“Ingon og akong gibati nga ako dili angay sa simbahan. Unsay akong mabuhat?” Mga Serbisyong Pangkakulangan: Mga Indibidwal (2020)

“Ingon og akong gibati nga ako dili angay sa simbahan. Unsay akong mabuhat?” Mga Serbisyong Pangkakulangan: Mga Indibidwal

Ingon og akong gibati nga ako dili angay sa simbahan. Unsay akong mabuhat?

Miingon si Sis Jane B. Bingham: “Sama sa mga bitoon nga matag usa gipahimutang sa usa ka piho nga libotanan ug lugar sa planeta, kita adunay impluwensya niadtong nagpalibut kanato. Tungod kay ikaw talagsaon, adunay mga butang nga ikaw lamang ang makabuhat diha sa imong piho nga paagi sa pagpanalangin sa [uban].”¹

Usahay tanan kita mobati nga dili kita angay diha sa simbahan. Mahimong bation nato kana tungod kay kita matan-aw nga lahi, lahi nga mosulti, lahi og panghunahuna, o lahi og panglihok, wala kita maapil. Mahimo gani nga bation nato ingon og kita walay bisan unsa nga ikatampo. Dili kana mao ang sitwasyon. Ang matag tawo gikinahanglan sa ang Simbahan ni Jesukristo. “Si Kristo sama sa usa ka lawas nga may daghang bahin. bisan kon nagkalainlain ang mga bahin niini, usa ra gihapon kini ka lawas” (1 Mga Taga-Corinto 12:12).

Si Elder Dieter F. Uchtdorf, kanhi sakop sa Unang Kapangulohan, mipasabut kon ngano nga ang tanan gikinahanglan: “Mga kaigsoonan, mga higala, gikinahanglan namo ang inyong espesyal nga mga talento ug mga panglantaw. Ang panaglahi sa mga tawo ug katawhan libut sa kalibutan maoy kalig-on niini nga Simbahan.”²

Aniay pipila ka mga butang nga ikaw makahimo aron makaila sa uban nga nagpalibut kanimo ug sa pagtabang kanila nga mas makaila kanimo og mas maayo ug moabut sa pagdayeg sa imong talagsaon nga mga talento ug mga abilidad.

Ipaila–ila ang imong kaugalingon. Paabut og panahon sa pagpaila sa imong kaugalingon ngadto sa uban ug sa pagpangita og mga butang nga ikaw aduna susama kanila. Kini motabang kanimo sa pagtukod og mga relasyon ug sa pagtabang sa tanan nga mobati nga mas giabi-abi. Mahimong makaplagan nimo nga kamo adunay mas daghang magkaparehas kay sa imong nahunahuna.
Pangayo og tabang kon gikinahanglan. Ayaw kahadlok sa pagpangayo og lugar nga motabang kanimo sa pagkat-on sa ebanghelyo ug sa pag-apil sa mga kalihokan nga gipadagan sa Simbahan ug sa mga serbisyo sa pagsimba. Sa daghan nga mga sitwasyon, ginagmay nga mga pagpahiangay alang sa usa ka tawo makahatag og kaayohan sa tanan. Sama pananglit, kon ikaw adunay kalisud sa pagbasa sa gi imprinta nga programa alang sa usa ka miting, ang paghangyo alang niini nga iimprinta sa dagko nga letra mahimong ikahinangop sa daghan diha sa kongregasyon. Kon ikaw adunay kalisud sa pagdungog diha sa mga miting, hangyoa ang paggamit sa sistema alang sa pagpalambo sa pagdungog nga anaa sa kasagaran sa mga chapel, hangyoa ang mga magtutudlo sa pagpakita sa mga ulohan kon ipasalida ang video sa panahon sa klase, o hangyoa nga ang magtutudlo mohangyo kaninyo og una sa pag-andam sa pag-ampo o pagbasa og kusog sa panahon sa leksyon.
Pangita sa mainampuong paagi og mga oportunidad nga makaserbisyo sa uban. Ang pagserbisyo sa uban mao ang usa sa labing maayo nga mga paagi nga makaila kanila ug pagpasiugda og tinuoray nga mga panaghigalaay. Ang Langitnong Amahan makatabang kanimo nga mahibalo kon kinsa ang imong maserbisyohan ug makadasig kanimo og mga ideya kon sa unsa nga paagi labing maayo nga matubag ang ilang mga panginahanglan.