Isip mga Disipulo ni Jesukristo Kita Kinahanglan Gayud nga Moamuma alang sa mga Kabus ug mga Timawa

• Levitico 19:14

• Job 29:15

• Mateo 15:29–31

• Lucas 4:16–21

• Lucas 14:12–14

• Mga Hebreohanon 12:12–13

• Mosiah 18:8–9

• Mosiah 23:18

• 3 Nephi 17:7

“Unsay kaayohan nga mahimo sa pagluwas sa kalibutan kon atong gibaliwala ang mga panginahanglan niadtong labing duol kanato ug niadtong atong gihigugma og maayo? Unsay kapuslanan nga ayohon ang kalibutan kon ang mga tawo sa atong palibut nagkalisod ug wala nato mamatikdi? Mahimong gibutang sa Langitnong Amahan kadtong nanginahanglan kanato diha sa atong duol, nakahibalo nga kita ang labing angayan nga makahimo sa pagtubag sa ilang mga panginahanglan” (Bonnie L. Oscarson, “Ang mga Panginahanglan nga Atong Giatubang,” Liahona, Nob. 2017, 25).

“Nakaamgo ko karon nga aron epektibong makaserbisyo sa uban, kinahanglan ato silang makita pinaagi sa panan-aw sa usa ka ginikanan, pinaagi sa panan-aw sa Langitnong Amahan. Niana lamang nga masugdan nato pagsabut ang tinuod nga bili sa usa ka kalag. Niana lamang nga mabati nato ang gugma sa Langitnong Amahan alang sa tanan Niyang mga anak. Niana lamang nga mabati nato ang kahingawa sa Manluluwas alang kanila. Dili nato hingpit nga matuman ang atong obligasyon sa pakigsaad nga magbangutan uban niadtong nagbangutan ug sa paghupay niadtong nagkinahanglan og kahupayan gawas kon ato silang makita pinaagi sa panan-aw sa Dios” (Dale G. Renlund, “Pinaagi sa Panan-aw sa Dios,” Liahona, Nob. 2015, 94).

“Mag-ampo kamo aron mahibalo kinsang gusto sa Amahan nga inyong serbisyuhan tungod sa inyong gugma Kaniya ug sa atong Manluluwas” (Henry B. Eyring, “Salig Niana nga Espiritu nga Naggiya sa Paghimo og Maayo,” Liahona, Mayo 2016, 18).

“Kita kinahanglang moamuma sa indibidwal. Si Kristo kanunay nga naghisgot kabahin sa mga indibidwal. Iyang giayo ang mga masakiton, sa indibidwal nga paagi. Naghisgot Siya sa Iyang mga sambingay kabahin sa mga indibidwal. Kini nga Simbahan nagpakabana sa mga indibidwal, bisan pa sa atong gidaghanon. Bisan pa kon sila 6 o 10 o 12 o 50 milyon, dili gayud nato kalimtan ang kamatuoran nga ang indibidwal mao ang importante” (Mga Pagtulun-an sa mga Presidente sa Simbahan: Gordon B. Hinckley [2016], 348).

“Sa ingon gihimo sa Manluluwas ang unang pagpahibalo sa publiko sa Iyang mesiyanhong pangalagad. Apan giklaro usab dinhi sa bersikulo nga sa nagkaduol ang katapusan sa Iyang maulaong sakripisyo ug Pagkabanhaw, ang pinakaimportante sa mesiyanhong katungdanan ni Jesus mao ang pagpanalangin sa mga kabus, lakip ang kabus sa espiritu.

“Sugod sa sinugdanan sa Iyang pangalagad, gihigugma ni Jesus ang mga kabus ug hinikawan sa lahi kaayong paagi. Natawo Siya sa panimalay nga ingon niini ug nagtubo nga mas labaw pa niini. Wala ta kahibalo sa tanang detalye sa temporal Niyang kinabuhi, apan kausa miingon Siya, “Ang mga milo adunay kalobluban, ug … ang mga langgam … adunay kabatugan; apan ang Anak sa Tawo walay dapit nga kapahulayan sa iyang ulo’ (Mateo 8:20). Sa ingon ang Tiglalang sa langit ug yuta ‘ug tanan nga mga butang nga anaa kanila’ (2 Nephi 2:14; 2 Nephi 9:15) sa Iyang paghingkod, walay panimalay” (Jeffrey R. Holland, “Dili Ba Kitang Tanan Makililimos?” Liahona, Nob. 2014, 40.).