Lesona 3: Folafolaga o le Toefuataiga

Faatomuaga i le Mataupu Faavae ma Feagaiga

Faalogoina le Siufofoga o Iesu Keriso

I le Mataupu Faavae ma Feagaiga, e mafai ona tatou faitau ai i afioga a le Alii lava ia, e fesoasoani ia i tatou e faalogo i Lona siufofoga o fetalai mai ia i latou i o tatou aso ma e oo lava ia i tatou taitoatasi. O lenei lesona e mafai ona fesoasoani i tagata aooga e sauni e aoao ia iloa le Faaola a o amata la latou suesuega o le Mataupu Faavae ma Feagaiga.

Gaoioiga E Ono Mafai Ona Aoao Ai

Faasolo ina iloa oe

Mafaufau e amata le vasega i le valaaulia o tagata aooga e fesili i se tasi o le vasega se fesili lea o le a fesoasoani ia i latou e iloa lelei ai lena tagata. Mo se faataitaiga, e mafai ona latou fesili atu, “O le a se mea e te fiafia e fai i ou taimi avanoa?”

A mae’a se taimi e talanoa ai tagata aooga ma se tasi o le vasega, e mafai ona e talanoaina mea nei:

Mafaufau i le tagata e te lagona ua matua sili ona e iloa.

• O le a se mea na fesoasoani ia te oe ina ia e iloa lelei ai lenei tagata?

Valaaulia ia tagata aooga e mafaufau loloto filemu po o le a le lelei ua latou manatu ua latou iloa ai Iesu Keriso ma o a ni mea o loo latou faia i le taimi nei e iloa atili ai o Ia.

I le Mataupu Faavae ma Feagaiga, sa faamatala ai e Iesu Keriso nisi o auala e mafai ona tatou iloa lelei ai o Ia ma folafola mai ai ia i tatou se faamanuiaga e mafai ona tatou maua mo le faia o lena mea.

Faitau le Mataupu Faavae ma Feagaiga 19:23–24, ma vaavaai mo valaaulia a le Faaola ma le folafolaga na Ia faia.

• O le a sou manatu e mafai faapefea e valaaulia a le Faaola i nei fuaiupu ona fesoasoani tatou te iloa atili ai o Ia?

• O a ni mea ua mafai ona tatou a’oa’oina e uiga i le Faaola mai Ana afioga i nei fuaiupu?

Mafaufau e faasino atu i le folafolaga a le Faaola i le fuaiupu 23 e mafai ona tatou maua ai Lona filemu a o tatou aoao ia te Ia ma faalogo i Ana afioga. Atonu e fesoasoani le valaaulia o tagata aooga e mafaufau loloto atili e uiga i lenei folafolaga. E mafai ona e fai atu ia i latou e iloilo pe faafia ona latou lagonaina le filemu lea e sau mai ia Iesu Keriso ma pe faapefea ona aafia o latou olaga pe afai e tele atu ni taimi latou te lagonaina ai le filemuu.

Suesueina o le Mataupu Faavae ma Feagaiga

O le tausaga lenei, o le a e maua ai avanoa e suesue ai le Mataupu Faavae ma Feagaiga i le fale, i le lotu, ma i le seminare. A o e suesue, o le a e maua le tele o avanoa e te aoao ai ia Iesu Keriso ma faalogo i Ana afioga. E mafai ona fesoasoani lenei mea ia te oe e iloa atoatoa atili ai o Ia ma maua ai le filemu ua Ia folafola mai.

• O a mea ua uma ona e iloa e uiga i le Mataupu Faavae ma Feagaiga?

O nisi tagata aooga atonu e i ai ni fuaitau mai le Mataupu Faavae ma Feagaiga e sili ona taua ia i latou. E mafai ona e fai atu i ni nai tagata aooga naunau e faasoa mai nei fuaitau ma faamatala mai pe aisea e taua ai. E mafai foi ona e faasoa atu ni nai fuaitau e sili ona e fiafia i ai.

Ona valaaulia lea o tagata aooga e susue a latou tusitusiga paia i le faatomuaga o le Mataupu Faavae ma Feagaiga.

I le faatomuaga i le Mataupu Faavae ma Feagaiga, faitau ia palakalafa 1–3 ma le fuaiupu mulimuli o le parakalafa 8. A o e faitau, vaavaai mo fasifuaitau e uiga i auala e mafai ai e le suesueina o le Mataupu Faavae ma Feagaiga ona fesoasoani ia te oe ia iloa atili ai Iesu Keriso.

• O le a se mea na e aoaoina e uiga i le ala e ese ai le Mataupu Faavae ma Feagaiga mai isi tusi o tusitusiga paia?

• O le a le mea “ua matua taua” ai le Mataupu Faavae ma Feagaiga?

O le siufofoga o le Alii i totonu o le Mataupu Faavae ma Feagaiga

O se upumoni e tasi e mafai ona tatou aoaoina mai i nei parakalafa o le, a o tatou suesue i le Mataupu Faavae ma Feagaiga, e mafai ona tatou faalogoina le siufofoga o le Faaola o fetalai mai ia i tatou i o tatou aso ma aoao atili e uiga ia te Ia.

Faitau le Mataupu Faavae ma Feagaiga 18:33–36, ma vaavaai mo aoaoga mai le Faaola e faatatau i lenei upumoni.

Atonu e fesoasoani le tuu atu i tagata aooga o le taimi e sue ai nisi faataitaiga o fetalaiga a Iesu Keriso i totonu o le Mataupu Faavae ma Feagaiga. E mafai ona e valaaulia i latou e susue a latou tusitusiga paia i soo se vaega o le Mataupu Faavae ma Feagaiga ma vaavaai mo faataitaiga o fetalaiga a le Alii.

• O le a sou manatu e mafai faapefea e le faitauina o fetalaiga a le Faaola i le Mataupu Faavae ma Feagaiga ona manuia ai lou olaga?

Afai e manaomia, ta’u atu e tele mea e mafai ona tatou iloa e uiga i le Faaola a o tatou suesue i Ana afioga. E mafai ona tatou malamalama atili i Ona uiga, o Ona manaoga, ma mea e taua ia te Ia. O le a fesoasoani foi le ta’u atu, o Iesu Keriso ma le Tama Faalelagi e tutusa i lo La’ua atoatoa ma uiga paia ma lotogatasi i lo La’ua faamoemoega. O le mea lea, a oo ina iloa e tagata aooga ia Iesu Keriso, ua a’oa’oina atili fo’i i latou e uiga i le Tama Faalelagi (tagai Ioane 14:9).

O le iloaina o le Tama Faalelagi ma Iesu Keriso e mafai ona faateleina ai lo tatou alolofa mo i Laua ma fesoasoani ia tatou maua le filemu e na o i Laua e mafai ona ofoina mai.

I lau suesuega atoa o le Mataupu Faavae ma Feagaiga, ia taula’i atu i mea o loo e aoaoina e uiga i le Tama Faalelagi ma Iesu Keriso. Atonu foi e aoga le faatulaga o se vaega o lau api talaaga o suesuega pe fai se faamatalaga i lau polokalama o le Gospel Library mo le faamaumauina o manatu e te maua e uiga ia i Laua. E mafai ona e faaopoopo atu i lau lisi o malamalama’aga i le tausaga atoa. Mafaufau pe faapefea e mea ua e aoaoina e uiga i le Tama Faalelagi ma Iesu Keriso ona aafia ai lou alofa mo ma le talitonu ia i Laua.

O le gaoioiga su’esu’e lenei e mafai ona fesoasoani i tagata aooga ia iloa faataitaiga o mea e mafai ona latou aoaoina e uiga i le Tama Faalelagi ma Iesu Keriso mai afioga a le Faaola i le Mataupu Faavae ma Feagaiga. Atonu e aoga le vaevae o tagata aooga i ni vaega ma tofi atu i vaega taitasi se fuaitau se tasi pe sili atu e suesue ai.

Suesue i fetalaiga a le Faaola i ni nai fuaitau nei mai le Mataupu Faavae ma Feagaiga. Faalogo lelei i mea e mafai ona e aoaoina e uiga i le Tama Faalelagi ma Iesu Keriso mai fuaiupu e te suesueina.

• Mataupu Faavae ma Feagaiga 1:37–38; 10:67–70; 11:2; 14:9; 19:1–2; 25:15–16; 29:1–2; 84:77

Mafaufau e lisi i luga o le laupapa tali a tagata aooga i fesili muamua o fesili nei. Pe o le valaaulia o ni tagata aooga eseese e o mai i le laupapa ma tusi o latou malamalama’aga.

• O a ni mea ua fesoasoani ai nei fuaitau ia te oe ia e malamalama ai e uiga i le Tama Faalelagi ma Iesu Keriso? Aisea e te manatu e taua ai le iloa o nei mea e uiga ia i Laua?

• E faapefea e mea na e aoaoina e uiga i le Tama Faalelagi ma Iesu Keriso i nei fuaiupu ona fesoasoani ia te oe ia maua le filemu?

Fai se sini mo le suesueina o tusitusiga paia

Faasoa atu mea nei, tuu atu i tagata aooga se taimi e fai ai se sini e fesootai ma a latou suesuega o le Mataupu Faavae ma Feagaiga i lenei tausaga.

Mo nisi aoaoga i le auala e uunaia ai tagata aooga e suesue le talalelei i aso taitasi, tagai i le aoaoga ua faaulutalaina “Fesoasoani i Tagata Aooga i le Faia o se Sini mo le Suesueina o Tusitusiga Paia i Aso Taitasi,” o loo maua i le aoaoga faamasani o Tomai o le Atinaega o Faiaoga .

O se tasi o faamoemoega o le seminare o le fesoasoani lea ia te oe ia faalatalata atili atu i le Tama Faalelagi ma Iesu Keriso e ala i le suesue i tusitusiga paia i aso taitasi. Saili musumusuga e ala i le Agaga Paia e faatu ai se sini e faatatau i lau suesuega o le Mataupu Faavae ma Feagaiga. E mafai ona e mafaufau i fesili nei a o e faatuina se sini:

• O le a le taimi ma o fea foi se nofoaga e mafai ona ou suesue ai a’u tusitusiga paia i aso taitasi?

• O le a le tele o le taimi i aso taitasi o le a ou suesue ai?

• O le a se mea e mafai ona ou faia e valaaulia atoatoa ai le Agaga Paia i lo’u aafiaga?

Faamaumau lau sini i lau api talaaga o suesuega.

Atonu e te manao e faasoa mai e tagata aooga a latou tali i nisi po o fesili uma na muamua atu pe a uma ona latou tusitusia.

Uunaia tagata aooga e galulue agai i le ausiaina o a latou sini. Folafola atu ia i latou o le faia o lena mea o le a fesoasoani ia i latou e faalogo ai i le siufofoga o le Faaola ma maua ai le taitaiga mai ia te Ia. Faaalu se taimi i le gasologa o le tausaga e faamanatu ai i tagata aooga a latou sini, e tuu atu i ai ni avanoa e iloilo ai lo latou alualu i luma.

Punaoa Faaopoopo

O le a le sootaga i le va o le Tusi a Mamona ma le Mataupu Faavae ma Feagaiga?

Sa aoao mai Peresitene Ezra Taft Benson (1899–1994):

O le Mataupu Faavae ma Feagaiga o le sootaga mau lea i le va o le Tusi a Mamona ma le galuega faifaipea o le Toefuataiga e ala mai i le Perofeta o Iosefa Samita ma i latou sa suitulaga ia te ia. …

O le Tusi a Mamona o le “maa’au’au” o la tatou tapuaiga, ae o le Mataupu Faavae ma Feagaiga o le maataualuga, o loo i ai faaaliga faifaipea o aso e gata ai. Ua tuuina e le Alii Lana faailoga o le faamaoniga i luga o le maa’au’au ma le maataualuga. (Ezra Taft Benson, “O le Tusi a Mamona ma le Mataupu Faavae ma Feagaiga,” Ensign, Me 1987, 83)

O le a le mea ua avea ai le Mataupu Faavae ma Feagaiga o se tusi taua e suesue i ai?

Na ta’ua e Elder Neal A. Maxwell (1926–2004) o le Korama a Aposetolo e Toasefululua:

Afai o le a tuuina atu le fesili po o le fea tusi o tusitusiga paia o loo sili ona maua ai le avanoa e “faalogo” soo ai o fetalai mai le Alii, e toatele tagata o le latou muai manatu e faapea o le Feagaiga Fou. O le Feagaiga Fou o se tuufaatasiga maoae lea o galuega ma le tele o aoaoga faavae o le Mesia. Ae o le Mataupu Faavae ma Feagaiga e mafai ona tatou maua ai oa o le upu moni lea e tuu sao mai i le Alii. E toetoe lava a mafai ona tatou “faalogo” o talanoa mai o ia. (Neal A. Maxwell, “O le Mataupu Faavae ma Feagaiga: O le Siufofoga o le Alii,” Ensign, Tes. 1978, 4)

Na aoao mai Elder John A. Widtsoe (1872–1952) o le Korama a Aposetolo e Toasefululua:

O aoaoga faavae uma na aoaoina atu e le Ekalesia a Iesu Keriso o le Au Paia o Aso e Gata Ai e maua, a le o le otootoina pe faaataata mai, i le Tusi o le Mataupu Faavae ma Feagaiga. E tusa ai ma mea ua ou iloa, e leai se aoaoga faavae ua aoaoina e le Ekalesia, e le o maua i se auala po o se isi ala i lenei tusi. … E leai se tasi o a tatou tusi paia e mafai ona tuuina atu lea lava aia e tasi i se iloiloga atoa o aoaoga faavae uma a le Ekalesia. (John A. Widtsoe, The Message of the Doctrine and Covenants [1969], 117)

O fea e mafai ona ou aoao atili ai e uiga i le Mataupu Faavae ma Feagaiga?

O punaoa nei e mafai ona fesoasoani i tagata aooga ia malamalama atili i mea o loo i le Mataupu Faavae ma Feagaiga:

• Annelise Gardiner,“O le Mataupu Faavae ma Feagaiga: O se Vaaiga Aoao,” Mo le Malosi o le Autalavou, Ian. 2021, 14–15

• Autu ma Fesili, “Mataupu Faavae ma Feagaiga,” topics.ChurchofJesusChrist.org

Gaoioiga Faaopoopo e Aoao Ai

O faaaliga paia na oo mai i taimi na manaomia ai

O le tele o faaaliga i le Mataupu Faavae ma Feagaiga na oo mai i taimi o mafatiaga po o tali i fesili. Ina ia fesoasoani i tagata aooga ia malamalama i lenei mea, valaaulia i latou e faitau le parakalafa 6 o le faatomuaga i le Mataupu Faavae ma Feagaiga, ma vaavaai mo tulaga e masani ona taitai atu ai i nei faaaliga na tuuina mai. E mafai e tagata aooga ona faasoa mai mea na latou aoaoina e uiga i le Alii e faavae i mea sa latou mauaina i lenei parakalafa.

E ono mafaufau foi tagata aooga e uiga i taimi i o latou olaga na latou manaomia ai le taitaiga mai le Tama Faalelagi. Uuna’i i latou e saili Lana taitaiga i o latou taimi o i ai nei ma le lumanai e manaomia ai.

A’oa’oga taua i totonu o le Mataupu Faavae ma Feagaiga

Ina ia fesoasoani i tagata aooga ia maua se vaaiga aoao o autu taua faaleaoaoga faavae o le a latou suesueina i le Mataupu Faavae ma Feagaiga, mafaufau e valaaulia i latou e faitau le parakalafa 8 o le faatomuaga i le Mataupu Faavae ma Feagaiga.

E mafai e tagata aooga ona filifili se tasi o autu o loo lisiina i lenei parakalafa lea latou te mananao e aoao atili i ai. Ina ia maua fuaiupu fesootai i le Mataupu Faavae ma Feagaiga, e mafai ona latou faaaogaina meafaigaluega suesue e pei o le faasino upu i le fusitolu, o le Taiala mo Autu, po o le Taiala i Tusitusiga Paia.

O le Toefuataiga faifai pea o le talalelei a le Faaola

E ui o le Mataupu Faavae ma Feagaiga o loo i ai aoaoga taua mai le Alii o se vaega o le Toefuataiga o Lana talalelei i le lalolagi, e le i mae’a le Toefuataiga i le lolomiga o le Mataupu Faavae ma Feagaiga. O loo faaauau pea ona faaali mai e le Alii upumoni i Ana perofeta ma aposetolo o se vaega o le Toefuataiga faifai pea.

Ina ia fesoasoani i tagata aooga ia malamalama atili i lenei mataupu, mafaufau e faasoa atu le saunoaga lenei a Peresitene Russell M. Nelson:

O le Toefuataiga o se faagasologa, e le o se mea [e faatasi ona] tupu, ma o le a faaauau pea se’ia oo ina toe afio mai le Alii.

… O le Toefuataiga faifai pea e manaomia ai faaaliga faifai pea. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 94)

Mafaufau e valaaulia tagata aooga e faasoa mai nisi o upumoni taua po o aoaoga ua faaalia mai e le Alii i Ana perofeta ma aposetolo i taimi lata mai nei.