Mataupu 9

“Leoleo o le Aiga”

Faavaeina, Faafailele, ma le Puipuia o le Aiga

I le aso 23 o Setema, 1995, na tulai ai Peresitene Gordon B. Hinckley, le Peresitene lona sefululima o le Ekalesia i luma o tamaitai o le Ekalesia i se sauniga aoao a le Aualofa. Sa ia faaalia le agaga faafetai mo le faatuatua ma le maelega o tamaitai o le Au Paia o Aso e Gata Ai—o ē talavou ma ē matutua, o ē ua faaipoipo ma ē nofofua, o ē ua i ai fanau ma ē leai ni fanau. I le faailoa ai o luitau matuia o loo latou feagai, sa ia ofo atu ai le faamalosiauga, fautuaga, ma lapataiga e fesoasoani ai ia i latou e faataunuu o latou tiutetauave ma ia maua le olioli i le olaga. I le taufaaiuiuga o lana saunoaga, na ia saunoa ai:

“Faatasi ai ma le tele o le tuusaoloto ua faaigoa faafoliga e faapea o mea moni, faatasi ai ma le tele o le taufaasese faatatau i faatulagaga faatonuina ma mea e faatauaina, faatasi ai ma le tele o faatauanauga ma faatosinaga ina ia talia lemu le pisia mai le lalolagi, ua matou lagonaina le tatau ona fautua atu ma lapataiina. I le faateleina o lenei tulaga, o i matou o le Au Peresitene Sili ma le Aufono a Aposetolo e Toasefululua ua tuuina atu nei se folafolaga i le Ekalesia ma le lalolagi o se faalauiloaga ma se toe faamautuina o tulaga faatonuina, aoaoga faavae, ma faatinoga e faatatau i le aiga ia ua faaleoina so’o atu e perofeta, tagatavaai, ma talifaaaliga a lenei ekalesia i le faagasologa o lona talafaasolopito.”¹ Ona ia faitauina lea o “O Le Aiga: O Se Folafolaga i le Lalolagi.” O le taimi muamua lenei ua faitau faalauaitele ai lenei folafolaga.

I totonu o le folafolaga, sa tautino mai ai e le Au Peresitene Sili ma le Korama a Aposetolo e Toasefululua e faapea “o le fiafia i le soifuaga faaleaiga e sili ona ausia pe a faavae i luga o aoaoga a le Alii o Iesu Keriso.” Sa latou “tautino mai ma le faamaoni o le faaipoipoga i le va o le tane ma le ava ua faauuina e le Atua ma o le aiga o le totonugalemu o le fuafuaga a le Foafoa mo le taunuuga faavavau o Lana fanau.” Ua latou faamanatu mai ai i tane ma ava lo latou “tiutetauave faamaoni ia alolofa ma popole le tasi mo le isi ma mo a latou fanau”²

E pei ona faamamafa mai e le ulutala o le folafolaga, sa lolomiina “O Se Folafolaga i le Lalolagi”—e faamanatu ai i tagata uma, e aofia ai ma taitai o malo, le taua e faavavau o le aiga. E valu masina talu ona tuuina mai le folafolaga, ae saunoa Peresitene Hinckley i se fonotaga a le au tusitala i Tokyo, Iapani. Na fai mai a ia: “Aisea ua i ai lenei folafolaga i aiga i le taimi nei? Aua ua osofaia le aiga. Ua malepelepe aiga i le lalolagi atoa. O le nofoaga e amata ona faaleleia ai nuu, o le aiga. O le tele lava, e faia e tamaiti mea e aoaoina ai i latou. O loo tatou taumafai e faia ia avea le lalolagi ma nofoaga e sili atu e ala lea i le faia ia malosi atu le aiga.”³

O loo faaalia i molimau a tuafafine o le Aualofa e faapea e le gata o se folafolaga i le lalolagi atoa, ae o lenei faamatalaga o aoaoga faavae e i ai le uiga mo aiga taitasi ma tagata taitoatasi i le Ekalesia. O mataupu faavae i le folafolaga ua pa’i atu i loto o tuafafine i tulaga uma.

O Sister Barbara Thompson, lea sa valaauina mulimuli ane e avea ma se fesoasoani i le au peresitene aoao o le Aualofa, sa i ai i le Tapeneko i Sate Leki ina ua faitauina e Peresitene Hinckley le folafolaga iina. “O se sauniga maoae lena,” sa ia tomanatu ai. “Sa ou lagonaina le taua o le savali. Sa ou mafaufau foi lava a’u ia, ‘O se taiala sili lenei mo matua. O se tiutetauave tele foi mo matua.’ Sa ou mafaufau mo sina minute e faapea, e le i faatatau tele ia te au talu ai ou te le’i faaipoipo ma e leai sa’u fanau. Peitai, sa vave ona ou mafaufau, ‘Ae e faatatau ia te au. O au o se tasi o se aiga. O au o se afafine, o se uso, o se uso o se tina po o se tuafafine o se tama, o se tausoga, o se tei, ma se afafine o se atalii po o se afafine. E i ai o’u tiutetauave—ma faamanuiaga—aua o au o se tasi o se aiga. Tusa pe na o a’u le tagata o lo’u aiga, o a’u lava o se tasi o le aiga o le Atua, ma e i ai lo’u tiutetauave e fesoasoani ai e faamalolosia isi aiga.’”⁴

O Sister Bonnie D. Parkin, o lē na avea mulimuli ane ma peresitene aoao lona sefulufa o le Aualofa, sa i ai foi i le Tapeneko ina ua faitauina e Peresitene Hinckley le folafolaga. Sa ia toe ta’ua: “Sa sāō le potopotoga ae sa i ai foi le lagona o le faagaeetia, o se tali o le ‘Ioe—matou te manaomia le fesoasoani mo o matou aiga!’ Ou te manatua le lagona, e matua sa’olele. Sa tafe ifo loimata i o’u alafau. A o ou tilotilo atu i uso sa nonofo i o’u tafatafa, sa foliga mai o o latou lagona foi na. Sa matua tele mea i le folafolaga ma sa le mafai ona ou faatali se’i maua se kopi e suesue ai. Sa faamautu mai e le folafolaga le mamalu o tamaitai. Ae toe mafaufau foi na muamua tuuina mai i tamaitai o le Ekalesia i le sauniga aoao a le Aualofa.”⁵

Aisea na filifili ai le Au Peresitene Sili e fofogaina le folafolaga i aiga i se sauniga aoao a le Aualofa? Ina ua uma ona faitauina e Peresitene Hinkley, sa ia tuuina mai se tali i lena fesili. “O outou o leoleo o le aiga,” na ia saunoa atu ai i tuafafine. “O outou e fanauina fanau. O outou o e faafaileleina i latou ma amatalia i totonu o i latou ia mausa o o latou olaga. E leai lava se isi galuega e latalata tele atu i le paia a’ia’i e pei o le faafaileleina o atalii ma afafine o le Atua.”⁶

Sa faaopoopo mai e Peresitene James E. Faust, le fesoasoani lua o Peresitene Hinckley, le faamatalaga lea: “Talu ai o outou tina o le fatu ma le loto o soo se aiga, o lea sa talafeagai ai ona uluai faitauina [le folafolaga] i le sauniga aoao a le Aualofa.”⁷

O Se “Toefaamautuina o Tulaga Faatonuina, Aoaoga Faavae, ma Faiga”

O aoaoga i le folafolaga i aiga e le o se mea fou i le 1995. E pei ona sa ta’ua ai e Peresitene Hinckley, o se “toefaamautuina o tulaga faatonuina, aoaoga faavae, ma faiga.”⁸ O mea lava sa “totonugalemu i le fuafuaga a le Foafoa” a o lei foafoaina e Ia le lalolagi.⁹

Na aoao mai e Sister Julie B. Beck o le peresitene aoao lona sefululima o le Aualofa: “I Le Ekalesia a Iesu Keriso o le Au Paia o Aso e Gata Ai, e i ai sa tatou mataupu silisili e uiga i le aiga e faavae i le Foafoaga, o le Pau, ma le Togiola. O le Foafoaga o le lalolagi sa saunia ai se nofoaga e mafai ona nonofo ai aiga. … O le Pau na saunia ai se ala mo le tuputupu ae o le aiga. … O le Togiola e mafai ai e le aiga ona faamau faatasi e faavavau.”¹⁰

O alii ma tamaitai faatuatua ua latou faamaoni i lenei mataupu silisili e uiga i le aiga ma mulimuli ai i nei tulaga faatonuina, o aoaoga faavae, ma faiga i soo se taimi e i ai le talalelei i le lalolagi. “O lo tatou Tina [mamalu] o Eva” ma lo tatou “Tama o Atamu” o taitai o a la’ua fanau, e aoaoina i latou i “le olioli o le togiola ma le ola faavavau lea e tuuina mai e le Atua ia i latou uma e usiusitai.”¹¹ Sa faamautinoa e Repeka ma Isaako o le a lē leiloloa feagaiga o le perisitua ma faamanuiaga mo lo la’ua aiga.¹² Sa mafai e se fafine Sarefata ua oti lana tane ona tausia lana tama aua sa i ai lona faatuatua e mulimuli i le perofeta o Elia.¹³ Sa tau malolosi ia le autau talavou e luaafe onosefulu e puipuia o latou aiga, ma lo latou talitonuga i le folafolaga a o latou tina “o le a laveaiina i latou e le Atua.”¹⁴ A o avea o se alii talavou, na “tupu le poto ma le tino [o Iesu Keriso], ua alofagia o ia e le Atua atoa ma tagata,” sa faafaileleina i le alofa ma le manatu popole o Lona tina, o Maria, ma lana tane o Iosefa.¹⁵

I le toefuataiga mai o le talalelei, sa faateleina ai e uluai tagata o le Ekalesia lo latou malamalama i le taua o le aiga.¹⁶ Sa aoaoina e le Au Paia e faapea, o le mana o le perisitua latou te mafai ai ona maua sauniga ma feagaiga o le malumalu o le a fusia faatasi ai o latou aiga e faavavau. O lenei folafolaga na faamalolosia ai le Au Paia o Aso e Gata Ai i le faataunuuina o a latou matafaioi o ni atalii ma ni afafine o le Atua.

Sa faamalosiauina e uluai taitai o le Aualofa ia tamaitai ina ia faia o latou aiga o se taulaiga tutotonu i o latou olaga. O Sister Eliza R. Snow, le peresitene aoao lona lua o le Aualofa, e le’i i ai sana lava fanau. Ae ui o lea, sa ia silafia le taua o le uunaiga a se tina. Sa ia fautuaina uso o le Aualofa, “Ia avea ma a outou pisinisi muamua le faatino o outou tiute i le fale.”¹⁷ Sa aoaoina ia tuafafine e Sister Zina D. H. Young, le peresitene aoao lona tolu o le Aualofa, ina ia “avea le aiga ma totonugalemu o le mataaga, lea o le a nofo ai le agaga o le alofa, filemu ma le lotogatasi, ma nofotumau ai le alofa moni matagofie lea e le mafaufau lava i se mea e leaga.”¹⁸

Sa faatuina e Mary Filitia Samita se faataitaiga o se tina malosi, ma alofa. Sa toe ta’ua e lana tama o Iosefa F. Samita, o lē sa avea ma Peresitene lona ono o le Ekalesia:

“E mafai ona ou manatuaina aso o lo’u tina i Navu. Ou te manatuaina lo’u vaai atu ia te ia ma lana fanau ua le iloa se mea a fai, a o faatopetope atu i se vaa mafolafola, faatasi ma ni mea sa mafai ona ia aumaia mai le fale i le amataga o le osofaiga o le aai o Navu e tagata faatupu faalavelave. Ou te manatua ia faigata o le Ekalesia iina ma le agai atu i Uinita Kuota, le vaitafe o Misuri, ma lana tatalo mo lana fanau ma le aiga i le taimi o lana malaga faigata. … E mafai ona ou manatuaina tofotofoga uma na tutupu i a matou taumafaiga e masi’i atu ma le Tolauapiga a Isaraelu, e o mai ai i nei vanu o atumauga e aunoa ma ni miula tosouta e tosoina a matou taavaletoso; ma ona o le leai o na mea e tatau ai, o lea sa ia faatausoaina ai ana povi ma tama’ipovi, ma nonoa faatasi i ai taavaletoso e lua, ma amata ai ona matou o mai i Iuta i lenei tulaga faigata ma le matautia ae sa fai mai lo’u tina—‘O le a tatala mai e le Alii le ala;’ ae pe faapefea ona Ia tatalaina le ala, sa leai se tasi na te iloaina. O le taimi lena o o’u laitiiti, ma sa ou aveina le ‘autoso ma sa ou faia la’u vaega o le galuega. Ou te manatua lo’u maua atu o ia o tatalo faalilolilo i le Atua ina ia mafai e ia ona faataunuu lana misiona. Pe tou te le manatu ea ua faia e nei mea se ata vaaia i le mafaufau? Pe tou te manatu e mafai ona galo ia te au le faataitaiga a lo’u tina? E leai; o le a mumu pea i lo’u mafaufau lona faatuatua ma ana faataitaiga. O le a so’u manatu! O manava uma ou te manavaina, o lagona uma o lo’u agaga e avatu i le Atua i le agaga faafetai ia te Ia ona o lo’u tina o se tagata e Paia, o ia o se tamaitai o le Atua, e mama a’ia’i ma faatuatua, ma sa sili ia te ia le oti nai lo le faafitia o le faatuatuaga na tuuina atu ia te ia; e sili atu ia te ia le mativa ma le mafatia i le vao ma taumafai e tuufaatasia lona aiga nai lo lona nofo ai pea i Papelonia. O le agaga lena sa faatumulia ai o ia ma lana fanau.”¹⁹

O Tiutetauave Faaletino ma Matafaioi Faavavau

I se tulaga e ogatusa ma mataupu faavae e lē masuia o le natura paia o le aiga ma le auaiga, e fesoasoani ia korama o le Perisitua Mekisateko e faataunuu o latou tiutetauave o ni atalii, uso, tane, ma tamā. E fesoasoani tamaitai o le Aualofa e faataunuu o latou tiutetauave o ni afafine, uso, ava, ma tina. E lagolagoina i taimi uma e uso o le Aualofa o le tasi ma le isi i taumafaiga e faamalolosia ai aiga, aoao ia tomai faatino e faaleleia atili ai o latou aiga, ma faia o latou aiga o ni nofoaga e mafai ona mau ai le Agaga.

Faafaileleina o Aiga

O Sister Zina D. H. Young o se tina alofa, ma tomai e faafailele, ma sa ia aoaoina uso o le Aualofa i mataupu faavae sa taialaina o ia i ana taumafaiga i le fale. Sa ia fautuaina mai: “Afai e i ai se tina o i ai iinei na te le aoao atu ma faatonuina lelei lana fanau, … ou te aioi atu ia te oe ia faia lena mea. Faapotopoto ane lau fanau ia te oe … ma tatalo faatasi ma i latou. … Lapata’i le fanau e uiga i mea leaga o loo siomia ai i tatou … ina ia le aafia i latou i nei mea leaga, ae ola a’e i le paia ma le mama a’ia’i i luma o le Alii.”²⁰ Sa ia aoao mai foi: “Ia maelega i tiute uma o le olaga, o ni tina ma ava. … Ia tatou faaeteete ia tautala atu ma le poto i luma o a tatou fanau, ia taumamao mai le va’iliili masei, … ma ia atiina ae uiga paia sili o o tatou natura, ia o le a siitia ai, faaleleia ai ma faamama ai le loto. … E tatau ona tatou taliaina tiga aupito maualuga e aoao ai le fanau a Siona ina ia faamaoni, amio mama, amiotonu ma aua ne’i tuai i o latou tiute uma; ia sogasogā foi ma tausia le aso Sapati ia paia. … E le tatau i tina ona tautala i luma o le fanau i se upu e tauleagaina ai mea e sili ona fiafia i ai le tamā, aua o i latou o ni tagata e matau mea. Ia toto ni fatu lelei i o latou mafaufau lelei ma le mu’amu’a, ma ia faamuamua i taimi uma ia mataupu faavae nai lo aiaiga, o le a outou tolo’a’i ai oa i le lagi.”²¹

A o avea Sister Bathsheba W. Smith ma peresitene aoao lona fa o le Aualofa, sa ia vaaia se tulaga manaomia o le faamalolosia o aiga, ma o lea sa ia faavaeina ai lesona o aoaoga a tina mo uso o le Aualofa. O lesona sa aofia ai fautuaga e uiga i le faaipoipoga, tausiga o tina maitaga, ma le tausiga o fanau. O nei lesona sa lagolagoina ai ia aoaoga a Peresitene Iosefa F. Samita e uiga i le fesoasoani o le Aualofa i tamaitai i a latou matafaioi i le aiga:

“Soo se mea lava e i ai le valea po o le le lava o le malamalama e faatatau i le aiga, tiute o le aiga, faatatau i matafaioi e tatau ona i ai ma e i ai moni i le va o le tane ma le ava ma le va o matua ma fanau, o iina e i ai lenei faalapotopotoga pe latalata ane foi i ai, ma e ala i faamanuiaga faalenatura ma musumusuga e ō lenei faalapotopotoga ua latou tapena ai ma saunia e tuuina atu ia faatonuga faatasi ma faasinoga i na tiute taua. O le mea o i ai se tina talavou, e le o i ai le poto masani e tatau ona ia faafaileleina ai ma tausia ai lana tama, pe faia foi ia avea lona fale ma nofoaga fiafia ma mata’ina ma manaomia mo ia ma lona toalua, o iina e i ai lenei faalapotopoga, i nisi vaega o le faalapotopotoga, e tuuina atu faatonuga i lena tina talavou, ma fesoasoani ai ia te ia e faia lelei ona tiute. Ma po o fea lava e le o i ai se poto masani e faatautaia ai meaai masani ma le faafaileleina lelei o tamaiti, po o le mea o loo tatau ai ona tuuina atu aoaoga faaleagaga ma meaai faaleagaga i le fanau, o loo i ai i latou i faalapotopotoga sili o le Aualofa a Tamaitai o Le Ekalesia a Iesu Keriso o le Au Paia o Aso e Gata Ai ma faalapotopotoga o tina ma afafine o Siona, ē ua faaauupegaina mo le tuuina atu o na faatonuga.”²²

O le tomai e faafailele ai ua le na o tamaitai ua fai a latou lava fanau e faatatau i ai. Sa matauina e Sister Sheri L. Dew: “Ona o ni mafuaaga ua silafia e le Alii, o lea ua i ai ni nai tamaitai ua moomia ona faatalitali mo ni fanau. O lenei faatuai e le faigofie mo tamaitai amiotonu. Peitai, o le taimi faatulagaina a le Alii mo i tatou taitoatasi, e lē aveesea ai lo tatou lava natura masani e faafailele ai ma alolofa. O lona uiga o nisi o i tatou, e tatau ona sailia isi auala e avea ai o se tina. Ma o loo vagaia i tatou e i latou o loo manaomia ona alofagia ma taitai.”²³

Ua i ai i tuafafine i le Ekalesia ia avanoa e faafailele ai pe a latou mauaina valaauga e avea ai o ni taitai ma faiaoga, ma pe a avea i latou o ni faiaoga asiasi. O nisi tuafafine latou te tuuina atu le alofa faatina ma uunaiga mo fanau latou te lei fanauina. O tuafafine nofofua e tele taimi latou te taulamua i na ituaiga taumafaiga, e faamanuia ai olaga o fanau o ē o loo manaomia le uunaiga a tamaitai amiotonu. O nisi taimi e faaauau ai lenei faafailelega mo aso, vaiaso, ma tausaga. O le auaunaga e lē manatu faapito ma le faatuatua o le tagata lava ia, ua laveaiina ai e tamaitai le toatele o fanau mai tulaga lamatia faalelagona, faaleagaga, ma le faaletino.

Faia o le Aiga o se Totonugalemu o le Malosiaga

Talu mai uluai aso o le Aualofa i Navu, Ilinoi, o faapotopoto ia tuafafine e aoao e uiga i o latou tiutetauave o le agaalofa ma faatino. Ua latou faatinoina tomai e fesoasoani ai ia i latou e faateleina le faatuatua ma le amiotonu patino, faamalolosia o latou aiga ma avea o latou aiga o totonugalemu o le malosiaga faaleagaga, ma fesoasoani ia i latou o e le tagolima. Ua latou faaaogaina mataupu faavae o le ola faautauta ma le ola faalagolago o le tagata ia te ia lava i le faaleagaga ma le faaletino. Ua latou faateleina i le usoga faatamaitai ma le lotogatasi, a o latou aoaoina e le tasi le isi ma auauna atu faatasi. O lenei aoaoga ua faamanuiaina ai tuafafine o tulaga uma. Sa faamatala e Sister Bonnie D. Parkin i le auala na malosi ai o ia ona o nei fonotaga:

“I le avea ai ma sui auai o le Aualofa a Le Ekalesia a Iesu Keriso o le Au Paia o Aso e Gata Ai, o lo tatou faamanuiaga ma lo tatou tiutetauave le faafaileleina ma lagolago le iunite faaleaiga. O tagata uma o se itutino o se aiga, ma e manaomia e aiga uma le faamalolosia ma puipuia.

“O la’u fesoasoani aupito sili i le avea ai ma se tausiaiga, na maua muamua mai lo’u lava tina ma lo’u tinamatua ma sosoo ai ma uso o le Aualofa i uarota eseese sa matou nonofo ai. Sa ou aoaoina tomai; sa ou vaai i le olioli e maua mai i le fatuina o se aiga e mananao isi ia i ai. … Taitai o Aualofa, fai ia mautinoa o fonotaga ma gaoioiga tou te fuafuaina o le a faamalolosia ai aiga o o outou uso uma.”²⁴

Sa faamanatu mai e Sister Barbara W. Winder, le peresitene aoao lona sefulutasi o le Aualofa, i tamaitai ia faamanuiaga faaleagaga latou te maua pe a latou faatumauina le mama ma le faatulagaina lelei o o latou aiga: “O loo i ai se faatufugaga o le a avea ma se tausiaiga. Mo i tatou lava ma o tatou aiga, e taua le i ai o so tatou sulufaiga—se nofoaga e sulufai i ai mai le lalolagi lea tatou te maua ai le mafanafana, ma afai foi e o mai i ai isi, e mafai foi ona latou maua ai le mafanafana.”²⁵

E avea uso taitasi ma le Aualofa tuufaatasi o ni faataitaiga i le tasi ma le isi i taumafaiga e faamalolosia aiga ma auaiga. Na faasoa mai e Sister Belle S. Spafford, le peresitene aoao lona iva o le Aualofa, lana molimau e uiga i le faapogai paia o le Aualofa ma lana matafaioi e fesoasoani i tamaitai e faataunuu a latou matafaioi o ni ava ma ni tina. “Ou te manatu e i ai se uunaiga maoae mo le lelei i le aiga,” na ia saunoa ai. “Afai e i ai i se tagata se tina lelei, ua i ai foi lona aiga lelei, ma afai e i ai sona tina lelei i le Aualofa, e mafai ona faamautinoa ia te ia le poto ma se uunaiga lelei o le a faatumulia ai le aiga.”²⁶

Ua i ai i tuafafine uma le tiutetauave e faafailelei ai, pe avea ai o se “tina.” Na aoao mai e Elder M. Russell Ballard o le Korama a Aposetolo e Toasefululua: “Tuafafine, o i matou, o o outou tuagane, e le mafai ona matou faia le mea sa atofaina outou i le lagi tou te faia mai lava a o lei faavaeina le lalolagi. E mafai ona matou taumafai, ae e le mafai lava ona matou faamoemoe e faaluaina a outou meaalofa tulaga ese. E leai se mea i lenei lalolagi e patino, e tusa lona faafailelega, pe suia ai le olaga nai lo le uunaiga a se tamaitai amiotonu. … Ua i ai i tamaitai uma i o latou natura paia le taleni e fanau mai lava ma ia ma le tiutetauave e tausia ai ma vaaia.”²⁷

O le upu o le tulagafaatina e faamatala ai matafaioi faavavau a tamaitai; e faamatala ai lo latou natura o ni ē e faafaileleina. Faafailelei o se upu e ‘oa. O lona uiga o le toleni, faiaoga, a’otauina, faalautele le atina’ega, siitia le tuputupu a’e, ma faafailele pe fafaga. Ua tuuina i tamaitai le avanoa sili ma le tiutetauave e faafailele ai nei uiga uma o le upu, ma o le Aualofa ua i ai le tiutetauave e aoao ai ma lagolago ia tamaitai i a latou matafaioi na faauuina faalelagi, ma le taua tele o ni tina ma ni ē faafaileleina.²⁸

Na aoao mai Sister Julie B. Beck e uiga i le matafaioi o le faafaileleina: “O le faafailele o lona uiga o le atiina ae, vaavaai, ma fai ia ola. O le mea lea, e [tatau] i tina ona fatuina se siosiomaga mo le tuputupu a’e faaleagaga ma le faaletino i o latou aiga. O se isi upu mo le faafaileleina o le tausiaiga. O le tausiaiga e aofia ai le kuka, tataina o lavalava ma fufulu ipu, ma tausia se aiga e faatulagaina lelei. O le fale o se nofoaga e i ai tamaitai le mana ma le uunaiga aupito sili; o le mea lea, e tatau i tamaitai o le Au Paia o Aso e Gata Ai ona avea ma tausiaiga silisili i le lalolagi. O galulue i autafa o le fanau i feau faatausiaiga e maua ai avanoa e aoao ai ma faata’ita’i ia uiga auau mama e tatau ona faata’ita’ia e le fanau. O tina faafailele e silafia lelei, ae o po o a a’oa’oga uma e maua e tina, o le a leai sa latou mea e maua ai pe afai latou te le maua le tomai e faia ai se aiga e maua ai se siosiomaga mo le tuputupu a’e faaleagaga. … O le faafailele e manaomia ai le faatulagaina, onosai, alofa, ma le galue. O le fesoasoani i le tuputupu a’e e tulai mai e ala i le faafaileleina o se matafaioi moni e mamana ma uunai ai ua faaee atu i tamaitai.”²⁹

Puipuia o le Aiga ma le Tulaga Faatina

E le gata i le faamalolosia o aiga mai totonu, ae ua saunia foi e le Aualofa se puipuiga e lē mataofia mai uunaiga e osofaia le aiga mai fafo. Na saunoa Peresitene Howard W. Hunter, le Peresitene lona sefulufa o le Ekalesia:

“E foliga mai ia te au o loo i ai se tulaga manaomia tele e aumai faatasi ia tamaitai o le Ekalesia ina ia tutu faatasi ma tutu atu mo le Usoga i le taofiga o le tai fana’e o le amioleaga ua siosiomia ai i tatou, ma le tuleia i luma o le galuega a lo tatou Faaola. …

“… O lea matou te augani atu ai ia te outou ina ia auauna atu ma le uunaiga mamana mo le lelei i le faamalolosia o o tatou aiga; la tatou ekalesia, ma o tatou nuu.”³⁰

E tautalagia pea lava pea e taitai o le Aualofa e tetee i taumafaiga e faavaivaia ai le aiga masani ma ta’ufaatauvaaina ai matafaioi paia a le avā ma le tina. Sa faamamafa mai e Sister Amy Brown Lyman, o le peresitene aoao lona valu o le Aualofa, le manaomia ona mafuta o tina ma a latou fanau. Sa avea o ia ma peresitene i le taimi o le Taua Lona Lua o le Lalolagi, o se taimi sa faamalosiauina ai e taitai faalemalo ma faalenuu ia tuafafine e faigaluega i fafo mai o o latou aiga ia lagolago ai le tamaoaiga o lo latou lotoifale a o i ai o latou taitoalua i le taua. O nisi o tuafafine, na manaomia ona galulue i fafo mai o o latou aiga, e saunia ai mea e tatau ai o le olaga mo o latou aiga. E ui lava ina sa faailoa atu e Sister Lyman nei luitau, ae sa ia faamalosiauina lava tamaitai ia faia mea uma latou te mafaia, ina ia nonofo ai i o latou aiga ma aoao a latou fanau.

Na ogatusa lava savali a Sister Lyman ma aoaoga a le Au Peresitene Sili, o ē sa latou faamanatu maia i tagata o le Ekalesia le “tautinoga paia” o le tulaga faatina.³¹ Na tautino mai e Peresitene Heber J. Grant, le Peresitene lona fitu o le Ekalesia, ma ona fesoasoani, o Peresitene J. Reuben Clark Jr. ma Tavita O. MaKei:

“O le tulaga faatina e latalata atu i le faaleatua. O le auaunaga e aupito maualuga, paia e tauaveina e le tagata. E tuuina ai o ia o lē e faamamaluina lona valaauga paia ma le auaunaga e pito atu i agelu. Ia te outou tina o Isaraelu, matou te faapea atu ia faamanuia ma puipuia outou e le Atua, ma avatu ia te outou le malosi ma le lotototoa, le faatuatua ma le malamalama, le alofa paia ma le faapaiaga i le tiute, lea o le a mafai ai e outou ona faatumu i le fuataga aupito atoatoa le valaauga paia lea ua fai mo outou. Ia te outou tina ma i latou o le a avea ma tina i se aso, matou te faapea atu: Ia ola mama, ia tausisia le atoatoa, ola amiotonu, ina ia ta’u faamanūina outou e a outou fanau seia oo i le toe augatupulaga.”³²

I le tele o tausaga na mulimuli mai i le Taua Lona Lua a le Lalolagi, sa matua faateleina ai uunaiga leaga i aiga ma auaiga. Ina ua vaetofia e Peresitene Spencer W. Kimball, o le peresitene aoao lona sefululua o le Ekalesia ia Sister Barbara B. Smith e avea ma peresitene lona sefulu o le Aualofa, sa lagona e Sister Smith “se uunaiga maoae o le tiutetauave … e puipuia le aiga ma le paaga a le tamaitai i lena li’o paia faaleaiga.”³³ I le taimi atoa o lana au peresitene, sa ia puipuia ai upumoni sa faaalia e uiga i matafaioi paia a tamaitai ma le faamanuiaga o aiga faavavau. A o suesue ma le maelega e ia ma ona fesoasoani ma taitai perisitua ia faafitauli faaagafesootai o o latou taimi, sa latou mauaina ai o taumafaiga sa faalauiloa e le toatele, o le a le puipuia ai avanoa o tamaitai ia latou matafaioi o ni ava ma ni tina ma o le a faavaivaia ai aiga.

Sa aoteleina e se failipoti o se nusipepa le savali faifai pea a Sister Smith: “‘Ia manatua o outou natura paia, o outou o ava, o tina, ma tausiaiga. Tou te foafoaina le ola ma faamauoaina. Aua nei outou faatauina lena malosiaga tele mo mea faata’eta’ealuga faavavave. Faapelepele i ai, faalautele, ma faateleina. Ua outou umia se tofi silisiliese.’ O le savali lena a le taitai o tamaitai Mamona, o Barbara B. Smith.”³⁴

Ua faateleina le osofaiga o le paia o le tulaga faatina ma le aiga talu mai lava taimi o le au peresitene a Sister Smith. Peitai, o le faatuatua i le Atua ma se malamalama i le taua e faavavau o o latou tiutetauave, ua faaauau ai e tuafafine o le Aualofa o augatupulaga uma ona umia ma puipuia upumoni e faamalolosia ai aiga ma auaiga. Latou te leoleoina le paia o le aiga ma le tele o matafaioi eseese: o ni tina ma ni tinamatutua, o ni afafine ma uso, o ni uso o tina ma tuafafine o tama, o ni faiaoga ma taitai i le Ekalesia. Soo se taimi e faamalosia ai e se tamaitai le faatuatua o se tamaitiiti, ua ia saofagā i le malosi o se aiga—i le taimi nei ma le lumanai.

O Aoaoga a Perofeta o Aso e Gata Ai e uiga i le Aiga

Sa fesili se tamā ma se tina i le la fanau po o le a se mea sa latou fiafia i ai e uiga i se konafesi aoao na se’i mavae atu. Fai mai lo la afafine e 16 tausaga le matua: “Sa ou fiafia lava i ai! Sa ou fiafia e faalogologo i perofeta ma taitai musuia, atamamai o latou lagolagoina le tulaga faatina.” I ona lagona o’oo’o, sa manao pea lava pea lenei tamaitai talavou e fia avea ma se tina, peitai sa popole o ia faapea ua le o manaomia le tulaga faatina ma ua ta’ufaatauvaaina e le tele o tagata i le lalolagi. Sa faamafanafanaina o ia ina ua ia faalogo atu i perofeta ma aposetolo o latou lagolagoina le lelei o ona lagona maualuga.³⁵ O le galuega a le Aualofa e faamalolosia aiga ma le auaiga, e ogatasi i taimi uma ma aoaoga a perofeta o aso e gata ai.

E tele ina aoao mai e Peresitene Tavita O. MaKei, le perofeta lona iva o le Ekalesia e faapea “e leai se isi manuia e mafai ona foia ai le toilalo i totonu o le aiga.”³⁶

Sa fautua mai foi faapena ia Peresitene Harold B. Lee, le Peresitene lona sefulutasi o le Ekalesia, “O le galuega aupito taua a le Alii o le a outou faia, o totonu lea o puipui o o outou lava aiga.”³⁷

I le popole ai e uiga i osofaiga faifai pea i le aiga, sa valoia ai ma lapataia e Peresitene Spencer W. Kimball:

“O le tele o faigata masani na fesoasoani i aso ua mavae e faamalosia ma lagolago ai le aiga ua mou atu ma ua leai. E i ai le taimi e na o i latou lava e talitonu aiai i le aiga o le a faasaoina o latou aiga i le lotolotoi o le amioleaga ua lofia ai i tatou.

“… E i ai i latou e faauigaina le aiga i se auala e le masani ai o le a pei ai e le o i ai ni aiga. …

“E ui i tagata uma a o i tatou, … e le tatau ona tatou toilalo i finauga pepelo e faapea o le aiga ua noatia i se vaega faapitoa o le atiina ae o loo aafia ai sosaiete i le olaga nei. Tatou te saoloto e tetee atu i na aga e le faatauaina ai le taua o le aiga ae faataua ai tagata manatu faapito. Ua tatou iloa o le a faavavau le aiga. Ua tatou iloa a oo ina faaletonu mea i le aiga, o le a faaletonu foi mea i isi faatulagaga lautele.”³⁸

Faatasi ai ma nei lapataiga matuia, ua faasoa mai foi e perofeta o aso e gata ai ia upu o le faamoemoe mo matua faamaoni o ē ua o ese atu fanau mai le ala o le talalelei. Na saunoa Peresitene James E. Faust: “Mo na matua lotonutimomoia o ē sa amiotonu, maelega, ma lototatalo i le aoaoina o a latou fanau lē usiusitai, matou te fai atu ia te outou, o loo vaavaaia i latou e le Leoleo Mamoe Lelei. Ua silafia ma malamalama le Atua i lo outou faanoanoa loloto. O loo i ai le faamoemoe.”³⁹

Sa faaalia e Peresitene Gordon B. Hinckley lona talitonuga e faapea o tamaitai o le Au Paia o Aso e Gata Ai, ua faamalolosia e la latou mafutaga i le Aualofa, e mafai ona fesoasoani i o latou aiga e tatalia osofaiga i le aiga. Sa ia faamamafaina mai e faapea o tuafafine o le Aualofa e mafai ona tutu faatasi i le puipuiga o le aiga.

“E matuai taua lava le tutu mausali o tamaitai o le Ekalesia mo le mea sa’o ma tonu e tusa ma le fuafuaga a le Alii. Ua faatalitonuina au e leai se isi faalapotopotoga i se isi mea e tutusa ma le Aualofa a lenei Ekalesia. … Afai latou te tutu faatasi ma tautala atu i le leo e tasi, o le a lē mafuatiaina lo latou malosi.

“Matou te valaau atu i tamaitai o le Ekalesia ina ia tutu faatasi mo le amiotonu. E tatau ona latou amataina i totonu o o latou lava fale. E mafai ona latou aoaoina atu i totonu o a latou vasega. E mafai ona latou faaleoina atu i totonu o o latou afioaga ma alalafaga.”

“E tatau ona avea i latou ma faiaoga ma leoleo o a latou tama teine. O na afafine e tatau ona aoaoina i le Peraimeri ma vasega a Tamaitai Talavou ia uiga faatauaina a Le Ekalesia a Iesu Keriso o le Au Paia o Aso e Gata Ai. A e laveaiina se teineitiiti, ua e laveaiina augatupulaga. O le a ola a’e o ia i le malosi ma le amiotonu. O le a faaipoipo o ia i le maota o le Alii. O le a faiaoga o ia i lana fanau i ala o le upumoni. O le a latou savavali i ona ala ma o le a faapena foi ona latou faiaoga i a latou fanau. O le a i ai iina tina matutua ofoofogia e tuuina atu le faamalosiauga.”⁴⁰

“O Ni Tepa i le Lagi”

Sa fesili se tagata ia Peresitene Spencer W. Kimball, “Pe na e oo ea i le lagi?” I le tali atu i lenei fesili, sa fai atu ai Peresitene Kimball e faapea sa ia tepa i le lagi i le aso tonu lava lea sa ia faatinoina ai le faamauga o se ulugalii, o se tasi o i la’ua o le toe tagata o se fanau e toa 8 sa mauaina lenei sauniga paia. “Sa i ai iina ē loto mama,” sa saunoa ai Peresitene Kimball. “Sa i ai le lagi iina. Sa ia faamatalaina se taimi na ia tepa ai i le lagi i se maota o se peresitene le siteki. Sa laitiiti le fale, ae sa telē le aiga. Sa galulue faatasi le fanau e seti le laulau, ma sa faia e se tamaitiiti laitiiti se tatalo na o’o ifo i le loto a o lei faia le meaai. Fai mai Peresitene Kimball sa ia tepa i le lagi ina ua ia talanoa i se ulugalii sa le’i i ai sa la’ua lava fanau, ae sa la “faatumuina lo latou fale” i tamaiti matuaoti e 18. Sa ia faamatalaina isi aafiaga na ia tepa ai i le lagi i olaga o le Au Paia o Aso e Gata Ai sa faamaoni, o ē sa faaalia a latou molimau i a latou upu ma a latou taga fai. “O le lagi o se nofoaga,” na aoao mai ai Peresitene Kimball, “ae o se tuutuuga foi; o se fale ma se aiga. O le malamalama lea i le agalelei. O se gaoioiga felagolagomai ma le le manatu faapito. O le ola filemu, ma le faautauta; ositaulaga patino, agalelei moni, manatu popole ma le loto mo isi. O le ola ai i poloaiga a le Atua e aunoa ma le faalialiavale po o le pepelo. O le le manatu faapito. O mea uma lava e uiga ia i tatou. Ioe, lo’u uso pele, ua tele taimi ou te tepa ai i le lagi.”⁴¹

I le lalolagi atoa, ua latalata atu tuafafine o le Aualofa ma o latou aiga i le lagi i le ala ua latou ola ai.

Sa tausia e se tuafafine i le Iunaite Setete lona tina o le a maliu mo le 3 tausaga. A o lei atoa se tausaga mulimuli ane, sa amata ona alia’e mai se tulaga faaletonu uiga ese i lana tama teine. Sa tausia e lenei tina tuuto lana tama teine i aso uma mo tausaga e 10 seia oo lava ina maliu le tamaitai talavou i le 17 o ona tausaga.

O se tina nofofua i Toga sa i ai sona fale faatauvaa, lea sa ia faafaileleina ai se fanau toatele. O lona faanaunauga aupito sili ia auauna lana fanau tama ma le fanau teine i le Alii ma ia faaleleia o latou olaga. Ina ia ogatusa ma nei faamuamua, sa ia fesoasoani ai i lana fanau e faavae ni mamanu faaletalalelei i o latou olaga. I lalo o lana taitaiga, sa lelei a latou a’oga. Sa latou tatalo, suesue i tusitusiga paia, galulue, ma tapuai faatasi.

E i ai se tuafafine i le Iunaite Setete e toa 8 lana fanau e i lalo ifo o le ta’i 14 tausaga. O aso uma lava sa i ai se luitau faaletino, faalemafaufau, faaleagaga, faaleatamai, ma faalelagona mo ia, ae sa ia tausia taulimaina mea tonu. Sa ia lagolagoina lona toalua i lana auaunaga i le Ekalesia ma ana taumafaiga e tausia lo latou aiga. Sa la tatalo faatasi mo tamaiti taitoatasi ma mafaufau loloto i auala e fesoasoani ai ia i latou taitoatasi ia agai i luma i o latou tiutetauave ma sini faaletagata lava ia. I lona aiga, o le aofaiga o kuka, faafoeina, mafaufau, ma tatalo sa maoae mo lenei tuafafine. E le gata i lea, ae sa ia taliaina foi ia tiutetauave o se faiaoga asiasi ma sa vaaia tuafafine i lana uarota o ē sa manaomia ona si’i a’e i luga. Sa ia tatalo mo i latou, popole mo i latou, asia i latou, ma siaki i le tele o taimi i masina taitasi.

Sa i ai se aiga faamaoni i Mekisiko, sa nonofo i se aai pisi ma le vavao, i se fale i tua o se papuipui tele ma se faitotoa u’amea. I totonu o le papuipui, sa valiina ai e le tina se togalaau matagofie, e i ai laau, o fugalaau, ma se punavai. I totonu o le fale, sa teuina ai e le aiga ni tusi i luga o fata ma sa teuina ni nofoaga e faapotopoto ai, suesue ai, ma taaalo faatasi ai.

Sa vaaia e se tuafafine i Ghana le faatoaga a lona aiga. I fafo atu o le pa, sa ia totoina ai ni laau masoa. O totonu o le pa, sa ia tausia ai ni ‘oti i ni pa. Sa ia teuina foi fatu pama sa ia sakaina e fai ai le suauu pama e faatau i o latou maketi. O mea uma lava i lona siomaga mama sa faaalia ai lona alofa i lona aiga. Sa ia lakeina, faamama, ma salu lona fanua. I lalo o se mago, sa i ai se nofoa sa fau latou te nonofo ai mo afiafi faaleaiga ma isi faapotopotoga faaleaiga.

Sa i ai se tuafafine nofofua e i ai ona manaoga faapitoa faaletino, sa nofo i le fogafale lona 80 i se fale maualuga i Hong Kong. Sa nofo na o ia ma sa na o ia le tagata o le Ekalesia i lona aiga, peitai sa ia fatuina se fale sa avea o se lagi lea sa mafai ai e ia ma ē asiasi atu ona lagonaina le uunaiga a le Agaga. I luga o se tamai fata, sa ia tuuina ai ana tusitusiga paia, o ana tusi lesona a le Aualofa, ma lana tusipese. Sa ia sailia ona augatuaa ma sa alu i le malumalu e faatino sauniga mo i latou.

Sa i ai se tuafafine i Initia sa fesoasoani e faatu se paranesi i lo latou aai. O lona toalua o le peresitene o le paranesi, a o ia o le peresitene o le Aualofa mo se vaega pe tusa ma le 20 tagata. Sa la tausia ni afafine faamaoni se toatolu, ma sa malupuipuia i latou e mataupu faavae o le talalelei i lo latou aiga paia.

Sa i ai se tina i Pasila sa nofo i se fale na fauina i piliki lanumumu i se fanua e mumu le palapala ma sa siomia i se papuipui o piliki lanumumu. Sa faatumuina le siosiomaga i pese a le Peraimeri, ma ata e otioti mai le Liahona o ata o malumalu, perofeta a le Atua, ma le Faaola sa ufitia ai puipui. Sa ositaulaga i la’ua ma lona toalua ina ia faamauina ai i le malumalu, ina ia mafai ai ona fananau mai a la’ua fanau i totonu o le feagaiga. O lana tatalo faifai pea, ia fesoasoani le Alii ia te ia ma avatu ia te ia le malosi ma musumsuga ia lava e tausia ai lana fanau i le malamalama, upumoni, ma le malosi o le talalelei ina ia mafai ai ona latou osia ma tausia feagaiga, ia sa ositaulaga ai i la’ua ma lona toalua ia faia mo i latou.

O nei tuafafine, ua avea ma sui o le anoanoai o isi, o i latou moni lava, e pei ona saunoa i ai Peresitene Gordon B. Hinckley, “o leoleo o le aiga.”⁴² Ua agavaa i latou mo nei upu na saunoa i ai Peresitene Spencer W. Kimball:

“O le avea ma se tamaitai amiotonu o se mea viia lea i soo se tupulaga. O le avea ma se tamaitai amiotonu i le taimi faaiu i lenei lalolagi, a o lumanai le afio mai faalua o lo tatou Faaola, o se valaauga e faapitoa lona tamalii. O le malosi ma aafiaga o tamaitai amiotonu i aso nei e mafai ona faasefuluina (le tulaga) e oo i ai taimi sili atu ona filemu. Ua tuuina mai o ia iinei e fesoasoani e faatamaoaigaina, puipui, ma leoleo le aiga—o le faalapotopotoga faavae aupito sili lea ona tamalii. E ono faavaivai ma toilalo isi faalapotopotoga i alalafaga, ae o le tamaitai amiotonu e mafai ona fesoasoani e laveai le aiga lea e ono avea ma sulufaiga mulimuli e tasi e iloa e nisi tagata i le totonugalemu o afa ma faigata.”⁴³

“E Mafai Ona Faamalolosia Outou mo Luitau o le Aso”

I lena po o le talafaasolopito ina ua faitauina e Peresitene Hinckley le folafolaga i aiga, sa faaiu ai lana saunoaga i se faamanuiaga i luga o tamaitai o le Ekalesia:

“Ia faamanuiaina outou e le Alii, o’u tuafafine pele. … Ia faamalolosia outou mo luitau o aso nei. Ia outou maua le atamai sili atu nai lou lava atamai e feagai ai ma faafitauli e masani ona fetaiai ma oe. Ia talia au tatalo ma talosaga mo faamanuiaga i ou luga ma luga o e pele ia te oe. Matou te tuuina atu ia te oe lo matou alofa ma faamanuiaga, ia faatumulia o outou soifuaga i le filemu ma le agaga fiafia. E mafai. E toatele outou e mafai ona molimauina lea. Ia faamanuia outou e le Alii, nei ma le faagasologa o tausaga o le a oo mai, ou te tatalo faamaulalo ai.”⁴⁴

“O tina o le fatu ma le agaga o soo se aiga” (James E. Faust).

O atalii o Aneti-Nifae-Liae na latou maua mai lo latou faatuatua tele i aoaoga a o latou tina (tagai Alema 56:47).

O Repeka, ua i ai ii ma le auauna a Aperaamo, sa malamalama o ia i le taua o le faaipoipoga i le feagaiga (tagai Kenese 24:1–28).

E fesoasoani le Aualofa i tina i o latou tiutetauave paia.

E mafai e tina ma tina matutua ona sauniuni a latou fanau teine ma fanau teine a fanau ina ia avea ma ni ē faafaileleina.

E i ai i tina ma tama se tiutetauave paia e aoao ma faafailele a latou fanau.

E mafai e uso talavou o le Aualofa ona aoaoina tomai faatausiaiga mai uso ua sili atu lo latou poto masani.

“O le faaipoipoga i le va o se alii ma se tamaitai ua faauuina e le Atua” (Au Peresitene Sili ma le Korama a Aposetolo e Toasefululua).

E mafai e tamaitai amiotonu ona faia o latou aiga ma ni lagi e mafai e le Agaga ona mau ai.

E tausia e tina amiotonu a latou fanau i le malamalama o le talalelei.

“O le avea ma se tamaitai amiotonu i le taimi faaiu i lenei lalolagi … o se valaauga e faapitoa lona tamalii” (Spencer W. Kimball).