Nganong nahitabo kini kanako? Tungod ba sa usa ka butang nga akong nabuhat?

“Ug sa pag-agi ni Jesus, iyang nakita ang usa ka tawo nga buta sukad pa sa iyang pagkahimugso.

“Ang iyang mga tinun-an nangutana kaniya, “Magtutudlo, kinsa may nakasala nga natawo man siyang buta? Siya ba o ang iyang mga ginikanan?

“Si Jesus mitubag, Ang iyang pagkabuta dili tungod sa iyang mga sala o sa mga sala sa iyang mga ginikanan: Siya natawong buta aron ang gahom sa Dios ikapadayag diha kaniya” (Juan 9:1–3).

Mipasabut si Presidente Russell M. Nelson: “Tungod sa mga rason nga wala masayri, ang ubang mga tawo natawo nga adunay pisikal nga mga limitasyon. Piho nga mga parte sa lawas mahimong dili normal. Ang mga sistema sa pagpahiangay tingali dili balanse. Ug ang tanan natong mga lawas ulipon sa sakit ug kamatayon. Bisan pa, ang gasa nga pisikal nga lawas walay presyo nga makatupong. Kon wala kini, dili kita makabaton og kahingpitan sa kalipay.”¹

Isip kabahin sa plano sa Langitnong Amahan, atong masinati ang kalisud sa panahon sa mortalidad. Bisan tuod og ang mga detalye sa atong mga hagit dili magkasama, ang wala damha nga mga kasakit ug mga pagsulay––pisikal, mental, ug espiritwal—moabut ngari sa matag tagsa kanato tungod kay kining tanan kabahin sa atong mortal nga kasinatian. Walay pagsapayan sa unsa nga mga kalisud o mga hagit nga atong masinati, kini makatabang kanato sa pagtubo sa espiritwal nga paagi ug mahimong mas mahisama sa atong Langitnong Amahan ug ni Jesukristo.

Unsa ang gisulti sa Ginoo kang Propeta Joseph Smith didto sa Bilanggoan sa Liberty mahitungod sa mga pagsulay mahimo usab nga magamit ngadto niadtong gihagit og mga kakulangan: “Ikaw nasayud … nga kining tanan nga mga butang makahatag kanimo og kasinatian, ug alang sa imong kaayohan” (Doktrina ug mga Pakigsaad 122:7).

Mubo nga mga sulat

1. Russell M. Nelson, “Kita mga Anak sa Dios,” Ensign, Nob. 1998, 86.