mea [vagana] ai mataupu faavae amiotonu, ma afai tatou te mananao i le mea tonu, ona tatou tuuina atu lea i isi, i le agalelei ma tumu i le alofa ma le alofa moni i tagata uma.”¹⁰

Liliuese mai Faatosinaga Faalelalolagi

I lona aiga, na aoaoina ai e Peresitene Polika Iaga ona afafine ia “vavae ese mai mea uma e leaga ma lē aoga, ae faaleleia atili i mea uma e lelei ma matagofie.”¹¹ O le vavae ese o le aveesea lea o se mea. Ina ua fautuaina e Peresitene Iaga ona afafine ia vavae ese mai, o lona uiga ia latou liliuese mai amioga a le lalolagi, lē faautauta, ma le le mama ma lavalava e le talafeagai. Sa ia laugaina foi le vavae ese mai ma le toefatufatua’i i le Ekalesia atoa.

I le fautuaina ai o le Au Paia ina ia lafoai ala o le lalolagi, e masani ona tuuina atu e Peresitene Iaga ia fautuaga patino e faatatau i mataupu o le olaga i aso faisoo. Sa ia faamalosiauina le ola faautauta ma le galue malosi. Mo se faataitaiga, sa ia fautuaina ia tuafafine o le Aualofa ina ia toefatufatua’i a latou mamanu o le tausasami ma le faasoasoaina o tupe. Peitai, e tele atu isi uiga o le vavae ese mai nai lo le amatalia o se ituaiga olaga e faigofie atu; o lona uiga o se suiga o le loto. Sa tatau i tamaitai ona faapafala mai i latou lava mai le lalolagi—ma avea moni o ni tagata Paia, o le nuu o le Atua. Na saunoa Sister Eliza R. Snow: “O le a le mea ou te manao e vavae ese mai ai a’u? O lo’u valea ma mea uma lava e le ni ō le Atua.”¹²

Faaaliga Faaletagata Lava Ia

Sa mulimuli Sister Snow i le fautuaga a taitai perisitua, ma sa ia folafola atu i ona uso o le Aualofa o le a faamanuiaina i latou pe a latou faia foi lena mea. Sa ia aoao atu foi e mafai e tamaitai taitoatasi ona maua musumusuga e taialaina ai i latou i o latou olaga patino, o o latou aiga, ma o latou tiutetauave i le Ekalesia. Fai mai a ia: “Ta’u atu i tamaitai e o atu ma faataunuu o latou tiute, i le lotomaulalo ma le faamaoni ona mafutaina lea o i latou e le Agaga o le Atua ma o le a faamanuiaina i latou i a latou galuega. Tuu atu ia i latou e saili le poto ae le o le pule, ona latou maua ai lea o le mana uma latou te maua ai le poto e faaaogaina ai.”¹³

Sa fesoasoani ana aoaoga musuia i tamaitai o le Aualofa a o feagai ai ma tofotofoga i o latou taimi. Sa ia aoao atu afai o le a latou sailia pea lava pea le taitaiga ma le faamafanafanaga mai le Agaga Paia, e mafai ona latou olioli i le filemu e oo lava i le totonugalemu o mafatiaga. Fai mai a ia, e “faamalieina ma faatumuina e le Agaga Paia mea uma e momoo i ai le loto o le tagata, ma faatumuina avanoa uma. A oo ina faatumulia a’u e le Agaga,” na ia saunoa ai, “e faamalieina lo’u agaga, ma e mafai ona ou fai atu ma le faamaoni, e foliga mai e le faalavelave i lo’u ala ia mea faalavefau o le aso. Peitai, se’i ou faamamulu ia o lena agaga ma le mana o le Talalelei, ma ou taliaina le agaga o le lalolagi, i sina luutaga itiiti, ma ua oo mai foi faafitauli; ua i ai se mea o faaletonu. Ua tofotofoina a’u, a o le a la le mea o le a faamafanafanaina ai au? Tou te le mafai ona aumaia ia te au le mafanafana o le a faamalieina ai le mafaufau e ola pea, ae o mea mai le Punavai i luga. Ma pe le o so tatou avanoa ea lo tatou ola ina ia mafai ona tafe mai pea lenei mana i o tatou agaga?”¹⁴

Puipuiga o le Faiga Faaautaunonofo

I le popofou o le Ekalesia, o le faiga faaautaunonofo na faaalia ia Iosefa Samita.¹⁵ E ui lava o lenei faiga na muamua lava faigata i le toatele ona latou taliaina, ae sa iloa e le Au Paia faamaoni, o Iosefa Samita o se perofeta a le Atua. Sa latou mulimuli i le finagalo o le Alii e pei ona faaalia i lo latou perofeta. Sa latou osia feagaiga ma le Atua ma sa malolosi ma tuuto atu i le tausiga o na feagaiga.

Ina ua toefaatuina le Aualofa i le faaiuga o le 1860, sa avea lava le autaunonofo ma se vaega o olaga o tagata o le Ekalesia. Peitai, e toatele tagata i le Iunaite Setete sa talitonu faapea, o fafine sa ola i le tulafono o autaunonofo, sa faamamasagiaina ma sauaina. O le taunuuga o se lē malamalama tele e uiga i le Au Paia o Aso e Gata Ai ma o latou talitonuga, na pasia ai e le fono faitulafono le faasa o faaipoipoga faaautaunonofo.

Sa faapotopoto se vaega o tamaitai o le Au Paia o Aso e Gata Ai i le Aai o Sate Leki ia Ianuari 1870 e tali atu i lenei tulafono. A o i ai le au failipoti o nusipepa mai vaega eseese o le Iunaite Setete, sa faaalia ai e nei tamaitai lo latou lagolagoina o perofeta soifua ma faiga a le Ekalesia. Sa latou puipuia i latou lava ma a latou tane ma sa latou tautino atu lo latou faatuatuaga ma a latou feagaiga. Fai mai Sister Eliza R. Snow: “Ua oo i le taimi [e] tulai a’e ai i le mamalu o lo tatou valaauga ma tautala atu mo i tatou lava. … E le iloa e le lalolagi i tatou, ma ua uunaia e le upumoni ma le faamasinoga tonu a o tatou tuagane ma i tatou lava e tautala atu. … Tatou te le atuna ma tamaitai o le lalolagi, ma e tatou te le mananao foi e foliga mai faapena.”¹⁶

Sa faaalia e se tasi o tamaitai o le Au Paia o Aso e Gata Ai ona lagona e uiga i le toatele o isi ina ua ia fai mai: “E leai se vaipanoa i lenei lalolagi atoa ua sili ona faaee i ai le agalelei ma le alofa i tamaitai, ma ua matua puipuia ma le paia ana aia tatau, e pei o Iuta. Ua tatou i ai iinei e faaalia lo tatou alofa o le tasi i le isi, ma faailoa atu i le lalolagi lo tatou tuuto faamaoni i le Atua lo tatou Tama Faalelagi; ma faaali atu lo tatou naunautai e ola i tulaga manaomia o le Talalelei, ma o le tulafono o le Faaipoipoga Faaselesitila i se tasi o tulaga manaomia ua tonu ia i tatou e faamamaluina, aoao atu, ma faatino, lea e mafai ona tatou maua ai le malosi mai le Atua e faia ai.”¹⁷

Fai mai lipoti o nusipepa o se “fonotaga ofoofogia” lenei.¹⁸ Na tusia e se tasi failipoti, “I le faautautaga lava ia ma le fofoga lafolafo, o tamaitai o le faa-Mamona ua ta’ua faapea e ta’uvaleina, e talitutusa lava ma … tamaitai mai Sasa’e.”¹⁹ I nai masina na sosoo ai, sa toatele atu tamaitai na auai i na fonotaga i le teritori atoa.

I le 1890, sa tauaaoina ai e Peresitene Uilifoti Uitilafi, le Peresitene lona fa o le Ekalesia, se faaaliga na oo atu ai i le le toe faaauauina e le Ekalesia o le faiga faaautaunonofo. Na ia tusia lenei faaaliga i se pepa o faamatalaga ua lauiloa o le Manifeso. Na ia saunoa e uiga i le tusiaina o le Manifeso: “Na poloaiina au e le Atua o le lagi e faia le mea ua ou faia; ma ina ua oo mai le itula sa faatonuina a’u e faataunuu ai, sa manino lelei ia te au. Sa ou alu atu i luma o le Alii, ma tusia le mea na ta’uina mai e le Alii e tusi.”²⁰

Ona ua taliaina e tagata le fautuaga faaperofeta ina ia faia autaunonofo ma sa latou osia ma tausia a latou feagaiga, o lea sa toe faigata ai foi lenei faaaliga fou mo le toatele, ae sa toe naunau foi le Au Paia faamaoni o Aso e Gata Ai e mulimuli i le perofeta. I le aso na faalogo ai le lautele o tagata auai o le Ekalesia i le Manifeso ma faamaonia, sa saunoa Sister Zina D. H. Young, o lē sa avea ma peresitene aoao lona tolu o le Aualofa i lena taimi, “O le asō sa tofotofoina loto o tagata uma, peitai sa latou vaavaai atu i le Atua ma gauai atu i ai.”²¹

O tamaitai o le Ekalesia, o ē sa taliaina e ala i faaaliga ia autaunonofo, ma o ē sa latou taliaina e ala i faaaliga le Manifeso, ua tatau i ai saafiafiga ma le agaga talisapaia. Sa latou matuai usiusitai i a latou feagaiga ma fautuaga a le perofeta soifua. O le taimi nei, ua faamamaluina na tamaitai e a latou fanau faatuatua.

Na tusia e Helen Mar Whitney, o lē sa soifua i le tulafono o faaautaunonofo, “Atonu ua tatou faitau i le talaaga o maturo ma toa manumanu lauiloa, ma le tele o alii ma tamaitai lelei, peitai o le tala e uiga i tamaitai viia ma afafine lalelei o Siona, o lo latou faatuatua i folafolaga a le Atua o Isaraelu sa mafai ai e i latou ona manumalo ia i latou lava ma usita’i ai i Lana tulafono maualuga, ma fesoasoani ai i Ana auauna e faatuina i le fogaeleele, … ou te mautinoa sa tausia e agelu se tusi o faamatalaga o a latou galuega o le a maua i faamaumauga o le faavavau, o loo tusia i mataitusi auro.”²²

Faamaninoga o Talitonuga

O Sister Eliza R. Snow o se tusitala talenia ma o se failauga i nofoaga faitele. Sa lauiloa o ia e le toatele o le “tusisolo a Siona” ona o lona tomai i le gagana Peretania.²³ Sa tele lona silafia, e faatulagaina lelei, e faatuatua, e le vaivai, e le femoumoua’i, e atamai, ma e manino lona fofoga lafolafo, ma e mulimuli foi i uunaiga a le Agaga a o ia fesoasoani i le fausiaina o le malo o le Alii. Na te faasoaina e le aunoa lona silafia ma lana molimau, ma sa ia faamalosiauina tamaitai o le Au Paia o Aso e Gata Ai ina ia latou faia foi lena mea e tasi i fonotaga a le Aualofa—ia aua nei faalagolago i isi e aoaoina i latou i taimi uma.

O nisi tamaitai sa mumusu ma sa lei saunia e talanoa atu pe lauga i nofoaga faitele. Na tuuina atu e Sister Snow le fautuaga lenei i na tamaitai: “Aua tou te faatuutuu e fai uma e lo outou peresitene. … Pe lei faamanuiaina ea outou e le Atua i le meaalofa o le failauga? … Afai ua faamanuiaina oe i le Agaga o le Atua, e le afaina po o le a lava le faatauvaa o ou mafaufauga, o le a faagaeetia ai lava i latou o e faafofoga atu ia te oe.”²⁴

Fai mai Emily S. Richards sa fesoasoani Sister Snow ia te ia e aoao e tautala i nofoaga faitele: “O le taimi muamua na [ia] talosagaina ai au ou te lauga i se fonotaga, sa ou le mafaia, ae sa ia fai mai, ‘E le afaina, ae a toe talosagaina oe e te lauga, taumafai ia i ai sau tala e fai,’ ma sa ou faia.”²⁵ Sa faaauau pea ona faaleleia atili e Sister Richards lona tomai o se failauga i nofoaga faitele, ma i le 1889 sa lauga ai o ia i le mafutaga a le National Woman Suffrage i Uosigitone, D. C.

Sa faamatalaina e se tusitala ia Sister Richards e faapea “sa fai si ona gatete i le sioa atu o le motu o tagata, ae sa taofiofi, to’alelei, malualii, ma sa atoatoa ma matagofie e pei o se agelu. … E le o upu ae o le agaga mālū [na] avatu faatasi ma upu ma sa tauaveina atu ai le alofa tunoa manumalo i loto uma.”²⁶

O le taimi nei, ua mulimuli ai tamaitai o le Aualofa i le mamanu na faatuina e Sister Snow, Sister Richards, ma isi uluai sui auai o le Aualofa. Latou te saili ma le maelega i le malamalama o le talalelei ona latou faasoa atu ai lea o lena iloa i isi. O le faia o lena mea, ua latou mulimuli ai i le fautuaga a perofeta o aso e gata ai. Na saunoa Peresitene Spencer W. Kimball, o le Peresitene lona sefululua o le Ekalesia:

“Ou te faamamafa atu … o le manaoga loloto o tamaitai taitoatasi o le suesue lea i tusitusiga paia. Matou te mananao ia faamanuiaina o tatou aiga i ni tuafafine e lava le silafia i tusitusiga paia—pe e te nofotoatasi pe faaipoipo, talavou pe matua, maliu le toalua pe o nofo i se aiga.

Peresitene Spencer W. Kimball — Spencer W. Kimball

“Po o a lava o outou tulaga faapitoa o i ai, a oo ina lava lo outou silafia i upumoni o tusitusiga paia, o le a sili atu ona outou mataalia i le tausiga o le tulafono lona lua ma le sili, ia alofa atu i le lua te tuaoi ia pei o oe lava ia te oe. Ia avea [outou] ma tagata atamamai i tusitusiga paia—e le faapea ia ta’u faatauvaaina ai isi, ae ia siitia ai i latou! Ia o ai e sili atu ona manaomia ona ‘faaputuina’ ia upumoni o le talalelei (lea e mafai ona latou tapa i ai i taimi e manaomia ai) nai lo tamaitai ma tina o e o loo faatinoina le tele o le faafailele ma le aoaoina?”

Sa tautino atu e Peresitene Kimball o le a avea ia tuafafine o le Aualofa ma se uunaiga mamana mo le lelei i “tamaitai lelei o le lalolagi” pe a “atagia atu le amiotonu ma le fesootai manino i o latou olaga.”²⁷

Sa faaalia e Sister Snow, Peresitene Kimball, ma le toatele o isi taitai o le Ekalesia se vaaiga mamao i le uunaiga a le Aualofa mo le lelei. A fesootai manino atu e tuafafine o latou talitonuga e ala i upu ma galuega, e mafai ona faamalosia e le tasi le faatuatua o le isi i le Tama Faalelagi ma Iesu Keriso. E mafai ona fesoasoani le tasi i le isi e saunia mo le mauaina o faamanuiaga uma o loo maua i le fuafuaga a le Tama Faalelagi mo le fiafia.

Faalagolago o le Tagata ia Te Ia Lava i La Le Tino

Sa faapotopoto le Au Paia i le Vanu o Sate Leki ina ua mavae ona sauaina i latou i le tele o taimi ma tutuliese faamalosi mai ō latou fale ma nuu. O lea ona ua latou masii mai i se mamao tele ma se toafa tuufua, o lea sa manao ai Peresitene Polika Iaga ia i latou ina ia ola lauusiusi ma faavaeina ni faletumau mo i latou lava. Sa manao ia latou saogalemu mai mea faatama’i faaletino, ma sa manao foi o ia ia latou saogalemu mai faatosinaga faalelalolagi ia e mafai ona faataumaoia ai lo latou faatuatua ma a latou molimau. Sa manao foi ia i latou ina ia latou tutoatasi mai faatosinaga faalelalolagi, e le gata i le faaletino ae faapea foi i le faaleagaga.

O lona uiga sa manaomia e le Au Paia ona aoao tomai o le a mafai ai e i latou ona saunia mea uma latou te manaomia. I lena taumafaiga, sa i ai ia Peresitene Iaga le faatuatuaga tele i le malosi, taleni, faatuatua, ma le naunautaiga o tamaitai. Sa ia faamanatu atu i tamaitai o le Aualofa ina ia faataunuu o latou tiute i o latou aiga faatasi ma a latou tane ma fanau.²⁸ Sa ia aoaoina foi i latou i isi tiute o le faalagolago o le tagata ia te ia lava i le faaletino, o nisi o na tiute o loo ta’ua i lalo. E ui ina ese le tele o tiute patino i nei aso, ae e tumau lava ia mataupu faavae e lagolagoina ai nei tiute: Ua fautuaina le Au Paia o Aso e Gata Ai ina ia latou faia mea uma latou te mafaia e saunia ai mea e tatau ai faaletino latou te manaomia mo le olaga mo i latou lava faapea o latou aiga.

Su’isu’i. Sa fautuaina tamaitai e Peresitene Iaga ina ia su’iina lavalava mo i latou lava ma o latou aiga. Fai mai a ia, “Ou te valaau atu i o’u tuafafine ia … fatuina a latou lava fua o ofu, ma fai o outou lavalava e faamalie ai outou lava ma tutoatasi ai mai uunaiga mai fafo.”²⁹ Sa lipotia mai e Sister Eliza R. Snow e faapea na ia faamalosiauina tamaitai e fai ni “fua e talafeagai—ni fua e talafeauga ma tofiga o tamaitai faautauta, tausaafia ma atamamai, o ē o loo tutu, aua o le mea moni lava lea, e taiulu i le lalolagi.”³⁰

Silika. Sa faavaeina e Peresitene Iaga le Asosi Silika a le Tesareta, ma sa avea Zina D. H. Young ma peresitene. Sa tausia e le vaega lenei ia anufe silika, ma fafaga i lau u’a. Sa matua inoino Sister Young i anufe ma sa mafatia foi o ia i mitivale e uiga i ai, peitai sa ia faafofoaina ma tausia i latou ma le usiusitai i lana lava fale mo anufe silika, ma sa ia aoaoina isi e faia foi lea lava mea e tasi. I lalo o lana taitaiga, sa tausia ai ma fafaga e le Asosi Silika a le Tesareta ia anufe silika mo le silia ma le 20 tausaga. E ui lava e lei i ai se tupe maua i la latou galuega, ae sa mafai ona latou lalagaina silika matagofie mo i latou lava.

Saito. Sa fautuaina e Peresitene Iaga ia tamaitai, “Aoao ina ia outou tausia outou lava; faaputuputu fatu ma falaoamata, ma teu mo aso vale.”³¹ Emmeline B. Wells, o le na avea mulimuli ane ma peresitene aoao lona lima o le Aualofa, sa tofia e taiulu i le komiti autu o le saito.

I lenei galuega faatino, sa faaosofia ai tamaitai i o latou manaoga faatina, e puipuia o latou aiga mai le fia aai. Fai mai Sister Wells: “Pe o ai o i ai iina e mafai ona tutusa le loloto o le lagonaina o nei mea e pei ona mafaia ai e se tina? Mafaufau pe faapefea pe a e faalogo atu o tagi mai sau tamaitiiti mo se falaoa.”³²

Sa fono mai lea taimi i lea taimi ia peresitene o le Aualofa e talanoaina ni auala e maua ai ma faaputu ia fatu. O foliga naunautai o Sarah Howard, o se peresitene o le Aualofa a se uarota i le Aai o Sate Leki, na fai ma sui o lagona o le toatele o tamaitai i lena taimi. Fai mai a ia: “Ou te lagona o se avanoa lea ua tuuina mai e le Alii ia i tatou, ma o le a tatou taumafai ia galulue faatasi i ai. Mo a’u lava ia, o le a ou taumafai e faia mea uma ou te mafaia, ma ou te lagona o le a tatala e le Alii se ala e mafai ai ona maua mai fatu, e ui lava ina ua uma le vaitau.”³³ E sau Sarah M. Kimball, o le sa peresitene i le Aualofa a se uarota, i se tasi o fonotaga, ua i ai sana fuafuaga i lona mafaufau mo le teuina. I le tausaga muamua o le galuega faatino, sa fauina ai e lana Aualofa se falesaito e le aafia i le afi, e mafai ona teu ai fusisaito e 1,000.

Sa fautuaina e Peresitene Ioane Teila o le Korama a Aposetolo e Toasefululua ia le usoga i Kaysville, Iuta, e fesoasoani i tuafafine i lenei taumafaiga. Sa ia faamatala atu e uiga i se fafine sa lagonaina “e fai si faatautala tele ma faatamala o lana tane i tupe a le aiga. O vaiaso taitasi, na te sulu ai se vaega o le paketi a lo latou aiga i le Tusi Paia a le aiga. “I nai tausaga mulimuli ane, sa oo mai se tulaga faigata o mea tautupe, ma sa fememea’i [le] tamaloa. Sa matauina e le fafine le suiga i foliga o lana tane, ma sa ia fesili atu i lona toalua e ta’u atu le mafuaaga o lona fememea’i. Sa fai atu le tamaloa e i ai lana [pili] ua tatau ona totogi, ma ua popole o le a le mafai ona totogi. Sa taumafai le fafine e faamalosiau atu ia te ia e ala i le fai atu e faatuatua i le Atua, ma faasino atu i le Tusi tuai, lelei ma fai atu i ai e tago e faitau, ina ia maua ai e ia sina faamafanafanaga mai ai. Sa ia tuuina atu ia te ia le Tusi Paia, ma sa tatala e le tamaloa ma suesue lautusi ma sa amata ona toulu mai [tupe].” Sa faaiu le saunoaga a Peresitene Teila, “Atonu e i ai taimi tatou te manaomia ai lenei saito o loo teuina e o tatou tuafafine; aua nei o tatou soona nopiai ia tatou mataupu, ae fai mea tatou te mafaia e fesoasoani ai ia te i latou.”³⁴

Sa ta’u atu e Sister Emmeline B. Wells i tamaitai e faapea, o lo latou maelega i lenei taumafaiga o le “faaolataga lea i la le tino o nei tagata mo taimi faafuasei.”³⁵ Sa faataunuuina lena i le 1898 ma le 1899, ina ua aoga saito a le Aualofa e maua ai le tausiga i le taimi o se lamala matautia i Iuta i saute.

O le maelega o tamaitai i le faasaoina o saito na mafai ai e tamaitai o le Au Paia o Aso e Gata Ai ona tautuaina tagata e ese mai o latou aiga ma le Au Paia. Na auina atu e le Ekalesia le saito i Initia Amerika i Iuta; i tagata na sao mai i se mafuie matautia ma le afi i San Francisco, Kalefonia, i le 1906; ma tagata i Saina sa mafatia i se oge i le 1907.³⁶ O le saito foi na fafaga ai le fiaafe i le taimi o le Taua Muamua a le Lalolagi , ina ua faatau atu e le Aualofa le 200,000 pusa saito i le malo.³⁷ O lenei talatuu o le teuina ma le auaunaga sa fesoasoani e faavae ai se mamanu mo taumafaiga o loo fai nei a le Ekalesia e tuuina atu ai le fesoasoani alofa i le lalolagi atoa, i soo se mea o manaomia ai e tagata le fesoasoani.

Tausiga faalesoifua maloloina ma a’oa’oga faafomai. Ia Setema 1873, sa lipotia mai ai e Sister Eliza R. Snow e faapea sa manao Peresitene Polika Iaga “i ni [tuafafine] se toatele ia maua a’oa’oga masani, ona a’otauina lea mo se faailoga i mea tau Vailaau.”³⁸

Na avea Sister Zina D. H. Young o se faataitaiga o se tamaitai o le Aualofa, na tuuina atu le auaunaga tele i le itu faafomai. Sa ta’u atu ia te ia i lona faamanuiaga faapeteriaka, ua ia te ia le meaalofa e faamalolo ai, ma sa ia saunia o ia lava e faaaoga lenei meaalofa i le aveina lea o sana kosi faafomai faatosaga—o le fomai e taulimaina le fananau mai o tamaiti. Sa fesoasoani o ia i le faafananauina mai o le tele o pepe i le Vanu o Sate Leki. I lana auaunaga, sa paleni lelei ai le faatinoga o lona a’otauina ma ana meaalofa e faafailele ai faaletino, faamaloloina ai faaleagaga, ma faamafanafanaina ai faalelagona. Sa ta’ua e Sister Emmeline B. Wells e uiga ia te ia: “E le faitaulia taimi o lana auaunaga i e mama’i, i le taimi e foliga mai ai sa musuia o ia e se mana e maualuga atu nai lo ia lava … pe a leai se faatuatua ma se lototoa o i latou sa siomia na moega o ma’i. O taimi na sa foliga mai ai o ia o se agelu o le alofa mutimutivale i lena lava galuega.”³⁹

E ui i le auaunaga uma sa tuuina atu e Sister Young a o ia faalagolago i ana meaalofa faaleagaga ma le tapulaa o a’oa’oga, sa ia iloa lelei lava na te le mafaia ona faafetaia’ia manaoga faafomai uma o le faitau aofai ua faatupulaia i Iuta. Sa ia faamalosiauina isi tamaitai o le Au Paia o Aso e Gata Ai e mulimuli i le fautuaga a Peresitene Iaga ia maua aoaoga faafomai.

Fai mai Sister Snow: “Pe o i ai nei iinei ni uso ua lava lo latou naunautai, ma ua iloa le matua manaomia, mo le manuia o Siona, e aooga i lenei matata? E i ai nisi e i ai lava le manao e fia tausima’i; ma o i latou na o le a manuia i le suesuega o Vailaau. … Afai latou te le gafataulimaina tupe e totogi ai, o loo i ai a tatou auala e faia ai.”⁴⁰

O lenei faamalosiauga, na aooga ai nisi o tamaitai o le Aualofa e suesue ia vailaau i le Iunaite Setete i sasae. Sa latou toe foi mai i Iuta ua avea ma foma’i ma sa latou aoaoina ni vasega faatosaga ma tausi soifua i aiga. Sa tusia e Emma Andersen Liljenquist, o lē sa auai i vasega i Iuta, nisi o ona aafiaga:

“Sa ou matua fiafia lava [i le vasega], ma ina ua uma ona vaetofia a’u e le Aposetolo o John Henry Smith ma le toatele o isi, sa ou toe taliu loa i lo’u nuu e fai la’u galuega, ma sa folafola mai e Aposetolo afai ou te ola amiotonu, o le a ou iloa i taimi uma le mea e fai pe a tulai mai ni faigata. …

“Na faataunuuina lena folafolaga i ona itu uma. E tele taimi ina ua matua tigaina se tasi o a’u ma’i, sa ou fesili ai i lo’u Tama Faalelagi mo se fesoasoani, ma o taimi uma lava e tuuina mai ai ia te au. O se tasi taimi faapitoa, o se tamaitai faatoa fanauina sana pepe ma sa le utu le palapala. Sa valaau e lona toalua le fomai, ae na te lei iloaina e matuai matuia lava. Sa ou … fesili atu i le Alii mo se fesoasoani. Sa utu le palapala ma sa ou faia mea e tatau ai mo ia. Ina ua taunuu mai le fomai, sa fai mai sa faigata ona talitonu o ia i le mea sa tupu, ae sa ia fai mai sa ou faia tonu lava le mea semanu na te faia. …

“… E silia ma le afe pepe na ou faafanauina mai [i le lalolagi]. Ou te toe faafetai ai i lo’u Tama Faalelagi mo Lana fesoasoani ma le malosi na aumai e le Alii ia te au, aua ana le seanoa lena semanu e le mafai ona ou tuuina atu lenei auaunaga i o’u uso ma lo matou nuu. O se tasi o mea aupito sili ona faamomoiloto e uiga i le fanau mai o se pepe, o le popolega muamua lava o le tina o lana pepe, ae le o ia lava.”⁴¹

I le 1882 sa faavaeina ai e le Aualofa le Falemai o le Tesareta, “lea sa mafai ai ona taulimaina ia tagata mama’i o le nuu o le Alii ma maua ai le faamanuiaga o sauniga faale-Ekalesia [faamanuiaga o le perisitua] faapea foi togafitiga lelei.”⁴² Sa faaauau pea le falemai mo le sefulu ma ona tupu tausaga seia oo ina ova atu le tau o lona faagaoioia nai lo foai sa ofoina mai, ma ua amata ona i ai isi falemai.

Aiā Tatau a Tamaitai (o le Aia Tatau e Palota Ai)

Ia Fepuari 1870, sa tuuina atu ai e le faigamalo faaitumalo o Iuta i tamaitai le aia tatau e palota ai i palota a le malo. O le taimi lena, o le itumalo o Wyoming sa na o le pau lena o le isi nofoaga i le Iunaite Setete sa tuuina atu i tamaitai lenei aia tatau. Mulimuli ane sa faaleaogaina ai e le malo o le atunuu lenei avanoa, ua avea o se vaega o le faasalaga mo le Au Paia o Aso e Gata Ai ona o lo latou ola ai i le tulafono o autaunonofo. Peitai, sa tumau pea ona faaleo ma faamanino e tamaitai o le Au Paia o Aso e Gata Ai a latou aia tatau. E toatele tamaitai sa sailia ma le mataalia aia tatau a tamaitai, po o le aia tatau e palota ai. O le faateleina o lo latou gafatia e saunoa manino ai, o se faamanuiaga lea pe a manaomia ona tutu atu mo i latou lava o ni tamaitai malolosi, malualii, ma le faamamaluina. O a latou taumafaiga, sa latou toe maua mai ai le aia tatau e palota ai ina ua avea Iuta ma setete i le Iunaite Setete o Amerika. Sa latou mauaina foi le faaaloaloga a isi faalapotopotoga a tamaitai i le Iunaite Setete ma le lalolagi atoa.

Lomiga

I lalo o le taitaiga a Sister Eliza R. Snow, sa lagolagoina ai e le Aualofa se nusipepa sa faaigoaina o le Woman’s Exponent. Sa tusia lenei nusipepa mo tamaitai o le Au Paia o Aso e Gata Ai, e fesoasoani ai ia te i latou e aoao e uiga i la latou galuega, o o latou olaga, ma lo latou talaaga. Sa avea Sister Emmeline B. Wells ma faatonu i le tele o le taimi sa lomia ai le nusipepa. Sa ia tusia i lana tusifaasoloaso, “Ou te manao e faia mea uma i lo’u malosi e fesoasoani ai e siitia le tulaga o o’u lava tagata, aemaise o tamaitai.”⁴³ Sa ia tusia mulimuli ane, “Sa ou manao ma lo’u loto atoa e faia na mea o le a faalauteleina ai tamaitai i le tino ma le agaga faapea foi i galuega faalea’oa’oga ma gauai atu ai i le tuleia i luma o le galuega a le Atua i le lalolagi.”⁴⁴

Ina ua mavae le 42 tausaga o lomiga, sa le toe faaauauina loa leWoman’s Exponent i le 1914. O le tausaga na sosoo ai, sa amata ai e le Aualofa ona lomia le Relief Society Magazine, lea na aofia ai ma lesona mo fonotaga faalevaiaso a le Aualofa. O le mekasini o se punaoa taua mo tamaitai. Sa faapelepele e tamaitai a latou kopi, ma sa latou aoao mai ai ma aoao atu. I le 1971, sa tuufaatasia ai le Relief Society Magazine ma isi mekasini mo tagata matutua fenanui o le Ekalesia, i se mekasini e tasi sa ta’ua o le Ensign. Talu mai lena taimi, o tuuina atu e le Ensign ia tusiga e aoao ai ma musuia tamaitai o le Aualofa.

Sa amata e le Ekalesia ona lolomiina mekasini i gagana eseese e ese mai le gagana Peretania i le taulotoaiga o le 1800. O le tele o nei mekasini sa lolomiina i lalo o le taitaiga a peresitene o misiona. I le 1967, sa tuufaatasia ai i se mekasini se tasi i le mamanu lava e tasi ma anotusi, ma sa faaliliuina i le tele o gagana eseese. O lenei mekasini faavaomalo—ua faaigoaina nei o le Liahona—o loo tuuina mai ai pea lava pea tusiga e fesoasoani ai i tamaitai e ola i le talalelei.

Talu mai le 1987, o loo lomia pea lava ia savali a faiaoga asiasi i le Liahona ma le Ensign. O loo tufatufaina foi savali a faiaoga asiasi i ni lomiga e ese mai ai, i eria o loo fou ai le Ekalesia ma lē o toatele ai ni tagata auai.

Sauniaina o Tamaiti ma Tamaitai Talavou mo le Auaunaga i le Malo o le Atua

I le taufaaiuiuga o le 1800, sa faatulagaina ai e taitai perisitua ma le Aualofa ni taumafaiga e faaleleia atili ai olaga o tamaiti ma tamaitai talavou. I le faatinoina o le valaau a Peresitene Polika Iaga ia toe fatufatua’i ma vavae ese mai (tagai itulau 45), sa faavaeina ai e taitai o le Aualofa le Matagaluega a Tamaitai Talavou o la latou “Senior and Junior Cooperative Retrenchment Association” i le 1870. O lea na tulai mai ai le faalapotopotoga a Tamaitai Talavou ua i ai i le taimi nei. Sa faatulagaina le Peraimeri mo tamaiti i le 1878. I le amataga, sa vaavaaia ai e le Aualofa le galuega a nei faalapotopotoga i lalo o le taitaiga a taitai perisitua. I le 1880, na tuuina atu ai e Peresitene Ioane Teila, o le peresitene lona tolu o le Ekalesia, ia valaauga i se au peresitene aoao o le Aualofa, o se au peresitene aoao o Tamaitai Talavou, ma se au peresitene aoao o le Peraimeri, e tuueseese ai le galuega a nei faalapotopotoga e tolu.

Talu mai lava i lena taimi, o taitai pea e tamaitai o le Aualofa ma galulue i faalapotopotoga a Tamaitai Talavou ma le Peraimeri. Ua latou faamalolosia foi le tupulaga faia’e e ala i auaunaga i isi faalapotopotoga, e pei o le Aoga Sa ma seminare ma inisitituti.

Aga’i i Luma

O le toe faavaega o le Aualofa na oo atu ai i ni tiutetauave ua sili atu ma avanoa sili atu mo tamaitai o le Au Paia o Aso e Gata Ai. Na tautino mai e Eliza R. Snow:

“Tou te le o silasila ua faateleina la tatou uunaiga? O la tatou uunaiga o le faatinoga o le a faaauau pea ona faalauteleina, ma e leai se tamaitai o Siona e tatau ona faanoanoa ona ua vaiti naua lana uunaiga.

“Ia faamanuia outou e le Atua, o’u uso e, ma faamalosiauina outou, ina ia faatumulia outou i le malamalama, ma ia iloa e leai nisi mea tou te fiafia i ai ua na o le soifua manuia o Siona. Ia avea ma au uluai pisinisi le faatinoina o ou tiute i le aiga. Peitai, talu ai o outou o tausimea atamamai, o le a outou maua lava se taimi mo tiute faaagafesootai, aua ua i o tatou luga nei mea o ni afafine ma ni tina i Siona. O le saili atu e faatino ia tiute uma, o le a outou iloa ai le faateleina o lo outou mana, ma o le a outou maofa i mea e mafai ona outou faataunuuina.”⁴⁵

E mafai ona avea le faatinoga patino e Sister Snow o le faatuatua ma le vaai i le itu lelei, o se taiala mo le Au Paia uma o Aso e Gata Ai. “O le a ou agai i luma,” na ia saunoa ai. “O le a ou ataata i le matamataita o se afā fulifāō, ma folau atu ma le lē fefe ma le manumalo i le vasa sousou o le olaga … ma o le a faamumuina se lamepa o le ‘molimau ia Iesu’ o le a taialaina ai la’u vaaiga mamao e oo atu i le ulufalega i le tino ola pea.”⁴⁶

Fauga o le Malumalu o Sate Leki, 1877

Agavale i le taumatau: Elizabeth Ann Whitney, Emmeline B. Wells ma Eliza R. Snow

Sa aoaoina e Sister Eliza R. Snow ia uso o le Aualofa.

A tatalo taitoatasi uso o le Aualofa ma tatalo foi faatasi ma o latou aiga, e mafai ona latou maua musumusuga e taialaina ai i latou.

O se mafutaga a tina ma tamateine o le Au Paia o Aso e Gata Ai, 1893

“Fiafia i le afioga a Keriso” (2 Nifae 32:3).

O tamaitai i le popofou o le Aualofa, o loo seleseleina le silika pe tusa o le 1890

O se potu fono o le Aualofa, i le fogafale i luga a’e o se faleoloa i le Aai o Sate Leki, Iuta, 1892.

Tamaitai tausi soifua faauu o le LDS Hospital, vasega o le 1911

The Woman’s Exponent, o se nusipepa mo tamaitai o le Aualofa, sa lolomiina mai le 1872 i le 1914.

“O le a ou agai i luma. … O le ‘molimau ia Iesu’ o le a … taialaina ai la’u vaaiga mamao” (Eliza R. Snow).