Mataupu 1
Aualofa
O Se Toefuataiga o se Mamanu Anamua
I Lana misiona atoa i la le tino, na faaalia e le Faaola le alofa ma le popolega faapitoa mo tamaitai. Na saunoa Elder James E. Talmage o le Korama a Aposetolo e Toasefululua, “O le siamupini aupito sili o tamaitai ma le tulaga faatamaitai o Iesu Keriso.”1
Sa aoaoina e le Faaola ia tamaitai i potopotoga toatele ma taitoatasi, i le ala ma i le apitaogalu, i le vaieli ma i o latou fale. Sa ia faaalia lona agalelei ma le alofa ia i latou ma faamaloloina i latou ma tagata o o latou aiga. I le tele o faataoto, sa Ia faamatalaina ai tala o fafine sa punouai i gaoioiga faatauvaa. Sa Ia faatinoina le silafia loloto i olaga o fafine ma aumaia ai le anoanoai o lesona o le talalelei mai o latou aafiaga i aso faisoo. Sa Ia faamagaloina i latou. Sa tagi o Ia faatasi ma i latou. Sa ia te Ia le alofa mo i latou i o latou tulaga patino o ni afafine, o ava, o tausiaiga, o tina, ma fafine ua oti a latou tane. Sa Ia talisapaia ma faamamaluina i latou.
E oo lava i le tiga ogaoga i luga o le satauro, sa faaalia lava le popole o le Faaola mo Lona tina, o lē ua pei o se fafine ua oti lana tane ma ua manaomia ai se vaavaaiga.2 Ma o le tagata muamua lava na Ia faailoa i ai ina ua mavae Lona Toetu o se tamaitai.3
O Soo Tamaitai i le Feagaiga Fou
E ui ina itiiti se mea o iloa e uiga i se faalapotopotoga aloaia a tamaitai i le Feagaiga Fou, ae ua fautuaina mai ni mea e faamaonia ai e faapea o fafine o ni tagata taua ia sa auai i le faatinoga o le galuega a le Faaola. O loo aofia ai i le Feagaiga Fou ni tala i fafine, e i ai igoa pe le o ta’ua foi, o e sa faaaogaina le faatuatua ia Iesu Keriso, sa aoaoina ma ola ai i Ana aoaoga, ma molimau atu i Lana galuega, o vavega, ma le silisiliese. Na avea nei fafine ma soo iloga ma ni molimau taua i le galuega o le faaolataga.
Sa malaga fafine faatasi ma Iesu ma Ana Aposetolo e Toasefululua. Sa latou foai atu a latou meatotino e fesoasoani ai i Lana galuega. Ina ua mavae Lona maliu ma le Toetu, sa faaauau pea ona avea fafine ma soo faamaoni. Sa latou potopoto ma tatalo faatasi ma Aposetolo. Sa latou tuuina atu o latou fale e fai ma faletapuai o tagata o le Ekalesia. Sa latou auai ma le lototetele i le galuega o le laveaiina o agaga, i la le tino ma la le agaga.
O Mareta ma lona uso o Maria o ni faataitaiga o soo fafine i le Feagaiga Fou. O loo i ai i le Luka 10 se tala ia Mareta ua tatala atu lona fale ia Iesu. Sa ia auauna atu i le Alii e ala i le taulimaina o Ona manaoga i la le tino, ae sa nofo Maria i aao o le Matai ma gauai atu i Ana aoaoga.
I se vaitau sa masani lava o fafine e na o le tautua faaletino latou te tuuina atu, na aoao ai e le Faaola ia Mareta ma Maria e mafai foi e fafine ona auai faaleagaga i Lana galuega. Sa Ia valaaulia i laua e avea ma Ona soo ma taumamafa ai i le faaolataga, “lea mea lelei” e le aveeseina mai ia te i laua.4
Na avea Maria ma Mareta ma tagata auai toaaga i le galuega i la le tino a le Alii. I se taimi mulimuli ane i le Feagaiga Fou, tatou te faitau ai i le molimau malosi a Mareta i le paia o le Faaola. I se talanoaga ma Iesu na ia fai atu ai, “Ua ou talitonu lava, o oe le Keriso le Alo o le Atua, o le maliu mai i le lalolagi.”5
E toatele isi soo fafine na malaga ma Iesu ma le Toasefululua, ma aoao ai mai ia te Ia faaleagaga ma auauna atu ia te Ia i le tino. Na tusia e Luka:
“Mulimuli ane ua faataamilo o ia [Iesu] i aai ma faoa aai, ua talai ma folafola le tala lelei o le malo o le Atua; ua faatasi foi ma ia le toasefulu ma le toalua,
“Atoa ma nisi fafine sa i ai agaga leaga ma ma’i, a ua faamaloloina; o Maria ua ta’ua o le Makatala, na o i fafo ia te ia temoni e toafitu,
“Ma Ioana le ava a Kusa le auauna pule lea a Herota, ma Susana atoa ma isi fafine e toatele, e na auauna atu ia te ia i a latou mea.”6
E foliga mai na tuuina atu e nei fafine se lagolago faaletamaoaiga mo Iesu ma Ana Aposetolo, faatasi ai ma le auaunaga e pei o le gaseseina o meaai. E le gata i le mauaina o le auaunaga a Iesu—upu lelei o Lana Talalelei ma faamanuiaga o Lona mana faamalolo—ae na auauna atu foi nei fafine ia te Ia, ma tuuina atu a latou meatotino ma le tuuto.
Na tusia e le Aposetolo o Paulo e uiga i fafine, o ē o i tofiga faale-Ekalesia ma isi i a latou lava filifiliga, sa auauna atu i le Au Paia. O lana faamatalaga o se fafine amiotonu ua oti lana tane sa faailoa ai uiga o le toatele o fafine i le Ekalesia anamua: “O loo tauleleia foi ona o ana galuega lelei, pe afai ua tausia e ia ni fanau, pe afai ua na alofa i tagata ese, pe afai ua na mulumulu i vae o tagata paia, pe afai ua na agalelei atu i e ua puapuagatia, pe afai ua na tausisi i galuega lelei uma lava.”7 Na tusia foi e Paulo e uiga i uunaiga a fafine matutua popoto, ma ua i ai le poto masani. Sa ia fautuaina Tito ina ia faamalosiau atu i fafine matutua e auauna atu ma aoao ia fafine muli e uiga i a latou matafaioi faavavau o ni ava ma ni tina, “ina ia latou aoao atu i fafine muli latou te alofa atu i a latou tane, ia alofa atu i a latou fanau.”8
O le tusi o Galuega o loo aofia ai se tala i se fafine na faatinoina amioatua na faamatala e Paulo. O Tapita, o lē foi sa iloa foi ia Toreka, sa nofo o ia i Iopa, i le mea sa ia faia ai ofu mo fafine sa lē tagolima.
“Sa i Iopa le tasi fafine o Tapita le igoa, e ta’ua pe a faamatalaina o Toreka; ua tele ana galuega lelei ma meaalofa na ia faia.
“O ia ona po ua ma’i o ia, ua oti ai. …
“Ua felata’i [le aai o] Lita ma Iopa, ua faalogo le au soo o i ai Peteru, ona latou aau atu ai lea o tagata e toalua ia te ia, ua ole atu aua le faatuai ona alu atu ia te i latou.
“Ona tu lea o Peteru i luga, ua o ma i laua. Ua oo atu o ia, … ua tutu mai foi fafine uma lava ua oti a latou tane, o fetagisi mai, ma faaali mai ofutino ma ofu tetele sa faia e Toreka, ina o ia te i latou o ia.
“A ua tuli atu Peteru ia te i latou uma lava i fafo, ona tootuli lea o ia, ma tatalo; ona faasaga atu lea o ia i le oti, ua faapea atu, Tapita e, ina tu ia i luga. Ua pupula o ia; ua na iloa Peteru, ona nofo lea i luga.”9
O loo ta’ua e le Feagaiga Fou isi fafine tuuto. Na tuu atu e Pisila ma lana tane o Akula o la’ua ola i se tulaga lamatia, mo Aposetolo ma saunia lo la’ua fale mo mafutaga faale-Ekalesia.10 Na tusia e Paulo, “Ua ou alofa atu ia Pisila ma Akula i le Alii ma le ekalesia uma o i lo laua fale.”11
O se fafine e igoa ia Maria na ia “tuuina atu le galuega tele” mo Aposetolo.12 O se fafine e igoa ia Litia, sa papatisoina faatasi ma lona aiga ona ia auauna atu lea ia i latou sa aoaoina o ia.13
O se fafine e igoa ia Fipe na ia umia se tofiga faalelotu e auauna ai i lana aulotu. Fai mai Paulo, “Ou te faailoa atu ia te outou lo tatou tuafafine o Fipe, o se auauna i le ekalesia … ina ia talia o ia e outou i le Alii, faapei ona tatau i le au paia, ia outou fesoasoani foi ia te ia i se mea a outou e aoga ia te ia; aua foi ua toatele ua ia fesoasoani i ai.”14 O le ituaiga o auaunaga na tuuina atu e Fipe ma isi fafine maoae o le Feagaiga Fou, o loo faaauau pea i le taimi nei e taitai o le Aualofa—faiaoga asiasi, tina, ma isi—o ē ua avea ma fesoasoani, po o lagolago, mo le toatele.
Soo Fafine i Aso e Gata Ai
O fafine i le Ekalesia anamua sa malualii ma tamalii, sa manaomia ma sa faatauaina. Sa latou auauna atu i isi, faateleina i le paia faaletagata patino, ma sa auai i le faatinoina o le galuega tele o le laveaiina o agaga.
O nei mamanu ua toefuatai mai i aso e gata ai e ala i le faalapotopotoga a le Aualofa. Na tautino mai e le Perofeta o Iosefa Samita, “E lei atoatoa lelei lava le faatulagaina o le Ekalesia vagana ai ina ua faatulagaina tamaitai.”15 Na toe ta’ua e Sister Eliza R. Snow, le peresitene aoao lona lua o le Aualofa, lenei aoaoga. Fai mai a ia: “E ui atonu o le igoa e faaona po nei, ae o le faalapotopotoga e faapogai mai anamua. Na ta’u mai e lo tatou perofeta lea na maliu faamaturo, o le faalapotopotoga lava lea na i ai foi i le ekalesia anamua.”16
E le gata ia Iosefa Samita, ae na molimau mai foi isi perofeta o aso e gata ai e faapea o le faalapotopotoga a le Aualofa, o se vaega musuia o le Toefuataiga, lea e tofia ai tamaitai i le Ekalesia i tofiga faalelotu e auauna ai le tasi i le isi ma faamanuia ai le Ekalesia atoa. Na saunoa Peresitene Iosefa F. Samita, le Peresitene lona ono o le Ekalesia, “O lenei faalapotopotoga ua faia faalelagi, faatagaina mai le lagi, faatulagaina faalelagi, faauuina faalelagi e le Atua ia auauna atu mo le faaolataga o agaga o tamaitai faapea ma alii.”17 Na saunoa Peresitene Lorenzo Snow, le Peresitene lona lima o le Ekalesia i se vaega o le usoga a tamaitai o le Aualofa: “Tou te i ai pea i autafa o le Perisitua, ua saunia e faamalolosia o latou lima ma faia la outou vaega e fesoasoani ai e faalautele mea e manaomia i le malo o le Atua; ma a outou fefaasoaai i nei galuega, o le a le taumateina lo outou maua o faamanuiaga o le galuega ma le faaeaga ma le mamalu o le a tuuina mai e le Alii i Ana fanau faamaoni.”18
A o auai tamaitai i le Aualofa, latou te galulue malosi o ni soo o Iesu Keriso i le galuega o le faaolataga. E faapei foi o fafine i le Ekalesia anamua, latou te galulue soosoo tauau ma alii o e o loo umia le perisitua e faateleina le faatuatua ma le amiotonu patino, faamalolosia aiga ma auaiga, ma saili atu ma fesoasoani ia i latou e le tagolima. Sa aoao mai e Sister Julie B. Beck, o le peresitene aoao lona sefululima o le Aualofa, “O le Aualofa tatou te faata’ita’ia ai le avea ma soo o Keriso. Tatou te aoaoina mea e finagalo o Ia tatou te aoaoina, tatou te faia mea e finagalo o Ia tatou te faia, ma avea i tatou ma tagata e finagalo o Ia e avea ai i tatou.”19
“Ua talia e Mareta [Iesu] i lona fale.” O lona uso foi e igoa ia Maria, ua nofo o ia i lalo i tafatafa o vae o Iesu, ma faalogo i lana fetalaiga”(Luka 10:38–39).
Sa faaalia e le Faaola se alofa ma se popolega faapitoa mo tamaitai, i Lana misiona atoa i la le tino.
O Tapita “ua tele ana galuega lelei ma meaalofa na ia faia” (Galuega 9:36).