Sa unsa nga paagi ako makatabang sa uban nga makasabut sa akong kakulangan?

Adunay mga panahon nga ikaw mahimong manginahanglan sa pagsulti ngadto sa uban nga ikaw nanginahanglan og tabang, suporta, pagpahiangay, o kapuy-an tungod sa imong kakulangan. Usahay, ang usa ka kakulangan mahimong malisud nga pagahisgutan. Sa kanunay, ang uban gustong motabang, apan sila wala makamatikud sa imong mga panginahanglan o dili sila sigurado kon unsaon sa pagtabang. Tingali sila maglikay sa pagpangutana kanimo mahitungod sa imong sitwasyon tungod kay sila mahadlok sa pagsulti sa sayop nga butang, o mahimo nga sila naghunahuna nga ang pag-istoryahanay mahimong bakikaw. Kon ikaw dili komportable sa pagsulti mahitungod sa imong kakulangan, kanunay nimong mahibaloan nga kadtong kinsa nahigugma kanimo andam sa pagpaminaw. Pag-ampo ngadto sa Langitnong Amahan alang sa kaisug ug paggiya mahitungod kon unsaon sa pagpakigsulti ngadto sa mga tawo mahitungod sa imong kakulangan. Pamalandonga kon unsa ang imong gusto nga mahibaloan sa uban mahitungod kanimo. Unsa ang imong mga kalig-on? Unsa ang imong mga hagit? Unsa ang imong nakaplagan nga makatabang? Unsa ang imong mga talento nga makatabang kanimo sa pagserbisyo sa uban?

Sabta nga kadaghanan sa mga miyembro sa Simbahan bukas nga magiyahan kabahin kon sa unsang paagi matabangan ug mapaapil kadtong may mga kakulangan. Hunahunaa nga ang imong mga kaigsoonan mahimo usab nga maaghat mahitungod kon unsaon sa pagtabang.

Ang Espiritu Santo makatabang sa mga sakop sa pamilya, mga magtutudlo, ug mga lider nga mahibalo kon kanus-a motabang ug unsaon nga sila makatabang.

Aniay pipila ka mga sugyot nga hunahunaon kon motabang sa uban sa pagsabut sa imong mga panginahanglan ug imong sitwasyon:

• Pagmapailubon samtang ang ubang mga miyembro nag-ila mahitungod kanimo ug buntuga ang dili mao nga mga pagtuo.

• Ipunting diha sa positibo kon mangutana alang sa kausaban.

• Klaroha kon unsa ang nasulti. Mahimo nimo kini pinaagi sa pagsulti og balik kon unsa ang imong nasabtan gikan sa pagsinultihanay o pinaagi sa pagpangutana sa uban sa pagbalik og sulti kon unsa ang ilang nasabtan gikan sa pag-istoryahanay.

• Dawat og lainlaing mga panabot o mga ideya mahitungod kon unsaon pagtuman ang usa ka tumong, ug pangayo sa mga hunahuna sa uban mahitungod sa sitwasyon. Ayaw paghunahuna nga ang imong paagi mao lamang ang paagi.

• Himoa nga ang panag-istoryahanay nakapunting diha sa usa ka piho nga panginahanglan. Kon kini motipas sa hilisgutan, dad-a kini pagbalik ngadto sa hilisgutan.

• Pagmapasalamaton. Pasalamati ang mga miyembro sa pagpakig-istoryahanay kanimo ug sa pagkaandam nga naminaw.