Mataupu 8
O Faamanuiaga o le Perisitua e mo Tagata Uma
O Se Sootaga e Le Mavavaeeseina ma le Perisitua
Na auala mai i le Perofeta o Iosefa Samita, na toefuatai mai ai le perisitua a le Atua i le lalolagi i lona atoaga. O le perisitua o le mana ma le pule faavavau a le Atua lea Na te faamanuia ai, faaolaina, ma faaeaina Ana fanau, ma faataunuuina ai “le faaofuina i le tino ola pea ma le ola faavavau o le tagata.”1
E faauuina atalii agavaa o le Tama Faalelagi i tofi o le perisitua ma e tofia i latou i tiute patino ma tiutetauave. E faatagaina i latou e galulue i Lona suafa e vaavaai Ana fanau ma fesoasoani ia i latou ia maua ia sauniga ma faia ma faamamaluina feagaiga. O atalii uma ma afafine o le Tama Faalelagi e faamanuiaina tutusa pe a latou utuvai atu i mana o le perisitua.
I se lauga i le konafesi aoao, sa aoao mai ai Elder Dallin H. Oaks o le Korama a Aposetolo e Toasefululua: “E ui o nisi taimi tatou te faasino atu ai i e umia le perisitua ‘o le perisitua,’ e le tatau ona galo ia i tatou o le perisitua e le pulea pe faitino e i latou o ē umiaina. E umia i se faatuatuaga paia ina ia faaaoga mo le manuia o alii, tamaitai, ma fanau.”2 Ona sii mai ai lea e Elder Oaks ia Elder John A. Widtsoe, o lē sa avea foi o se tasi o le Korama a le Toasefululua: “E le sili atu se faiā a alii nai lo tamaitai i faamanuiaga e tuuina mai e le Perisitua ma lona umiaina.”3
“O Ē e Mauaina Atoatoa Faamanuiaga Faaleagaga o le Perisitua”
E toatele tamaitai o le Au Paia o Aso e Gata Ai ua molimauina faamanuiaga o le perisitua i o latou olaga. Na faaalia e Sister Elaine L. Jack, le peresitene aoao lona sefululua o le Aualofa, ia lagona o isi uso o le Aualofa. “E i ai sa’u molimau mausali i le mana o le perisitua i olaga o tagata uma o le Ekalesia,” na ia saunoa ai. “I le Mataupu Faavae ma Feagaiga ua ta’u mai ai ia i tatou … o le Perisitua Mekisateko e umia ‘ki o faamanuiaga faaleagaga uma o le ekalesia’ (MFF 107:18). Ou te iloa o le mana lea ma le pule a le Atua i le lalolagi e faamanuiaina ai o tatou olaga ma fesoasoani tatou te faafesoota’ia ai o tatou aafiaga faalelalolagi ma le faavavau. A tatou mauaina faamanuiaga o le perisitua, ua tatou utuvai mai le mana ma le alofa tunoa o le Atua.” Na faaauau ai le saunoaga a Sister Jack:
“E taua tele ia te au le faatulagaina o tamaitai i lalo o le pule a le perisitua. Tatou te lagolagoina le perisitua ma e lagolagoina i tatou i lona mana. O uso o le Ekalesia … e faapelepele i lo tatou avanoa e avea ai ma ni ē mauaina atoatoa faamanuiaga faaleagaga o le perisitua.
“E mafai ona taitaia ma faamanuiaina i tatou taitoatasi i lo tatou alualu i luma e faavavau e ala i le mauaina o nei faamanuiaga. O sauniga, feagaiga, faamauga, ma le meaalofa o le Agaga Paia e tatau ai mo le faaeaga. E anoanoai foi faamanuiaga eseese o le perisitua. O faamanuiaga o le perisitua e aumaia ai ia i tatou le taitaiga; latou te siitia a tatou vaaiga; latou te faamalosiauina ma musuia i tatou; latou te uunaia a tatou tautinoga. E mafai ona avea i tatou uma ma ni ē mauaina nei faamanuiaga faaleagaga.”4
Sa faaleoina mai e Sister Sheri L. Dew, o lē sa avea o se fesoasoani i le au peresitene aoao o le Aualofa, nei aoaoga: “Uso e, o le a i ai nisi e taumafai e faatauanau outou faapea, talu ai e le faauuina outou i le perisitua, o se faiga faaituau. Ua matua sese lava i latou, ma e latou te le malamalama foi i le talalelei a Iesu Keriso. O loo avanoa faamanuiaga o le perisitua mo alii ma tamaitai amiotonu uma. E mafai ona tatou mauaina uma le Agaga Paia, maua faaaliga e patino i le tagata lava ia, ma maua faaeega paia i le malumalu, lea tatou te tulai mai ai ua ‘faaauupegaina’ i le mana. O le mana o le perisitua e faamalolo ai, puipuia, ma puipuia ai ē amiotonu uma mai mana o le pogisa. O le mea e aupito sili ona taua, o le atoaga o le perisitua o loo i ai i sauniga e aupito sili ona maualuga i le maota o le Alii, e na o le tuufaatasia o se alii ma se tamaitai e mauaina ai.”5
Sauniga, Feagaiga, ma Faamanuiaga
Ina ua faatulagaina e Iosefa Samita le Aualofa i Navu, Ilinoi, i le tautotogo o le 1842, o ona sui auai o ni tamaitai ua uma ona faamanuiaina e ni sauniga o le perisitua ma feagaiga. Sa papatisoina i latou mo le faamagaloga o agasala. Sa latou mauaina le meaalofa o le Agaga Paia, ma latou maua ai le aia tatau mo le mafutaga faifai pea a le Agaga ma le tomai e taialaina ai e faaaliga patino. Sa latou aai ma feinu i le faamanatuga e manatua ai Iesu Keriso ma a latou feagaiga. Sa latou mauaina meaalofa o le Agaga. O nisi ua maua o latou faamanuiaga faapeteriaka, ma ua aoao ai e uiga i a latou meaalofa patino ma gafatia, ma lo latou piitaga i le aiga o Isaraelu. Ua faamaloloina i latou e le Alii, faamafanafanaina, ma aoaoina i latou e tusa ai ma o latou manaoga, lo latou faatuatua, ma Lona finagalo.
Elizabeth Ann Whitney
Sa aoaoina e Sister Elizabeth Ann Whitney, o lē sa auai i le uluai fonotaga a le Aualofa, e uiga i le talalelei toefuataiina i le 12 tausaga na muamua atu, i le 1830. “O le taimi lava na ou faalogo ai i le Talalelei a o folafolaina e Faifeau,” sa ia fai mai ai, “sa ou iloaina o le leo lava lea o le Leoleo Mamoe Lelei.” Sa “papatisoina loa lava o ia,” a o lona toalua o Newel K. Whitney, sa papatiso i ni nai aso mulimuli ane.6 O le toe tomanatu i lenei aafiaga, sa ia faamatalaina ai faamanuiaga sa ia mauaina e ala i sauniga o le perisitua o le papatisoga ma le faamauga:
“Afai e i ai ni mataupu faavae ua ou maua ai le malosiaga, ma ua ou aoao ai e ola faamaoni atili i se olaga aoga, e foliga mai ia te au e mafai ona ou momoo e faasafua atu lenei olioli ma le malosi i isi; e ta’u atu ia i latou le taua o le Talalelei ia te au, talu ona ou taliaina ma aoao ai e ola i ona tulafono. O se faaaliga fou a le Agaga i lea aso ma lea aso, o se tatalaina mai o mealilo lea na pogisa muamua, loloto, ma lē mafaamatalaina ma lē malamalama ai; o se faatuatua e aupito sili ona lē leoa i se mana faalelagi, i le upumoni e le i’u e faapogai mai le Atua le Tama.”7
Meaalofa o le Agaga
I le aso 28 o Aperila, 1842, sa saunoa ai Iosefa Samita i se fonotaga a le Aualofa a Tamaitai o Navu. O se vaega o lana saunoaga sa faavae i aoaoga a le Aposetolo o Paulo i le 1 Korinito 12–13 e uiga i meaalofa a le Agaga. Sa faamamafaina ai e Iosefa Samita e faapea “o nei faailoga, e pei o le faamaloloina o ē mama’i, tutulieseina o temoni ma isi mea faapena, e tatau ona mulimuli atu ia i latou uma e talitonu.”8
Ona ua maua e tamaitai o le Au Paia o Aso e Gata Ai le meaalofa o le Agaga Paia, o lea ua mafai ai ona latou sailia ma faamanuiaina e ala i meaalofa faaleagaga e pei “o le meaalofa o gagana, valoaga, faaaliga, vaaiga mamao, faamalologa, faamatalaina o gagana, ma isi.”9 I le talafaasolopito o le Ekalesia, ua maua e tamaitai o le Au Paia o Aso e Gata Ai meaalofa o le Agaga ma faaaogaina e faamanuiaina ai o latou aiga ma isi.
Sa i ai Amanda Barnes i le aso 28 o Aperila, 1842 ina ua aoao atu e Iosefa Samita ia tuafafine o le Aualofa e uiga i meaalofa a le Agaga. Sa ia iloaina le moni o ana aoaoga, aua sa faamanuiaina o ia i le meaalofa o faaaliga pe tusa o le fa tausaga na muamua atu, i se taimi sa ia manaomia ai le fesoasoani a le Alii ia faasaoina lana tama tama.
I le faaiuga o Oketopa i le 1838, sa agai atu ai Amanda ma lona toalua, o Warren ma le la fanau ma isi tagata o le Ekalesia, i Sisifo Mamao, Misuri. Sa latou malolo i se ililaupapa e lipea la latou taavaletoso. A o i ai i latou iina, sa osofaia e ni tagata leaga le Au Paia o Aso e Gata Ai sa faigaluega ai i le ililaupapa, ma sa fasiotia ai ni tamaloloa se 17 ma ni tamaiti, ae manunu’a le toa 15. Sa lafi Amanda i le taimi o le osofaiga, ma sa toe foi atu o ia ma maua ai Warren ma le la tama tama o Sardius i ē ua maliliu. O le isi atalii, o Alema, sa matua tuga ona manu’a. Sa masofa lona suilapalapa i se pulufana. Sa faamatala e Amanda mulimuli ane le faaaliga patino sa ia mauaina ina ia mafai ai ona faamaloloina lana tama:
“Sa ou i ai iina, i lena po umi ma le matautia, faatasi ma lo’u toalua ma la’u tama ua maliliu ma la’u tama manu’a, ma sa leai lava se tasi ua na o le Atua o lo matou fomai faapitoa ma le fesoasoani.
“Oi lo’u Tama Faalelagi e, sa ou tagi atu ai, o le a se mea ou te faia? Ua e silasila mai i si a’u tama ua manu’a ma ua e silafia lo’u lē iloa o se mea. Le Tama Faalelagi e, taitai a’u i le mea e fai!
“Ona taitai ai lea o au e faapei o loo tautala mai se leo ia te au.”
Sa taitaiina Amanda e faia se vai mai lefulefu o fualaau faisua, po o se vailaau mo tagamea, mai lefulefu o le latou afi e fufulu ai le manu’a. Ona taitaiina lea o ia e matuai faavevela se ie e tuuina i le manu’a e tau faamama ai le tiga ma se laau mase’ese’e mai le laau o le elm e faatumu ai le manu’a. O le aso na sosoo ai sa na maua ai ni pasama ma liligi atu i le manu’a e fesoasoani ai i le tiga o Alema.
“‘Alema si a’u tama,’ sa ou fai atu ai, ‘e te talitonu na faia lou suilapalapa e le Alii?’
“‘Ioe tina.’
“‘Ia, e mafai e le Alii ona faia se mea iina e sui ai lou suilapalapa, pe e te lē talitonu na te mafaia, Alema?’
“‘E te manatu e mafaia e le Alii, tina?’ na fesili ai le tamaitiiti, i se fesili faigofie.
“‘Ioe, la’u tama e,’ sa ou tali atu ai, ‘ua uma ona ia faaalia uma mai ia te au i se faaaliga.’
“Ona ou faataotoina ai faalelei lea o ia faafao, ma fai atu: ‘Ia taoto ai la’ia faapena, aua e te gaoioi, o le a faia e le Alii se isi suilapalapa mo oe.’
“O lea na faō ai Alema mo le lima vaiaso, seia iu ina malosi atoatoa—ua ola se ivi maaleale i le mea sa i ai le sooga ma le soketi lea na misi, … o se mea na maofa ai fomai.
“I le aso sa toe savali ai o ia, sa ou alu e asu mai se pakete vai, ae ou faalogoina le feei o tamaiti. Sa ou toe tamoe i le fale, i lo’u fefe, ma ina ua ou ulu atu i totonu, o la e sivasiva mai Alema i luga o le fola, a o la e feei tamaiti i le ofo tele ma le fiafia.”10
O le meaalofa faaleagaga o faaaliga, sa aoaoina ai e le Alii ia Sister Smith i le ala e tausia ai lana tama. O ia, e faapei foi o Elizabeth Ann Whitney ma le anoano o isi e le mafaitaulia, sa latou mauaina le “olioli ma le malosi” ma “faaaliga fou a le Agaga”11 ona o lona faatuatua.
O Faamanuiaga o le Malumalu
O se tasi o faamoemoega o le Alii i le faatulagaina o le Aualofa o le saunia lea o Ona afafine mo faamanuiaga e sili atu o le perisitua, o loo maua i sauniga ma feagaiga o le malumalu. Sa faatalitali ma le naunautai tele ia uluai tuafafine i Navu ia mae’a le malumalu aua sa latou iloa, e pei ona sa folafola atu e le Perofeta o Iosefa Samita ia Mercy Fielding Thompson, o le faaeega paia o le a aumaia ai i latou “mai le pogisa i le malamalama ofoofogia.”12
Na faaalia mai e le Alii e ala i le Perofeta o Iosefa Samita, mea nei i le Au Paia o Aso e Gata Ai i Katelani, Ohio: “Na ou tuuina atu ia te outou le poloaiga ia outou faia se fale, i lena foi fale ou te loto ina faauuina ai i latou o e ua ou filifilia i le mana mai luga.”13 Sa Ia folafola mai e tuu atu i le Au Paia faamaoni se “faatelega o faamanuiaga,”14 ma sa Ia tautino mai foi o le malumalu o le a “fai ma mea e faafetai atu ai mo le au paia uma, ma … mea e aoaoina ai i latou uma ua valaauina i le galuega i o latou valaauga eseese ma tofiga uma; ina ia faaatoatoaina i latou i le malamalamaaga o la latou galuega, i teori, i mataupu autu, atoa ma mataupu faavae i mea uma e uiga i le malo o le Atua i le lalolagi.”15
I Navu, sa toe poloaiina ai foi e le Alii le Au Paia e fau se malumalu, ma sa fetalai atu ai o le a Ia toefuatai maia le “atoaga o le perisitua” ma “faaalia [Ana] sauniga” iina.16
Sa fesoasoani uso o le Aualofa o le tasi i le isi e saunia mo nei sauniga ma feagaiga e o faatasi ai. Sa latou saofagā atu i le fauina o le malumalu, a’oa’o mai le Perofeta ma mai le tasi ma le isi i fonotaga a le Aualofa, auauna atu ma le agaalofa o le tasi i le isi, ma saili e ola i le paia e sili atu.
Ina ua lata ina mae’a le malumalu, sa tofia tamaitai e 36 e galulue i sauniga i le malumalu. Sa toe ta’ua e Elizabeth Ann Whitney, o se tasi o na uluai tagata fai galuega i le malumalu: “Sa ou ofoina atu a’u lava, o o’u taimi ma le gauai i lena misiona. Sa ou faigaluega i le Malumalu i aso uma e aunoa ma se malolo seia i’u ina tapuni.”17
I sauniga o le perisitua maualuga na maua e le Au Paia i le Malumalu i Navu, “[na] faaalia ai le mana o le amioatua.”18 A o tausia e le Au Paia a latou feagaiga, sa faamalolosia ma lagolagoina i latou e lenei mana i taimi o o latou tofotofoga i aso ma tausaga o i luma (tagai mataupu e 3).
Iosefa Filitia Samita
I le Ekalesia i ona po nei, o loo faaauau pea ona galulue tamaitai ma alii faamaoni i le lalolagi atoa i malumalu ma latou maua ai le malosiaga i faamanuiaga e na o sauniga o le malumalu e mafai ona maua ai. E pei ona saunoa i ai Peresitene Iosefa Filitia Samita, le Peresitene lona sefulu o le Ekalesia, “E i ai le avanoa o tuafafine o lenei Ekalesia e maua ai le faaeaga i le malo o le Atua ma maua le pule ma le mana e avea ai o ni masiofo ma ni faitaulaga tamaitai.”19
Perisitua i le Aiga
E fesoasoani tuafafine o le Aualofa e faamalolosia aiga ma auaiga, ma fesoasoani ai i le faataunuuina o se tasi o faamoemoega faavae o le perisitua. “Ua toefuatai mai le pule o le perisitua,” na saunoa ai Elder Russell M. Nelson o le Korama a Aposetolo e Toasefululua, “ina ia mafai ai ona faamauina aiga e faavavau.”20 Na aoao mai foi Elder Richard G. Scott, o le Korama a le Toasefululua: “O le aiga ma le auaiga o le faavae lea o le ola amiotonu. O le perisitua o le mana lea a o le laina o le perisitua o le auala ua saunia e le Alii e lagolago ai le aiga.”21 E lagolago le Aualofa i lenei galuega e ala i le fesoasoani atu i tamaitai ma o latou aiga ia ola i le talalelei i se ala e mafai ai ona latou maua faamanuiaga folafolaina o le perisitua.
Tane ma le Ava
Na saunoa Elder Dallin H. Oaks o le Korama a Aposetolo e Toasefululua: “O le faailoaga aupito taua ma maualuga o le tulaga faatamaitai ma le faatamatane, o le feagaiga fou lea ma le faavavau o le faaipoipoga i le va o se alii ma se tamaitai. Na pau lenei o le sootaga e i’u i le faaeaga. E pei ona sa aoao mai e le Aposetolo o Paulo, ‘E leai se tane pe a le o i ai le fafine, e leai foi se fafine pe a le o i ai le tane, i le Alii.’”22 Ua faamautu mai e tusitusiga paia anamua lenei mea i tala o le feagaiga o faaipoipoga i le va o Aperaamo ma Sarai, Isaako ma Repeka, ma Iakopo ma Rasela. O le sauniga o le faamauga e noatia ai le tane ma le ava o le tasi i le isi, i a la’ua fanau, ma lo latou Tama i le Lagi. “O lea,” na faaauau ai le saunoaga a Elder Oaks, “o le faamoemoega masani lava … o a tatou korama o le perisitua ma … i a tatou Aualofa, o le aumaia lea o alii ma tamaitai faatasi i le faaipoipoga paia ma sootaga faaleaiga e tau atu ai i le ola faavavau, ‘o le meaalofa aupito silisili o meaalofa uma a le Atua.’”23
A faamanuiaina se tane ma se ava i le avanoa e avea ai o ni matua, la te taufai tauaveina le tiutetauave paia e fesoasoani i a la fanau ia malamalama ma maua sauniga ma feagaiga o le perisitua.24 O o tatou uluai matua, o Atamu ma Eva, sa la faatuina se faataitaiga o se sootaga felagolagoma’i ma le soofaatasi, ina ua la aoaoina a la’ua fanau. Na aoao mai e Elder Bruce R. McConkie o le Korama a Aposetolo e Toasefululua:
“Sa lē na o Atamu, sa aofia ai i nei mea. …
“O Eva o sē sa auai patino. Sa ia faalogo i mea uma sa fai atu ai Atamu. Sa ia tautala i ‘la ma solitulafono,’ i ‘le olioli o lo ta’ua togiolaina,’ i le ‘fanau’ o le a la mauaina faatasi, ma le ‘ola faavavau’ lea e le mafai ona oo mai i le na o se toatasi o i la’ua, ae ua faapolopolo pea faatasi mo se tane ma se fafine.
“Sa tatalo o ia faatasi ma Atamu; sa la faamanūina faatasi le suafa o le Alii; sa la aoaoina faatasi a la’ua fanau; sa la mauaina faatasi faaaliga; ma sa poloaiina e le Alii i la’ua uma e tapuai atu ma auauna atu ia te ia i le suafa o Iesu Keriso e faavavau.”25
Ua faamalosiauina e perofeta ma aposetolo o aso e gata ai ia tane ma ava ina ia mulimuli i lenei mamanu i o latou aiga: “I le fuafuaga paia, e tatau ona pulefaamalumalu tamā i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga: O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa. O mea e faaletonu, oti, po o nisi mea e tula’i mai, e alagatatau ai ona fetuutuunai tagata taitoatasi. E tatau i aiga lautele ona tuuina atu le lagolago pe a manaomia.26
O loo mulimuli le Au Paia o Aso e Gata Ai i le lalolagi atoa i lenei fautuaga i ala faigofie ae mamana. E faapotopoto e tane ma ava a latou fanau e tatalo ma faitau tusitusiga paia. I le tele o aiga, e faatuina e matua se nofoaga faapitoa—atonu o se fata faatauvaa—e tuu ai a latou tusitusiga paia ma isi punaoa a le Ekalesia. Latou te aoao atu le talalelei e ala i a latou upu ma a latou faataitaiga. Latou te fesoasoani foi i a latou fanau e sauniuni mo le mauaina o faamanuiaga o le malumalu, auauna atu i misiona tala’i, faavaeina o latou lava aiga, ma faaauau pea ona auauna atu i le Ekalesia. E faapei o Atamu ma Eva, latou te faasoa o latou tiutetauave e faiaoga ai, tatalo ai, auauna atu ai, ma tapuai ai i le Alii.
E i ai nisi tulaga, e ono lagona e le tane po o le ava le tuuatoatasi i nei tiutetauave, ona e lei osia feagaiga e o latou taitoalua pe ua solomuli foi mai feagaiga sa faia. E oo lava i nei tulaga, e le tatau ona maua e tagata faamaoni o le aiga se lagona ua tuulafoaiina. E faamanuiaina i latou ma faamalolosia e ala i sauniga o le perisitua ua latou maua ma feagaiga latou te tausia. E mafai foi ona latou valaau atu mo le lagolago a tagata o aiga lautele ma isi o le Au Paia o Aso e Gata Ai.
Tuafafine Nofofua ma le Perisitua
E toatele tagata o le Au Paia o Aso e Gata Ai e le faaipoipo. O isi e nofofua ona ua maliu se toalua, pe ua lafoaia, pe tatala foi se faaipoipoga. E pei foi o tagata uma o le Ekalesia, o nei tagata o le a faamanuiaina pe a tumau lo latou faamaoni i a latou feagaiga ma faia uma mea latou te mafaia e taumafai ai mo le mea sili e ola ai i se aiga faavavau. E mafai ona latou olioli i faamanuiaga, malosi, ma le uunaiga a le perisitua i o latou olaga ma aiga e ala i sauniga ua latou mauaina ma feagaiga latou te tausia.
Sa faamatala e Elder Dallin H. Oaks le faamaoni o lona tina, o lē sa maliu lana tane a o talavou o ia. Ona ua uma ona faamauina o ia i lana tane i le malumalu, o lea sa lei manatu ai lava o ia faapea ua nofofua; ae ui i lea, sa ia tausia lava na o ia lana fanau e toatolu. Sa toe ta’ua e Elder Oaks:
“Na oti lo’u tama i le fitu o o’u tausaga. O au o le ulumatua o le fanau laiti e toatolu a lo matou tina ua oti lana tane, lea sa tauivi e tausia. Ina ua faauuina a’u o se tiakono, sa ia fai mai ua matuai fiafia lava o ia ina ua i ai se tasi e umia le perisitua i le aiga. Peitai, sa tumau pea ona taitaia e Tina le aiga, e aofia ai le tofia po o ai o i matou e tatalo pe a matou tootutuli faatasi i taeao taitasi. …
“Ina ua oti lo’u tama, sa pulefaamalumalu lo’u tina i lo matou aiga. Sa leai sona tofi o le perisitua, ae i le avea ai o se matua o loo ola o la la’ua ulugalii, o lea sa avea ai o ia ma tofi e pulea lona aiga. O le taimi foi lena, sa ia matua faaaloalo ai i le pule o le perisitua a lo matou epikopo ma isi taitai o le Ekalesia. Sa pulefaamalumalu o ia i lona aiga, ae sa latou pulefaamalumalu i le Ekalesia. …
“O le tina faamaoni ua oti lana tane, lea sa tausia i matou, sa lei fenumia’i ia te ia le natura faavavau o le aiga. Sa ia faamamaluina i taimi uma le tulaga o lo matou tama ua maliu. Sa faia e ia e pei o la lava e i ai i lo matou aiga. Sa ia talanoa i le tumau e faavavau o la la’ua faaipoipoga i le malumalu. E tele taimi na te faamanatu mai ai ia i matou le mea e manao lo matou tamā matou te faia ina ia matou iloa ai folafolaga a le Faaola e mafai ona faavavau lo matou aiga.”27
Sa faamatala e se tasi alii lona tina sa pulefaamalumalu i le aiga: “I le taimi tonu sa ou sauniuni ai e faamisiona talai, sa tuua e lo’u tama lo matou aiga ma le Ekalesia. Ona o nei tulaga, sa faigata ai ia te au ona tuua le aiga mo tausaga e lua, peitai sa ou alu. A o ou talai i se nuu mamao, sa ou faalogo i le malosi o lo’u tina i le fale. Sa ia manaomia ma talisapaia le gauai faapitoa atu mo ia o alii sa umia le perisitua—o lona tama ma ona tuagane, o ona faiaoga o aiga, ma isi alii o le uarota. Peitai, o lona malosiaga silisili na maua mai i le Alii lava Ia. Sa lei tau faatalitali o ia mo se asiasiga ina ia maua ai faamanuiaga o le perisitua i lona fale, ma a oo ina tuua na asiasiga, e lei o ma aveese atu ai na faamanuiaga. Talu ai sa faamaoni o ia i ana feagaiga na faia i le vai o le papatisoga ma le malumalu, o lea sa i ai lava ia te ia i taimi uma faamanuiaga o le perisitua i lona olaga. Sa tuuina atu e le Alii ia te ia o musumusuga ma le malosi e sili atu i lona lava malosi, ma sa ia tausia se fanau ua latou tausia foi feagaiga lava e tasi sa lagolagoina ai o ia.”28
Sa malamalama nei tamaitai sa latou mauaina le malosiaga faaopoopo ma le fesoasoani e ala i feagaiga sa latou osia ma tausia.
Auaunaga i le Ekalesia
O i latou uma e galulue i se tofiga aloaia i Le Ekalesia a Iesu Keriso o le Au Paia o Aso e Gata Ai, e faia i lalo o le taitaiga ma le pule a i latou o loo umia ki, e pei o epikopo ma peresitene o siteki. I le Aualofa, na faavaeina lenei mamanu i le uluai fonotaga a le Aualofa. E pei ona faatonuina ai e le Perofeta o Iosefa Samita, sa faaee ai e Elder Ioane Teila o le Korama a Aposetolo e Toasefululua ona lima i luga o ulu o Sister Ema Samita ma ona fesoasoani, o Sisters Sarah M. Cleveland ma Elizabeth Ann Whitney, sa auaua’i taitoatasi. Sa ia faamanuiaina i latou ina ia taialaina i la latou auaunaga. Talu mai lava i lena taimi, o tuafafine sa galulue i valaauga i le Aualofa, ma isi valaauga uma o le Ekalesia, ma o ni faiaoga asiasi, sa latou galulue lava i lalo o le pule a i latou e umia ki o le perisitua.
Na ta’ua e Peresitene Boyd K. Packer, o le Korama a Aposetolo e Toasefululua:
“O le Aualofa e galulue i lalo o le taitaiga a le Perisitua Mekisateko, aua ‘o isi pule uma po o tofi i le ekalesia o itutino o lenei perisitua:’ Sa faatulagaina ‘i le mamanu o le perisitua.’ …
“E silafia e le Usoga o i latou o itutino o se korama o le perisitua. Peitai, ua toatele naua tuafafine, ua manatu o le Aualofa ua na o se vasega e ō i ai. O le agaga lava lea e tasi o seitutino o le Aualofa e tatau ona i ai nai lo le na o le auai i se vasega, e tatau ona tamau i loto o tamaitai taitoatasi.”29
E faatulagaina e korama o le perisitua ia alii i se usoga e avatu ai le auaunaga, e aoao ai ma faatino o latou tiute, ma suesue aoaoga faavae o le talalelei. E faataunuu e le Aualofa nei faamoemoega e tasi mo tamaitai o le Ekalesia. O tamaitai uma lava i le Ekalesia o itutino o le Aualofa, tusa lava pe i ai isi o latou tiutetauave e faigata ai ia i latou ona auai atu i fonotaga uma a le Aualofa. E vaavaaia lava i latou ma aoaoina e ala i le usoga a tamaitai o le Aualofa.
Lotogatasi: “E Tatau ona Galulue Faatasi Tagata Uma”
I Le Ekalesia a Iesu Keriso o le Au Paia o Aso e Gata Ai, e tatau i alii ma tamaitai ona faamalolosia ma faamausali e le tasi le isi ma galulue faatasi i le lotogatasi. Na fetalai mai le Alii, “Ia tasi outou; aua a le tasi outou e le a a’u outou.”30
Na aoao mai e le Perofeta o Iosefa Samita, “O tagata uma e tatau ona galulue faatasi, a leai e leai se mea e mafai ona faia.”31 Ma sa ia faatuina se faataitaiga e ala i le galulue faatasi ai ma isi. Sa manatua ma faapelepeleina e Sister Eliza R. Snow lenei faataitaiga i lona olaga atoa. Sa ia faamatala atu i taitai o le Ekalesia i le lotoifale ina ua toefaatuina le Aualofa i Iuta. Sa ia aoao atu e tatau i epikopo ona “i ai lena lava sootaga” ma Aualofa a uarota e pei ona faia e Iosefa Samita i le Aualofa i Navu. Sa ia aoao atu foi e faapea “e le mafai … ona i ai sosaiete taitasi e aunoa ma le fautuaga a [le epikopo].”32
Ina ua avea Sister Bathsheba W. Smith ma peresitene aoao lona fa o le Aualofa, sa ia manatuaina aoaoga ma le faataitaiga a Iosefa Samita. Sa ia aoaoina uso o le Aualofa ia galulue soosoo tauau ma taitai perisitua. Fai mai a ia: “Matou te mananao ma le lotomaulalo e faalautele ia valaauga e tuuina mai ia i tatou e le Alii, ma ina ia mafai ona faia ma talileleia, o le a tatou manaomia le faatuatua ma le lagolago a le Au Peresitene Sili o le Ekalesia, o Aposetolo, peresitene o Siteki ma Epikopo, o ē tatou te lagona e lagolagoina, ma ē tatou te mananao e galulue faatasi.”33
Ua autausagā lenei mamanu. Na saunoa Peresitene Henry B. Eyring, o se fesoasoani i le Au Peresitene Sili, “O se vaega matagofie o le talatuu o le Aualofa ua iloga i le ala e faaalia ai pea e le au perisitua le faaaloalo i le Aualofa ma latou mauaina mai ai foi [ia i latou] lena lava faaaloalo.”34
Ina ua amata le auaunaga a Sister Barbara W. Winder o le peresitene aoao lona sefulutasi o le Aualofa, sa talosagaina o ia e Peresitene Gordon B. Hinckley, a o avea o ia ma se fesoasoani i le Au Peresitene Sili, ina ia tuufaatasia tuafafine o loo galulue i le Aualofa, Tamaitai Talavou, ma le Peraimeri i lalo o le [taitaiga] a le perisitua. Sa silafia e Sister Winder o le lotogatasi e “lē na o se mataupu i le galulue faatasi o uso, ae matou te faipaaga ma le usoga a le au perisitua. O i matou o ni soa i le galuega.”35
Fai mai Sister Winder e lei leva ona valaauina o ia e avea ma peresitene aoao o le Aualofa, ae talosagaina o ia e Elder Dallin H. Oaks la te fono. Sa faatonuina [Elder Oaks] e saunia se faamatalaga mo le Ekalesia e uiga i se mataupu taua, ma sa ia manatu e tatau ona maua mai se finagalo faaalia mai taitai tamaitai o le Ekalesia. Sa ia faaalia lona faaaloalo ma le agaga faafetai mo le silafia, manatu, ma uunaiga a Sister Winder i lona fesili atu lea ma faaaoga lana fesoasoani.
Sa aoao mai mulimuli ane e Sister Winder e faapea, e manaomia e alii ma tamaitai o le Ekalesia le fesoasoani a le tasi ma le isi i le galuega. “Sa ou aoaoina a oo ina valaaulia oe i se fonotaga,” sa ia faamatala ai, “e le valaaulia oe e te alu atu ma faitio i au faafitauli uma, ae e valaaulia oe e te alu atu ma ni tali. Ona mafai lea ona talanoa faatasi e uiga i manatu e iloa ai po o lē fea e aoga. E faamoemoe le usoga a le au perisitua ma manaomia manatu o tamaitai o le Ekalesia. E manaomia ona tatou tapenapena ma lagolagoina i latou.”36
O lenei lotogatasi o le faamoemoe ua iloga i fonotaga a aufono a le Ekalesia. A o faalogologo atu alii ma tamaitai o nei aufono o le tasi i le isi, saili le taitaiga a le “Agaga, ma galulue i le lotogatasi, latou te maua musumusuga e iloa ai pe faapefea ona faafetaia’ia manaoga o tagata taitoatasi ma aiga. Na fetalai mai le Alii, “Pe a potopoto se toalua pe toatolu i lo’u igoa, a o pa’i atu i se mea se tasi, faauta, o le a ou i ai foi i lo latou lotolotoi.”37
Sa faamatala mai e Peresitene Thomas S. Monson, le Peresitene lona sefuluono o le Ekalesia se faataitaiga o le mea e mafai ona tupu pe a galulue faatasi tuafafine o le Aualofa ma le usoga a le perisitua i le galuega a le Alii:
“I le aso 24 o Aokuso, [1992,] sa taia ai e le Afa o Andrew le talafatai i saute o Florida i Miami. Sa sili atu le malosi o le agi a le matagi i le luaselau maila i le itula. … E valusefulu fitu afe fale sa faatama’ia, ma sa tuua ai le 150,000 ua leai ni mea e nonofo ai. …
“Sa vave ona faatulagaina e taitai perisitua ma le Aualofa o le lotoifale ma iloilo manu’aga ma mea sa faatamaia ma fesoasoani i taumafaiga mo le faamamaina. E tolu vaega tetele o tagata o le ekalesia sa ofofua mai, ma na silia ma le lima afe le aofai, sa galulue soosoo tau’au ma tagatanuu sa feagai ma le mala, e fesoasoani ai e toe faaleleia fale e tolu afe, o se falesa Iutaia, ma se falesa o le lotu Penetekoso, ma faleaoga e lua.”38
“Soosoo Tauau ma le Au Perisitua”: O Se Fautuaga Musuia mai Perofeta o Aso e Gata Ai
Ua saunoa perofeta o aso e gata ai e uiga i faamanuiaga e oo mai i le Ekalesia ma aiga pe a galulue faatasi le usoga faamaoni o le perisitua ma tuafafine faamaoni o le Aualofa.
Na saunoa Peresitene Spencer W. Kimball, le Peresitene lona sefululua o le Ekalesia, “O loo i ai le mana i lenei faalapotopotoga [a le Aualofa] ae lei matuai faaaogaina atoatoa e faamalolosia ai aiga o Siona ma fausia le Malo o le Atua—ma o le a le atoatoa lava vagana ua taufai maua e tuafafine ma le au perisitua le vaaiga mamao a le Aualofa.”39
Na aotele e Peresitene Iosefa Filitia Samita le sootaga i le va o le Aualofa ma korama o le perisitua:
“Latou te [tuafafine] faia a latou lava fonotaga, e pei o le Aualofa, lea ua tuuina atu ai ia i latou le mana ma le pule e faia ai le anoanoai o mea. …
“Na valaauina e le Alii e ala i lona poto ia o tatou tuafafine e avea ma fesoasoani i le au Perisitua. Ona o lo latou tigaalofa, agamalu o le loto, ma le agalelei, ua silasila atu ai le Alii ia i latou i tiute ma matafaioi e avea ai ma auauna i e le tagolima ma e mafatia. Ua Ia faasino mai le ala e tatau ona latou mulimuli ai, ma ua ia tuuina atu ia i latou lenei faalapotopotoga maoae, lea ua latou maua ai le pule e galulue ai i lalo o taitaiga a epikopo o uarota ma galulue soosoo tauau ma epikopo o uarota, e vaavaaia ai mea e fiafia i ai o tatou tagata i le faaleagaga ma le faaletino.”40
A o avea Peresitene Gordon B. Hinckley ma Peresitene lona sefululima o le Ekalesia, sa ia faasoa atu mea nei i tuafafine o le Aualofa:
“Se i ou fai atu ia te outou tuafafine e faapea tou te le o tulaga lua i le fuafuaga a lo tatou Tama mo le fiafia e faavavau ma le soifua manuia o Ana fanau. O outou o se vaega e matua taua a’ia’i o lena fuafuaga.
“A leai outou e le mafai ona aoga le fuafuaga. A leai outou e le taulau le polokalama atoa. …
“O outou taitoatasi o se afafine o le Atua, ua faaee i ai se tofi paia. E te le faataute’e i lena tulaga. …
“… E i ai le malosiaga ma le mana tele i tamaitai o lenei Ekalesia. O loo i ai le au taitai ma le taitaiga, o se agaga patino o le tutoatasi, ae e i ai le faamalieina tele i le avea ai o se vaega o lenei galuega, le malo o le Alii, ma le galulue soosoo tau’au ai ma le perisitua e tuleia i luma.”41
Sa tatalo Amanda Smith mo se fesoasoani e tausia ai lana tama.
Malumalu o Navu Ilinoi
O le au faigaluega i sauniga o le malumalu i sitepu o le Malumalu o Sate Leki, 1917
Sa i ai se mafutaga soofaatasi a Atamu ma Eva i le feagaiga.
A osia ma tausia e tamaitai o le Au Paia o Aso e Gata Ai feagaiga, e faamalolosia i latou e le Alii e auauna atu i Lona malo.
E lagolagoina e le Aualofa ia tamaitai a o latou faafaileleina a latou fanau.
O se lagona o ia o se itutino o le Aualofa “e tatau ona tamau i loto o tamaitai uma” (Boyd K. Packer).
I le Ekalesia, e galulue faatasi i le lotogatasi ia alii ma tamaitai.
“E i ai le malosiaga ma le mana tele i tamaitai o lenei Ekalesia” (Gordon B. Hinckley).