Uputomua
“O Se Mea Maoae”
I le uluai fonotaga a le Aualofa, sa saunoa ai Ema Samita, “O le a tatou faia se mea tulaga ese.”1. Na sa’o lava o ia. Ua faatumulia le talafaasolopito o le Aualofa i faataitaiga o tamaitai le taualoa o e ua faataunuuina mea ofoofogia a o latou faatinoina le faatuatua i le Tama Faalelagi ma Iesu Keriso. Sa faavaeina le Aualofa e fesoasoani e saunia ia afafine o le Atua mo faamanuiaga o le ola e faavavau. O le Aualofa e fesoasoani e sauniaina tamaitai mo faamanuiaga o le ola e faavavau a o latou faateleina le faatuatua i le Tama Faalelagi ma Iesu Keriso ma Lana Togiola; faamalolosia o tagata taitoatasi, aiga, ma auaiga e ala i sauniga ma feagaiga; ma galulue i le lotogatasi e fesoasoani ia i latou e manaomia le fesoasoani. E faataunuuina e tamaitai nei faamoemoega a o latou saili, mauaina, ma galulue i faaaliga a le tagata lava ia i o latou valaauga ma i o latou olaga faaletagata lava ia.
O lenei tusi e le o se talafaasolopito faasolo, e le o se taumafaiga foi e tuuina atu se vaaiga lautele i mea uma sa ausia e le Aualofa. Ae, o loo tuuina atu ai vaaiga faaletalafaasolopito i le maoae o le galuega a le Aualofa. O talafaasolopito, aafiaga faaletagata, tusitusiga paia, ma upu a perofeta o aso e gata ai ma taitai o le Aualofa, o loo aoao mai ai lenei tusi e uiga i tiutetauave ma avanoa ua tuuina mai e le fuafuaga o le fiafia a le Tama Faalelagi, i tamaitai o le Au Paia o Aso e Gata Ai.
Aisea Tatou te Suesue ai i le Talafaasolopito ma Galuega a le Aualofa?
Na saunoa Peresitene Spencer W. Kimball, le Peresitene lona sefululua o le Ekalesia, “Ua tatou iloa o tamaitai e loloto lo latou talisapaia o le taimi ua tuanai, o le a popole e uiga i le teuteuina o se lumanai amiotonu.”2 E mafai ona fesoasoani se suesuega i lenei tusi i tamaitai e faateleina ai lo latou talisapaia o le taimi ua tuanai, ma lo latou malamalama i lo latou talatuu faaleagaga.
O le talafaasolopito o le Aualofa o loo aoao mai ai le faasinomaga paia ma le aoga e le i’u o afafine o le Atua. O se tala e faatumulia i le Agaga o tamaitai malolosi, faatuatua, ma tumu i le faamoemoe, o ē sa galulue ae faalēamanaiaina e le lautele. O le suesue i lenei talafaasolopito, e mafai ai e le Au Paia o Aso e Gata Ai ona iloa, e silafia e lo tatou Tama Faalelagi Ona afafine, e alofa o Ia ia te i latou, e Na te faatuatuaina i latou i tiutetauave paia, ma Na te taialaina i latou a o latou faataunuuina na tiutetauave. I a latou taumafaiga, ua soofaatasi ai tamaitai o le Ekalesia ma alii o loo umia le perisitua, e galueaiina le malo o le Atua i le fogaeleele ma faamalolosia aiga o Siona.
Suesuega a le Tagata Lava Ia o le O Afafine i Lo’u Malo
E le taua tele aso ma mea moni o loo tuuina atu i lenei tusi, ae o faamoemoega, mataupu faavae, ma mamanu o loo aoao mai ai. A suesue e tuafafine taitoatasi o le Aualofa ma tagai pea lava pea i lenei tusi, o le a latou iloa ai o le talatuu o le Aualofa ua le na ona faatatau i tamaitai sa soifua i le taimi ua tuanai, ae e faatatau foi i tamaitai i le lalolagi atoa i nei ona po, o ē osia ma tausia feagaiga. E mafai ona fesoasoani lenei malamalama i tuafafine e maua ai musumusuga mai le taimi ua tuanai ma lagonaina ai le filemu a o latou faasaga atu i le lumanai.
O aoaoga, tala, ma faataitaiga i le tusi e mafai ona taialaina ai tuafafine i le faavaeina o mea e faamuamua ma faatinoga i o latou olaga, ia o le a fesoasoani e faateleina ai lo latou faatuatua ma le amiotonu o le tagata lava ia, faamalolosia ai aiga ma auaiga, ma sailia ma fesoasoani ai ia i latou e le tagolima.
Na saunoa Sister Belle S. Spafford, o le peresitene aoao lona iva o le Aualofa: “O le tamaitai averesi i le taimi nei, ou te talitonu, o le a lelei pe a iloiloina mea e fiafia i ai, iloilo gaoioiga e punouai ai, ona faia lea o laasaga e faafaigofie ai lona olaga, faamuamua mea e taua, tuu le faamamafa i le mea e silisili ona tele ai faamanuiaga ma sili ona tumau, ma taofia ai ia lava mai gaoioiga e le manuia.”3
A o aoao e tuafafine mai le talafaasolopito o le Aualofa, e mafai ona latou mauaina ai faataitaiga, faamatalaga, ma mataupu faavae e sili ona ‘anoa ia i latou. A musuia ai i nei mea latou te mauaina ma aoaoga a perofeta anamua ma aso nei e gata ai, e mafai ona latou sailia, mauaina, ma faatino i luga o faaaliga faaletagata lava ia. E mafai ona latou mauaina le taiala pe a latou taumafai e avea ma tagata e finagalo le Alii e avea ai i latou, ma faia mea e finagalo o Ia latou te faia.
E mafai e tuafafine ona maua le faamalosiauga i upu a Alema: “O mea faatauvaa ma mea faavalea ua faataunuuina ai mea tetele.’”4 O mea faatauvaa ma mea faavalea latou te faataunuuina, o le a fesoasoani latou te iloa ai le auala e faamalolosia ai i latou e le Alii ma taialaina o latou olaga.
Suesueina Faatasi ma isi o le Talafaasolopito ma le Galuega a le Aualofa
O lenei tusi o se punaoa taua e fesoasoani ai i tuafafine o le Aualofa e aoao faatasi ai i Aso Sa ma isi aso o le vaiaso. Ina ia maua faatonuga aoao e uiga i le faiaoga i fonotaga a le Aualofa, e mafai e taitai o Aualofa a uarota ma paranesi ona tagai i le tusitaulima o loo i ai i le taimi nei ma le LDS.org. Ina ia maua faamatalaga patino e uiga i lenei tusi i fonotaga a le Aualofa, e mafai ona latou asiasi ane i le LDS.org ma tagatagai i isi faatonuga faaopoopo ua lolomi ma faasalalau e le Ekalesia.
O le uunaiga a lenei tusi ua faamoemoe ia oo atu i talaatu o fonotaga a le Aualofa. E mafai e aiga ona suesue faatasi ma talanoaina ia faataitaiga ma aoaoga o i le tusi. E mafai e tuafafine o le Aualofa ona faasoa atu le tusi i a latou uo. E mafai e tagata uma o le Ekalesia ona faaaogaina le tusi e fai ma se tusi faasino i lesona, lauga, ma fonotaga a aufono.
Saafiafiga
O i latou na sauniaina lenei tusi mo le lomiga, e momoli atu lo latou agaga faafetai ia Lucile C. Tate ma si ona tei o Elaine R. Harris, o ē na tofia ma vaetofiaina i le 1996 e tuufaatasia se talafaasolopito e lei lolomiina o le Aualofa. Sa teuina la la’ua galuega e fai ma punaoa i le teugaoa a le Ekalesia. O a la’ua taumafaiga e tusi faamaumauina soifuaga o peresitene aoao o le Aualofa ma mea taua na tutupu i le Aualofa, na saunia ai le faavae mo lenei tusi.
E momoli atu foi le agaga faafetai ia i latou nei: Susan W. Tanner, o lē na vaetofia i le 2009 e tusia le talafaasolopito lautele muamua o le Aualofa mo le Ekalesia atoa, e faaaoga ai le galuega a Sister Tate ma Sister Harris e fai ma faavae; faatonu ma le au mamanu, o ē na puemauina le agaga o le mea e mafai ona oo i ai lenei tusi, ma galulue maelega e faatino; o isi tusitala, o le au fai sao, ma le au tusitalafaasolopito, o loo patipatia e ala i faamatalaga aloaia o a latou lomiga i faaupuga o i le faaiuga o lenei tusi.
Ma le mea mulimuli, semanu e le mafai lava ona tusia lenei talafaasolopito pe a na leai le faatuatua, tuuto, ma le auaunaga a tuafafine o le Aualofa i le talafaasolopito atoa o le Ekalesia.
E faapei o Maria ma Mareta i le Feagaiga Fou, o loo tautua foi tuafafine o le Aualofa o ni soo faamaoni o Iesu Keriso.
E fesoasoani le suesue faaletagata i tamaitai e aoao ai i o latou tiutetauave i le malo o le Atua.
E mafai e tuafafine ona faamalamalama e le tasi le isi a o latou talanoaina le talafaasolopito ma le galuega a le Aualofa.