Mataupu 6

O Se Li’o o le Usoga a Tamaitai i le Lalolagi Atoa

Ina ua fono le Perofeta o Iosefa Samita ma tuafafine o le Aualofa i Navu, sa ia aoao atu e le gata i le tuuina atu o le auaunaga faaletino, ae e tatau foi ona latou faamalolosia faaleagaga ia tagata (tagai mataupu e 2). O le avea ai o lenei fautuaga o se faavae, sa iloa ai e tamaitai o le Aualofa le alofa ma le saogalemu mai afa o le olaga a o latou galulue faatasi. Sa latou fefaasoaai o le tasi ma le isi i le talalelei a Iesu Keriso, faapea foi i ē sa vagaia i latou. Ua avea le Aualofa o se malutaga mai le lalolagi—o se nofoaga o le sulufaiga—ma o se totonugalemu o le malamalama i le lalolagi—o se nofoaga o le uunaiga.

I le fonotaga a le Aualofa i Ogden, Iuta, sa faailoa ai ma le agaga faafetai e Sister Eliza R. Snow, le peresitene aoao lona lua o le Aualofa ia taumafaiga a tamaitai e faamalosi e le tasi le isi i le faaletino ma le faaleagaga. Sa ia ta’u atu ia i latou e ui lava e lei tausia e le Ekalesia se faamaumauga o foai uma sa latou faia e fesoasoani ai ia i latou e le tagolima, ae sa tausia lava e le Alii se faamaumauga sa’o atoatoa o la latou galuega laveai:

“Ua ou matua iloa lelei lava le tele o mea sa foai mai ae e le’i tusia lava i tusi [faamaumau]. Fai mai Peresitene Iosefa Samita o lenei sosaiete sa faatulagaina e laveai ai agaga. O le a le mea ua faia e tamaitai e toe aumaia ai i latou ua se?—e faamafanafanaina ai loto o i latou ua maluluina i le talalelei?—O loo tausia se tasi tusi o lo outou faatuatua, o lo outou agalelei, o a outou galuega lelei, ma upu. O loo tausia foi se isi tusi. E leai lava se mea o leiloa.”¹

O loo i ai se tusi faamaumau a le lagi o loo tausia o galuega a tamaitai o le Aualofa, a o latou aapa atu ia i latou ua maluluina o latou loto ma ua manaomia le faatuatua, agalelei, galuega lelei, ma upu lelei.

Usoga a Tamaitai i le Lalolagi Atoa

I le taulotoaiga o le 1900, a o mafatia le lalolagi i aafiaga o taua ma faalavelave faalenatura, sa faauau pea ona faateleina le galuega a le Aualofa. I le faamaoni ai i faamoemoega o le faalapotopotoga—o le faateleina o le faatuatua ma le amiotonu patino, faamalolosia o aiga ma auaiga, ma le sailia ma fesoasoani atu ia i latou e le tagolima—sa saunia ai e le Aualofa se malutaga mo tamaitai o le Au Paia o Aso e Gata Ai, ma sa avea ma se uunaiga mo le lelei. I le 1947 sa aoao mai ai e le au peresitene aoao o le Aualofa o (Sisters Belle S. Spafford, Marianne Sharp, ma Gertrude Garff), “O la tatou misiona o se misiona faamalolo e manaomia ai le loto e tele atu, o le pa’i e sili atu ona agalelei, ma le loto e sili atu ona mausali.”²

O le taimi lena, sa faavaeina ai e nisi o malo ni faasa faaupufai ma fausia ni papupuni faaletino. O nei faasa ma papupuni, ua lauiloa i igoa e pei o le Pupuni U’amea ma le Papuipui o Perelini, sa fuafua e faasa ai nisi tagata ae faaesea ai isi. E ese mai ai, sa fausia e tamaitai o le Aualofa ni puipui faaleagaga o le malutaga e fuafua e puipuia ma faaaofia mai ai. Sa latou tutu faatasi i se li’o o le usoga a tamaitai i le lalolagi atoa ma valaaulia isi e auai faatasi ma i latou.

E oo lava i atunuu e i ai tuaoi ma tulafono faaupufai sa taofia ai le auai saoloto i tapuaiga, sa lagonaina lava e uso o Aualofa se sootaga i o latou uso i le lalolagi atoa. Sa latou tumau filemu ma le faamaoni i a latou molimau i le talalelei toefuataiina ma faamoemoega o le Aualofa.

I le 1980, na asiasi atu ai Peresitene Boyd K. Packer o le Korama a Aposetolo e Toasefululua ma lona faletua o Donna, i se Aualofa i Siekisolovakia (lea ua ta’ua nei o le Ripapelika o Sieki ma Solovakia). Na ia toe ta’ua mulimuli ane:

“Sa lei faigofie ona maua ni visa, ma sa matou faaaogaina le faaeteetega tele ina ia aua nei tuuina le saogalemu ma le soifua manuia o o tatou tagata i se tulaga matautia, o ē sa tele augatupulaga o tauivi e faaolaola lo latou faatuatua i tulaga e le matautalagia o pulega saua.

“O le fonotaga e sili ona manatua pea sa faia i se afeafe pito i luga. Sa toso ia pupuni. E oo lava i le po, o i latou sa auai sa eseese taimi sa o mai ai, o se tasi mai le tasi itu ma le isi mai le isi itu, ina ia aua nei masalomia i latou lava.

“E toa 12 tamaitai na auai. Sa matou usuina viiga o Siona mai tusipese—o upu e aunoa ma ni nota—sa lolomiina i le silia ma le 50 tausaga ua mavae. Sa tuuina mai ma le migao [se lesona] mai itulau o se tusi lesona sa tusilima. …

“Sa ou ta’u atu i na tuafafine o i latou o itutino o se faalapotopotoga aupito tele ma i ona itu uma lava e aupito maoae foi i le lalolagi. Sa ou ta’ua le Perofeta o Iosefa Samita ina ua faatulagaina e ia ma le Usoga le Aualofa. …

“Sa i ai le Agaga iina. Sa lē natia le tagi o le tuafafine lelei sa taitaia ma le agamalu ma le migao.

“Sa ou ta’u atu ia i latou ina ua ma toe foi mai, sa tofia a’u ou te lauga i se konafesi a le Aualofa; pe mafai ona ou auina atu se savali mai ia i latou? E toatele i latou sa tusia ni faamatalaga; o faamatalaga taitasi, faamatalaga uma, sa aumaia i le agaga o le foai atu—ae le o le talosaga atu mo se mea. O le a le galo lava ia te au le mea na tusia e se tasi tuafafine: ‘E momoli atu alofaaga o se li’o laitiiti o uso o latou lava loto ma mafaufauga i tamaitai uma ma faatoga atu i le Alii e fesoasoani mai ina ia matou fetuleni atu i luma.’

“O na upu, li’o o uso, na musuia ai au. Sa mafai ona ou vaai atu ia i latou o tutu i se li’o e oo i luga atu o lena potu ma li’o ai le lalolagi.”³

O le toe manatuaina o lea fonotaga, sa saunoa ai Peresitene Packer, “Sa ou tu, mo sina minute, i lena li’o ma lagonaina ia uunaiga o le faatuatua ma le lotototoa ma le alofa na agai mai ma agai atu i itu uma.”⁴

O lena faatuatua ma le lotototoa ma le alofa na tuufaatasi e fausia ai le talatuu o tuafafine o le Aualofa i soo se mea. Na faamalosiauina e Peresitene Henry B. Eyring, o se fesoasoani i le Au Peresitene Sili, ia tuafafine o le Aualofa e faasoa atu lenei talatuu. “Tou te pasi atua le talatuu pe a outou fesoasoani atu i isi ia maua le meaalofa o le alofa moni i o latou loto,” na ia saunoa ai. “Ona mafai lea ona latou pasi atu i isi. O loo faamaumauina le talafaasolopito o le Aualofa i upu ma fuainumera, ae o le talatuu e pasi atu mai le loto i le loto.”⁵ O loo tupu lenei mea i le li’o o le usoga a tamaitai o le Aualofa.

O Se Nofoaga o le Sulufaiga

Talu mai popofou o le Aualofa, o saunia lava e tamaitai se nofoaga o le sulufaiga—o se nofoaga o le faamalologa, alofa, agalelei, amana’ia, ma le taliaina. I Navu, sa maua e tamaitai le sulufaiga i le Aualofa a o latou faalagolago atu i le faatuatua ma tomai o le tasi ma le isi ma a o latou fefaasoaa’i meaai ma lavalava. Sa faaauau pea lenei mea a o latou laasia laufanua valevalenoa, ma a o latou faamautuina i latou lava i le Teritori o Iuta. I le taimi nei, a o faatupulaia le Ekalesia i le lalolagi atoa, o loo faaauau pea e tamaitai ona maua le sulufaiga i le Aualofa.

Na saunoa Peresitene Boyd K. Packer: “O lenei li’o tele o tuafafine o le a avea o se puipuiga mo outou taitoatasi ma o outou aiga. E mafai ona faatusa le Aualofa i se sulufaiga—o le nofoaga o le saogalemu ma le puipuiga—o le malutaga o aso anamua. O le a outou saogalemu iina. E siosiomia ai tuafafine taitoatasi e pei o se pa e puipuia ai.”⁶

I le 1999, sa masii atu ai Bobbie Sandberg, o se ava ma o se tina talavou foi, ma lona aiga mai le Iunaite Setete i Taiuani. E ui lava e na o le ono masina o le a i ai o ia iina a o faiaoga o ia ma lona toalua i se vasega o le gagana Peretania, ae sa siosiomia o ia e ona uso Taiuani i le uunaiga puipuia o le Aualofa.

Sa iloatino lenei puipuiga ina ua luluina le atunuu e se mafuie matautia, ma o le vaega tonu na lulu ai o tafatafa o le fale o le au Sandberg. Sa toulu i lalo fale i itu uma o le aoga lea sa nonofo ai i latou. I ni nai itula o le ulua’i lulu tele, na sau ai le peresitene o le Aualofa a Sister Sandberg i le aiga e pei o se agelu o le alofa e iloilo mea sa latou manaomia ma fesoasoani atu ia te i latou. Ona o le tele o auala ma fale sa faatama’ia ma ua toulu uma foi laina o fesootaiga, o lea sa faaaoga ai e lenei peresitene alofa le auala e tasi o feoa’iga sa mafai ona ia maua. Sa alu atu i lana uila vilivae e ui atu i le gasu seia oo ina ia asia le toatele o tuafafine o le uarota.

I le totonugalemu o le gaogaosa faaletino, sa i ai Sister Sandberg i le puipuiga malu a se Aualofa. Sa taulimaina e lona peresitene o le Aualofa le saogalemu ma manaoga o tuafafine taitasi i lana uarota.

E faapei o Sister Sandberg, e toatele le Au Paia i le lalolagi atoa e mafai ona faamaonia le moni o lenei saunoaga a Peresitene Packer: “E maeu le mafanafana o le iloa po o fea lava e o i ai [se aiga], e i ai lava se aiga o le Ekalesia e faatali maia. Mai le aso latou te taunuu ai, o le a avea le alii ma se itutino o le korama a le perisitua ae avea le tuafafine ma se itutino o le Aualofa.”⁷

O Se Nofoaga o le Uunaiga

Sa valaauina Sister Belle S. Spafford e avea ma peresitene aoao lona iva o le Aualofa ia Aperila 1945, ma sa vaetofiaina Peresitene Siaosi Alapati Samita e avea ma Peresitene lona valu o le Ekalesia pe tusa o le ono vaiaso mulimuli ane ai. Sa faamalosiauina e Peresitene Samita ia Sister Spafford ma tuafafine uma o le Aualofa e saunia ma tuuina atu le lagolago faaletino mo tagata sa faaauau pea ona mafatia mai aafiaga o le Taua Lona Lua a le Lalolagi. Sa ia talosagaina foi i latou ina ia faia ia lagonaina a latou uunaiga e fafine uma o le lalolagi. Na ia saunoa, “Ina ua tatala e le Perofeta o Iosefa Samita le ala mo le saolotoga o tamaitai, sa tatalaina mo le lalolagi uma.”⁸

O Le Maota o le Aualofa, o se Nofoaga Autu o le Uunaiga

Ia Oketopa 1945, sa fofogaina mai ai fuafuaga e faatu se maota o le Aualofa.⁹ Ia Oketopa 1947, sa faamaonia ai e le Au Peresitene Sili se fuafuaga na fautuaina atu e Sister Belle S. Spafford: o sui auai uma o le Aualofa, lea sa 100,000 lona aofai i lena taimi, sa talosagaina e foai atu le ta’i lima tala mo le galuega faatino. Sa auina mai e tuafafine mai le lalolagi atoa a latou foai. O nisi sa latou auina mai a latou measina mai o latou atunuu e faamatagofie ai totonu o le maota. E tasi le tausaga, ae maua e tuafafine le $554,016.

Sa tautino mai e Sister Spafford: “O lenei tulaga ua ausia o se ata o se tupe tele, peitai e le na o le tupe. O i ai ii le ata o le tele o tulaga faatauaina e lē mavaaia—tulaga faatauaina e sili ona taua—o le agaga faafetai mo le tulaga mamalu ua lototasi i ai tamaitai i le fuafuaga o le talalelei; molimau i le paia o le galuega a le sosaiete; ma le lotofaafetai mo le avanoa ua tuuina mai i uso o le Ekalesia e auauna atu ai … ; lotonuu i le taitaiga; o le tuuto e aunoa ma le manatu faapito i se galuega tele. O se ata lea o le maoae ua maua’a i lenei sosaiete.”¹⁰

O le maota, o loo tu i matu i sasae o le Malumalu o Sate Leki, sa faapaiaina i le aso 3 o Oketopa, 1956. I le tatalo o le faapaiaga, sa saunoa ai Peresitene Tavita O. MaKei, le Peresitene lona iva o le Ekalesia, e uiga i le uunaiga i le lalolagi atoa o le a afua mai i lea maota. “Ina ia atili aoga la latou auaunaga i e le tagolima ma mafatia i le Ekalesia ma le Lalolagi, o lea ua faatuina ai faatasi ma le fesoasoani atu a tagata o le Ekalesia lenei maota matagofie o le Aualofa.”¹¹

Talu mai le 1984, ua aofia ai foi i lenei maota ia ofisa o le au peresitene aoao o Tamaitai Talavou ma le au peresitene aoao o le Peraimeri.

Uunaiga o i Latou o Isi Faatuatuaga

Sa aoao mai e Sister Spafford se lesona tele mai ia Peresitene Siaosi Alapati Samita e uiga i le faasoa atu o tulaga taua o le Ekalesia i fafine o le lalolagi. E le’i leva ona uma ona lagolagoina o ia e avea ma peresitene aoao o le Aualofa, “sa aumai se tusi mai le Fono Aoao a Tamaitai o le Atunuu, e faasilasila mai ai la latou fono faaletausaga e faia i le Aai o Niu Ioka.

“Sa auai Sister Spafford i na fonotaga muamua, ma i lona silafia ai o le tulaga sa oo i ai muamua, o lea sa latou iloiloina ai ma le faaeteete ma ona fesoasoani le valaaulia mo le tele o vaiaso.

“Sa tonu ia i latou e fautuaina le Peresitene o le Ekalesia ia faamutaina le auai o le Aualofa i na fonotaga. Sa latou saunia se faaupuga o le fautuaga, ma lisi uma ai mafuaaga ua faia ai.

Sa tuu atu ma le gatete ma le le mautonu e Sister Spafford le pepa i luga o le kesi a Peresitene Siaosi Alapati Samita ma faapea atu, ‘E fia fautuaina atu e le Au Peresitene o le Aualofa ia faamutaina le avea o le Aufono Faatonu Aoao ma sui auai i le Fono Aoao a le Atunuu, faapea foi le Fono Aoao Faavaomalo a Tamaitai, ona o mafuaaga o loo lisi atu i le pepa lenei.’

“Sa faitauina ma le faaeteete e Peresitene Samita le pepa. Pe le’i silia ma le afa seneturi o avea i latou ma sui auai? o lana fesili lea.

“Sa faamalamalama atu e Sister Spafford le taugata o le o i Niu Ioka, o le taimi e alu ai, ma sa ia faamatala atu foi i ai le faamamasagiaina o i latou i nisi taimi. Sa ia fautuaina e solomuli ese mai aua ‘e leai se tatou mea e maua mai ai i nei fonotaga.’

“Sa faalagolago i tua lenei perofeta atamai, toeaina i lona nofoa ma tilotilo atu ia te ia ma se foliga lē fiafia. ‘Ua outou mananao e solomuli ona e leai sa outou mea o maua mai ai?’ o lana fesili lea.

“O lo matou lagona lena,’ na ia tali atu ai.

“‘Ta’u mai ia te au,’ na ia fai atu ai, ‘o le a la outou mea o loo tuu i ai i totonu?

“‘Sister Spafford,’ na ia faaauau ai, ‘ua e faaofoina au. Pe e te mafaufau ea i taimi uma i mea tou te maua mai? Pe tou te le mafaufau ea foi i mea e tatau ona outou tuuina atu?’

“Sa ia toe faafoi atu le pepa ia te ia ma tuuina atu lona aao. Faatasi ai ma le mausali a’ia’i sa ia saunoa atu ai, ‘Faaauau le avea ai o outou ma sui auai i nei fonotaga ma ia faia ia lagonaina la outou uunaiga.’”¹²

Sa ia faia lava lana uunaiga ia lagonaina. Sa auai o ia i le Fono Aoao a Tamaitai o le Atunuu ma le Fono Aoao a Tamaitai Faavaomalo ma sa ia umia tulaga faaletaitaiga i na faalapotopotoga mo le tele o tausaga. Sa tu malosi o ia mo mataupu faavae o le talalelei a Iesu Keriso, ma mo faamoemoega o le Aualofa.

O taimi uma lava e alu ai Sister Spafford i le Fono Aoao a Tamaitai Faavaomalo (ICW), sa tofia lava o ia i le vaega o le “uelefea faaagafesootai ma amio tauleleia”. Sa ia toe ta’ua:

“I se tasi taimi sa ou tetee ai ou te le toe fia alu i le [vaega] o le uelefea faaagafesootai ma le amio tauleleia, ma sa lelei lava le ma faigauo ma le peresitene o le ICW i lena taimi. … Sa ou fai atu i ai, ‘Ou te alu i taimi uma i le vaega lenei, ma ua lē malie foi ua ou fia manao e sui.’ Fai mai a ia, ‘Ia, e sa’o lava ua tatau ona e alu i se isi mea, ma o le a ou vaai i ai ina ia sui.’

“Ona foi mai lea o ia ma fai mai, ‘E le mafai ona matou talia lau talosaga, aua o loo mananao lava lau aufono ina ia tuu ai pea oe i le uelefea faaagafesootai ma le amio tauleleia.’ Sa ia fai mai, ‘Atonu e te fia iloaina le mafuaaga. Fai mai lou peresitene faaleatunuu, o oe e te tu i taimi uma i le tulaga o lau Ekalesia i mataupu nei, ma ua latou iloa le tulaga o le Ekalesia Mamona, ma ua latou lagona ai o loo i ai le saogalemu i le tuu ai pea o oe iina.’”¹³

Sa iloa e fafine o nei faalapotopotoga o le a tu la latou uo o Belle Spafford mo mataupu faavae o le Ekalesia, ma sa latou manaomia lena ituaiga o faautautaga ma le malosi. I le 1954, sa filifilia ai o ia e fai ma taitai i le usugafono a le Iunaite Setete i le Fono Aoao Faavaomalo a Tamaitai i Helsinki, Finelani. A o ia taimua i se savali tele i le tatalaga o le konafesi, sa toe oo lona mafaufau i tua i le taimi:

“A o ou vaavaai atu i le aofia matagofie ua aofia ai tagata mai le tele o atunuu … , sa faafuasei ona toe tepa lo’u mafaufau i upu a o tatou taitai paionia o le [Aualofa] … ‘tatou te tutu e taiulu i tamaitai o le lalolagi,’ … ‘mo aia tatau a tamaitai o Siona ma aia tatau a tamaitai o atunuu uma.’ … Sa ou iloa na tuuina atu i o tatou taitai paionia tamaitai e ala i le malamalamaaga faalelagi se silafia o le taunuuga o le Aualofa. … O la’u molimau maumaututu, o le a oo mai le taimi e lagonaina ai le uunaiga a le Aualofa e tamaitai i le lalolagi atoa.”¹⁴

I le 1987, sa fautuaina ai e le Au Peresitene Sili le Aualofa ina ia solomuli mai le Fono Aoao a Tamaitai o le Atunuu ma le Fono Aoao a Tamaitai Faavaomalo. Ua oo mai le taimi mo le au peresitene aoao o le Aualofa e taulai atu ai le tele o le malosi i la latou faalapotopotoga ua vave lona faatupulaia i le lalolagi, nai lo isi galuega faaleatunuu ma le lalolagi. Ae ona ua ola le Ekalesia, ua faaauau ai pea e tamaitai o le Aualofa ona faia ia lagonaina la latou uunaiga i le lalolagi atoa—i o latou nuu, a’oga, ma faalapotopotoga aoga i le lofoifale. Sa latou mulimuli i le mamanu na faatuina e Peresitene Samita ma Sister Spafford, o le mafaufau i mea e mafai ona latou tuuina atu, ae le o mea e mafai ona latou maua mai ai.

Faafaileleina ma le Aoaoina o Tagata Sailiili ma Tagata Fou e Liliu Mai

O le faatupulaia o le Ekalesia i le lalolagi atoa, ua avea ai le Aualofa ma se nofoaga o le uunaiga mo tagata sailiili ma tagata fou e liliu mai. O lenei uunaiga ua aofia ai le tuuina atu i tagata fou o le ekalesia o avanoa e galulue ai ma ta’ita’i. Na faamatala e Sister Silvia H. Allred, o se fesoasoani i le au peresitene aoao o le Aualofa, e uiga i lona tina, o Hilda Alvarenga, sa avea ma peresitene o le Aualofa i se paranesi i San Salvador, El Salvador:

“E lei leva ona liliu mai lo’u tina i le Ekalesia ae valaauina o ia e avea ma peresitene o le Aualofa i la matou paranesi laitiiti i San Salvador. Sa ia fai i le peresitene o le paranesi o ia e leai sona poto masani, e le’i saunia, ma e le agavaa. Ua 30 ma ona tupu ona tausaga, e lei tele sona a’otauina ma o lona olaga atoa sa tuuto atu i le tausiga o lona toalua ma le fanau e toafitu. Peitai, sa valaauina lava o ia e le peresitene o le paranesi.

“Sa ou matauina lo’u tina o tulai mai i le galuega. A o auauna atu o ia, sa ia aoaoina tomai faaletaitaiga ma atiina ae meaalofa fou e pei o le faiaoga, tautala i nofoaga faitele, ma le fuafuaina ma faatulaga ia fonotaga, o gaoioiga, ma galuega faatino mo auaunaga. Sa ia uunaia ia tamaitai o le paranesi. Sa ia auauna atu ia te i latou ma aoaoina i latou e feauaunaa’i le tasi i le isi. Sa alolofa tamaitai ma faaaloalo ia te ia. Sa fesoasoani o ia i isi tamaitai ia latou iloa, faaaoga, ma atiina ae meaalofa ma taleni; sa fesoasoani o ia ia te i latou e avea ma tufuga o le malo ma aiga malolosi, ma faaleagaga. Sa tumau lona faamaoni i feagaiga o le malumalu sa ia osia. Ina ua maliu o ia, sa i ai o ia i le filemu o lona Matai.

“Sa i ai se tamaitai sa galulue faatasi ma ia o se fesoasoani i le Aualofa na tusi mai ia te au ina ua mavae le tele o tausaga: ‘O lou tina o le tagata sa aoaoina a’u i le ala e avea ai ma tagata ua ou i ai nei. Mai ia te ia, sa ou aoaoina ai le alofa moni, agalelei, faamaoni, ma le tiutetauave o o’u valaauga. O ia o lo’u faufautua ma lo’u faataitaiga. O lea ua 80 nei o’u tausaga, ae sa ou tumau faamaoni i le Faaola ma Lana talalelei. Sa ou faamisiona, ma sa matuai faamanuiaina au e le Alii.’”¹⁵

Sa fesoasoani lenei peresitene tuuto o le Aualofa e faamalolosia molimau a tamaitai ua avea ma tagata auai o le paranesi. Sa ia faafaileleina foi le faatuatua o tamaitai sa sailiili i le Ekalesia, ma i latou sa faatoa papatiso ma faamauina. Sa ia taiulu i taumafaiga ina ia avea le Aualofa o se nofoaga, e fia ō i ai ma faafaileleina ai.

Uunaia o Isi e ala i le Faasoa atu o le Talalelei

E lei leva ona asia e Peresitene ma Sister Packer lena li’o laitiiti o tuafafine i Siekisolovakia, ae ta’a’ina atu i lena li’o se tamaitai talavou o lē sa sailia se sulufaiga faaleagaga, alofa, ma le uiga o lona olaga. O lona igoa o Olga Kovářová, ma o le taimi lena sa a’oga ai i lona faailoga faafoma’i i le iunivesite i le aai o Brno. Sa faamalosia e le iunivesite i tamaiti aoga ia a’oa’oga e le talitonu i tapuaiga. Sa lagona e Olga sa leai se tapasa o tamaiti aoga ma i latou uma sa siomia ai o ia. Sa matelaina o ia mo se ola faaleagaga e loloto atu, ma sa ia lagonaina foi sa i ai i ana uo ma paaga lea lava tulaga matelaina.

I le taimi a o i ai Olga i le iunivesite, sa la feiloai ai ma Otakar Vojkůvka, o se tamaloa e 75 tausaga le matua o le Au Paia o Aso e Gata Ai. Sa ia toe faamatalaina: “Sa foliga mai ia te au ua fitusefululima ona tausaga, ae o lona loto e tusa ua sefuluvalu ma e tumu i le olioli. O se mea tulaga ese lea i Siekisolovakia i le taimi o le faitio. … Sa ou vaaia e le gata ina aoaoina lelei, ae sa ia iloa le ala e ola fiafia ai.” Sa fesili [Olga] ia te ia ma lona aiga i le uiga o le olaga, ma sa latou faafeiloaia o ia i isi tagata o le Ekalesia. Sa manao o ia e iloa pe na faapefea ona latou maua le olioli ma pe o fea foi na latou faitau ai e uiga i le Atua. Sa latou avatu ia te ia se kopi o le Tusi a Mamona, lea sa ia amata faitauina ma le naunau.

Sa liua Olga i le talalelei toefuataiina, ma sa tonu ia te ia o le a papatiso. Sa tatau ona papatisoina o ia i le vao i le po ina ia lē ta’a’ina atu ai tagata i se gaoioiga faalelotu. Ae paga lea, e toatele le au faifaiva sa i ai i le vao i le po o lona papatisoga. Peitai, ina ua fiu Olga ma ana uo e faatalitali sa i’u ina latou faia se tatalo faatauanau, ona tuumuli ese ai lea o le au faifaiva.

Sa fesili se tasi o le Ekalesia sa i ai i le papatisoga o Olga ia te ia, “E te iloa le mafuaaga na toatele ai le au faifaiva i tafatafa o le vai i lena po?” Ona ia fai mai lea, “Manatua Iesu, a o ia savali i talaane o le Sami Kalilaia, na ia fai atu ia Simona Peteru ma Aneterea, o ē na lafo o la’ua upega i le sami, ‘Mulimuli mai ia te au, ma o le a ou faia oulua ma faifaiva i tagata.’” Sa manatu Olga, “o lona uiga e le o toe mamao ona tatau lea ona avea a’u ma meafaigaluega i aao o le Atua e aumaia tupulaga talavou i le Ekalesia.”

O le mea tonu lava lena na faia e Olga. Sa ia uunaia le toatele o e sa saili atu mo le upumoni ma le fiafia. Talu ai sa le faatagaina le talaiga i lo latou atunuu, o lea sa faia ai e i latou ma le aiga o Vojkůvka se vasega sa ta’ua o le “A’oga o le Poto.” I nei faatulagaga, sa latou aoao atu ai uiga taua o le amio lelei ma le tauleleia e fesoasoani ai i tagata ia maua le faaleagaga ma le fiafia i le olaga. O le toatele o a latou tamaiti a’oga sa lagonaina le uunaiga a le Agaga, ma sa tele ina matala atu avanoa mo talanoaga ma tagata sa filifilia, e uiga i le Tama Faalelagi ma le talalelei a Iesu Keriso.¹⁶

Mulimuli ane, a o avea ia Sister Barbara W. Winder ma peresitene aoao lona sefulutasi o le Aualofa, sa ia maua le avanoa e malaga ai i Siekisolovakia ma lona toalua, o Richard W. Winder, o lē sa faamisiona ai iina a o talavou i tausaga ua mavae. A o la ulufale atu i se fale o le a faia ai se fonotaga, sa alu ane se tamaitai matatiotio ia i la’ua ma le naunautai ma fai atu, “Susu maia! O lo’u igoa o Olga, ma o au o le peresitene o le Aualofa.” Sa matauina e Brother ma Sister Winder le susulu i ona foliga ma sa i ai le Agaga o le Alii i ona luga. I le avea ai ma peresitene o le Aualofa o lana paranesi toalaiti, sa avea Olga Kovářová ma uunaiga mo le lelei i se lalolagi o pulega saua faaupufai ma sauaga faalelotu, ma sa fesoasoani o ia e saunia sulufaiga mo i latou sa auai i le Ekalesia ma avea ma sui auai o le Aualofa. Sa fesoasoani o ia e laveai agaga o isi e ala i le aumaia o i latou ia Keriso.

O le tala o le liua o Sister Kovářová ma lana galuega faafaifeautalai, o se vaega o le faataunuuina o se valoaga a Peresitene Spencer W. Kimball, le Peresitene lona sefulu ma le lua o le Ekalesia: “O le tele lava o le faatupulaia autu ua oo mai i le Ekalesia i aso e gata ai o le a oo mai ona o le toatele o tamaitai lelei i le lalolagi (lea e tele lava ina i ai se lagona loloto o le faaleagaga) o le a aumaia i le Ekalesia i ni aofaiga tetele. O le a tupu lenei mea e oo atu ai i le tulaga o le a atagia mai ai i tamaitai o le Ekalesia le amiotonu ma le manino i o latou olaga ma vaaia ai tamaitai e maoae ma tulaga ese—i uiga fiafia—mai fafine o le lalolagi.”¹⁷

Uunaia o Isi e ala i le Auauna Atu

I le 1992, sa faamanatuina ai e tamaitai i le lalolagi atoa le 150 tausaga o le Aualofa e ala i lo latou auai i galuega faatino o le auauna atu i o latou nuu. O lenei taumafaiga, na faatulagaina i lalo o le taitaiga a taitai aoao o le perisitua ma le lotoifale, sa faasoa ai e tuafafine le uunaiga a le Aualofa i le lalolagi atoa. Fai mai Sister Elaine L. Jack, o le sa avea ma peresitene aoao lona sefululua o le Aualofa i lena taimi:

“Sa matou talosagaina a matou iunite taitasi i le lotoifale, e vaavaai i manaoga o o latou lava nuu ma filifili po o le a le auaunaga faalenuu e sili ona manaomia. Tou te silafia le mea na faia e lena mea i lenei lalolagi?

“Sa alu se tasi o peresitene o la matou Aualofa i le aufono a le aai i Kalefonia ma fai atu, ‘O a mea tou te manatu e manaomia i lenei nuu e mafai ona matou faia?’ Ma sa fai atu tamaloloa, ‘O lona uiga o le 20,000 o vaega o tagata i lenei lalolagi o le a latou faia foi le mea lava lea e tasi?’ Sa ia fai atu ioe. Ona fai mai lea [o se tasi o sui auai o le aufono], ‘O le a outou suia le lalolagi.’ Ma ou te manatu ua tatou faia … mo le mea e sili atu. O se tasi lena o mea ua soofaatasi ai. Ma [sa] tele ni auaunaga eseese. … Sa faia e [tamaitai] i Aferika ni ie mafiafia mo toeaiina ma olomatutua i nofoaga e tausi ai. … Sa latou totoina ni togalaau e faataamilo [i se] uati tele i Samoa. Ma sa latou faia le anoanoai o mea mo i latou e leai ni mea e nonofo ai pe auina atu ni tusi mo tamaiti pe valiina fale o tina e leai ni tamā i aiga, ituaiga mea faapena. Sa matou lagona o nei galuega faatino o auaunaga i le lalolagi atoa, o se mea maoae, e le gata mo tamaitai ae mo nuu foi.”¹⁸

Uunaia o Isi e ala i le Faitautusi ma le Tusitusi

A o faatulagaina e tamaitai o le Aualofa galuega faatino i nuu, sa taulai atu Sister Jack ma ona fesoasoani i se taumafaiga auauna atu i le lalolagi atoa: e fesoasoani ai i tuafafine e aoao e faitautusi. “Sa matou lagonaina e manaomia e tamaitai i le lalolagi atoa ona mafai ona faitau, ma e toatele sa le mafai,” na ia saunoa ai. “Mata e mafai ona outou mafaufau—afai sa latou le iloa faitau, e mafai faapefea ona latou aoao a latou fanau, e mafai faapefea ona latou faaleleia o latou tulaga, e mafai faapefea ona latou suesue i le talalelei” O lea sa matou mafaufau ai e leai se mea e mafai ona tele atu lona aoga nai lo le faalauiloaina o se taumafaiga ia iloa faitautusi ma tusitusi. … Ae o lo matou faamoemoega foi o le faamalosiauina lea o le aoaoina o tamaitai uma i le olaga atoa.”¹⁹

Sa feiloai Peresitene Thomas S. Monson, le Peresitene lona sefuluono o le Ekalesia, ma se tasi tamaitai i Monroe, Lusiana, o lē sa faamanuiaina i lenei auaunaga a le Aualofa, ma sa ia mauaina faatasi ma isi faamanuiaga. Sa alu atu o ia [ia Peresitene Monson] i se malaevaalele ma fai atu: “Peresitene Monson, ae ou te lei auai i le Ekalesia, ma avea ma se tasi o uso o le Aualofa, sa ou le iloa faitautusi. Sa ou le iloa tusitusi. Sa leai se tasi o lo’u aiga na iloa.” Sa ia faamatala atu ia Peresitene Monson, sa aoaoina o ia e uso o le Aualofa e faitau ma ua mafai nei ona ia fesoasoani i isi e faitau. Ina ua uma ona talanoa atu [Peresitene Monson] ia te ia, sa ia “mafaufau i le fiafia aupito maualuga atonu na ia lagonaina ina ua ia tatalaina lana Tusi Paia ma faitau ai mo le uluai taimi i afioga a le Alii. … O lena aso i Monroe, Lusiana,” sa maua ai e [Peresitene Monson] se faamautinoa mai le agaga o lo outou faamoemoega faaeaina o le faaleleia o le faitautusi ma le tusitusi i o outou uso.”²⁰

Uunaia ma le Faamalolosia o Tuafafine i Uarota ma Paranesi

E ui lava ina faia e tuafafine faatuatua o le Aualofa a latou uunaiga ia lagonaina i o latou nuu ma le lalolagi atoa, ae sa lei galo lava ia i latou ona fefaamalosia’i o le tasi i le isi i a latou lava uarota ma paranesi. O Sister Julie B. Beck, o le na avea mulimuli ane ma peresitene aoao lona sefululima o le Aualofa, na ia mauaina le usoga faatamaitai, sulufaiga, ma le uunaiga a le Aualofa ina o avea o ia ma se tina talavou ma se tausiaiga e leai se poto masani. Na ia toe ta’ua:

“E tatau ona faatulagaina le Aualofa, faaogatasi, ma faagaoioia e faamalolosia ai aiga ma fesoasoani ia avea maota ma laoa ma malutaga mai le lalolagi. Sa ou aoaoina lenei mea i tausaga ua mavae ina ua ou faatoa faaipoipo. Sa faasilasila mai e o’u matua, o ē sa avea ma o’u tuaoi, o le a la siitia atu i se isi vaega o le lalolagi. Sa ou faalagolago i le faafailelega a lo’u tina, ma ana faataitaiga poto, ma le faamalosiau. A o lea o le a alu mo se taimi umi. O le taimi lea e le’i i ai ni i-meli, masini fesi, telefoni feavea’i, ma mea pueata faaonaponei, ma sa matua matautia le tuai o meli feavea’i. I se tasi aso a o le’i tuuvaa ese atu o ia, sa ma fetagisi ai ma ia ma sa ou fesili, ‘O ai la o le a fai ma o’u tina?’ Sa mafaufau toto’a Tina, ma faatasi ai ma le Agaga ma le mana o faaaliga ia e oo mai i na ituaiga o tamaitai, sa ia fai mai ai ia te au, ‘Afai ou te le toe foi mai, afai e te le toe vaai lava ia te au, afai e le toe mafai lava ona ou toe aoao atu ia te oe se isi mea, ia e noatia oe lava i le Aualofa. O le Aualofa o le a avea ma ou tina.’

“Sa iloa e lo’u tina afai ou te ma’i, o le a tausia au e tamaitai, ma afai ou te fanauina a’u fanau, o le a latou fesoasoani mai ia te au. Peitai, o le faamoemoega aupito silisili o lo’u tina, ia avea uso o le Aualofa ma o’u taitai mamana, ma le faaleagaga. Sa amata mai lea taimi i lea taimi ona ou aoaoina mea e tele mai tamaitai taualoa ma le faatuatua.”²¹

O Se Li’o Ua Matua Faateleina o Tuafafine

O le taimi muamua na faamatala ai e Peresitene Boyd K. Packer i se tulaga lautele lona aafiaga i tuafafine o le Aualofa i Siekisolovakia, sa ia saunoa ai i se sauniga aoao a le Aualofa i le 1980. Na ia saunoa, “O iina na ou maua ai le faaaliga o se li’o tele o tuafafine.”²² I le 1998 sa ia toe faamatala ai foi lena aafiaga, a o le taimi lenei o se konafesi aoao na ia saunoa ai i le Ekalesia atoa. Sa ia matauina, “O le Aualofa ua lē na o se li’o i le taimi nei; ua pei o se ie leise ua fofola i konetineta.”²³

O tuafafine o le Aualofa o se vaega o se faalapotopotoga musuia faalelagi lea na faatuina e le Perofeta o Iosefa Samita i lalo o le pule faaleperisitua. A auai tamaitai i le Aualofa ma tuuto atu i latou lava i ai, o le a faaauau pea ona latou maua le sulufaiga ma le usoga faatamaitai ma avea ma uunaiga mamana, mo le lelei. Sa folafola mai e Peresitene Packer ia faamanuiaga silisili i tuafafine o ē galulue i lenei galuega:

O le a faataunuuina ou manaoga uma i le taimi nei ma le faavavau; o tulaga le amanaia uma o le a tafiesea; o le sauaina ma faiga faatautala taitasi o le a faasa’oina. O nei mea uma e mafai ona oo mai ia te oe, ma oo vave mai, pe a e tuuto atu oe lava i le Aualofa.”

“O le galue ai i le Aualofa e faalauteleina ai ma faapaiaina ai tuafafine taitasi. E tatau lava ona tumau lou avea ai ma uso o le Aualofa. A e tuuto atu oe lava i le Aualofa ma faatulagaina ma faagaoioia ma auai, ua e lagolagoina le galuega o le a faamanuiaina ai tamaitai uma e o mai i totonu o lana uunaiga.”²⁴

Faamalolosia o le Usoga Faatamaitai e ala i le Faaalia o le Alofa Moni

I se saunoaga i tuafafine o le Aualofa, sa faasoa mai ai e Peresitene Thomas S. Monson ona mafaufauga e uiga i le ala e faamalolosia ai noataga o le usoga faatamaitai i le Aualofa pe a faaalia le alofa moni.

“Ou te mafaufau i le alofa moni—po o le ‘alofa mama o Keriso’—o le faafeagai o le faitio ma le faamasinosino. I le ta’ua ai o le alofa moni, ou te le o mafaufau i le taimi nei i le faaolatotoga i ē mafatia e ala i le foai atu o mea. Ioe, o lena mea e taua ma e tatau ai. Peitai, o le po nei, ou te mafaufau i le alofa moni lea e faaalia ia lava, pe a tatou taliaina isi ma amanaia a latou taga fai, o le ituaiga o alofa moni e faamagalo atu, o le ituaiga o alofa moni e onosai.

“Ou te mafaufau o le alofa moni lea e uunaia ai i tatou e tigaalofa, agaalofa, ma alofa mutimutivale, e le gata i taimi o ma’i ma mafatiaga ma faanoanoaga, ae faapea foi i taimi o vaivaiga po o sese o isi.

“O loo i ai se tulaga manaomia taua mo le alofa moni lea e gauai atu ai ia i latou e le o amanaiaina, faamoemoe ia i latou ua faavaivai, fesoasoani ia i latou ua mafatia. O le alofa moni o le alofa e faatino. O loo i ai i soo se mea le tulaga manaomia o le alofa moni.

“O loo manaomia le alofa moni lea e le manao ai e su’e le faamalieina i le faalogo atu po o le fai faafia mai o lipoti o mala e fetaiai ma isi, vagana ai o le faia o lea mea, e mafai ai ona manuia lē sa feagai ma le mala. …

“O le alofa moni o le i ai lea o le onosai i se tasi na ta’uvaleaina i tatou. O le teena lea o le lagona faama’ite e itaita gofie. O le taliaina lea o vaivaiga ma sese. O le taliaina o tagata i o latou tulaga moni o i ai. O le tilotilo i luga atu o foliga faaletino agai i uiga paia o le a le matafi i le gasologa o taimi. O le teenaina lea o lagona faama’ite e tuufaavasega isi.

“O le alofa moni, o lena alofa mama o Keriso, e faaalia pe a malaga atu se vaega o tamaitai talavou mai se uarota a le au nofofua i le fiaselau o maila e auai i sauniga falelauasi o se tina o se tasi o tuafafine o la latou Aualofa. O le alofa moni e faaalia pe a toe taliu atu i lea masina ma lea masina ia faiaoga asiasi, o lea tausaga ma lea tausaga i le tuafine lava lea e tasi e le fia gauai atu, ma faigata. E iloagofie pe a manatuaina se fafine matua ua oti lana tane ma avatu i gaoioiga a le uarota ma gaoioiga a le Aualofa. E lagonaina pe a maua e se tuafafine e nofonofo na o ia i le Aualofa se valaaulia, ‘Sau—tatou nonofo.’

“I le selau o ni ala iti, ua ofu ai e outou uma le ofutalaloa o le alofa moni. E leai se tasi o i tatou ua atoatoa i le olaga. Nai lo le faamasinosino ma faitio o le tasi i le isi, ia tatou maua le alofa mama o Keriso mo i latou o loo tatou malaga faatasi i lenei malaga o le olaga. Ia tatou iloa o loo tofu faia e tagata taitoatasi le mea sili na te mafaia e taulima ai faigata e fetaiai ma ia i le ala, ma ia tatou taumafai e faia le mea silitatou te mafaia e fesoasoani ai.

“O le alofa moni ua faamatalaina o le ‘ituaiga alofa e aupito maualuga, tamalii, ma aupito malosi,’ o le ‘alofa mama o Keriso … ; ma pe o ai lava e maua o i ai lena alofa i le aso mulimuli, amuia lava ‘[ia].’

“‘E le uma le alofa.’ Talosia ia taialaina outou e lenei mautauave ua loa a le Aualofa, lenei upumoni e faavavau, i a outou mea uma e fai. Ia faatumulia ai o outou agaga ma ia faaalia i o outou mafaufauga ma faatinoga uma.”²⁵

E maua e tuafafine o le Aualofa le alofa ma le saogalemu mai matagi o le olaga pe a latou galulue faatasi.

E o mai faatasi sui auai o le Aualofa i se li’o o le usoga faatamaitai.

“Po o fea lava e o i ai [se aiga], e i ai lava se aiga o le Ekalesia e faatali maia i latou” (Boyd K. Packer).

Maota o le Aualofa, Aai o Sate Leki, Iuta, 1956

O Sister Belle S. Spafford, tauagavale, i se mafutaga a le Fono Aoao a Tamaitai Faavaomalo

O tamaitai o le Aualofa ma ni faifeautalai faamisiona i San Antonio, Texas, pe tusa o le 1950

E faapei o Aposetolo anamua a le Faaola, e mafai foi ona avea tamaitai o le Aualofa ma tufugaaao o le Atua.

E mafai e le auauna atu ona suia le lalolagi mo le mea e sili atu.

O le tomai e faitau ai e fesoasoani lea i tamaitai e faaleleia ai o latou tulaga, suesue le talalelei, ma aoao a latou fanau.

O se aufaipese a le Aualofa o loo pepese i le Tapeneko i Sate Leki, 1956

“O le alofa moni o le alofa e faatino. O loo manaomia le alofa moni i soo se mea” (Thomas S. Monson).

E lagonaina le alofa moni i se valaaulia “Sau—tatou nonofo.”